1. Bibliat yateqeriru bautisasiñapatak yanaptʼañajj mä suma privilegiowa, ¿kunjamsa 2 Corintios 3:1-3 textojj uk amuyañatak yanaptʼistu? (Nayrïr paginankir foto uñjjattʼäta).

 ¿CONGREGACIONASAN Bibliat mä yateqerejj bautisaski ukhajj kunjamakis jikjjatastanjja? Cheqas wal kusistanjja (Mat. 28:19). Yamas jiwasatï bautisasiñapatak yanaptʼstan ukhajj jukʼampiw kusistanjja (1 Tes. 2:19, 20). Bibliat yateqerin nayrar sartatapasa bautisasitapasa qhawqsa jumasa congregacionasa jupar yanaptʼañataki chʼamachasiwayapjjta ukwa uñachtʼayi, ukatwa jichhak bautisatanakajja, yatichirinakapata ukhamarak congregacionat sum parlir ‘cartanakäpjje’ (2 Corintios 3:1-3 liytʼañataki).

2. 1) ¿Kuna wakiskir jisktʼsa jisktʼasiñasa, kunatsa? 2) ¿Kunas mä estudio biblicojja? (Qhanañchäwip uñjjattʼäta).

² Pasïr pusi maranak nayrajja, sapa phajjsejj 10.000.000 ukha estudionakaw * oraqpachan utjawayi, ukajj wali kusiskañawa. Uka pusi maranakanjja, niya 280.000 jaqenakaw Jehová Diosan Testigopjam sapa mara bautisasiwayapjje. Ukampis walja millón yateqerinakan bautisasipjjañapaw faltaski, ¿kunjamsa jupanakar yanaptʼsna? Jehová Diosajj pacienciampiw jaqenakarojj Jupan Testigopäpjjañapatak suytʼaski.  Tiempojj niyaw tukusiski, ukatwa jupanakar yanaptʼañatak chʼamachasiñasa, ukhamat jankʼak bautisasipjjañapataki (1 Cor. 7:29a; 1 Ped. 4:7).

3. ¿Kuna toqetsa aka yatichäwin yatjjataskañäni?

³ Jichhürunakanjja, jaqenakar Jesusan discipulopar tukuyañajj wali wakiskiriwa. Ukatwa Oraqpachan Jilïr Irpirinakajj sucursalanakar kunjamsa Bibliat yateqerinakarojj bautisasipjjañapatak yanaptʼsna uka toqet jisktʼawayapjje. Aka yatichäwinsa akjjar jutki uka yatichäwinsa, kunsa congregacionanak tumptʼirinakatsa, misioneronakatsa, experienciani precursoranakatsa yateqassna ukwa yatjjataskañäni (Prov. 11:14; 15:22). * Kuntï jupanakajj sapki ukajja, Bibliat yatichirisa Bibliat yateqerisa, kunjamsa mä estudio sumpach apapjjaspa ukwa amuytʼayistani. Aka yatichäwinjja, kunanaksa Bibliat yateqerejj lurañapa ukwa phesqa toqet yatjjataskañäni.

4. Maynirutï uta punkun yatichaskstan ukhajja, ¿kunsa amtañasa?

⁴ Walja jilat kullakanakajja, uta punkunwa maynirojj Bibliat yatichapjje. Bibliat yateqañ munapjjañapataki ukham yatichañajj walikïskiwa, ukampis uta punkunjja janiw jaypach yatichañjamäkiti, janirakiw sapa semanas yatichañjamäkiti. Yaqhep jilat kullakanakajja, yateqerin jukʼamp yatjjatañ munaskakiñapatakejj celular numeropwa mayipjje ukhamat jawstʼasina jan ukajj mä mensaje aptʼayasin Bibliat parltʼaskakiñataki. * Walja phajjsinakaw ukham lurapjje. Ukampis ¿kunsa amtañasa? Uka yateqerejj janitï Bibliat yatjjatañataki jukʼamp tiempo apstʼaskani, janirak chʼamachaskani ukhajja, janiw nayrar sartkaspati ni bautisaskaspasa.

