Paul: ¡Wali kusisitäpjjayätwa! Noviembre de 1985 maranwa Liberia (África Occidental) markar puripjjayäta, ukanwa nayrïr kuti misionerot servipjjayäta. Sarapkayäta uka avionajj Senegal markaruw mä rat saytʼäna. Esposajajj “janiw mä horas faltkiti, ¡niyaw Liberia markar purjjañäni!” sasaw sitäna. Ukhamaruw “Liberia markar saririnakajj avionat saraqapjjañapawa, golpe de estado utjatapat janiw ukar puriñjamäkaniti” sasin mä yatiyäwejj istʼasïna. Ukatwa Senegal markan misioneronakamp tunka urunak quedasipjjayäta. Ukankkasajj Liberia markan jiwatanakar camionanakat apapjjatapa, toque de queda ukanakar jan istʼirinakar jiwayapjjatapwa istʼapjjayäta.

Anne: Nanakajj wali amuytʼasis kuns lurirïpjjtwa. Nayarojj wawatpachaw “wali ajjsarayasir Anne” sasin sapjjetu. Calle paskatañs ajjsarayasiktwa. Ukampis asignapkitäna ukar puriñatakejj chʼamachasipjjayätwa.

Paul: Esposajampejj Inglaterra markat inti jalanta toqen nasipjjta, utapat 8 kilometronak jayanwa jakayäta. Colegio tukuyasajj jankʼakiw precursoräjjapjjayäta. Sapürunjamaw Diosar serviñ munapjjayäta. Tataj mamajasa esposajan mamapas ukatakiw chʼamañchtʼapjjetäna, yanaptʼapjjarakitäna. 19 maraniruw Betelar invitapjjetäna, esposajajj 1982 maran casarasipkta ukhaw Betelan sirvjjarakïna.

Anne: Betelankañajj wals gustapkchitänjja, kawkjantï jukʼamp predikirinakajj munaskäna ukanwa serviñ munapjjayäta. Nayrajj misioneröpkäna uka jilat kullakanakamp Betelan trabajiñaw ukham serviñ munañatakejj chʼamañchapjjetäna. Ukatwa kimsa maranakajj uka toqet sapa aruma orasipjjayäta. 1985 marajj wali kusiskañapunïnwa, Galaad escuelaruw clase 79 ukar sarañatak invitapjjetäna. Ukat Liberia (África Occidental) markaruw khitapjjetäna.

Paul: Viajiñatak permisonïkäna uka nayrïr avionatwa Liberia markar puripjjayäta. Janiw kunas ukan waltʼkänti, toque de queda ukanakas utjaskakïnwa. Mä auton jachʼat wururtatap istʼasakiw jaqenakajj warartʼasis escapjjapjjerïna. Jan ajjsarayasiñatakejj sapa arumaw Salmo librot liytʼapjjerïta.  Ukan serviñajj wal gustapjjetäna. Esposajajj misioneratwa servïna, nayajj Jhon Charuk a jilatampiw Betelan trabajiyäta. Waljanak jupat yateqayäta, Liberia markan walja tiempo jakatapat kuna jan walinakansa jilat kullakanakajj uñjasipjjäna uk sum yatirakïna.

Anne: Niyakejjay jilat kullakanakajj wali munasiri, jan ajjsaras parltʼasiri, Diosat jan jitheqtiri ukhamäpjjchïnjja, Liberia markan wali kusisitäpjjayätwa. Jupanakampejj wali sum apasipjjayäta, familiajäpkaspas ukhamänwa. Ewjjtʼanakapajj Diosar serviskakiñatakiw yanaptʼapjjetäna, predicañajj sumapunïnwa. Ratuk sarjjañ munapjjerïta ukhas utaninakajj colerasipjjerïnwa. Jaqenakajj taqe cheqanwa Bibliat parlapjjerïna, jupanakampejj parltʼasiñjamakïnwa. Waljaniruw Bibliat yatichapjjayäta, taqenir yatichañatakejj wal chʼamachasipjjañajänwa. Ukampis ¡ukajj kusiskañänwa!

