1, 2. 1) ¿Kunsa yaqhep gobiernonakajj Jehová Diosan servirinakap contrajj lurapjje, ukat kunsa jilat kullakanakajj lurapjje? 2) ¿Kunatsa arknaqatpachas kusisitakïsksna? (Nayrïr paginankir fotonakat qhanañchtʼarakim).

 JICHHÜRUNAKANJJA, predicañajj 30 jila markanakan jarkʼatäskiwa. Uka markanakat yaqhep lugaranakanjja, autoridadanakajj carcelaruw jilat kullakanakasarojj llawintapjje. ¿Kunatsa carcelar llawintapjje? Jehová Diosatakejj janiw kuna jan walsa jupanakajj lurapkiti. Jupanakajj Biblia liyipjje, Bibliat yatjjatapjje, kunanakarutï creyipki ukanak yaqhanakaruw parlapjje, jilat kullakanakapampiw tantachasipjjaraki, janiw politicarus mitisipkiti. Sinti jan waltʼayatas uñjasipkchejja, Diosat jan jitheqtir uka servirinakajj taqpach chuymampiw Diosar servipjje, b Jehová Diosar taqe chuym adorapjjatapsa uñachtʼayapjjarakiwa, ukatwa wal kusisipjje.

² ¿Ukham jan ajjsariri yaqhep Testigonakan fotonakap uñjirïtati? Jupanakajj kunja kusisitäpjjesa uk uñjarakpachätawa. Ukham taqpach chuymamp servisipkakitapatjja, Jehová Diosajj wal jupanakat kusisi, ukatwa jupanakajj wali kusisitäpjje (1 Crón. 29:17a). Jesusajj akham sänwa: “Kusisiñanïpjjew cheqapar sarnaqapjjatap layku arknaqata uñjasirinakajja […]. Jumanakajj kusisipjjam, wal kʼuchisipjjarakim, mä jachʼa bendicionaw jumanakatakejj alajjpachan utji” sasa (Mat. 5:10-12).

3. Hechos 4:19, 20 textorjamajja, ¿kunsa apostolonakajj arknaqat uñjasisajj lurapjjäna, ukat kunatsa ukham lurapjjäna?

³ Kunjamtï nayrïr patak maranakan jakir apostolonakajj Jesusat  predicapjjatap layku arknaqat uñjasipkänjja, ukhamarakiw jilat kullakanakasajj arknaqat uñjasipjje. Judionakan jachʼa tribunalapankir juezanakajja, walja kutiw jupanakarojj “janiw Jesusan sutipjjarojj jukʼampi parlapjjätati [sasin] ewjjapjjäna” (Hech. 4:18; 5:27, 28, 40). ¿Kunsa apostolonakajj lurapjjäna? (Hechos 4:19, 20 liytʼäta). Jupanakarojj khititï jukʼamp autoridadanïki ukaw markar yatiyapjjañapatakisa, Jesucristot phoqatpach qhanañchapjjañapatakis orden churäna (Hech. 10:42). Ukatwa Pedrompi Juanampejj taqpach apostolonakan sutipjjar parlapjjäna, jumanakar istʼañat sipansa Diosaruw istʼapjjäjja Jesucristots parlasipkakïwa sasaw jupanakarojj jan ajjsartʼas sapjjäna. Uka juezanakarojj akham sasinsa jisktʼapkaspäna ukhamänwa: “¿Diosat sipans jukʼamp autoridadanïpkasmas ukhamti amuyasipjjta?” sasa.

4. Hechos 5:27-29 textorjamajja, ¿kunatsa apostolonakajj cheqpach cristianonakatakejj yateqaskañäpjje, kunjamsa jupanakat yateqassna?