5. Lucas 14:27-33 textorjamajja, ¿kun lurañapatakis Bibliat yateqerir yanaptʼsna?

⁵ Mä kutejja, Jesusajj pä uñachtʼäwimpiw kunsa maynejj discipulopäñ munchi ukhajj lurañapa uk qhanañchäna. Maya, mä uta lurañ muniri mä jaqetwa parläna, uka jaqejja ‘nayraqatajj qontʼasisin qhawqha qollqes munasini ukwa amuytʼañapa, ukhamat tukuyañatakejj alcanzaniti janicha uk yatiñataki’ sasaw säna. Paya, yaqha reyimp guerran nuwasir sarañ muniri mä reyitwa parlarakïna, uka reyejj guerrar janïr sarkasajj ‘nayraqatajj  qontʼasisinwa yaqhanakamp aruskipañapa, ukhamat qhawqha soldadonakampis guerra atipaspa uk yatiñataki’ sasaw sarakïna (Lucas 14:27-33 liytʼañataki). Jesusan discipulopäñ munirinakajja, ukhamarakiw discipulöñatakejj kunsa lurañapa uk sum amuytʼasipjjañapa. Ukatakejja, sapa semana jiwasamp estudiañapatakiw chʼamañchtʼañasa. ¿Kunjamsa uk lursna?

6. Yateqerin nayrar sartañapatakejj ¿kunsa lursna?

⁶ Nayraqatajj uta punkun jaypach parltʼañatakiw chʼamachasiñasa. Sañäni, sapa kuti visittʼkasajja, mä qhawqha textonakatwa jupamp parltʼsna. Sapa kuti jaypach parltʼasiñajj gustjjani ukhajja, ¿janit jukʼamp parltʼaskakiñatakejj qontʼasksna? sasaw utanir jisktʼsna. Kuntï siskistani ukajja, cheqapunit Bibliat yatjjatañ muni janicha uk yatiñatakiw yanaptʼistani. Tiempompisti ¿janit semanan mä pä kuti estudiañ munkasma? sasaw jisktʼaraksna. Jupamp ukham yatjjatsna ukhajja, ratukiw Diosar serviñan nayrar sartaspa. Kunamp lurañas wakisi, uk amuytʼaskakiñäni.

7. Bibliat yatichirejja, ¿kunjamsa sapa kuti Bibliat yatichañatak wakichtʼasiñapa?

⁷ Bibliat yatichirinakajja, sapa kuti Bibliat yatichañatakiw wakichtʼasipjjañasa. Kuna toqetsa yatichañäni ukwa liytʼañasa, textonaksa thaqtañasarakiwa. Kunanakas jukʼamp qhanstañapa ukwa amuytʼañasaraki. Yatjjatkañäni ukan pʼeqeñchäwipatsa, jiskʼa pʼeqeñchäwinakatsa, jisktʼanakatsa, “liytʼañataki” utjki uka textonakatsa pienstʼañasawa. Ukatjja, kawkïr dibujonakasa videonakas yateqerir amuyañapatak yanaptʼaspa ukwa pienstʼañasaraki. Ukatsti, kunjamsa yateqerejj facilak qhan amuyaspa, ukarjamas lurarakispa ukwa amuytʼañasaraki (Neh. 8:8; Prov. 15:28a).

8. Colosenses 1:9, 10 textorjamajja, ¿kunsa lurañasa?

⁸ Wakichaskasajja, Bibliat yateqerejj kunan yanaptʼatäñsa muni uka toqetwa Jehová Diosar mayisiñasa. Biblian yatichäwinakapampi yateqerin chuymaparu purtʼañatakis ukhamarakiw mayisiñasa (Colosenses 1:9, 10 liytʼañataki). Yateqeritak kun amuyañasa jan ukajj iyawsañas chʼamäspa uka toqetwa lupʼiñasa. Yateqerin bautisasiñapatakiw yanaptʼañ muntanjja, uk janiw armañasäkiti.

9. ¿Kunjamatsa Bibliat yateqerirojj wakichtʼasiñapatak yanaptʼsna?