Paul: Pusi maranakajj suman jakasiñas utjchïnjja, 1989 maran wali ajjsarkañ mä guerra civilaw qalltäna. 2 de julio de 1990 maranjja, gobierno conträpkäna ukanakaw Betel muytpach oraqenak katuntasipjjäna. Kimsa phajjsinakaw jistʼantatäpjjayäta, janiw familiaranakampisa sede mundialampis parlasjjapjjayätti. Nuwasiñanaka, manqʼat pistʼañanaka, violacionanakaw utjäna. 14 maranakaw ukham jan waltʼäwinakajj utjäna, markpacharuw jan waltʼayarakïna.

Anne: Yaqhep tribunakajj chʼajjwapjjänwa, jiwarayasipjjarakïnwa. Mayja isinakani wali armantat jaqenakaw callenakan sarnaqapjjäna, taqe edificionakaruw saqueysupjjarakïna. Yaqhepatakejj jaqenakar jiwayañajj wallpanakar jiwayañjamakïkaspas ukhamänwa. Thakinakan controlajj utjkäna uka cheqanakansa Betel jakʼans jiwatanak montonapjjäna. Diosat jan jitheqtir yaqhep Testigonakas jiwayatäpjjarakïnwa, pä munat misioneronakas jiwapjjarakïnwa.

Walja Testigonakaw arknaqatäpkäna jiwayatäpkarakïna uka tribunakankir jaqenakar imantapjjäna, uk lurasajj niyaw vidaps aptʼasipjjarakïna. Yaqhep misioneronakasa betelitanakas ukhamwa lurapjjarakïna. Escapasipkäna uka jilat kullakanakat yaqhepajj nanakamp chikaw altusan jakapjjäna, yaqhepajj aynachanwa ikipjjarakïna. Mä familiaw nanakamp jakapjjäna, jupanakajj paqallqonïpjjänwa.

Paul: Jaqenak imantasipkayätti janicha uk yatiñatakejja, sapüruw chʼajjwirinakajj Betelar mantaniñ munapjjäna. Ukatwa jarkʼaqasiñatakejj ak lurapjjayäta: nanakat paniniw anqa punkur sarapjjeri, paninisti ventanatwa uñchʼukipjjarakiri. Anqar misturinakan amparanakapajj  nayräjjapankaskäna ukhajja, “taqe kunas walikïskiwa” sapjjayätwa, ukampis amparanakap qhepäjjar uchapjjatapajj nuwasirinakan wali coleratätapwa uñachtʼayäna, ukatwa ventanat uñchʼukirinakajj jilat kullakanakar jankʼak imantapjjerïna.

Anne: Walja semananak qhepatjja, wali colerat jaqenakaw Betelar mantanipjjäna. Nayajj mä kullakampiw mä bañon imantasiyäta, ukan mä mueblew utjäna, uka manqhan imantasiñatak mä jiskʼa lugaraw utjarakïna. Ukaruw kullakajj imantasïna. Nuwasirinakajj ametralladoranak aptʼataw bañor arktanipjjetäna. Wali colerataw leqʼentanipjjäna, esposojajj akham sasaw jupanakar ruwtʼäna: “Mä rat suytʼapjjam, esposajaw bañonkaski” sasa. Ukampis uka mueble jan kunak jaytkasajj kunas tojjtapunïnwa, mueblen uchatäkäna ukanak lugarapar uchañkamas tiempojj pasjjarakïnwa. Ukatwa pʼeqet kayukam inak khatatjjayäta. Jan katjayasiñatakejj janiw punk jistʼarañ munkayätti. Chuyma manqhan Jehová Diosar yanaptʼa mayisisajja, punk jistʼarasajj janis kunas paskaspa ukhamwa jupanakar aruntayäta. Jupanakat maynejj nayar mä lador nuktʼasajj cheqak uka mueble jistʼaräna, qʼal thaqsurakïna. Niyakejjay jan kuns katkchïntejja, jupasa grupopas maynïr cuartonak thaqsuriw sarapjjäna, techo manqhanaks thaqsupjjarakïnwa. Ukampis janiw kuns katupkänti.