⁴ Apostolonakajj wali suma yateqaskañäpjjewa, ukatwa cheqpach cristianonakajj jichhakamas jupanakat yateqasis sarnaqaskaktanjja, jupanakajj akham sapjjänwa: “Jaqenakar istʼañat sipansa Diosar istʼapjjañajawa” sasa (Hechos 5:27-29 liytʼäta). Diosar taqpach chuymampi servipjjatapat jawqʼjat uñjasisajj wali kusisitaw jupanakajj judionakan jachʼa tribunalapat sarjjapjjäna, “kuna laykutejj Jesusan sutip layku phenqʼachat uñjasipjjatapat Diosajj wali sum jupanakar uñjäna”, ukatsti predicasipkakïnwa (Hech. 5:40-42).

5. ¿Kawkïr jisktʼanakarus qhanañchañasa?

⁵ Apostolonakan ukham wali yateqaskañ lurapjjatapatjja, akham sasaw jisktʼassna: ¿kunjamsa apostolonakajj jaqenakar istʼañat sipans Diosar istʼapjjaspäna, Biblian jilïr autoridadanakar istʼapjjam siski uk phoqapjjarakispäna? (Rom. 13:1). ¿Kunjamsa apóstol Pablon arunakaparjamajj “gobiernonakarusa autoridadanakarusa” istʼsna, jilïr gobernantesäki uka Diosar taqpach chuymamp serviraksna? (Tito 3:1).

6. 1) ¿Romanos 13:1 texton parlki uka ‘jilïr autoridadanakajj’ khitinakäpjjesa, kunjamsa jupanakar uñjañasa? 2) ¿Kunsa taqe gobernantenakat amtañasa?

⁶ (Romanos 13:1 liytʼäta). Uka versiculon ‘jilïr autoridadanaka’ siski uka arunakajja,  jaqenakjjar munañanïpki autoridadanïpkaraki uka gobernantenakatwa parlaski. Cristianonakajj uka gobernantenakar istʼañasawa. Jupanakaw markan taqe kun sum lurasiñapatak yanaptʼapjje, markan leyinakap phoqayapjje, awisajj Jehová Diosan markaparus arjjatapjjaraki (Apoc. 12:16). Ukatwa jupanakajj impuestonak mayipjjestu, jupanakar ajjsartʼsna, respetaraksna ukwa munapjjaraki (Rom. 13:7). Uka gobiernonakajja, Jehová Diosan permisopampikiw autoridadanïpjje. Kunapachatï Roma markankir Poncio Pilato gobernadorajj jisktʼkäna ukhaw Jesusajj uk qhanañchäna. Jumar salvañatakis jan ukajj jiwayañatakis nayajj autoridadanïtwa sasin Pilatojj siskäna ukhajja, Jesusajj akham sasaw jupar säna: “Janitï Diosajj munañanïñ churkiristamjja, janiw nayjjarojj kuna munañanïkasmasa” sasa (Juan 19:11). Jichha tiemponjja, taqpach gobernantenakas politiconakas Pilato kikparakiw jan taqpach munañanïpkiti.

7. ¿Kunapachas gobernantenakarojj jan istʼañasäki, ukat kunsa jupanakajj amtapjjañapa?

⁷ Gobernantenakan leyinakapatï Jehová Diosan leyinakap jan conträkchi ukhajja, cristianonakajj jupanakar istʼtanwa. Ukampis gobernantenakatejj kuntï Diosajj jan lurañas munki uk lurayañ munapjjchistu, jan ukajj kuntï Diosajj lurañas munki uk jarkʼapjjchistu ukhajja, janiw jupanakarojj istʼktanti. Inas waynanakarojj markapankir cuartelar sarapjjañapatak obligañ munapjjchi. c Jan ukajj inas utjkistu uka Biblia, Bibliat apstʼat qellqatanaka, predicaña, tantachasiña jarkʼapjjchi. Gobernantenakajj autoridadanïpjjatap laykuw mä kuns lurañ munapjjestaspa, inas Criston discipulonakaparojj arknaqapjjchistaspa, ukampis jupanakajj Diosaruw cuenta churapjjani. ¡Jehová Diosaw jupanakarojj uñjaski! (Ecl. 5:8).

8. ¿Kunansa Jehová Diosampi jilïr autoridadanakampejj jan pachpäki, ukat kunatsa ukajj wali wakiskirejja?

