BIBLIANKIR Ester libronjja, kuntï Mardoqueojj lurkäna ukajj wali importantënwa. Jupajj Persia markar apat mä judiönwa, palacionwa trabajirakïna, ukajj 500 antes de Cristo maranakanwa pasäna, ‘Asuero reyin urunakapana’ (jichhürunakan waljanejj Jerjes I [primero] reyiw sapjjewa). Reyir jiwayañ amtapkäna ukwa Mardoqueojj jan phoqasiykänti. Reyejj uk luratapat wal yuspäräna, ukatwa Mardoqueorojj taqenin uñjkat jachʼañchatäñapatakejj mä orden churäna. Ukatsti Mardoqueompin mayni judionakampin enemigopäkäna uka Hamán chachan jiwatap qhepatjja, reyejj jilïr serviripatwa Mardoqueor uttʼayäna. Ukham cargonïtapatwa, Persia Imperion jakapkäna uka judionakar jiwañat salvañatakejj mä decreto Mardoqueojj apsüna (Est. 1:1; 2:5, 21-23; 8:1, 2; 9:16).

Historia toqet yaqhep yatjjattʼatanakajja, Ester librojj mä cuentokiwa Mardoqueos janiw utjkänti sasaw sapjjäna. Ukampis 1941 maranjja, kuntï Bibliajj Mardoqueot parlki ukajj cheqätapwa arqueologonakajj uñachtʼayapjjäna. ¿Uk uñachtʼayañatakejj kunsa jikjjatapjjäna?

Persa arut cuneiforme sat mä qellqat jikjjatapjjäna, ukanjja Marduka (aymaranjja Mardoqueo) sat mä chachan sutipaw uñsti. Jupajj Susa markanwa administradorat trabajïna, inas jupajj reyin qollqe apnaqeripächïna. Cuneiforme sat mä qellqat jikjjatapkäna ukhajja, uksa toqenakan historiapat yatjjatiri Arthur Ungnad chachajja, uka qellqatat akham sänwa: “Bibliajj Mardoqueo chachats parlkchejja, cuneiforme sat qellqat mayanakwa Mardoqueo sutejj aytasi” sasa.

Arthur Ungnad chachajj uka arunak siskäna uka qhepatjja, persa arut cuneiforme sat qellqatanakajj walja waranqa waranqanakaw traducisiwayi. Persépolis ukankir tʼalpha qalanakas uka qellqatanak taypinkarakiwa, uka tʼalpha qalanakjja reyin qollqepajj imaskäna uka uta laqayanakanwa jikjjatapjjäna, uka utajj markan murallanakap jakʼankänwa. Uka tʼalpha qalanakajj Jerjes I (primero) reyejj apnaqkäna uka tiemponakatawa. Ukanakajj elamita arun qellqatawa, Ester libron uñstki uka sutinakatsa walja sutinakaw uka qellqatanakan uñstaraki. a

Persépolis ukankir walja tʼalpha qalanakanjja, Marduka sat mä chachatwa parli, jupajj Jerjes I (primero) reyejj apnaqkäna uka tiemponwa Susa markankir palacion secretariot trabajïna. Uka qellqatanakat mayajja, Marduka chachajj traductoränwa sasaw qhanañchi. Ukajja, kuntï Bibliajj Mardoqueo chachat siski ukampejj igualtʼiwa. Mardoqueojj Asuero (Jerjes I) reyin palaciopan mä jilïrit trabajïna, jupajj pä arunak parlañwa yatpachäna, jupajj Susa markan reyin palaciopan punkupan qontʼasirïna (Est. 2:19, 21; 3:3). Uka punkojj wali jachʼa musparkañ lurtʼatänwa, ukanwa palacion jilïrit uttʼayatanakajj trabajipjjerïna.

Tʼalpha qalanakan parlki uka Marduka chachampi Bibliankir Ester libron parlki uka Mardoqueo chachampejj waljanakan igualtʼi. Jupanakajj mä pachpa tiempona ukhamarak mä pachpa lugaran jakapjjäna, palacionwa jilïrit trabajipjjarakïna. Taqe ukanakajja, Marduka chachampi Mardoqueo chachampejj mä pachpa jaqekïpjjatapwa uñachtʼayistu.