1-2. ¿Kuna ‘suma luräwinakampis’ ancianonakajj phoqapjje?

 JUMATÏ mä tiempojj siervo ministerialat sirvjjsta ukhajja, inas ancianot serviñatakejj jilaparte requisitonaka jan ukajj mayitanak phoqjjaraksta. ¿Janit uka “suma luräwi” katoqañ munkasma? (1 Tim. 3:1).

² ¿Kuna lurañanakampis ancianonakajj phoqapjjañapa? Jupanakajj predicañan nayrankapjjewa, jilat kullakanakar pastoreo lurañatakisa yatichañatakis wal chʼamachasipjje. Parlatanakapampi luratanakapampiw congregacionar chʼamañchtʼapjjaraki, ukatwa Bibliajj wali trabajtʼir ancianonakat ‘mä regalor uñtat churat chachanakäpjjewa’ sasin qhanañchpacha (Efes. 4:8).

3. ¿Kunsa mä jilatajj ancianöñatakejj lurañapa? (1 Timoteo 3:1-7; Tito 1:5-9).

³ ¿Ancianöñatakejj kun lurañamas wakisi? Ancianöñatakejj janiw mä kun sum lurtʼañ yatiñajj wakiskapuniti. Jilapartejj mä trabajon katoqayasiñatakejj mä kun sum lurtʼañ yatiñamajj wakisipuniwa. Ukampis ancianot uttʼayatäñ munsta ukhajja, janiw sum predicañaki sum yatichañak wakiskiti. Ancianöñatakejj kuntï 1 Timoteo 3:1-7 ukat Tito 1:5-9 (liytʼäta) textonakajj siski uka requisitonakamp phoqañaw wakisi. Aka yatichäwinjja, ancianot serviñatakejj kunanak lurañas wakisi ukwa kimsa toqet yatjjataskañäni. Maya, kunjamsa mä jilatajj yateqaskañ sarnaqaspa. Paya, kunjamsa familiapar sum pʼeqtʼaspa. Kimsa, kunas congregacionar kusisit serviñatak yanaptʼaspa.

YATEQASKAÑ SARNAQAÑA

4. ¿“Sum sarnaqañapawa” siski ukajj kun sañs muni?

⁴ Maynitejj ancianöñ munchi ukhajja, “sum sarnaqañapawa”.  Mä arun maynitejj sum sarnaqerïchejja, congregacionan yateqaskañ sarnaqerit uñtʼatäñapawa. “Jaqenakas jupjjat sum parlapjjañapawa”. Inas Diosar jan servirinakajj kuntï jilatajj creyki uka toqet jan wal parlapjjchispa, ukampis janipuniw khitis cheqaparjam luririti janicha jan ukajj sum sarnaqerit janicha ukat payachasiñapäkiti (Dan. 6:4, 5). Akham sasaw jisktʼasisma: “Jilat kullakanakasa jan Testigöpki ukanakas ¿sum sarnaqeritti uñtʼapjjetu?” sasa.

5. ¿Kunjamsa ‘kunatejj walïki ukar munasitam’ uñachtʼayasma?

⁵ Jumatï ‘kunatejj walïki ukar munasstajja’, mayninakan suma jaqëpjjatapa, suma chuymanïpjjatapwa uñjäta. Mayninakar yanaptʼatamatsa jan mayipktam uk luratamats kusisitarakiyätawa (1 Tes. 2:8). ¿Kunatsa ancianonakan kunatejj walïki ukar munasipjjañapajj wakisipuni? Kuna laykutejj jilat kullakanakar pastoreo lurañatakisa asignacionanakapamp phoqañatakis walja tiempo apstʼasipjjañapawa (1 Ped. 5:1-3). Ukanak lurañatak wals chʼamachasipkchejja, mayninakar servisajj wali kusisitäpjjewa (Hech. 20:35).

6. ¿Kunjamanakats maynejj katoqtʼasirïtap uñachtʼayaspa? (Hebreos 13:2, 16; foto uñjjattʼarakïta).

⁶ ‘Katoqtʼasir’ mä jilatajja, amigonakap laykusa jan amigopäpki ukanak laykus kunanakatï sumäki ukanakwa luri (1 Ped. 4:9). Mä qellqatarjamajja, katoqtʼasir mä jaqejj uñtʼatanakarus jan uñtʼatanakarus munasiñampiw uñji, utapar invittʼasas kusisitarakiwa. Akham jisktʼasim: “¿Congregacionajar jutapki ukanakar sum katoqtʼirit uñtʼatätti?” sasa (Hebreos 13:2, 16 liytʼäta). Katoqtʼasir mä jilatajj taqeniruw munasiñamp katoqtʼi, jukʼa utjirinïpki ukanakarusa, discurso arstʼir jutir jilatanakarusa, circuito jilatanakarusa, jupanakjam taqe chuyma servirinakarus munasiñampiw katoqtʼaraki (Gén. 18:2-8; Prov. 3:27; Luc. 14:13, 14; Hech. 16:15; Rom. 12:13).

