1, 2. ¿Kunsa Biblia jukʼamp sum liytʼañatakisa yatjjatañatakis lursna? Mä uñachtʼäwimp uk qhanañchtʼam.

 MÄ UTSA alañ munkasma ukham amuytʼañäni. ¿Uka ut alätati janicha uk janïr amtkasajj kun yatiñamas walïspa? ¿Uka utan anqa toqet apsut foto uñjjatañamakit wakisispa? ¿Janit juma pachpa uka ut uñjir sarañ munkasma? Uka ut anqäjj toqet uñjañatakisa, taqpach cuartonakap uñakiptʼañatakis kʼuchut kʼuch uñjañatakis juma pachpaw sarañ munasma. Uka utajj kunjam lurtʼatas uk yatiñatakejj planonakapwa uñakiptʼañ munarakisma. Cheqas taqe toqetwa uka ut uñakiptʼañ munasma. 

² Biblia liytʼkasasa yatjjatkasas ukhamarakwa lursna. Biblia toqet yatjjattʼat mä chachajj akham siwa: “[Bibliajj] mä jachʼa edificior uñtatawa, altorojj wali jachʼawa, wali manqha cimientonirakiwa” sasa. Ukhamajj ¿kunjamsa Biblian yatichäwinakap sum uñtʼsna? Ratuk liyirpayasajj fácil amuykañ yatichäwinakak yateqañäni, ukajj “Diosan arunakapankir qallta yatichäwinakapa[wa]” (Heb. 5:12). Ukampis kunjamtï mä uta sum uñakipksna ukhamäñapawa: uta “manqhanak” sum uñakipañasawa. Bibliat sum yatjjatañatakejja, kunjamsa sapa mä yatichäwipajj mayachtʼasi ukwa uñjañasa. Janiw kawkïr yatichäwinakarus creytan ukak yatiñasäkiti, kunatsa uka yatichäwinakar creytan uk yatiñasarakiwa.

3. ¿Kun lurapjjañapatakis Pablojj cristianonakar chʼamañchtʼäna, ukat kunatsa? (Efesios 3:14-19).

³ Diosan Arupan taqpach yatichäwinakap sum amuytʼañatakejja, jan fácil amuyañjamäki uka cheqa yatichäwinakwa yatjjatañasa. Apóstol Pablojj Diosan arunakap wali sum yatjjatapjjañapatakiw taqpach cristianonakar chʼamañchtʼäna, ukhamat “qhawqchʼäkitejj cheqa yatichäwinakajj anchorusa,  largorusa, altorusa, manqharusa uk sum amuytʼapjjaña[pa]taki”. Ukhamatwa Diosar confiyañan ‘suma saytʼatäpjjaspäna’, ‘suma saphintatäpjjarakispäna’ (Efesios 3:14-19 liytʼäta). Jiwasajj ukhamwa lurañasaraki. Diosan Arup phoqatpach amuytʼañatakisa yatichäwinakap sum amuyañatakis kunjamsa yatjjatsna uk yatjjatañäni.

4. ¿Kunsa Jehová Diosar jukʼamp jakʼachasiñatakejj lursna? Uk mä qhawqhanak qhanañchtʼam.

⁴ Cristianonakajja janiw Biblian fácil amuytʼañjam yatichäwinakapak yateqañasäkiti. “Diosan imantat yatiñapsa” yateqañ munaraktanwa, ukatakejj espíritu santow yanaptʼistani (1 Cor. 2:9, 10). Bibliat sapak yatjjatañatakejj ¿janit kunatï Diosar jukʼamp jakʼachasiñatak yanaptʼkiristam uk yatjjatañ amtkasma? Ukatakejj kunjamsa Jehová Diosajj nayra servirinakapar munasitap uñachtʼayäna, kunjamsa ukajj jumar munasitap uñachtʼaytam ukwa yatjjatasma. Jan ukajj kunjamsa Jehová Diosajj nayra Israel markamp adorayasiñ munäna ukwa yatjjatasma, ukatjja kunjamsa jupajj jichhürunakan adorayasiñ muni ukampiw igualtʼayasma. Jan ukajj Jesusajj aka oraqen jakkasasa, Diosan arunakap yatiyasas kunjamsa taqpach profecianakap phoqawayäna ukwa jukʼamp yatjjatasma.   

