Uka maranjja, Diosan markapajj Jehová Diosar jukʼamp mayachtʼat adorapjjañapatakiw Estudiantes de la Biblia ukanakarojj yanaptʼäna. Inglés arut Yatiyañataki revistajja, Reunión de Oración, Alabanza y Testimonio sat tantachäwin yatjjataskäna uka texton qhanañchäwipwa apsuñ qalltäna, uka tantachäwejj sapa semanaw apasïna. Estudiantes de la Biblia ukanakajj mä calendario apsupjjäna, ukanjja sapa semanatak mä textompi, cantañatak mä cancionampiw utjäna, sapaki jan ukajj familiampi Bibliat yatjjatkasaw cantasispäna.

Tantachäwinakanjja, Estudiantes de la Biblia ukanakajj testimonionaka, mä arunjja kunatï predicacionan paskäna uka experiencianakwa cuentapjjäna, cuentkasajj Jehová Diosaruw yuspärapjjäna, mä canción cantapjjäna, oracionsa lurapjjarakïnwa. Eva Barney sat kullakajj 1923 maranwa 15 maranïkasajj bautisasïna, jupajj akham sänwa: “Maynitï mä testimonio arstʼañ munäna ukhajja, saytʼasiñapänwa, ‘Tatituruw nayar khuyaptʼayasitapat yuspärañ munta’ sasaw qalltañapäna” sasa. Yaqhep jilat kullakanakarojj testimonio arstʼañajj wal gustäna. Eva kullakajj akham sarakïnwa: “Wali munata Godwin sat jilïr jilatajj waljanakatwa Tatitur yuspärañ munirïna. Ukampis esposapajj tantachäwi sarayir jilatan tukuyjjañ munatap amuyasajj sacopatwa Godwin jilatar jiytʼirïna, jilatajj qontʼasjjerïnwa” sasa.

Phajjsin mä kutejja, sapa clase jan ukajj sapa congregacionaw Reunión de Oración, Alabanza y Testimonio sat wali wakiskir tantachäwi apirïna. Inglés arut Yatiyañataki 1 de abril de 1923 revistajja, uka tantachäwit akham siwa: “Chikat tantachäwejja, predicacionat testimonio arstʼañataki yatiyirinakar chʼamañchtʼañatakïñapawa […]. Taqeni mä pachpa luräwinïñajja, amigonakarojj jukʼampiw mayachtʼani” sasa.

Uka tantachäwinakajj Charles Martin jilatarojj wal yanaptʼäna, jupajj Vancouver (Canadá) markatänwa, 19 maranïkasaw trabajador de claset jan ukajj publicadorat servïna. Jupajj akham sänwa: “Ukanwa kunjamsa predikirista uk yateqayäta. Utat uta predickasajj kuna experiencias pasäna ukwa maynejj cuenttʼirïna. Ukaw predicacionan kamsiristsa, jan istʼañ munapki ukanakampejj kunjamsa parltʼirista uk amuytʼayitäna” sasa.

“Predicación urunakajja” ukhamarakiw jilat kullakanakarojj jukʼamp mayachtʼäna. Inglés arut  Yatiyañataki 1 de abril de 1923 revistajj akham sasaw yatiyäna: “Taqenis mä pachpa luräwin mayachtʼatäñasatakejja […], 1 de mayo de 1923 martes urojj taqeniw predicañäni. Sapa phajjsiw nayrïr martesajj uk lurañäni […]. Clasenkirinakat taqeniw uk lurañatak chʼamachasipjjañama” sasa.

Estudiantes de la Biblia ukanakat waynitunakas tawaqetanakas predicapjjarakïnwa. 1923 maranjja, Hazel Burford sat kullakajj 16 maranïskänwa, jupajj akham sänwa: “Bulletin sat qellqatanjja, kunjamsa jaqenakar prediksna ukanakajj waljaw utjäna, ukanak pʼeqeruw yatsupjjañajäna. a Nayajj abuelitojamp chikaw wali kusisit predikirïta” sasa. Ukampis mayniw Hazel kullakan jan predicañap munkänti, kullakajj akham saskakiwa: “Mä jilïr jilataw predicañaj jan munkänti. Uka tiemponjja, Estudiantes de la Biblia ukanakat janis taqe ‘wayn tawaqonakajj’ taqe kun Lurir Awkisar jachʼañchapjjañapäkaspa ukhamwa yaqhepanakajj amuyapjjäna” sasa (Sal. 148:12, 13). Ukampis kullakajj predicaskakïnwa. Qhepa maranakatjja, Galaad escuelaruw clase 2 ukar saräna, ukat Panamá markanwa misionerat servïna. Tiempompejja, uka jilatanakajj janiw wayn tawaqonakan predicapjjatapat nayrjam amuyjjapjjänti.

