SAPA marajja, congregacionat jaqsutäpkäna ukanakat waljaniw congregacionar kuttʼanjjapjje. Uka valorani ovejanakajj kuttʼanjjapjje ukhajja, ‘alajjpachan wali kusisiñaw utjpacha’ (Luc. 15:7, 10). Jumatï Diosar kuttʼanjjstajja, janipun ak armamti: Jesusasa, angelanakasa, Jehová Diosasa, kuttʼanjjatamat wal kusisipjje. Ukampis Diosampi wasitat sum apasjjañatak chʼamachaskasajj inas llakita aynachtʼata jikjjataschïta ¿Kunanakas llakisiyiristam, ukat kunas atipjañatak yanaptʼiristam?

Congregacionar kuttʼanjjapjje uka jilat kullakanakat waljaniw aynachtʼata llakita jikjjatasisipkaki. Jumatï ukham jikjjatassta ukhajja, Davidajj kunjamas jikjjatasïna uk amuypachätawa. Diosajj jupar perdonjjchïnsa, “walja pantjasitanakajajj wal llakisiyitu” saskakïnwa (Sal. 40:12; 65:3). Ukhamarakiw Jehová Diosar kuttʼanjje uka jilatasa, jan ukajj uka kullakas jan wali luratapat walja maranak phenqʼasiskakispa ukat juchañchasiskakispa. Isabel * kullakajj 20 jila maranakaw congregacionat jaqsuta uñjasïna, jupajj akham siwa: “Jehová Diosajj perdonjjpachïtuwa sasin amuyañajj wali chʼamänwa” sasa. Jumatï ukanakat llakisisma ukhajja, Jehová Diosamp sum apasitamajj wasitampiw aynachtʼaspa (Prov. 24:10). Jan ukanakamp aynachtʼamti.

Wasitampi Diosamp sum apasjjañatakejj kunanaksa lurañapa ukanakat lupʼisajja, yaqhepajj llakisipjjewa. Diosan markapar kuttʼanjjasajja, Antonio jilatajj akham siwa: “Kunanaktï nayrajj Testigökasajj yateqkayäta, lurkarakiyäta taqe ukanak armasjjatätwa” sasa. Yaqhepajj ukham jikjjatasisaw Diosarojj jan sum sirvjjapjjaspati.

Mä utat amuytʼañäni. Mä jachʼa thayampi sinti jan waltʼayata uñjasispa ukhajja, qhawqha tiempos uk askichañatakejj munasini, askichañajj kunja chʼamänisa ukanakat lupʼisakiw dueñopajj wal llakisjjaspa. Jumampejj ukaw pasarakispa, jachʼa  jucha luratamat Diosamp sum apasitamajj jan waltʼayata uñjasiwaychi ukhajja, ‘Jupampi wasitat sum apasjjañatakejj wal chʼamachasiñajaw wakisini’ sasaw amuyasma. Ukampis yanaptʼajj utjtamwa.

Jehová Diosajj akham sasaw invittʼistu: “Jutapjjam, kuna asuntonaksa jiwaskam askichañäni” sasa (Is. 1:18). Diosamp asuntonak askichañatakejj chʼamachasiwayjjtawa, ukatwa Jupajj wal munastam. Aka toqet amuytʼam: Diosajj jupar kuttʼanjjatamampiw Supayarojj kʼarïtap uñachtʼayaspa (Prov. 27:11).

Jehová Diosar kuttʼanjjasajj Juparuw jakʼachasjjtajja, Jupasti jakʼachasirakïtamwa, Jupaw uk arsuwayi (Sant. 4:8). Cheqas congregacionar kuttʼanjjatam mayninakajj uñjapjjewa, ukajj wali askiwa, ukampis akwa lurañamaraki: Jehová Dios Awkimaru Amigomaru jukʼamp munasiñatakejj chʼamachasiskakiñamawa. ¿Kunjamsa uk lurasma?

Kunanaksa lurañ puedisma ukanak lurañwa amtañama. Kunanaktï Jehová Diosatsa, promesanakapatsa yateqawaykta uk inas jan armaskstati. Ukampis jichhajj wasitampiw chʼamachasiskakiñama, sañäni predikir sarañamapuniwa, tantachäwinakatsa janiw faltasiñamäkiti, jilat kullakanakampïñatakis tiempo apstʼasiñamarakiwa. Kunanak lurañsa amtasma uk mä qhawqha uñjañäni.

