Bibliat sapak yatjjatkasajj wali sum yateqañ muntanjja. Sum yatjjatañatakejj akanakaw yanaptʼiristam:

• Mä suma lugar thaqam. Puedsta ukhajj suma ordentʼata, ukat suma qhana lugar thaqam. Mä mesana jan ukajj mä escritorionwa yatjjatasma, jan ukajj anqanwa mä suma lugaran yatjjatasma.

• Sapak yatjjatañatak mä lugar thaqam. Jesusajj “chʼamak chʼamakäskäna ukhaw” ‘mä chʼusa lugarar’ orasir saräna (Mar. 1:35). Janitï mä lugaran sapakïrjamäksta ukhajja, familiamaru jan ukajj khitinakatï jumamp jakapki ukanakaruw kuna horasarus Bibliat yatjjatañ munta uk sasma, jan jumar pantjasiyapjjañapatakiw mayirakisma.

• Yatjjatañar chuym ucham. Bibliat yatjjatañatak mä celularampi jan ukajj mä tabletamp yanaptʼasïta ukhajja, mensajenak jan katoqañatakejj modo avión ukaruw uchasma, ukhamatwa jan kuna pantjasiyirin yatjjatäta. Yatjjatkasatï mä kun lurañs amtasïta ukhajja, qhepat lurañatakiw uk qellqtʼasisma. Janitï yatjjatañar chuym uchirjamäksta ukhajja, mä rat sarnaqtʼasmawa jan ukajj saytʼasisaw muchʼartʼasisma.