Markan apaskäna uka asambleanakasa asamblea regionalanakasa, ukhamarakiw jilat kullakanakarojj mayachtʼatäpjjañapatak yanaptʼäna. Walja asambleanakanjja, yaqhep urunakajj predicasirïnwa, Winnipeg (Canadá) markan apaskäna uka asamblean predicasïnwa. 31 de marzo urunjja, uka asamblear saririnakarojj taqeniruw predicapjjañapatak invittʼasïna. Predicaskäna uka urunakajj wali suma experiencianakaw utjäna. 5 de agosto urun Winnipeg markan apaskäna uka asambleanjja, mä 7.000 jaqenakaw tantachasipjjäna. Janipuniw Canadá markan ukham walja jaqenakajj mä asamblean tantachasipjjerïkiti.

18 al 26 de agosto de 1923 maranjja, Los Ángeles (California) markan mä wakiskir asambleaw apasïna. Semananak faltkipanjja, periodiconakanwa uka asambleat yatiyasïna, Estudiantes de la Biblia ukanakajj 500.000 jila invitacionanakwa lakirapjjäna. Autonakaparusa yaqha autonakarus asambleat yatiyañatakiw letreronak uchapjjäna.

 Sábado 25 de agosto urojja, Rutherford jilatajj “Ovejanakampi cabranakampi” sat mä discurso arstʼäna, ukanjja “ovejanakajj” suma chuyman jaqenakawa, jupanakaw aka oraqen mä Paraison jakasipjjani sasaw qhanañchäna. Ukatjja “Amonestación” sat mä resolución liytʼäna, ukanjja cristianöpjjtwa sapki ukanakaruw juchañchäna, suma chuyman jaqenakarojj ‘Jachʼa Babiloniat’ mistjjapjjañapatakiw chʼamañchäna (Apoc. 18:2, 4). Uka qhepatjja, uka resolucionajj mä tratadoruw imprimisïna, Estudiantes de la Biblia ukanakajj oraqpachanwa walja millón tratadonak lakirapjjäna.

Asamblea qhep qhepa urunjja, Rutherford jilatajj “Taqe markanakaw Armagedón guerrar sarasipki, ukampis jichhürunakan jakapki ukanakatjja millón millón jaqenakaw jan jiwapkaniti” sat discurso arstʼäna, 30.000 jila jaqenakaw uk istʼapjjäna. Walja jaqenakan sarapjjañap yatisajja, Estudiantes de la Biblia ukanakajj ukhak lurat Coliseo de Los Ángeles alquilapjjäna. Taqenin sum istʼapjjañapatakejj uka coliseon parlantenakapwa uchapjjäna, uka parlantenakjamajj janiw yaqhajj uka tiempon utjkänti. Walja jaqenakarakiw radio toqejj uka asamblea istʼapjjäna.

1923 maranjja, África, Europa, India, Sudamérica toqenakan jukʼampiw predicasjjäna. India markanjja, Adavimannathu Joseph sat jilatajj casadökasasa, sojjta wawanakanïkasasa, hindi, tamil, telugu, urdu arunakan Bibliat apstʼat qellqatanak lurasiñapatakiw yanaptʼäna.

Sierra Leona markansti, Alfred Joseph ukat Leonard Blackman sat jilatanakajj Brooklyn (Nueva York) central mundialaruw yanap mayiñatak qellqapjjäna. Ukatsti 14 de abril de 1923 maranwa Estudiantes de la Biblia ukanakajj uka cartarjam yanaptʼa katoqapjjäna. Alfred jilatajj akham sänwa: “Mä sábado arumaw mä akatjamat telefonot jawsanipjjetäna” sasa. Jachʼa arun mä jilataw akham sasin jisktʼäna: “¿Jumat Sociedad Watch Tower ukar predikirinak mayta?” sasa. Alfred jilatajj “Jïsa” sasaw säna. “Nayaruw khitanipjjetu” sasaw telefonot jawsankäna uka jilatajj säna. ¿Khitin arupänsa? William Brown jilatan arupänwa. Uka urukiw jilatajj Caribe markat Antonia esposapampi Louise ukat Lucy sat pä jiskʼa imill wawanakapampejj purinïna. Jilat kullakanakajj janiw jupanakar uñtʼañatakejj walja tiempo suyapjjañapajj wakiskänti.