⁸ Jilïri siski uka arojja, mä kunat sipans jukʼamp sumäki jan ukajj jilankki uka toqet parlañatakiw apnaqasi. Ukampis janiw taqe kunat sipans jukʼamp sumäkaspa, jan ukajj jilankkaspas ukham sañ munkiti. Gobiernonakarojj ‘jilïr autoridadanaka’ sasinsa uñtʼaskchejja, jupanakat sipans jukʼamp jila autoridadaniw utji. Biblianjja, walja kutiw Jehová Diosat parlkasajj Jachʼa Dios sasin aytasi (Dan. 7:18, 22, 25, 27).

9. ¿Kunsa Daniel profetajj visionanakan uñjäna?

⁹ Kuntï Daniel profetajj visionanakan uñjkäna ukajja, Jehová Diosajj taqe autoridadanakat sipans jilankatapwa qhan uñachtʼayistu. Nayraqatjja pusi jachʼa animalanakaruw uñjäna, uka animalanakajj nayra tiempon utjkäna jichha tiempon utjkaraki uka potencia mundialanakamp sasiwa, ukanakajj akanakawa: Babilonia, Medopersia, Grecia, Roma markanakampi, Reino Unido ukat Estados Unidos mayachtʼat potencia mundialampi, uka qhepïrejj jichhürunakanwa apnaqaski (Dan. 7:1-3, 17). Ukjjarusti, Danielajj Jehová Diosaruw alajjpachankir tribunalan mä tronon qontʼat uñjäna (Dan. 7:9, 10). Kuntï Diosat jan jitheqtir uka profetajj ukjjar uñjkäna ukajja, jichhürunakan utjki uka gobernantenakan amuyasipjjañapatakiwa.

10. Daniel 7:13, 14, 27 textorjamajja, ¿khitinakarus Jehová Diosajj aka oraqjjar autoridad churäna, kunsa ukajj jupat yatichistu?

¹⁰ (Daniel 7:13, 14, 27 liytʼäta). Diosajj gobiernonakar taqpach autoridadap apaqerïtapa, khitinakar churañatï wakiski wali chʼamanïpkaraki ukanakar churirïtapwa Daniel profetajj uñjarakïna. ¿Khitinakarus churäna? “Jaqen mä yoqapar uñtasi[täki]” uka Jesucristompiru, ‘Jachʼa Diosan santo jaqenakapampiruw’  churäna, uka santo jaqenakajj “wiñayans wiñayapataki” apnaqapkani uka 144.000 ajllitanakäpjjewa (Dan. 7:18). Ukhamajj Jehová Diosakiw jachʼa Diosajja, jupa sapakiw uk lurañatakejj autoridadani.

11. ¿Jehová Diosan markanakjjaru jilankatap uñachtʼayañatakejj kunampsa Daniel profetajj qellqäna?

¹¹ Kuntï Danielajj uka visionan uñjkäna ukajja, kuntï nayrajj siskäna ukwa qhanañchistu. Jupajj akham sänwa: “Alajjpachankir Diosa[w] […] reyinaks apaqe, reyinaks uttʼayi” sasa. Ukjjarusti sarakïnwa: “Jachʼa Diosajj jaqenakan reinonakapan Apnaqe[riwa], [...] jupaw khitirutï churañ munki ukar apnaqañ churi” sasa (Dan. 2:19-21; 4:17). ¿Jehová Diosajj mä kutis reyinakarojj apaqeti, jan ukajj uttʼayarakiti? Jïsa, ukhamawa.