Jehová Diosampejj sapa kutiw parltʼasiñama. Jucha luratamat pisayasiskaksta ukhajja, inas Jehová Diosar orasiñ ajjsarayassta, ukampis Jupajj uk amuytamwa (Rom. 8:26). Ukhamäkchisa orasiskakim, ‘amigomäñ wal munta’ sasin Diosar orasim (Rom. 12:12). Andrés jilatajj akham siwa: “Jucha luratajat walpun pisayasiyäta, walirak phenqʼasiyäta. Ukampis Diosar sapa kuti mayisisajj sumakiw jikjjatasjjayäta” sasa. Jumatï kunjamsa mayisisma uk jan yatksta ukhajja, David reyejj juchapat wal arrepentisisajj kunjamsa mayisïna uka toqet lupʼim, ukajj Salmo 51 ukat 65 ukanakanwa jikjjatasi.

Bibliat sapüruw yatjjatañama. Ukaw Jehová Diosar jukʼamp confiyañatakisa Jupar jukʼamp munasiñatakis yanaptʼätam (Sal. 19:7-11). Felipe jilatajj akham siwa: “Bibliat yatjjatañatak tiempo jan apsusitajaw aynachtʼayawayitu, uk jan luratajatwa Dios nayraqatans pantjasiwayta. Janiw wasitampi ukham pantjasiñ munjjti, ukatwa Bibliat jan jaytasa sapaki sum yatjjatañ amtawayta, ukhamat jarkʼaqasiñataki” sasa. Jumajj ukhamarakiw lurasma. Bibliat sapak yatjjatkasajj kuna toqenakatsa yatjjatasma uk jan ajlliñ puedkstajja, Diosar serviñan suma saytʼatäki uka amigomaruw yanaptʼa mayisma.

Wasitampiw jilat kullakanakan amigopäjjañama. Congregacionar wasitamp kuttʼanjjapjje ukanakat yaqhepajja, jilat kullakanakajj janiw sum uñj-jjapjjetaniti sasaw llakisipjje. Luisa kullakajj akham siwa: “Jan wali luratajat walpun phenqʼasiyäta. Jilat kullakanakar jan wal uñjaypachäta, chuym ustʼaypachäta sasaw llakisiyäta. Walja tiempow ukham jikjjatasiyäta” sasa. Congregacionar kuttʼanir jilat kullaka, ancianonakasa mayni jilat kullakanakas Jehová Diosampi wasitat sum apasjjañamatakiw wal yanaptʼañ munapjjtam (“ Kunsa ancianonakajj lurapjjaspa” sat recuadro uñjjattʼäta). Congregacionar kuttʼanjjatamat wal kusisipjje, juman kusisitäñamwa munapjjaraki (Prov. 17:17).

¿Jilat kullakanakar jukʼamp jakʼachasiñatakejj kunsa lurasma? Taqe tantachäwinakaruw sarañama, jilat kullakanakampis predicañamapuniwa. ¿Kunjamsa taqe ukanak lurañajj yanaptʼiristam? Félix jilatajj akham siwa: “Jilat kullakanakajj congregacionar kuttʼanjjañaj wal suyapjjatayna. Wali munataw jikjjatasiyäta. Wasitampi congregación taypinkjjataja, Jehová Diosajj nayar perdonjjatapa, Jupar serviñ puediskakitaj amuyasiñatakejj taqeniw yanaptʼapjjetäna” sasa (“ Kunsa jumajj lurasma” sat recuadro uñjjattʼäta).

Jehová Diosamp wasitat sum apasjjañatak chʼamachasiskäta ukhajja, Supayajj ‘mä jachʼa thayar’ uñtataw jan walinakampejj aynachtʼayañ munaskakïtam (Luc. 4:13). Jumatï ukar atipjañ munsta ukhajja, Diosamp jukʼamp sum apasiñatak chʼamachasiskakim.

Jehová Diosajj ovejanakapat parlkasajja, akham siwa: “Chhaqat ovejanakarojj thaqäwa, saranukutanakarojj kuttʼayanïwa, usuchjatanakarojj vendanakampiw chʼoqtʼarakï, tʼukha ovejanakarusti chʼamañcharakïwa” sasa (Ezeq. 34:16). Diosajj walja servirinakaparuw Jupamp wasitat sum apasjjañapatakejj yanaptʼawayi. Ukhamajja jumarojj sapürutjam Jupampi jukʼamp sum apasjjañamatakejj wal yanaptʼañ munaraktamjja, janipun ukat pächasimti.