5. ¿Kuna toqenakatsa Bibliat sapak yatjjatkasajj jukʼamp yatjjatañ munasma?

⁵ Diosan Arupat yatjjatir yaqhep jilat kullakanakarojja, “Jan fácil amuytʼañjam yatichäwinakat ¿kawkïrinakatsa yatjjatañ munasma?” sasaw jisktʼasïna. Jupanakajj kawkïrinakatsa yatjjatañ munapjje ukanakat mä qhawqhajja, “ Bibliat sapak yatjjatañataki” sat recuadronkiwa. Ukanakjja, Índice de las publicaciones Watch Tower ukat Jehová Diosan Testigonakapan Bibliat yatjjatapjjañapataki sat yanaptʼanakampiw yatjjatasma. Ukham yatjjatañaw Diosar jukʼamp confiyañatakisa ‘Diosar uñtʼañatakis’ yanaptʼätam (Prov. 2:4, 5). Jichhajja, Biblian jan fácil amuykañ cheqa yatichäwinakapat mä qhawqhanak yatjjataskañäni.

6. 1) ¿Mä kun lurañ amuytʼañampi mä kun lurañ amtañampejj kunansa jan pachpäki? 2) ¿Kuntï Jehová Diosajj jaqenakatakisa aka oraqetakis amtki ukajj kunatsa wiñayatakiwa sasin sissna? (Efesios 3:11).

⁶ Diosan amtanakapat kamsis Bibliajj uk yatjjatañäni. Kunsa lurañäni uk amuytʼañampi  mä kun lurañ amtañampejj janiw pachpäkiti. Kunsa lurañäni uk amuytʼañajja, mä lugarar puriñatak mä sapa thak ajlliñampi sasiwa. Ukampis thakin mä jan walejj utjaspa ukhajja, kawkirutï puriñ amtkayätan ukajj janiw phoqasjjaspati. Maysa toqetjja, mä kun lurañ amtktan ukajja, kawkirutï puriñ munktan ukamp sasiwa. Kawkirutï puriñ munktan uk sumwa yattanjja, ukampis kawkïr thaktï ukar puriñatak ajllktan ukajj cambiaspawa. Jehová Diosajj mä “wiñay amta[niwa]”, Biblian uk jiwasar jukʼat jukʼa qhanañchatapat wal yuspärtanjja (Efes. 3:11). “Jehová Diosajja amtap phoqasiñapatakejj taqe kunwa luri”, amtapajj phoqasipuniwa (Prov. 16:4). Jehová Diosan amtapajj phoqaski ukajj wiñayatakiwa. Ukhamajj ¿kunas Jehová Diosan amtapajja? Uk phoqañatakejj ¿kunanaksa cambiawayi?

7. Adanampi Evampejj Dios contra saytʼapkäna ukhajj ¿kunsa Jehová Diosajj amtap phoqañatakejj cambiäna? (Mateo 25:34).

⁷ Kunas nayrïr chacha warmitak amtapajj ukjja, Diosajj akham sasaw jupanakar qhanañchäna: “Walja wawanakanïpjjam, waljaptapjjam, oraqpach phoqantapjjam, [taqe jakirinaks] apnaqapjjarakim” sasa (Gén. 1:28). Cheqas Adanampi Evampi Dios contra saytʼapkäna ukhajja, taqe jaqenakaruw juchar katuyapjjäna, ukampis ukajj janiw Jehová Diosan amtap phoqasiñapatak jarkʼkänti. Diosajj kunjamsa amtap phoqani ukakwa cambiäna. Jupajj jankʼakiw alajjpachan mä Reino uttʼayañ amtäna, ukhamat kuntï jaqenakatakisa aka oraqetakis qalltan amtkäna uk phoqañataki (Mateo 25:34 liytʼäta). Jehová Diosajj tiempoparuw munasiñap uñachtʼayäna, jilïr Yoqaparuw aka oraqer khitanirakïna. Jesusasti jaqenakarojj Reinotwa parläna, juchampit jiwañampit jiwasar kutsuyañatakiw jiwarakïna. Ukatjja alajjpachan jakañataki Diosan Reinopan Reyjam apnaqañatakiw jaktarakïna. Ukampis Diosan amtanakapat jukʼampinakwa amuykiptʼsna.

