1. ¿Kuna suytʼäwsa Jehová Diosajj churistu?

 JEHOVÁ DIOSAJJ wiñay jakañasatakiw mä suma suytʼäwi churistu. Yaqhep servirinakapajja, alajjpachan jan tukusir cuerponi jakañwa suytʼasipki (1 Cor. 15:50, 53). Ukampis jilaparte servirinakapatjja, aka oraqen wiñayatak jakasiñwa suytʼasipki, ukanwa jupanakajj kusisita kʼumara jakasipjjani (Apoc. 21:3, 4). Alajjpachan wiñayatak jakasiñsa jan ukajj aka oraqen wiñayatak jakasiñsa suytʼaskstanjja, taqeniw uka suytʼäwirojj wali valoranit uñjtanjja.

2. ¿Jutir urunak suytʼañatakejj kunas yanaptʼistu, ukat kunatsa ukham sistanjja?

² Bibliajj suytʼäwit parlki ukhajja, kunanaktï jutïritak suytʼasktan ukanakajj cheqapuniw phoqasini sasin confiyañatwa parlarakispa. Niyakejjay suytʼäwisajj Jehová Diosat jutchejja, phoqasipuniniwa sasaw confiytanjja (Rom. 15:13). Diosan promesanakap yatjjtanwa, promesanakap phoqerïtapsa yatiraktanwa (Núm. 23:19). Taqe kunanaktï Jehová Diosajj luräw siski ukanakjja, wal jupajj lurañ muni, lurarakispawa, janiw ukat payachasktanti. Janiw amuyusarjamakisa ni munañasarjamakis suyktanti, jan ukasti pruebanak utjatapata ukhamarak kunatï cheqäki uk yatitasatwa suytʼasktanjja.

3. ¿Kunanaksa aka yatichäwin yatjjataskañäni? (Salmo 27:14).

³ Alajjpachankir Awkisajj wal munasistu, jupar confiyañaswa munaraki (Salmo 27:14 liytʼäta). Jiwasatï Jehová Diosar taqe chuyma suytʼañänejja, yantʼanak aguantañäniwa, jan ajjsarasa kusisita ukhamaw jutir urunak suytʼarakiñäni. Aka yatichäwinjja, kunjamsa suytʼäwejj jarkʼaqestu ukwa yatjjataskañäni. Nayraqatjja, kunatsa suytʼäwejj mä anclampiru mä cascompir uñtasitawa sasin sistan ukwa yatjjataskañäni. Ukatjja kunanakas taqe chuyma suytʼañatakejj yanaptʼistaspa ukanakwa yatjjataskarakiñäni.

4. ¿Kunatsa suytʼäwejj mä anclar uñtasitajja? (Hebreos 6:19).

⁴ Hebreonakar qellqkäna uka cartapanjja, suytʼäwisajj mä anclar uñtasitawa sasaw apóstol Pablojj säna (Hebreos 6:19 liytʼäta). Niyakejjay jupajj lamar qotnam sapa kut viajirïchïnjja, kunjamsa mä anclajj thayamp jan apatäñapatakejj barcor katjjäsi uk sumwa yatïna. Mä kutejja, barcot viajiskäna ukhaw thayampi jallumpejj wal sartanïna. Barcon qarqanakjjar jan jaltʼañapatakejj kunjamsa marineronakajj lamar qotar anclanak jaqontapjjäna ukwa uñjäna (Hech. 27:29, 39-41). Jallumpir thayampir uñtat jan waltʼäwinakan uñjasktan ukhajja, kunjamtï mä anclajj barcor katjjäskejj ukhamarakiw suytʼäwisajj Diosat jan jitheqtañasatak yanaptʼistu. Taqe kunas sumakëjjaniwa sasin taqe chuyma suytʼañajja, kunayman jan waltʼäwinakar saykatañatakiw yanaptʼistu. Ak amtapjjañäni, jumanakarojj arknaqapjjätamwa sasaw Jesusajj säna (Juan 15:20). Ukhamajj kuna bendicionanaktï Diosajj churkistani ukanakat lupʼiñajja, jupar serviskakiñatakiw yanaptʼistani.

