Predikirinakajj jukʼat jukʼat jiljjattaskäna ukhajja, Bibliat apstʼat qellqatanakajj jukʼampiw faltjjäna. Brooklyn (Nueva York, Estados Unidos) markankir Betelanjja, revistanakaw lurasïna. Ukampis thuru jan ukajj lankhu tapan libronak lurañatakejja, jilatanakajj empresanakampiw lurayapjjerïna. Walja phajjsinakajja, libronakajj jukʼakiw utj-jjäna, predicacionas jukʼat jukʼat saytʼaskarakïnwa, ukatwa Rutherford jilatajj fabricat encargatäkäna uka Robert Martin jilatarojj libronak lurañ puediraksnati sasin jisktʼäna.

Martin jilatajj akham sasaw säna: “Libronak lurañ qalltañajj janiw creyiñjamäkänti, ukatakejja composición, galvanotipia, impresión ukat encuadernación lurañatakejj maquinanak instalañaw wakisini” sasa. Jilatanakajj mä edificion mä qhawqha pisonakapwa alquilapjjäna, maquinanaks alapjjarakïnwa. Uka edificiojj calle Concord número 18 Brooklyn markankänwa.

Ukanak lurasitapatjja, janiw taqenejj kusisitäpkänti. Libronakas lurkäna uka mä empresan gerentepaw machaq maquinanak uñjir jutäna. Jupajj akham sänwa: “Jumanakajj mä suma imprentanïpjjtawa, ukampis janiw khitis jumanakat uk apnaqañ yatkiti. Akat mä sojjta phajjsirojja, taqe uka maquinanakajj qʼala tukjatäjjaniwa, janirakiw kunatakis sirvjjaniti” sasa.

Martin jilatajj sarakïnwa: “Uka chachan arunakapajj cheqäkaspas ukhamänwa, ukampis janiw Tatitun yanaptʼapat yatkänti. Tatitojj nanakampipunïskänwa” sasa. Martin jilatajj razonaniw parlaskäna. Mä qhawqha tiempotjja, uka machaq maquinanakajj 2.000 libronakwa sapür lurjjäna.

Jehová Diosan servirinakapajj yaqhep libronak imprimipkchïnsa, radio toqew suma yatiyäwinak yatiyapjjarakïna. 26 de febrero de 1922 maranjja, mä domingo jaypʼojj Rutherford jilataw nayrïr kuti radio toqejj arstʼäna. Jupajj Los Ángeles (California,  Estados Unidos) markankir KOG sat radionwa “Jichhürunakan jakapki ukanakatjja millón millón jaqenakaw jan jiwapkaniti” sat discurso arstʼäna.

Mä 25.000 jaqenakaw uka discurso istʼapjjäna. Yaqhepanakajj cartanakwa yuspärañatak apayanipjjäna. Jupanakat maynïrejja, Santa Ana (California) markan jakasiri Willard Ashford chachänwa. Jupajj wali suma discurso arstʼatapatwa Rutherford jilatarojj yuspäräna, akham sarakïnwa: “Janitï radio toqe arstʼkasmänjja, utajan kimsa usutanakampejj janiw discursom istʼañ puedipkiriskayätti, utajj jakʼans arstʼkchismänjja, janiw istʼañ puedipkiriskayätti” sasa.

Jutir semananakanjja, jukʼamp discursonakaw radio toqejj arstʼasirakïna. Mara tukuyatakejj 300.000 ukhaniw Biblian yatiyäwinakap radiot istʼjjapjje sasaw The Watch Tower revistajj yatiyäna.

Niyakejjay jaqenakajj Diosan arunakap radio toqe wali sum istʼasipkchïnjja, Bibliat Yatjjatirinakajj Staten Island markan utjkäna uka oraqepanwa mä radio utjañapatak amtapjjäna. Ukajj Brooklyn markankir Betelat janiw jayankkiti. Jutïr maranakanjja, Bibliat Yatjjatirinakajj WBBR radio toqew Reinon yatiyäwinakap yatiyapjjañapäna.

15 de junio de 1922 maratak mistkäna uka The Watch Tower revistanjja, 5 al 13 de septiembre de 1922 maran mä asambleaw Cedar Point (Ohio) markan apasini sasaw yatiyasïna. Cedar Point markar puripkäna uka Bibliat Yatjjatirinakajj wali kusisitäpjjänwa.

Asamblear jutirinakar katoqtʼañatak arstʼkäna uka discursopanjja, Rutherford jilatajj akham sasaw säna: “Taqe chuymapuniw nayajj Tatitur confiyta [...]. Jupaw aka asamblea bendisini. Juparakiw Diosat jukʼamp yatiyasiñapatakejj yanaptʼani, janipuniw nayrajj ukham yatiyasirïkänti” sasa. Uka asamblean discurso arstʼirinakajja, kutin kutiniw jilat kullakanakarojj predicapjjañapatak chʼamañchtʼapjjäna.

Viernes 8 de septiembre phajjsinjja, niya 8.000 jaqenakaw Rutherford jilatan discursop wal istʼañ munasajj Asamblear mantanipjjäna. Invitacionanakan uñstkäna uka “ADV” letranakajj kamsañsa muni uk jilatan qhanañchtʼañapwa suyasipkäna. Jilat kullakanakan qontʼasiñapkamajja, waljaniw plataforma alayan rollthapit mä jachʼa lona uñchʼukisipkäna. Tulsa (Oklahoma, Estados Unidos)  markatpach viajkäna uka Arthur Claus jilatajja, discurso sum istʼañatakiw mä asiento thaqäna. Niyakejjay uka tiempon microfononakas parlantenakas jan utjchïnjja, discursonak istʼañajj chʼamakïnwa.

