1. Jaqenakar Jesusan discipulopar tukuyasajja, ¿kunatsa salvasipjjañapatakiw yanaptʼasktan sasajj sissna?

 JAQENAKAR Jesusan discipulopar tukuyasajja salvasipjjañapatakiw yanaptʼasktanjja. ¿Kunatsa ukham sistanjja? Mateo 28:19, 20 texton Jesusajj akham sänwa: ‘Sarapjjam, jaqenakar nayan discipulojar tukuyapjjam, bautisapjjarakim’ sasa. ¿Kunatsa bautisasiñajj wali wakiskirejja? Maynitï salvasiñ munchi ukhajja, bautisasiñapawa. Bautisasiñ munirinakajja, Jesusan jiwatapata jaktatapatwa salvasirista sasaw creyiñapa. Ukatwa apóstol Pedrojj cristianonakar akham säna: “Bautismo taypiw jichhajj Jesucriston jaktatapat salvatäsipktajja” sasa (1 Ped. 3:21). Ukhamajja, maynejj bautisasjje ukhatpachaw wiñay jakañ suyjjaspa.

2. Kuntï 2 Timoteo 4:1, 2 texton siski ukarjamajja, ¿kunjam yatichirïñasasa?

² Jesusan discipulopar tukuyañatakejja, ‘suma yatichirïñaw’ wakisi (2 Timoteo 4:1, 2 liytʼañataki). ¿Kunatsa? Jesusajj “sarapjjam, [...] jaqenakar nayan discipulojar tukuyapjjam, [...] yatichapjjarakim” sasaw säna. Apóstol Pablojj akham sasaw Timoteor sarakïna: “Ukanak phoqañatakejj chʼamachasiskakim, ukhamatwa juma pachpas salvasïta, ukhamaraki khitinakatï jumar istʼapktam ukanakas salvasipjjani” sasa. Ukatwa Pablojj akham sasin ewjjtʼarakpachäna: “Kunjamsa yatichaskta ukanakatjja amuytʼasipunim” sasa (1 Tim. 4:16). Niyakejjay Jesusan discipulopar tukuyañatakejj suma yatichirïñasächejja, jukʼamp sum yatichañatakiw chʼamachasiñasa.

3. ¿Kunanakatsa aka yatichäwin yatjjataskañäni?

 ³ Sapa semanaw Biblian cheqa yatichäwinakapjja, walja millón jaqenakar aka oraqpachan yatichtan. Ukampis kunjamtï pasïr yatichäwin uñjktanjja, kunjamsa jaqenakar bautisasiñapatak yanaptʼsna ukwa yatiñ muntanjja. Aka yatichäwinjja, yateqerinakar bautisasiñ yanaptʼañatakejj kunanaksa lurañasa ukwa phesqa toqet yatjjataskañäni.

4. ¿Kunatsa yatichirejj Bibliat yatichkasajj jan sinti parlañapäki? (Qhanañchäwip uñjjattʼäta).

⁴ Taqeniruw Diosan arunakapat yatichañajj gustistu. Ukatwa uka toqet wal parlañ muntanjja. Yatiyañataki Revistat Yatjjatañataki sat wakichäwejj semana tukuyan apaski uk saraykasasa, jan ukajj Congregacionan Bibliat Yatjjatañataki sat wakichäwejj semanan apaski uk saraykasasa, janiw jilatajj sinti parlañapäkiti. Bibliat yateqeriru yatichkasajj ukhamarakiw jan sinti parlañasäkiti. Antisas Bibliampipuniw yatichañasa. Ukhamajj yatichkasajja janiw sinti parlañasäkiti, janiw mä textotsa jan ukajj kuna yatichäwitsa taqpach qhanañchañajj wakiskapuniti (Juan 16:12). * Jumajj bautisaskayäta ukhajj qhawqhaksa yatiyäta, jichhajj qhawqsa yatjjarakta uka toqetwa amuytʼañama. Ukapachajj mä jukʼakwa Bibliat yatpachayätajja (Heb. 6:1). Niyakejjay kuntï yatkta ukjja walja maranakat yateqstajja, janiw yateqerir jankʼak yateqañap mayiñamäkiti.

5. 1) Kuntï 1 Tesalonicenses 2:13 textojj siski ukarjamajja, ¿kunsa yateqerejj amuyañapa? 2) ¿Kunjamsa yateqerirojj kuntï yateqaski ukanak arsuñapatak yanaptʼsna?