12. Kunjamsa Jehová Diosajj nayra tiempon reyinak apaqäna uk mä uñachtʼäwimp qhanañchtʼam. (Dibujo uñjjattʼäta).

¹² Jehová Diosajj ‘jilïr autoridadanakat’ jilankatapwa uñachtʼayi. Kimsa toqet uk uñjañäni. Egipto markan faraonapajj Jehová Diosan markaparuw esclavot trabajiyäna, kutin kutiniw jupanakarojj jan antutañ munkarakïnti. Ukampis Jehová Diosaw markapar salväna, faraonarojj Mar Rojo qotanwa jiwayarakïna (Éx. 14:26-28; Sal. 136:15). Babilonia markan Belsasar reyipajja, mä jachʼa manqʼäwinkaskäna ukhajj “alajjpachanakan Tatitup contraw” saytʼäna, Jehová Diosar jachʼañchañat sipansa ‘qorita qollqeta lurat diosanakaruw jachʼañchäna’ (Dan. 5:22, 23). Ukampis Diosaw uka jachʼa jachʼa tukuri reyirojj jiskʼachäna. “Uka pachpa arumaw” Belsasar reyir jiwayapjjäna, reinopajj medonakampiru persanakampir katuyatäjjarakïnwa (Dan. 5:28, 30, 31). Palestina markankiri Herodes Agripa I (primero) sat reyejja, apóstol Santiagoruw jiwayäna, apóstol Pedror jiwayañ munasajj carcelaruw llawintayarakïna. Ukampis Diosaw uka amtap jan phoqasiykänti, ‘Jehová Diosan angelapaw jupar usuntayäna’, ukatsti Herodes reyejj jiwjjänwa (Hech. 12:1-5, 21-23).

13. Kunjamsa Jehová Diosajj mayachtʼat gobernantenakar atipjäna uk mä uñachtʼäwimp qhanañchtʼam.

¹³ Jehová Diosajj taqe mayachtʼat gobernantenakat jilankatapwa uñachtʼayaraki. Diosajj israelitanak laykuw nuwasïna, mayachtʼatäpkäna uka 31 cananeo reyinakar atipjañataki, Suma Oraqen jilaparte oraqenakap katuntañatakiw yanaptʼarakïna (Jos. 11:4-6, 20; 12:1, 7, 24). Jehová Diosajja, Israel marka contra nuwasir sarapkäna uka Ben-Hadad reyimpiru 32 sirio  reyinakampir atipjapjjañapatakiw israelitanakar yanaptʼäna (1 Rey. 20:1, 26-29).

14, 15. 1) ¿Nabucodonosor reyisa Darío reyis Jehová Diosan apnaqäwipat kamsapjjänsa? 2) ¿Mä salmo qellqerejj Jehová Diosatsa markapats kamsänsa?

¹⁴ Jehová Diosajj kutin kutiniw Jachʼa Diosätap uñachtʼayi. Jehová Dios sapakiw jachʼañchatäñapa sasin humilde chuymamp reconosiñat sipansa, Babiloniankir Nabucodonosor reyejj chʼamanïtapata, autoridadanïtapata, reyïtapatwa jachʼañchasïna, ukatwa Diosajj loqher tukuyjjäna. Waliptjjäna ukhajja, jachʼa Diosaruw jachʼañchäna, Jehová Diosaw wiñayatak apnaqerejja sasaw reconosjjarakïna. Kuntï jupajj lurañ munki uk “janiw juparojj khitis jarkʼkaspati” sasaw sarakïna (Dan. 4:30, 33-35). Daniel profetan Diosar taqpach chuymampi servitapajj yantʼaskäna, Jehová Diosajj leonanakan putupat salvkarakïna uka qhepatjja, Darío reyejj akham sasaw mä orden apsüna: “Taqe cheqanakan jakir jaqenakarojj mä orden churta, ukhamat Danielan Diosapar ajjsarapjjañapataki ukhamarak respetapjjañapataki. Jupajj jakkir Diosawa, wiñay jakirirakiwa, reinopajj janipuniw tukjatäkaniti, wiñayatakiw apnaqani” sasa (Dan. 6:7-10, 19-22, 26, 27).

¹⁵ Mä salmo qellqerejj akham sänwa: “Jehová Diosajj markanakan jan wali amtanakapjja janiw phoqasiykiti, markanakan amtanakapsa ina chʼusaruw tukusiyi” sasa. Ukatsti sarakïnwa: “Kawkïr markatejj Jehová Diosarojj Diosaparjam adorki ukajj kusisitawa, jupankañapatak ajlliski uka markajj kusisitawa” sasa (Sal. 33:10, 12). Ukatwa Jehová Diosarojj taqpach chuymamp serviñasa.