7. ¿Kunjamsa mä ancianojj jan qollqe chuymätap uñachtʼayaspa?

⁷ “Janiw qollqe chuymäñapäkiti”. Ukhamächi ukhajj qollqenïñasa, wali utjirinïñas janiw jupatakejj jukʼamp importantëkaniti. Wali utjirinïsasa jan ukajj pobrësasa, jupatakejj Diosar serviñapuniw jakäwipan nayranki  (Mat. 6:33). Tiempopampisa, chʼamapampisa, kunanakatï jupan utjki ukanakampis Jehová Diosaruw adorañapa, familiaparuw cuidañapa, congregacionaruw yanaptʼañaparaki (Mat. 6:24; 1 Juan 2:15-17). Akham sasin jisktʼasim: “¿Qollqejj nayatak wali importanteti? ¿Kunanakatï jakañatakejj wakiski ukanakampejj kusisitakïtti? ¿Jan ukajj walja qollqenïñataki walja utjirinïñatakit chʼamachastjja?” sasa (1 Tim. 6:6, 17-19).

8. ¿Kunjamanakatsa maynejj ‘jan kunans jiljirïtapa’ ‘munañapamp jan apnaqayasirïtap’ uñachtʼayaspa?

⁸ Maynitï jakäwipan sum amuytʼasis kuns lurirïchi ukhajja, “janiw kunansa jiljañapäkiti”, janirakiw ‘munañapamp apnaqayasiñapäkiti’. Janiw ukakïkiti, janirakiw manqʼañans umañans jiljañapäkiti. Wali amuyumpiw isthaptʼasi kʼachachtʼasiraki, kusistʼañatakis suma amtanakaruw puriraki. Janirakiw akapachankir modampis apayaskiti (Luc. 21:34; Sant. 4:4). Janiw jankʼak coleraskiti, colerayapki ukhas tranquilokiwa. Mä ancianojj ‘janiw machirïñapäkiti’, janirakiw jiljas umirit uñtʼatäñapäkiti. Akham jisktʼasim: “¿Jan kunans jiljirita munañajamp jan apnaqayasirit uñtʼatätti?” sasa.

9. ¿‘Wali amuyump kuns lurirïki’ ukasa ‘taqe kuns sum lurirïki’ ukas kunjamasa?

⁹ Mä ancianojj ‘wali amuyumpiw kuns lurañapa’, ukatakejj Biblian wiñay yatichäwinakaparjamaw kuna asuntonaks amuytʼañapa. Kunjamsa Bibliarjam luraspa uk amuytʼasajja, mä toqet sum amuytʼasajj suma amtanakaruw puriraki, janiw amuyuparjam kuns jankʼak amtkiti. Nayraqatajj kun yatiñapatï wakiski uka toqet sumwa yatjjati (Prov. 18:13). Ukhamatwa kunjamtï Jehová Diosajj amuyki ukarjam suma amtanakar puri. ‘Taqe kuns sum lurirïñaparakiwa’. Ukhamajj sum organiztʼasiri, taqe kuns horasapar luriri ukhamäñapawa. Confiykañ jaqet uñtʼatäñapawa, instruccionanakarjam qhoqerit uñtʼatäñaparakiwa. Taqe ukanakarjam phoqañaw yateqaskañ jaqet uñtʼatäñapatak yanaptʼi. Familiap sum pʼeqtʼañapatakejj Bibliankir kawkïr requisitonakampis qhoqañapa uk jichhajj yatjjatañäni.

FAMILIAR SUM PʼEQTʼAÑA

10. ¿Kunjamsa maynejj ‘familiapar sum pʼeqtʼaspa’?

¹⁰ Mä casado jilatatï ancianöñ munchi ukhajja, familiapajj mayninakatak wali yateqaskayäñapawa. Ukatwa ‘familiaparojj sum pʼeqtʼañapa’. Familiapar munasiñamp uñjirita, familiapatak suma amtanakar puririt uñtʼatäñapawa. Familiapamp Bibliat yatjjatañatakisa, tantachäwinakar sarapjjañapatakisa, predikir sarapjjañapatakis jupaw pʼeqtʼañapa. ¿Kunatsa ukanak lurañajj wali wakiskirejja? Apóstol Pablojj akham sänwa: “Maynitejj familiapar jan sum pʼeqtʼañ yatkchejja, ¿kunjamaraki Diosan congregacionaparojj pʼeqtʼaspasti?” sasa (1 Tim. 3:5).