⁵ Yateqerejj kuntï yateqaski ukajj Diosan Arupat jutatap amuyaspa, ukwa muntanjja (1 Tesalonicenses 2:13 liytʼañataki). Ukatakejj ¿kunsa lurañasa? Kuntï yateqki uk arsuñapatakiw chʼamañchtʼañasa. Jiwasaki textonak qhanañchañat sipansa, juparuw mä qhawqha textonak qhanañchañapatak mayiñasa. Biblian yatichäwinakaparjam kunjamsa sarnaqaspa uk jupa pachpa amuytʼasiñapatakiw yanaptʼañasaraki. Kawkïr textonaktï liytʼki ukanakat kunsa amuyi uk yatiñatakejja, yaqha jisktʼanakampiw jisktʼañasa (Luc. 10:25-28). Akham sasaw jisktʼsna: “¿Aka textorjamajj Diosajj kunjam Diosaw sasmasa?”, “¿Kunjamsa aka cheqa yatichäwejj yanaptʼiristam?”, “¿Kuntï yateqkta ukajj kunjamakis jumatakejja?” sasa (Prov. 20:5). Walj yateqañat sipansa, kuntï yateqki ukaruw wali valoranit uñjañapa, ukarjamaw sarnaqañaparaki, ukaw jukʼamp wakiskirejja.

6. ¿Kunatsa Bibliat yatichañatakejj experienciani jilat kullakanakar irpañasa?

 ⁶ Bibliat maynir yatichañatakejja, ¿experienciani jilat kullakanakar irpirïtati? Irpañäni ukhajja, ‘¿walikti yatichasktjja, Bibliamp sumti yatichasktjja?’ sasaw jisktʼañasa. Suma yatichirïñasatakejj humildëñasawa (Hechos 18:24-26 uñjjattʼarakïta). ‘¿Kuntï nayajj yatichaskta uk yateqerejj amuyaskit janicha?’ sasaw jisktʼañasaraki. Jiwasatï mä semana jan ukajj pä semana viajchiñäni ukhajja, juparuw yatichañapatakejj jaytawaysna. Ukhamatwa yateqerejj sapa semana yatjjataskakini, yatjjatañajj kunja wakiskirisa uksa amuyarakini. Jiwasakipunis yatichañasäkaspa ukham janiw amuyañasäkiti. Cheqas taqeniw yateqerin nayrar sartañap muntanjja.

7. ¿Kunjamatsa yateqerejj taqe chuym yateqaspa?

⁷ Biblian yatichäwinakapatjja taqe chuymaw jan pächasis parlañasa, uksti yateqerejj amuyañapawa (1 Tes. 1:5). Ukham parlañäni ukhajja, taqe chuymaw yateqarakispa. Ukatjja, kunjamsa Biblian yatichäwinakapajj yanaptʼawayistu ukwa cuenttʼaraksna. Ukhamatwa jupajj ‘uka yatichäwinakajj nayar yanaptʼarakitaspawa’ sasin saspa.

8. ¿Kunjamsa yateqerirojj yanaptʼaraksna, kunatsa ukham lurañajj wakisi?

⁸ Yateqerejj jan walinakan uñjaschi ukhajja, uka pachpa jan walinakan uñjasisajj kunsa yaqhep jilat kullakanakajj lurawayapjje ukwa yatichkasajj cuenttʼsna. Jan ukajj mä jan waltʼäwir saykatawayki uka jilatampi jan ukajj uka kullakampiw compañtʼayassna. Jan ukajja, “Bibliat yatjjatasaw nayra jakäwinakap jaytawayapjje” sat yatichäwejj Yatiyañataki revistana ukhamarak jw.org cheqan utjki uka experiencianakampiw yaticharaksna. * Uka yatichäwinakasa videonakasa, Biblian yatichäwinakaparjam sarnaqañajj kunjamsa yanaptʼistu ukwa yateqerirojj amuytʼayani.