5. Jiwayatas uñjasiñapäkchïnjja, ¿kunjamsa suytʼäwinïñajj Jesusar yanaptʼäna?

⁵ Jesusajj jan sinttʼasis jiwayatäñap yatkchïnsa, kunjamsa suytʼäwiñïñajj Diosat jan jitheqtañatak yanaptʼäna ukwa yatjjatañäni. 33 maran Pentecostés urunjja, apóstol Pedrojj Salmos libron mä profeciapwa aytäna, uka profecianjja kunjamsa Jesusajj wali paciencianïtapsa, Diosar confiyatapsa uñachtʼayañapäna ukwa wali sum qhanañchi, ukan akham siwa: “Nayajj Diosar suytʼasaw jakarakëjja, janiw nayarojj Sepulturar jaytkitätati, khititï jumat jan jitheqtki ukan cuerpopan ñusantañapsa janirakiw munkätati. […] Nayraqatamansa wali kusisiñampiw phoqtʼayarakitäta” sasa (Hech. 2:25-28; Sal. 16:8-11). Jesusajj jiwañap yatkchïnsa, Diosaw jaktayitani, Awkijan ukaruw wali kusisit kuttʼjjäjja sasaw taqe chuym suytʼarakïna (Heb. 12:2, 3).

6. ¿Suytʼäwit kamsänsa mä jilatajja?

⁶ Walja jilat kullakanakajja, Diosar suytʼapjjatapatwa kunayman yantʼanak aguantawayapjje. Inglaterra markan jakkäna uka Leonard Chinn jilatat parltʼañäni, jupajj Diosat jan jitheqtir mä jilatawa. Primera Guerra Mundialanjja, ejercitor jan sarañ munatapatwa carcelar llawintapjjäna. Juparojj pä phajjsinakaw jan khitimpis parlayapkänti, chʼama tukuñ trabajonakwa lurayapjjarakïna. Tiempompejja akham sasaw qellqäna: “Ukhaman uñjasisajja, aguantañatakejj kunja wakiskiris Diosar suytʼañajja ukwa yateqawayta. Jesusana, apostolonakana, profetanakan sarnaqäwinakapasa, Biblian wali valorani promesanakapasa, jutir urunak suytʼañasatakiw yanaptʼistu, aguantañatakis chʼam churarakistu” sasa. Jupatakejj Diosar suytʼañajj mä anclar uñtasitänwa, jiwasatakejj ukhamarakïspawa.

7. ¿Kunjamsa yantʼanakan uñjasiñajj Diosar jukʼamp suytʼañatak yanaptʼistu? (Romanos 5:3-5; Santiago 1:12).

⁷ Yantʼanak aguantañasa, Jehová Diosan yanaptʼap uñjañasa, nayraqatapan suma jaqet uñjatäñasa, jupar taqe chuyma suytʼañatakiw yanaptʼistu (Romanos 5:3-5; Santiago 1:12 liytʼäta). Ukhamatwa Bibliat yateqañ qalltkayätan ukhat sipans jichhajj Diosar jukʼamp suytʼjjtanjja. Supayajj jan waltʼäwinakamp aynachtʼañaswa muni, ukampis Diosan yanaptʼapampejj taqe ukanakar saykatsnawa.

8. ¿Kunatsa suytʼäwisajj mä cascor uñtasitajja? (1 Tesalonicenses 5:8).

⁸ Biblianjja suytʼäwisajj mä cascor uñtasitawa sasaw qhanañchi (1 Tesalonicenses 5:8 liytʼäta). Mä soldadojja, enemigopamp pʼeqet jan usuchjayasiñatakiw mä casco uchasi.  Jiwasajj Supayampiw nuwasisktanjja, Supayajj kunayman jan walinakampiw jan waltʼayañ munistu, ukanakatwa amuyus jarkʼaqasiñasa. Amuyus jan waltʼayañatakejja, Supayajj kunayman tentacionanakampi, kunayman amuyunakampiw yantʼistu. Kunjamtï cascojj soldadon pʼeqep jarkʼaqkejja, ukhamarakiw suytʼäwisajj amuyus jarkʼaqestu, ukhamat Jehová Diosar jan jitheqtas serviskakiñasataki.

9. ¿Jan suytʼäwinïpki ukanakajj kunjamans uñjasipjje?

⁹ Wiñay jakañ suytʼañajja, suma amtanakar puriñatakiw yanaptʼistani. Ukampis jiwasatï kunanaktï munktan ukanakak piensaskañäni ukhajja, janiw taqe chuym Diosar suytʼjjsnati. Kunas Corintonkir cristianonakar pasäna uk amuytʼañäni. Jupanakajj jiwatat jaktañarojj janiw confiyjjapjjänti, ukajj Diosan wali importante promesapänwa (1 Cor. 15:12). Jiwatat jaktañar jan creyirinakajj jichhürutakwa llakisipjje sasaw apóstol Pablojj säna (1 Cor. 15:32). Jichhürunakanjja, waljaniw Diosan promesanakapar jan confiyapkiti, ukatwa jichhürutak llakisipjje, kusistʼañanakampis apayasipjje. Ukampis jiwasajj kuntï Diosajj jutïritak arsuwayki ukaruw confiytanjja. Diosar suytʼatasajja, mä cascor uñtataw amuyus jarkʼaqestu, kunanaktï jiwasatak wal munktan ukanakamp jan apayasiñatakiw yanaptʼistu, ukanakajj Diosamp sum apasitaswa aptʼasiyistaspa (1 Cor. 15:33, 34).