Paul: Walja phajjsinakaw manqʼat pistʼatäpjjayäta. Ukampis Diosan arunakapaw yanaptʼapjjetäna. Uka tiempon adoración matutinakiw “desayuno” lantejj Betelan utjäna, chʼam katjjatasajj taqeniw Diosar yuspärapjjerïta.

Manqʼamp umampitï jan utj-jjaspäna, Betelat sarjjapjjarakiriskayäta ukhajja, nanakamp imantasirinakarojj jiwayapjjaspänwa. Awisajj necesitapkayäta ukhapuniw Jehová Diosajj kuns musparkañ churapjjetäna. Janiw kuns faltayapkitänti, jan ajjsarañatakis yanaptʼapjjarakitänwa.

Jan walinakajj chʼamakar uñtasitäkchïnsa, kunatï cheqäki ukajj qhantʼaskakïnwa. Jilat kullakanakajj walja kutiw salvasiñatak escapapjjäna, ukampis jan walinakan uñjaskasas Diosar confiyasipkakïnwa, tranquilokïpjjarakïnwa. “Aka guerrajj jachʼa tʼaqesiñ tiempotakiw wakichtʼaskistu” sasaw yaqhepajj sapjjäna. Ancianonakasa wayna jilatanakas kunayman toqetwa mayninakar jan ajjsartʼas yanaptʼapjjäna. Yaqha cheqar sarjjer jilat kullakanakajj mayachtʼatäpjjänwa, monte manqhanwa Salonäkaspas ukham lurtʼasisajj tantachtʼasipjjäna. Uka jan wali tiemponakan tantachäwinakaw jarkʼaqasiñäkaspas ukhamäna, predicañaw jilat kullakanakar aguantañatak yanaptʼarakïna. Yanaptʼanak apapkayäta ukhajj isinak mayiñat sipansa, yaqhepajj predicañatak bolsanaka jan ukajj maletinanakwa mayipjjetäna, ukajj walpun chuym chʼalljjtayapjjetäna. Niyakejjay jaqenakajj guerra utjatapat wali llakita wali sustjatäpjjchïnjja, taqe chuymaw suma yatiyäwinak istʼapjjäna. Testigonakar kusisita, jan llakimp aynachtʼat uñjasajj jaqenakajj  musparapjjänwa. Chʼamakans qhantʼapkaspa ukhamänwa (Mat. 5:14-16). Jilat kullakanakan taqe chuyma predicapjjatapat jan sinttʼasis nuwasirinakas Testigöjjapjjänwa.

Paul: Awisajj Liberia markat sarjjapjjañajänwa, kims kutejj mä qhawqha tiempokiw chhaqasipjjayäta, pay kutejj marpachaw chhaqasipjjarakiyäta. Kunjamas jikjjatasipjjayäta uk mä misionera kullakajj akham sänwa: “Asignacionar chuym uchapjjañajatakiw Galaad escuelajj yatichapjjetäna, ukhamwa lurapjjarakiyäta. Ukatwa jilat kullakanakar ukhaman jaytasajj wal llakisipjjayäta” sasa. Ukampis Liberia markarojj uka jakʼa markanakat yanaptʼasipkakiyätwa, ukajj kusiskañänwa.