9. Kuntï yateqaski uk familiaranakaparu amigonakaparu parltʼañapatakejj ¿kunjamsa yateqerirojj chʼamañchtʼsna?

⁹ Yateqeritejj chachanïchi jan ukajj warminïchi, ukampis jupajj Bibliat jan yatjjatkchi ukhajja, jupamppach yatjjatañapatakiw invittʼsna. Ukatjja yateqerirojj kuntï yateqaski uk familiaranakaparu amigonakaparu parltʼañapatakiw chʼamañchtʼaraksna (Juan 1:40-45). ¿Kunjamsa uk lursna? Akham sasaw  jisktʼsna: “¿Kunjamsa familiamarojj aka yatichäw qhanañchtʼasma?” jan ukajj “¿Kuna textompis uka toqet amigomar qhanañchtʼasma?” sasa. Ukham lurasaw yateqerirojj suma yatichirïñapatak yanaptʼañäni. Kunapachatï publicadoräñatak mayitanak phoqjjani ukhajja, congregacionampiw predikir mistjjani. Ukatjja, khitis Bibliat yatjjatañ munarakispa sasaw jisktʼaraksna. Bibliat yatjjatañ munir mä jaqer uñtʼchi ukhajja, jankʼakiw uka jaqemp parltʼañasa, ukhamat Bibliat uka jaqemp yatjjatañasataki. Ukatakejj ¿Kunjamsa Bibliat yatichasi? sat video uñtayaraksna. *

10. Kuntï 1 Tesalonicenses 2:7, 8 siski ukarjamajja, ¿kunjamsa yatichirejj Pablot yateqasitap uñachtʼayaspa?

¹⁰ Yatichirinakajj yateqerinakasat llakisipjjañasawa. Niyas jilat kullakanakasäjjaspa ukhamwa jupanakar uñjañasa (1 Tesalonicenses 2:7, 8 liytʼañataki). Diosar serviñ layku akapachankir amigonakap jaytañasa nayra jakäwip apanukuñasa yateqerinakatakejj chʼamakïspawa. Ukatwa congregacionan amigonakanïpjjañapatak yanaptʼañasa. Janiw Bibliat yatjjatañatakikejj tiempo apstʼasiñasäkiti, jan ukasti yaqha horasan jupanakar visittʼañatakejj tiempo apstʼasiñasarakiwa, ukhamatwa amigopätas uñachtʼayañäni. Ukatjja, celularat jawstʼasa, mä mensaje aptʼayasa, jan ukajj mä rato visittʼasaw jupanakat llakisitas uñachtʼayaraksna.

11. ¿Yateqerinakajj congregacionan kun jikjjatapjjañapsa muntanjja, ukat kunatsa?

¹¹ África toqenjja akham sañwa yatipjje: “Mä wawar uywañatakejj mä markaw munasi” sasa. Jiwasajj niya ukhamarakiw sissna: “Mä jaqer discipulor tukuyañatakejj mä congregacionaw munasi” sasa. Ukatwa suma yatichirinakajja, khitinakatï yateqerir yanaptʼapkaspa ukanakar congregacionan uñtʼayapjje. Ukhamatwa yateqerejj Diosar jukʼamp serviskakiñatakisa jan waltʼäwinakar saykatañatakisa Diosan markapan yanaptʼa katoqaspa. Yateqerejj congregación taypinkjjaspasa Diosan familiap taypinkjjaspasa ukham amuyasiñapwa muntanjja. Jupatï jilat kullakanakar jakʼachasjjani ukhajja, Diosar munasiñ jan yanaptʼapki uka amigonakapar jaytañajj janiw chʼamäkaniti (Prov. 13:20). Akapachankir amigonakapatï jupat jan kuns yatiñ munjjapjjani ukhajja, Jehová Diosan markapan suma amigonakwa jikjjataspa ukwa amuyani (Mar. 10:29, 30; 1 Ped. 4:4).

12. ¿Kunatsa yateqerirojj Diosar vidap katuyasiñapatakisa bautisasiñapatakisa parlañasa?

¹² Diosar vidap katuyasiñapatakisa bautisasiñapatakisa jan ajjsarasaw parlañasa. Cheqas bautisasisin Jehová Diosar servipjjañapatakiw Bibliat yatichtanjja. Yateqeritï walja phajjsinak jan jaytas Bibliat yateqjjchi, tantachäwinakarus sarjjarakchi ukhajja, Jehová Diosan Testigopäñapataki Bibliat yateqaskatapwa amuyañapa.

13. ¿Kunanaksa mä yateqerejj bautisasiñatak lurañapa?