10. ¿Kunjamsa suytʼäwisajj kʼari amuyunakamp jan apayasiñatakejj yanaptʼistu?

¹⁰ Mä cascor uñtasitäki uka suytʼäwisajja, Jehová Diosar kusisiyañatak chʼamachasiñajj inamayakiwa sasin amuyañatwa jarkʼaqestu. Inas maynejj akham sasin amuychispa: “Nayajj janipuniw wiñay jakañ katoqkäti. Janiw suma jaqëkti. Kuntï Diosajj servirinakapar mayki ukanak janipuniw phoqañ puedkäti” sasa. Elifaz chachat amtañäni, jupajj Job chachan falso amigonakapat maynïrïnwa. Jupajj akham sänwa: “¿Kunjamarak mä jaqejj qʼomäspasti?” sasa. Ukatsti sarakïnwa: “Diosajj janiw angelanakapar confiykiti, alajjpachanakas janiw nayranakapatakejj qʼomäkiti” sasa (Job 15:14, 15). ¡Ukajj kʼarïnwa! Amtapjjapuniñäni, Supayaw ukham amuyañas muni. Jiwasatï ukham sapa kuti piensaskañäni ukhajja, janiw Diosar taqe chuyma suytʼjjsnati, uk Supayajj yatirakiwa. Ukhamajj Supayan uka kʼari amuyunakapampejj jan apayasipjjañäniti, antisas Jehová Diosan promesanakapat piensapjjañäni. Taqe servirinakapajj wiñayatak jakassna ukwa jupajj muni, wiñay jakañ katoqañasatakis yanaptʼarakistaniwa, janipun ukat payachasipjjañäniti (1 Tim. 2:3, 4).

11. ¿Kunanaktï suytʼasktan ukanakan phoqasiñapkamajj kunatsa pacienciampi suytʼañasa?

¹¹ Diosar taqe chuyma suytʼañajj janiw faciläkapuniti. Awisajja, Diosan promesanakap phoqasiñap suykasajj janiw pacienciamp suytʼjjsnati. Ukampis Jehová Diosajj wiñay Diosawa, janirakiw tiempjja jiwasjam uñjkiti (2 Ped. 3:8, 9). Amtanakapjja wakisitarjamaw sum phoqani, ukampis inas jiwasajj suyktan uka horasar jan phoqkchiniti. Kunürutï Diosajj promesanakap phoqkani uka urun puriniñapkamajja, ¿kunas taqe chuyma suytʼaskakiñatakisa, pacienciampi suytʼaskakiñatakis yanaptʼistani? (Sant. 5:7, 8).

12. Hebreos 11:1, 6 textorjamajja, ¿kunatsa suytʼaskakiñatakejj Diosar confiyañajj wakisi?

¹² Jiwasatï Jehová Diosan jakʼapankañäni ukhajja, taqe chuymaw jupar suytʼarakiñäni. Kuntï suytʼasktan uk jupaw phoqasiyani. Bibliarjamajja, Diosar taqe chuyma suytʼañatakejj jupan utjataparusa, “jupar taqe chuyma thaqerinakar pago churirïta[parusa]” confiyañasawa (Hebreos 11:1, 6 liytʼäta). Jiwasatï Jehová Diosan utjatapar cheqpachapun  confiyañänejja, jupajj taqpach promesanakapwa phoqani sasaw confiyarakiñäni. Diosamp jukʼamp sum apasiñatakejj kunsa lursna ukwa jichhajj yatjjatañäni, ukaw Diosar taqe chuyma suytʼaskakiñatakejj yanaptʼistani.

13. ¿Kunjamatsa Diosan amigopäsna?

¹³ Jehová Diosar orasipjjañäni, Arupsa liyipjjarakiñäni. Janis Jehová Diosar uñjkstanjja jupan amigopäsnawa. Jupar orasktan ukhajja, istʼitaniwa sasin confiyasaw jupamp parltʼastanjja (Jer. 29:11, 12). Arupat liytʼasin lupʼiraktan ukhaw kuntï jupajj siskistu uk istʼaraktanjja. Kunjamsa Jehová Diosajj jupat jan jitheqtiri nayra servirinakaparojj cuidäna uk liytʼasajja, urut urutjamaw juparojj taqe chuym suytʼaraktanjja. Taqe kunatï Diosan Arupan qellqatäki ukanakajja, “jiwasar yatichañatakiw qellqasiwayi, ukhamat kuntï Diosajj jutïrin churkistani uk suytʼañasataki. Uka Qellqatanakaw aguantañasatak yanaptʼistu, chuymachtʼarakistu” (Rom. 15:4).