11, 12. Mä jilatan ancianöñapatakejj ¿kunatsa wawanakapan sum sarnaqapjjañapajj wali wakiskiri? (Fotonak uñjjattʼarakïta).

¹¹ Jilatatï wawanakanïchi ukat jupanakatï 18 maranit minusanïpjjchi ukhajja, uka wawanakapajj “istʼasiri suma sarnaqeri ukhamäpjjañapawa”. Jupanakarojj munasiñampiw yatichañapa. Cheqas wawanakarojj lartʼasiñas anattʼasiñas wal gusti. Ukampis jilatatï wawanakapar sum yatichanejja, jupanakajj istʼasirïpjjaniwa, respetasirïpjjaniwa, sum sarnaqapjjarakini. Jukʼampis Jehová Diosamp sum apasipjjañapataki, Biblian wiñay yatichäwinakaparjam sarnaqapjjañapataki, bautisasiñkam chʼamachasipjjañapatakiw kunayman toqet yanaptʼañapa.

¹² “Wawanakapajj creyentëpjjañapawa, janiw jan wali sarnaqerit uñjatäpjjañapäkiti ni kutkatasirïpjjañapäkisa”. Mä jilatan wawapatï  mä jachʼa juchar purtʼaschi ukhajj ¿tataparojj ancianot uttʼayasispati? Tatapatï wawapar jan cheqañchkchïna, jan yatichkchïna ukhajja, inas ancianot jan uttʼayatäkchispati (La Atalaya del 15 de octubre de 1996, página 21, párrafos 6 y 7 revista liytʼäta).

CONGREGACIONAN YANAPTʼAÑA

13. ¿Kunjamsa maynejj ‘amuytʼirïtapsa’ ‘jan munañaparuk kuns lurañ munirïtaps’ uñachtʼayaspa?

¹³ Suma chuyman jilatanakajj congregacionan wal yanaptʼapjjaspa. ‘Amuytʼir’ jilatajj sumankañ utjañapatakiw chʼamañchi. Jumatï amuytʼir jaqet uñtʼatäñ munstajja, mayninakaruw istʼañama, kunjamas jikjjatasipjje uk amuyañatakiw chʼamachasiñama. Ancianöjjasmas ukham amuytʼañäni: ancianonakan mä tantachäwipan jilaparte ancianonakatï mä amtar puripjjchi, janirak Biblian mä yatichäwipsa jan ukajj mä leyips pʼakintkchi ukhajj ¿uka amtar apoyasmati? Mä ancianojj “janiw munañaparuk kun lurañsa munirïñapäkiti”, mä arunjja janiw kunjamtï munki ukhampun kun lurasiñapsa munañapäkiti. Mayninakajj kunsa amuyapjje uk yatiñajj kunja wakiskirisa uks yatirakiwa (Gén. 13:8, 9; Prov. 15:22). “Janiw chʼajjwirïñapäkiti”, janirakiw “jankʼaki colerasirïñapäkiti”. Ukhamajj mayninakar respetompiw uñjañapa, janirakiw jupanakamp chʼajjwañapäkiti, jan ukasti munasiñampiw mayninakar uñjañapa. Niyakejjay sumankañ thaqer jilatächejja, sinti jan walinakans mayninakamp sumankañatakiw chʼamachasi (Sant. 3:17, 18). Munasiñamp arsut arunakapajja, mayninakan tranquilokïpjjañapatakiw yanaptʼaspa, kunarutï creyktan uka contra saytʼirinakarus tranquilokïpjjañapatakiw yanaptʼarakispa (Juec. 8:1-3; Prov. 20:3; 25:15; Mat. 5:23, 24).

14. ¿Kunatsa mä ancianojj ‘jan machaq creyentëñapäki’, ukat kunjamsa ‘Diosat jan jitheqtirïtap’ uñachtʼayi?

¹⁴ Mä ancianojj “janiw machaq creyentëñapäkiti”. Janis walja maranak bautisatäñapajj wakiskchejja, Jehová Diosamp jukʼamp sum apasiñapatakisa Bibliarjam suma amtanakar  puriñapatakis tiempow munasi. Janïr ancianot uttʼayatäkasajja, Jesusjam humilde chuymanïtapa, kunapachasa ukat kunjamsa Jehová Diosajj servitäñ muni ukarjam serviñatak dispuestokïtapwa uñachtʼayañapa (Mat. 20:23; Filip. 2:5-8). Jehová Diosan markapajj churki uka instruccionanakarjam phoqasaw ‘Jehová Diosat jan jitheqtirïtapsa’ cheqap mandatonakaparjam phoqerïtaps uñachtʼayañapa (1 Tim. 4:15).