Anne: Mayo de 1996 maranjja, pusiniw sucursalan wali importante documentonak aptʼatajj Betelankir mä autot viajipjjayäta. 16 kilometronak viajipjjañajänwa, ukhamat markat maysa lador sarasajj mä seguro lugarar puriñataki. Ukhamaruw sarasipkayäta ukhajj uka lugaran mä jan waltʼäwejj qalltäna. Wali colerat jaqenakaw chʼusaruk disparapjjäna, nanakar saytʼayasajj kimsaniruw saraqayapjjetäna, esposojajj auto manqhankkchïnsa, ukhampachwa auto apasjjapjjäna. Janiw kamachtʼañs puedipkayätti. Ukhamaruw mä akatjamat esposojajj jaqenak taypit uñstanïna, parapat wilaw chʼaqaraniskäna. ‘Disparapjjpachaw’ sasaw amuyapjjayäta, ukampis ‘disparatäspa ukhajj janiw sarnaqkaspati’ sasaw amuyapjjarakiyäta. Mayniw autot jaqsunisajj usuchjatayna, janiw sinti usuchjatäkänti, ukajj wali kusiskañänwa.

Uka jakʼan militaranakan mä camionapaw saytʼatäskäna, ukankir jaqenakajj wali sustjatäpjjänwa, ukaruw nanakajj warkkattapjjayäta. Choferojj mä akatjamatwa uka camión jankʼak sartayäna, niyapuniw willirtapjjayäta. Saytʼañapatakis wal ruwtʼasipkchiyätjja, wali sustjatäsajj janiw istʼapkitänti. Ukhampachas janiw antutasipkayätti. Wali sustukiw puripjjayäta, chʼamamp katuntasipjjatajat ina khatatkirikiw puripjjayäta.

Paul: Isinakajas wali qʼañünwa, chʼiyjatarakïnwa. Jakasipkatajat wal musparapjjayäta. Uka arumajj anqanwa mä helicóptero jakʼan ikipjjayäta, uka helicopterojj qʼala thanthänwa, balanakamp pʼiyanoqatarakïnwa. Qhepürojj uka helicopterotwa Sierra Leonar viajipjjayäta. Jakasipkatajat wals Diosar yuspärapkchiyätjja, jilat kullakanakat wal llakisipjjayäta.

Anne: Freetown (Sierra Leona) markankir Betelaruw puripjjayäta, uka lugarajj segurönwa, sum cuidapjjarakitäna. Ukampis kunatï paskäna ukanakwa amtasiyäta. Urojj wali sustukiyätwa, kunach paskani sasaw piensirïta, kunatï naya jakʼan paskäna ukajj samkakïkaspas ukhamänwa. Arumanakajj sustukiw khatattʼasis sartirïta, kuna jan walich paskani sasaw sustjasirïta, janiw samsuñs puedirïkti. Esposojajj nayar qhomantasaw oración luriri. Diosan markapankir cancionanakwa cantapjjerïta, ukhamatwa jan khatatjjerïkti. Loqheptkiristsa, janis misionerat serviñ puedjjerista ukham amuyasirïta.

Kunatï ukat paskäna uk janipuniw armaskäti. Uka pachpa semanajj pä revistanak katoqapjjayäta. Maynïrejj ¡Despertad! del 8 de junio de 1996 revistänwa, mä yatichäwipajj “Qué hacer ante los ataques de pánico” sänwa, uk liytʼasaw kunas pasaskitäna uk amuyayäta. Maynïristi La Atalaya del 15 de mayo de 1996 revistänwa, mä yatichäwipajj “¿De dónde proviene su fuerza?” sarakïnwa. Uka revistan mä usuchjat mariposaw uñjasïna. Kunjamtï chheqapan usuchjatäkasas manqtʼasiskaki, tuyuskakejja, ukhamarakiw jiwasajj chuyma usuchjatäkasas, Diosan espíritu santopamp yanaptʼatäsajj mayninakar yanaptʼaskaksna sasaw qhanañchäna. Ukajj Jehová Diosan horasapar churat mä yanaptʼapänwa, chʼamañchtʼarakitänwa (Mat. 24:45). Uka toqet jukʼampinak yatjjatayäta, mä carpetaruw imasirakiyäta, ukaw wal yanaptʼitäna. Tiempompejj janiw sint llakisjjayätti.