14. ¿Kunanaktï Diosajj yaqhanak layku lurawayi ukanakat amuykiptʼañajj kunatsa wakisipuni?

¹⁴ Kunjamsa Jehová Diosajj promesanakap phoqawayi uk amuykiptʼañäni. Kunsa Abrahán ukat Sara chacha warmi laykojj luräna uk amuytʼañäni. Jilïrëjjapjjatap laykojja, jupanakajj janiw wawanïñ puedipkänti, ukampis Diosajj wawanïpjjätawa sasaw mä promesan arsüna (Gén. 18:10). ¿Kunsa Abrahanajj luräna? Bibliajj akham siwa: “Walja markanakan awkipäyäwa sasaw Abrahanajj Diosar confiyäna” sasa (Rom. 4:18). Mä jaqetakejj janiw kuna suytʼäwis utjkaspänti, ukampis Abrahanajja Diosajj promesap phoqapuniniwa sasaw confiyäna. Kuntï Diosat jan jitheqtir uka servirejj suykäna ukajj phoqasïnwa (Rom. 4:19-21). Bibliankir ukham sarnaqäwinakajja, Jehová Diosajj arupar phoqapuniniwa sasin confiyañasatakiw yatichistu, jiwasatakejj janis phoqasirjamäkchi ukhasa.

15. Kunanaktï Diosajj jiwas layku lurawayki ukanakat amuykiptʼañajj ¿kunatsa wakisipuni?

 ¹⁵ Kunanaksa Jehová Diosajj jiwas layku lurawayi ukanak amuykiptʼañäni. ¿Diosan Arupan utjki uka yaqhep promesanakan phoqasitapajj kunjamsa jumar yanaptʼtam uk amuykiptʼirïtati? Kunanakatï jakañatak wakiski ukanakjja, Awkijaw churapjjätam sasaw Jesusajj säna (Mat. 6:32, 33). Jumanakatï espíritu santo mayipjjätajja, Jehová Diosajj churapjjätamwa sasaw sarakïna (Luc. 11:13). Jehová Diosajj uka promesanakap phoqewa. Kunjamsa Jehová Diosajj jiwasar yanaptʼañatakejj yaqha promesanakap phoqawayi uk amtarakpachätawa, jupajj jiwasar perdonaña, chuymachtʼaña, kunanakatï jakʼapankañatak wakiski ukanak churañwa arsuwayäna (Mat. 6:14; 24:45; 2 Cor. 1:3). Kunanaktï jiwas layku lurawayki ukanakat lupʼiñajja, kuntï jutïrin lurkani uk taqe chuyma suytʼañatakiw yanaptʼistani.

16. ¿Kunatsa suytʼäwejj mä suma regalojja?

¹⁶ Wiñay jakañ suytʼañajja, Diosan mä suma regalopawa. Uka suma tiempon puriniñap walpun suyasktanjja, janirakiw uka urun puriniñapat payachasktanti. Suytʼäwisajj mä anclar uñtasitawa, ukaw yantʼanakan uñjasktan ukhasa, arknaqat uñjasktan ukhas aguantañatak yanaptʼistu, ukarakiw jiwañar jan ajjsarañatakis yanaptʼistu. Suytʼäwisajj mä cascor uñtasitarakiwa, ukaw amuyus jarkʼaqestu, jan walinakat jitheqtañatakisa, kunatï walïki ukat katuntasiñatakis yanaptʼistu. Bibliajj churkistu uka suytʼäwejja, Diosar jukʼamp jakʼachasiñatakiw yanaptʼistu, qhawqsa Diosajj munasistu ukwa uñachtʼayarakistu. Cheqas Diosar taqe chuyma suytʼañajj wal yanaptʼistu.

17. ¿Kunatsa suytʼäwisajj kusisiyistu?

¹⁷ Romankir cristianonakar qellqkäna uka cartapanjja, Pablojj akham sänwa: “Kuntï jutïrin katoqapkäta ukat wal kusisipjjam” sasa (Rom. 12:12). Pablorojj akaw wal kusisiyäna: jupatï Jehová Diosar jan jitheqtas serviskakispänjja, alajjpachan wiñay jakañwa katoqaspäna, janiw jupajj ukat payachaskänti. Jiwasajj ukhamarakiw suytʼäwisat kusissna, kuna laykutejj Diosajj promesanakap phoqapuniniw sasaw confiytanjja. Salmo qellqerejj akham sänwa: “Jehová Diosapar suytʼir jaqejj kusisitawa. […] Jupajj jan apanukusir Diosapuniwa” sasa (Sal. 146:5, 6).