SAPA semana Bibliat sapak yatjjatañajj ¿jumatak chʼamakiti? Inas uk lurañajj jumatak chʼamakïchi. Ukampis sapüru luräwinakasamp phoqañatakejj tiempow munasi, chʼamachasiñasarakiwa. Ukanakat mayajj jarisiñäspawa. Jareqtʼasisajj ¡sumakiw jikjjatastanjja! Bibliat yatjjatasajj ukhamarakiw ‘Diosan arunakapamp jareqtʼastanjja’ (Efes. 5:26). Kunas ukatak yanaptʼistaspa uk jichhajj amuytʼañäni:

• Mä horario lurtʼasim. Bibliat sapak yatjjatañajj “kunanakatejj jukʼamp importantëki” ukanak taypinkiwa, janiw mä cristianojj uk lurañ jaytañapäkiti (Filip. 1:10). Kunürusa ukat kuna horarus Bibliat yatjjatañama uk jan armasiñatakejj mä papelar qellqtʼasisaw mä qhana cheqar uchasma. Jan ukajj celularamaruw mä alarma uchasisma, ukhamatwa yatjjatañatak mä jukʼa tiempo faltkipan jumar amtayiristam.

• Qhawqtï puedkta ukarjam yatjjatam. ¿Jumatakejj kunas jukʼamp walïspa? ¿Mä hora yatjjataña, jan ukajj mä jukʼa tiempok walja kuti yatjjatañacha? Jumakiw uk sum yatistajja. Ukarjamaw yatjjatañatakejj tiemp apstʼasisma. Yatjjatañ horasäjjani ukhatï yatjjatañatak jan ganasanïksta ukhajj ¿janit tunka minutonakak yatjjatkasma? Jan kun yatjjatañat sipansa, tunka minutonakak yatjjatañajj jukʼamp walïspawa. Inas tunka minutonakak yatjjatasajj jukʼamp yatjjatañ munjjchïta (Filip. 2:13).

• Kunsa yatjjatäta uk janïrjjatwa amtjjañama. Jumatï Bibliat yatjjatañatak qontʼasjjasak kunsa yatjjatäta uk amtaskäta ukhajja, ‘tiempom ina chʼusarukiw aptʼasiskasma’ (Efes. 5:16). Jan ukhamäñapatakejj ¿janit kuna toqenakattï yatjjatañ munkasma uk mä listar qellqtʼaskasma? Kuna jisktʼamas utjani ukhajj qellqtʼasim. Ukat yatjjatkasatï yaqha toqenakampit yatiñ munäta ukhajja, listamaruw qellqtʼasirakisma.

• Wakiskani ukhajj horariom cambiasmawa. Bibliat sapa semana yatjjatañamajj wali importantewa. Ukhamajj wakiskani ukhajj kunürusa, kuna horarusa, qhawqha tiemposa, kuna toqets yatjjatäta uk horarioman mayjtʼayasmawa.

Bibliat sapa semana yatjjatañajj wal yanaptʼätam. Jehová Diosampejj jukʼamp sum apasïta, suma amtanakaruw purïta, chʼamañchtʼasirakïtawa (Jos. 1:8).