⁹ Bibliat sapa kuti estudiasajja, kuntï Jehová  Diosasa Jesusasa lurawayki uk valoranit uñjañapatakiw yateqerir yanaptʼañ muntanjja, ukhamat jukʼamp yateqañ munañapataki (Mat. 5:3, 6). Sum yateqañatakejja, Bibliat yateqerejj kuntï yateqaski uk sum katoqañapatakiw chʼamachasiñapa. Ukhamasti Bibliat sapa kuti yatjjatañatakejj wakichtʼasiñapawa, ukatakejj kuntï yateqkani ukwa liytʼañapa, kunjamsa uka yatichäwirjam sarnaqaspa ukwa amuytʼañaparaki. Kunjamsa wakichtʼasispa uk yatichañatakejj jupampiw mä yatichäw wakichtʼassna. * Jisktʼan qhanañchäwipajj kawkïrisa uk thaqañapatakiw yanaptʼañasa. Mä qhawqha arunak marktʼasiñajj kunjamsa qhanañchäw amtañatakejj yanaptʼaspa uksa qhanañchañasarakiwa. Ukatsti pachpa arunakapampi arstʼañapatakiw mayiñasaraki. Ukhamatwa kuntï yateqaski uk amuyaskiti janicha uk yatiñäni. Kun lurañas wakisiraki, uk uñjaskakiñäni.

10. 1) ¿Kunatsa yateqerejj sapüru Biblia liyiñapa? 2) ¿Kunsa Biblia liyisin jukʼamp yateqañapatakejj lurañapa?

¹⁰ Bibliat yateqerejj sapa semanas yatichiripamp yateqapkchejja, yaqhanakampwa lurañapa. Jehová Diosampiw parltʼasiñapa. ¿Kunjamsa uk luraspa? Diosaruw oracionan mayisiñapa, ukatjja Biblia sapüru liyisaw istʼañaparaki (Jos. 1:8; Sal. 1:1-3). Ukatakejj “Biblia liytʼañatak programa” apnaqañwa yatichañasa, ukajj Internetan jw.org cheqanwa imprimiñatak utji. * Biblia liyisa jukʼamp yateqañapatakejja, kuntï liyki ukjjat lupʼiñapataki, kunjamsa jakäwipan ukarjam sarnaqaspa uk lupʼiñapatakiw chʼamañchtʼañasa (Hech. 17:11; Sant. 1:25).

11. ¿Kunjamsa yateqerejj orasiñ yateqaspa, kunatsa sapa kuti orasiñapajj wali wakiskirirakejja?

¹¹ Jehová Diosampi sapüru oración toqe parltʼasiñapatakiw yateqerir chʼamañchtʼañasa. Sapa kuti yateqerimpi yatjjatkañäni ukhajja, janïr qalltkasasa tukuyatarusa taqe chuymaw Diosar orasiñasa, yateqerin sutipsa oracionan aytañasarakiwa. Ukhamatwa Diosar taqe chuyma mayisiñsa, Jehová Diosar Jesusan sutipjjar jakʼachasiñsa yateqani (Mat. 6:9; Juan 15:16). Jupatï sapüru Biblia liyisa Diosar istʼani, oración mayisisa Jupamp parltʼasirakini ukhajja, jukʼampiw Jehová Diosar jakʼachasini (Sant. 4:8). Ukanak lurañaw vidap Diosar katuyasiñatakisa  bautisasiñatakisa yanaptʼani. ¿Diosamp parlasiñajj kunatakis yanaptʼarakispa?

12. ¿Kunjamsa Jehová Diosan amigopäñapatak yateqerir yanaptʼsna?

¹² Kuntï yateqerejj yateqki ukjja, janiw pʼeqerukejj katoqañapäkiti, jan ukasti chuymaparuw katoqañaparaki. Ukhamatwa kuntï yateqki ukarjam sarnaqañ amtani. Jesusan qhana yatichäwinakapjja, sumwa jaqenakajj pʼeqer katoqapjjerïna. Ukampis chuymapar katoqapjjatap laykuw Jesusar arkañ amtapjjäna (Luc. 24:15, 27, 32). Yateqerejj Diosan utjatapat janiw pächasiñapäkiti, juparojj Awkiparjama, Diosaparjama, Amigoparjamaw uñjañapa (Sal. 25:4, 5). Yateqerir yatichkañäni ukhajja, Diosajj kunjam chuymanisa ukwa qhanstayañasa (Éx. 34:5, 6; 1 Ped. 5:6, 7). Kuna toqetsay yatichaskchiñänejja, Jehová Diosajj kunjam Diosasa uk qhanstayañasapuniwa. Diosajj kunja munasirisa, kunja suma chuymanisa, kunja khuyaptʼayasirisa uk wali valoranit uñjañapatakiw yanaptʼañasa. Jesusajja, ‘Jehová Diosamar munasiñamawa, ukaw taqet sipans nayrïri jachʼa mandamientojja’ sasaw säna (Mat. 22:37, 38). Yateqerin Jehová Diosar taqe chuyma munasiñapatakiw chʼamachasiñasa.