15. ¿Mä ancianon discursonak sum arstʼirïñapajj wakisipuniti?

¹⁵ Bibliajja mä ancianojj “yatichañatakis wakichatäñapawa” sasaw qhanañchi. Ukhamajj ¿discursonak sum arstʼirïñapajj wakisipuniti? Janiwa. Cheqas janiw taqe ancianonakajj discursonak sum arstʼirïpkapuniti, ukampis predicapki ukhasa pastoreonak lurapki ukhas Bibliarjamaw sum yatichapjje, chʼamañchtʼapjjaraki (1 Corintios 12:28, 29 ukat Efesios 4:11 liytʼarakïta). Ukhamäkchisa, ancianöñ munki uka jilatajj jukʼamp suma yatichirïñatakejj chʼamachasiskakiñapawa. ¿Kunsa suma yatichirïñatakejj luraspa?

16. ¿Kunanaksa mä jilatajj suma yatichirïñatak luraspa? (Fotonak uñjjattʼarakïta).

¹⁶ “Yatichkasajj Diosan cheqa arunakaparjamaw yatichañapa”. Jilat kullakanakar yatichki ewjjtʼkaraki ukhajja, anciano jilatajj Bibliarjamapuniw jilat kullakanakar yatichañapa ewjjtʼañaparaki. Ukatakejj Bibliatsa qellqatanakasats sum yatjjati (Prov. 15:28; 16:23). Yatjjatkasajj kunjamsa Biblian versiculonakaparjam sarnaqasispa uks sum amuytʼaraki. Yatichki ukhajj istʼirinakan chuymapar purtʼañatakiw chʼamachasi. Jukʼamp suma yatichirïñatakejja, experienciani ancianonakar jisktʼasiñaw yanaptʼaspa, ukat ukarjam lurañaw yanaptʼarakispa (1 Tim. 5:17). Ancianonakajj jilat kullakanakar ‘chʼamañchtʼañatakejj’ wakichtʼatäpjjañaparakiwa, ukampis awisajj ewjjtʼapjjañapawa jan ukajj yaqhepar ‘cheqañchapjjañapawa’. Ukampis munasiñampiw taqe ukanak lurapjjañapa. Jupanakatï munasirïpjjani, Diosan Aruparjam yatichapjjani ukhajj suma yatichirïpjjaniwa, Jachʼa Yatichiri Jesusat yateqasipjjatapwa uñachtʼayapjjarakini (Mat. 11:28-30; 2 Tim. 2:24).

 CHʼAMACHASISKAKIM

17. 1) ¿Kunas siervo ministerialanakar ancianot serviñatak chʼamachasiskakiñatakejj yanaptʼaspa? 2) ¿Kunarjamas ancianonakajj mä jilatar ancianot uttʼayasiniti janicha uk amtapjjaspa? (“ Maynir ancianot uttʼayañatakejj amuytʼirïpjjañamawa” sat recuadro liytʼäta).

¹⁷ Ancianonakajj kuna requisitonakampis phoqapjjañapa uk yatjjatasajja, yaqhep siervo ministerialanakajj janis uka requisitonakamp phoqerjamäpkaspa ukhamwa amuyasipjjaspa. Ukampis janiw Jehová Diosasa ni markapas uka requisitonakamp sumpachpun phoqapjjañap maykiti (1 Ped. 2:21). Jehová Diosan wali chʼamani espíritu santopaw uka requisitonakamp phoqañatak jupanakar yanaptʼaskani (Filip. 2:13). Inas kunan mejorañamajj wakischi. Ukhamächi ukhajj Jehová Diosar orasim, kunan chʼamachasiñamas wakisi uka toqet yatjjatam ukat mä ancianor uka toqet jisktʼasirakim.

18. ¿Kunsa taqe siervo ministerialanakajj lurapjjañapa?

¹⁸ Aka yatichäwin yatjjatawayktan ukanak phoqañatakejj janiw ancianonakakejj chʼamachasipjjañapäkiti, taqeniw chʼamachasiñasa (Filip. 3:16). ¿Jumajj siervo ministerialätati? Ukhamächi ukhajj ancianöñatak chʼamachasiskakim. Jehová Diosar jukʼamp serviñatakisa congregacionar jukʼamp yanaptʼañatakis yatichayasiñamawa (Is. 64:8). Ancianot serviñatak requisitonakamp phoqañatak chʼamachasitamarojj ¡Jehová Diosay wal bendispan!