Paul: Liberia markar kuttʼasajj wal kusisipjjerïta. 2004 mara tukuyarojj niya 20 maranakaw ukankjjapjjayäta. Guerrajj tukusjjänwa. Sucursal askichañwa amtasipkäna, ukhamaruw yaqha asignación katoqapjjta.

 Ukar iyawsañajj wali chʼamänwa. Uka markankir jilat kullakanakar wal munasipjjatajat jupanakar jaytañajj wali chʼamänwa. Galaad escuelar sarañatakejj familianakaj jaytjjapjjayätwa, Jehová Diosan amparapar katuyasisajj walja bendicionanak katoqapjjayäta. Ukatwa uka jakʼankir Ghana markar sarañatakejj iyaw sapjjayäta.

Anne: Liberiat sarjjasajj wal jachapjjayäta. Ukatwa wali yatiñani Frank sat mä jilïr jilatajj “nanakat armasipjjañamawa” sasin sapjjetäna. Ukat akham sarakïnwa: “Cheqas janiw armasipkitätati, ukampis sarasipkta uka asignacionaruw chuym uchapjjañama. Jehová Diosaw ukar asignapjjtamjja, ukhamajj ukankir jilat kullakanakar yanaptʼapjjam” sasa. Uka jilatan arunakapajj jukʼanik uñtʼapkitäna uka jan uñtʼat lugaran amigonakanïñatakiw yanaptʼapjjetäna.

Paul: Mä jukʼa tiempotjja, Ghana markankir jilat kullakanakarojj wal munasjjapjjayäta. Walja Testigonakaw ukan utjäna. Diosat jan jitheqtirïpjjatapasa jupar wal munasipjjatapas wali yateqaskañänwa. Ukampis Ghana markan 13 maranak servisajj yaqha asignación katoqapjjayäta. África Oriental toqenkir Kenia markankir sucursalan serviñatakiw invitapjjetäna. Jaytapkayäta uka jilat kullakanakat wals amtasipkchiyätjja, Kenia markankir jilat kullakanakampejj suma amigöjjapjjarakiyätwa. Jichhakamaw uka markankasipkta, walja yanaptʼaw munasiraki.

Anne: Jakäwijan kunayman jan walinakan uñjasiwayta, ajjsararakiyätwa. Jan wali lugaran jakañasa, jan walinakan uñjasiñas usuntayistaspawa, llakisiyarakistaspawa. Jehová Diosajj janiw mä milagro toqejj ukanakat jarkʼaqkistaniti. Disparonak istʼasajj mayjtʼasikipuntwa, amparajas inakiw tunurjjetu. Ukampis Jehová Diosajj churkistu uka chʼamapar confiyañwa yateqawayta, jilapartejj jilat kullakanakas toqew uka chʼam churistu. Ukampis jiwasatï Bibliat yatjjataskakiñäni, oraskakiñäni, tantachäwinakarus predicacionarus saraskakiñäni ukhajja, Jehová Diosajj asignacionasamp phoqañatakiw yanaptʼistani.

Paul: “¿Asignacionamajj gustapjjtamti?” sasaw yaqhepajj jisktʼapjjetu. Mä markajj sumäkchispasa, mä akatjamatwa mayjtʼaspa, janiw seguröjjarakispati. Ukatwa jilat kullakanakar familiajarjam uñjañajj wal gustapjjetu. Cheqas janiw mä pachpa lugarat jutirïktanti, costumbrenakasas yaq yaqharakiwa, ukampis mä pachpa amuyunikïtanwa. Chʼamañchtʼiris khitapkchitänjja, nanakakiw chʼamañchtʼatäjjapjjayäta.

Mä markat yaqha markar sarjjapjjta ukhajja, jilat kullakanakan familiasäpjjatapwa uñjapjjta, ukajj mä milagrowa. Diosan markapankasajj familianïtanwa, jakasiñatak suma lugaranirakïtanwa. Jiwasatï Jehová Diosar confiyaskakiñänejja, wakiskani ukarjamajj chʼam churapunistaniwa (Filip. 4:13).