¹³ Mä yateqerejj Bibliat taqe chuyma yateqasajj akanakwa bautisasiñatakejj luri: nayraqatjja, Jehová Diosar uñtʼasajj wal Jupar munasi, taqe chuymaw confiyaraki (Juan 3:16; 17:3). Ukatsti, Diosan amigoparu jilat kullakanakan amigoparuw tukjje (Heb. 10:24, 25; Sant. 4:8). Tiempompejja, jan walinakjja jaytjjewa, juchanakapatsa arrepentisjjarakiwa (Hech. 3:19). Diosar confiyatapaw yaqha jaqenakar cheqa yatichäwinak parlañatak chʼamañcharaki (2 Cor. 4:13). Qheparusti, Diosar vidap katuyasisaw bautisasjjaraki (1 Ped. 3:21; 4:2). Uka urojj taqenitak wali kusiskañawa. Ukhamajja, yateqerimatï ukanak lurañatak chʼamachasiskchi ukhajja, walik ukham lurasktajja sasaw nayrar sartaskakiñapatak chʼamañchtʼañama.

14. ¿Kunjamsa yatichirejj yateqerin nayrar sartaskatap amuyaspa?

¹⁴ Mä yateqerin Diosar vidap katuyasiñapatakisa bautisasiñapatakisa paciencianïñaw munasi. Ukampis Jehová Diosar serviñ cheqapunit muni janich uk yatiñaw wakisiraki. Aka jisktʼanakatwa amuytʼañasa: ¿Jesusan arunakapar istʼañatak chʼamachasiskiti? ¿Jan ukajj Bibliat aleq yatiñatakikich yatjjataski?

15. ¿Kunanakansa yateqerin nayrar sartaskatapajj amuyasispa?

¹⁵ Kunanaksa yateqerejj nayrar sartañatak luraski ukanak sapa kuti amuytʼañasawa. Sañäni, ¿Jehová Diosar munasitapajj amuyasiti? ¿Diosar oracionan jakʼachasiti? (Sal. 116:1, 2). ¿Biblia liyiñajj gustiti? (Sal. 119:97). ¿Tantachäwinakarojj jan faltasisat sari? (Sal. 22:22). ¿Kuntï yateqki ukarjamat sarnaqaski? (Sal. 119:112). ¿Kuntï yateqaski ukanakjja familiaparusa amigonakaparus parliti? (Sal. 9:1). ¿Cheqapunit Jehová Diosan Testigopäñ muni? (Sal. 40:8). Yateqeritï ukanak  jan lurkchi ukhajja, kunatsa jan chʼamachaski ukanak wali amuyumpiw yatjjatañasa, ukatjja munasiñampi qhana arunakampiw jupar parltʼañasaraki. *

16. ¿Kunapachas mä yateqerir jaytjjañajj wakisispa?

¹⁶ Mä yateqerirojj Bibliat yatichaskakiñäniti janicha ukjja sapa kutiw amuytʼañasa. Akham sasaw jisktʼassna: “¿Bibliat yateqañatakejj wakichtʼasiti? ¿Tantachäwinakar sariti? ¿Jan wali lurañanak apanukjjeti? ¿Falso religionatsa jitheqtjjeti?” sasa. Janitï ukanak lurkchi ukhajja, inamayaw chʼamachasisksna, jan umar mantañ muniri jaqerus nadañ yatichañ munksna ukhamäspawa. Yateqeritï kuntï yateqki ukar jan valoranit uñjkchi, janirak ukarjamas sarnaqañ munkchi ukhajja, ¿janit jaytjjañajj wakiskaspa?

17. “Kunjamsa yatichaskta ukanakatjja amuytʼasipunim” sasaw 1 Timoteo 4:16 textojj sistu, ukarjamajj ¿kunsa yatichirinakajj lurañasa?

¹⁷ Jesusajj ‘discipulojar tukuyapjjam’ siskistu uka mandato phoqañajj jiwasatak wali importantewa, yateqerinakarojj bautisasipjjañapatakiw yanaptʼañ muntanjja. Ukatwa Bibliampipuni yatichañasa, jan pächasisaw taqe chuyma yatichañasaraki. Congregacionan amigonakanïñapatakiw chʼamañchañasa, Diosar vidap katuyasisin bautisasiñapatakis parlañasarakiwa. (“ ¿Kunsa Bibliat yatichirinakajj lurapjjañapa?” sat recuadro página 13 ukan uñjjattʼäta). ¡Jaqenakar salvasipjjañapatak yanaptʼañajj wal kusisiyistu! Ukhamajj Bibliat yateqerinakan bautisasipjjañapatak wal chʼamachasipjjañäni.