16. ¿Kuna toqetsa jachʼa tʼaqesiñ tiempon jan payachaskañäni? (Dibujo uñjjattʼäta).

¹⁶ Kunsa Jehová Diosajj nayra tiempon luräna uk yatjjatawayjjtanwa. Ukhamajj ¿akat mä jukʼa tiemporojj kun pasañapsa suyasktanjja? Jehová Diosajj jupat jan jitheqtiri servirinakaparojj ‘jachʼa tʼaqesiñ tiempon’ salvaniwa, janiw ukat payachasktanti (Mat. 24:21; Dan. 12:1). Kunapachatï Magog oraqenkiri Gog satäki  uka mayachtʼat markanakajj Jehová Diosat jan jitheqtiri servirinakapar atacapkani ukhaw uk lurani. Uka mayachtʼat markanakajj Naciones Unidas sat organización taypinkiri 193 markanakäskpansa, janiw Jehová Dios contrasa, alajjpachankir ejercitonakap contras nuwasiñ puedipkaniti. Jehová Diosajj akham sasaw mä promesa arsuwayi: “Nayajj jachʼañchasipunïwa, santot uñjayasëjja, walja markanakampiw uñtʼayasëjja. Jupanakasti Jehová Diosätaj yatipjjani” sasa (Ezeq. 38:14-16, 23; Sal. 46:10).

17. ¿Oraqpachankir reyinakarojj kunas pasani, Diosar taqpach chuymamp servirinakarojj kunas pasarakini?

¹⁷ Gog satäki ukajj Diosan markapar atackani ukampiw Armagedón sat qhep qhepa guerrajj qalltani, ukhaw Jehová Diosajj ‘oraqpachankir reyinakar’ tukjani (Apoc. 16:14, 16; 19:19-21). Ukampis “cheqap sarnaqer jaqenakakiw oraqen jakapjjani, taqpach chuymampi servir jaqenakakiw oraqenkapjjani” (Prov. 2:21, nota).

18. ¿Kunsa walja cheqpach cristianonakajj lurapjjäna, ukat kunatsa uk lurapjjäna? (Daniel 3:28).

¹⁸ Nayratpachasa, Taqe Kunjjar Munañani Jehová Dios Reyipar munasipjjatap laykojj walja cheqpach cristianonakaw carcelar jistʼantat uñjasipjjäna, vidaps niy aptʼasipjjarakïna. Uka cheqpach cristianonakajja, janiw Jehová Diosat jitheqtañ munapkiti, jupanakajj nayra tiempon jakir kimsa hebreonakar uñtasitäpjjewa. Uka kimsa hebreonakajj janiw Jachʼa Jehová Diosat jitheqtapkänti, ukatwa jupajj nina aqkir hornot jupanakar salvarakïna (Daniel 3:28 liytʼäta).

19. ¿Kunarjamas Jehová Diosajj servirinakapar juzgani, ukat kunsa jichhajj lurañasa?

¹⁹ Jehová Diosar taqpach chuymamp serviñajj kunja wakiskirisa uk salmo qellqeri Davidajj yatïnwa. Jupajj akham sasaw qellqäna: “Jehová Diosasti markanakjjarojj juicio arunakwa arsuni. Jehová Dios Tata, cheqap luratajarjam juzguita, taqpach chuymampi servitajarjam juzguita” sasa (Sal. 7:8). Ukatsti sarakïnwa: “Taqpach chuymampi servitajasa cheqapar sarnaqatajas jarkʼaqetpan” sasa (Sal. 25:21). Cheqas Jehová Diosat jan jitheqtas jakañaw jukʼamp sumajja, janiw kunäkipansa jupat jitheqtañ munktanti. Ukhamtï lurañänejja, kuntï mä salmo qellqerejj siskäna ukhamwa sarakiñäni: “Khitinakatï [...] taqpach chuymamp servipki […], khitinakatï Jehová Diosan leyiparjam sarnaqapki ukanakajj kusisitäpjjewa” sasa (Sal. 119:1, nota).