Jilat kullakanakajj discurso sum istʼapjjañapatakejja, discursojj arstʼaskani ukhajj janiw khitis tantachäwir mantanjjañapäkiti sasaw Asamblea sarayiri jilatajj yatiyäna. Llätunka chikatani alwa horasarojja, Rutherford jilatajj Jesusan arunakapat qhanañchtʼañwa qalltäna. Ukajj Mateo 4:17 textonkiwa, ukan akham siwa: “Alajjpachankir Reinojj jakʼankjjewa” sasa. Kunjamsa jaqenakajj Reinon yatiyäwinakap istʼapjjani uka toqet parlkasinjja, akham sasaw jilatajj qhanañchtʼäna: “Jesús pachpaw nayajj kuttʼankä uka tiempon cosecha apthapëjja sasin säna, ukhaw Diosat jan jitheqtir cheqpach servirinakaparojj tantachthapiñaparakïna” sasa.

Claus jilatajj uka tantachäwinkarakïnwa, jupajj akham siwa: “Wali atencionampiw discurso istʼasipkayäta” sasa. Ukampis mä akatjamatwa jilatajj jan waltʼjjäna, ukatwa tantachäwit mistjjañapäna. Janis mantayanjjapjjchispänjja, jilatajj mistünwa.

Mä qhawqha minutonakatjja, Claus jilatajj walikëjjänwa. Tantachäwir kuttʼaskayäta ukhajja, amparanakap wali fuerte tʼajjllirasipjjatapwa istʼayäta sasaw jilatajj cuenttʼäna. Uk istʼasajj walpun jilatajj kusisïna, ukatwa uka suma discurso istʼañ tukuyañatakejj techor makatañas wakischinejja, makatäwa sasin jilatajj amuytʼäna. Uka tiempotakejja, jilatajj 23 maranikïskänwa, ukatwa asambleajj apaskäna uka utan mä ladopat techor makatäna. Techon ventananakapajj llawiratänwa, uka ventananakar jakʼachasisajja, discursojj wali sum istʼasitapwa amuyäna.

Ukampis Claus jilatajj janiw sapakïkänti. Yaqhep amigonakapajj jupamp chikaw techo patjjankapjjarakïna. Jupanakat maynïrejj Frank Johnson satänwa, jupajj Claus jilatar akham jisktʼañatakiw tʼijüna: “¿Afiltʼat mä navajamajj utjtamti?” sasa.

 Arthur jilatajj, “jïsa” sasaw sarakïna.

Frank jilatajj sarakïnwa: “Waljjay jumar jikjjatapjjsmajja, navajani mä jilatar jikjjatañatakiw orasisipkayäta. ¿Rollthapit uka jachʼa lona uñjtati? Ukajj mä letreruwa, aka clavonakamp kattʼayatawa. Juezarojj wali atencionampiw istʼäta. a Kuna horasatejj ‘yatiyapjjam, yatiyapjjam...’ siskani ukhajja, aka pusi pitanakwa khuchjäta” sasa.

Claus jilatajja, navaj kattʼataw Rutherford jilatan “yatiyapjjam, yatiyapjjam...” sañap suyaskäna. Mä jukʼampjjarojja, Rutherford jilatajj niyaw discursop tuktʼayañampïskäna. Jilatajj wali kusisita, niya arnaqasirpachaw akham säna: “Tatitutakejj jan jitheqtiri cheqpach testigöpjjam. Babilonian qʼala tʼunjatäñapkamajj nayrar sarantasipkakim. Diosan arunakap jaya cheqanakana, taqe cheqanakan yatiyapjjam. Diosajj Jehová sutinïtapsa, Jesucristojj reyinakans Reyïtapsa, tatitunakans Tatitupätaps taqeniw yatipjjañapa. Aka urojj wali importante uruwa. ¡Uñjapjjam, Reyejj apnaqjjewa! Jumanakaw yatiyirinakapäpjjtajja, ukhamajj Reyitsa Reinopatsa yatiyapjjam, yatiyapjjam, yatiyapjjam” sasa.

Nayampi mayni jilatanakampejj pitanakwa khuchjapjjayäta, ukat rollthapitäkäna uka lonajj kʼachitatwa janaqtanïna. Uka letrerojj akham sänwa: “Reyitsa Reinopatsa yatiyapjjam” sasa. “ADV” letranakajja, inglés arun advertise siski uka arun nayrïri kimsa letranakapänwa, uka arojj “yatiyapjjam” sasaw tradusispa.

Cedar Point markan apaskäna uka asambleajja, Reinot taqe chuyma yatiyapjjañapatakiw jilat kullakanakar yanaptʼäna. Khitinakatï yanaptʼañatakejj dispuestokïpjjäna ukanakajja, wali kusisitaw yanaptʼapjjäna. Oklahoma markankiri colportorat serviri (jichhajj precursor satäjjewa) mä jilatajja, akham sasaw qellqäna: “Carbón minanakajj utjki uka toqenwa predicapjjta, ukanjja waljaniw pobrëpjje” sasa. The Golden Age revistan yatiyäwinakap katoqtʼasisajja, jaqenakajj jachaqtʼasipjjeriwa sasaw jilatajj qhanañcharakïna. Jilatajj akham sarakïnwa: “Uka jaqenakar chuymachtʼasajj wali kusisitäpjjtwa” sasa.

Lucas 10:2 textonjja, Jesusajj akham sänwa: “Cosecha apthapiñajj waljawa, ukampis trabajirinakajj jukʼanikiwa” sasa. Bibliat Yatjjatirinakajja, Jesusan uka arunakap jankʼakiw phoqañasa sasaw amuyapjjäna. Uka pachpa mara tukuyatakejja, Reinon yatiyäwinakap jaya cheqanakana, taqe cheqanakan yatiyañatakiw chʼamachasipjjäna.