13. Jehová Diosajj kunjam chuymanisa uk amuyañapatakejja, ¿kunjamsa yateqerir yanaptʼsna?

¹³ Yateqerimpi parlkañäni ukhajja, qhawqsa Jehová Diosar munastan ukwa sañasa. Ukham lurasaw Jehová Diosan amigopäñapataki Diosar munasiñapatak yanaptʼsna (Sal. 73:28). Sañäni, Diosajj munasiri, yatiñani, cheqapar uñjiri, wali chʼamani ukham Diosawa. Ukanakat parliri mä textosa, Bibliat apstʼat mä qellqatan arunakapas chuymar purtʼchistu ukhajja, ¿kunjamsa ukampejj yateqerir yanaptʼsna? ‘Ukham Diosätapatwa alajjpachankir Awkisar munasta’ sasaw yateqerirojj sissna. Kunampsa yateqerejj bautisasiñapatak lurañapa, uk yatjjataskakiñäni.

14. Hebreos 10:24, 25 textorjamajja, ¿kunas yateqerirojj nayrar sartañapatak yanaptʼani?

¹⁴ Yateqerinakajj bautisasipjjaspa uk taqeniw muntanjja. Ukatakejj tantachäwinakar sarapjjañapatakiw chʼamañchtʼañasa. ‘Tantachäwinakar sarapki uka yateqerinakaw ratuk nayrar sartapjje’ sasaw experienciani yatichirinakajj sapjje (Sal. 111:1). Yaqhep jilat kullakanakajja, ‘kunjamtï utan yatjjatktan ukhamarakiw tantachäwinakan Bibliat wal yateqäta’ sasaw sapjje. Hebreos 10:24, 25  (liytʼañataki) texto yateqerimpi liytʼasajja, kunjamsa tantachäwinakar sarañajj yanaptʼani ukwa qhanañchtʼañasa. Ukatjja, ¿Kunjamsa tantachäwinakajj apasi? * sat video uñtayañasaraki. Taqpach tantachäwinakar sarañapatakiw yateqerir yanaptʼañasa.

15. ¿Kunjamsa yateqerirojj tantachäwinakar sarañapatak yanaptʼsna?

¹⁵ Yateqeritï tantachäwinakar janïr sarkchi jan ukajj awisak sarchi ukhajja, ¿kunsa lursna? Jichhak apaski uka tantachäwin kuntï yateqktan ukwa wali kusisita jupar cuenttʼañasa. Ukaw aleq invitañat sipansa jukʼamp yanaptʼani. Tantachäwin yatjjatasiski uka Yatiyañataki revista jan ukajj Tantachäwin yatjjatañataki sat qellqatwa chursna. Kuna toqetsa jutïr tantachäwin yatjjataskañäni ukwa uñjjattʼayaraksna, ukatsti kawkïr yatichäwsa yatjjatañ munaspa ukwa jisktʼaraksna. Kuntï nayrïr tantachäwipan uñjkani istʼkarakini ukajja, yaqha religionanakan tantachäwinakapat sipansa mayjätapwa amuyani (1 Cor. 14:24, 25). Tantachäwinjja, wali yateqaskay jilat kullakanakaruw uñtʼani, jupanakaw bautisasiñapatak yanaptʼapjjani.

16. 1) ¿Mä yateqeriru bautisasiñapatak yanaptʼañ munstan ukhajj kunsa lurañasa? 2) ¿Kunsa akjjar jutki uka yatichäwin yatjjataskañäni?

¹⁶ ¿Kunjamsa mä yateqerirojj bautisasiñapatak yanaptʼsna? Bibliat yatjjatañajj kunja wakiskirisa uk amuyañapatakejja, sapa semana yateqañapataki, sum wakichtʼasiñapatakiw chʼamañchtʼañasa. Jehová Diosampi sapür parltʼasiñapataki, Diosan amigopäñapatakiw yanaptʼañasa. Tantachäwinakar sarañapatakis chʼamañchtʼañasarakiwa. (“ ¿Kunsa Bibliat yateqerinakajj lurapjjañapa?” sat recuadro página 12 ukan uñjjattʼäta). Akjjar jutki uka yatichäwinjja, kunsa mä yatichirejj yateqerin bautisasiñapatak lurarakispa ukwa phesqa toqet yatjjataskañäni.