Alfred jilatajj akham sarakïnwa: “Qhepür alwajja, kunjamtï lurapjjerïkayät ukhamaw Leonard jilatampejj Bibliat yatjjatasipkayäta, ukhamaruw mä jachʼa tansa jaqejj purinïna, William jilatätaynawa. Biblian cheqa yatichäwinakapar wal jupajj munasïna,  ukatwa qhepürpachajj mä discurso arstʼañ munäna” sasa. Apkäna uka Bibliat apstʼat qellqatanakjja, niya mä phajjsinakwa William jilatajj taqpach lakiratayna. Mä qhawqha tiempotjja, 5.000 libronakampwa katoqäna, ukatsti jankʼakiw ukanak tukj-jjarakïna. Ukampis jaqenakajj janiw libro aljirit uñtʼapkänti. Jehová Diosar jan jitheqtas serviwayki uka maranakajja, discursonakapan Bibliampipuniw yatichirïna, ukatwa jaqenakajj Biblia apnaqer William jilatat uñtʼapjjäna.

Ukañkamajja, Barmen (Alemania) markankir sucursalan waljanëjjapjjänwa, Francia markan ejercitopas uka mark katuntañampïskänwa. Estudiantes de la Biblia ukanakajja, Bibliat apstʼat qellqatanak imprimiñatakejj suma edificionakwa Magdeburgo markan jikjjatapjjäna. 19 de junio urunjja, jilat kullakanakajj taqe kun apthapiñwa tukuyapjjäna, imprimiñatak maquinanaks apthapipjjarakïnwa, ukatjja Magdeburgo markankir machaq Betelaruw sarjjapjjäna. Magdeburgo markaruw sarjjapjjta sasin central mundialar yatiyapkayäta uka urut qhepärmanthejja, Barmen markajj Francia markamp katuntatätapwa periodiconakajj yatiyapjjäna. Jilat kullakanakajj Jehová Diosaw bendisiskistu, jarkʼaqaskarakistu sasaw amuyapjjäna.

Brasil markanjja, George Young jilatajj markpacharuw suma yatiyäwinak yatiyas viajïna. Mä sucursal utjañapatakiw yanaptʼäna, ukatjja portugués arutwa Yatiyañataki revist apsuñ qalltarakïna. Mä qhawqha phajjsitjja, 7.000 jila Bibliat apstʼat qellqatanakwa lakiräna. Uka jilatan Brasil markar puritapajja, Sarah Ferguson kullakarojj walpun yanaptʼäna. Inglés arut Yatiyañataki revistjja, Sarah kullakajj 1899 maratpachaw liyitayna, Diosar jakäwip katuyaskchïnsa, janiw bautisasiñ puedkataynati. Ukampis George Young jilatan purinitapat mä qhawqha phajjsitjja, Sarah kullakampi pusi wawanakapampejj bautisasjjapjjänwa.

Uka mara tukuyarojja, inglés arut Yatiyañataki 15 de diciembre de 1923 revistajj kunjamsa cambionakajj tantachäwinakansa, predicacionansa, asambleanakans yanaptʼäna uk akham sasaw qhanañchäna: “Congregacionankirinakajj jukʼampiw Diosar confiyapjje, ukajj qhanaw amuyasi […]. Armadurasamp uchantasipjjañäni, niya puriniñampïski uka marajj Diosar taqe chuyma wali kusisit serviskakiñäni” sasa.

1924 marajja, Estudiantes de la Biblia ukanakatakejj jan armkañ maränwa. Brooklyn markanjja, Central mundialankir jilat kullakanakajj walja phajjsinakaw Staten Island markankir mä oraqen trabajasipkäna, uka markajj Brooklyn markat wali jakʼankänwa. 1924 mara qalltaw utanak lurañ tukuyapjjäna. Uka utanakajj jilat kullakanakarojj jukʼampiw mayachtʼäna, suma yatiyäwinak yatiyasiñapatakiw yanaptʼarakïna, janipuniw nayrajj ukham lurasirïkänti.