8. 1) ¿Kuna toqetsa Bibliajj jilapartejj parli? 2) Efesios 1:8-11 textorjamajj ¿kunampsa Jehová Diosajj lurani? (Nayrïr paginankir dibujo uñjjattʼäta).

⁸ Kunjamsa Diosajj sutip jachʼañchani uka toqetwa jilapartejj Bibliajj parli, kunapachatï Criston apnaqat Reino toqejj Diosan amtapajj aka oraqetak phoqaskani ukhaw sutipajj jachʼañchatäni. Jehová Diosan amtap phoqasiñap janiw kunas jarkʼkaspati, jupa pachpaw taqe ukanakan phoqasiñapatakejj mä promesa arsuwayi (Is. 46:10, 11; Heb. 6:17, 18). Tiempompejja, aka oraqejj mä suma paraisöjjaniwa, ukanwa Adanampin Evampin cheqapar sarnaqer wawanakapajj perfectöjjapjjani, wiñayatakiw jakapjjarakini (Sal. 22:26). Ukampis Jehová Diosajj janiw ukanakak lurkaniti. Jupajj alajjpachankir servirinakaparusa aka oraqenkir servirinakaparus mä familiak mayachtʼani, taqenis Taqe Kunjjar Munañanïtap taqe chuym reconosipjjaspa ukwa Diosajj muni (Efesios 1:8-11 liytʼäta). ¿Kunjamsa Jehová Diosajj amtap phoqani ukajj wali musparkañajjaya?

9. ¿Biblia liytʼasajj kunanaks jutïrit yattanjja?

⁹ Jehová Diosajj Edén jardinan arskäna uka profeciat amuytʼañäni, ukajj Génesis 3:15 textonkiwa. b Diosan amtap phoqasiñapatakejj kunanakas pasañapäna ukanakatwa parli, ukampis ukanakajj waranq waranqa maranak qhepatwa pasañapäna. Ukanakat mayajj warmin wawapan parte principalapawa, mä arunjja Mesiasawa, jupajj Abrahanatwa jutañaparakïna (Gén. 22:15-18). Qhepatjja, profeciarjamajj 33 maranwa Jesusajj kayu talonat achjatäna (Hech. 3:13-15). Uka profecian  qhep qhepa partep phoqasiñapatakejja, 1.000 jila maranakaw faltaski, ukhaw Supayajj pʼeqet takjjatatäni (Apoc. 20:7-10). Ukampis Supayan apnaqat akapachampi Jehová Diosan markapamp enemigöpjjatapajj janïr tukuskipan kunas pasani uka toqet waljanakwa Bibliajj qhanañchi.

10. 1) ¿Kunanakas niya pasañampïski? 2) ¿Kunjamsa amuyussa chuymassa wakichtʼassna? (Nota liytʼäta).

¹⁰ Kuna musparkañanak pasañapsa Bibliajj qhanañchi uk amtañäni. Nayraqatjja, “¡Suman jakasiñampi jan ajjsaras jakasiñampiw utj-jje!” sasaw markanakajj yatiyapjjani (1 Tes. 5:2, 3). Markanakajj taqpach falso religionanakar atacapkani ukhaw jachʼa tʼaqesiñ tiempojj “mä akatjamat” qalltani (Apoc. 17:16). ‘Jaqen Yoqapajj alajjpachankir qenayanak patjjan wali kʼajkiri wali chʼamani jutaskir uñjaskani’ ukhajja, inas musparkañanak paschini (Mat. 24:30). Jesusajj taqe jaqenakaruw juzgani, ovejanakjamäpki uka jaqenakarojj cabranakjamäpki uka jaqenakatwa yaqhachani (Mat. 25:31-33, 46). Ukañkamajja, Supayajj janiw jan kun lurasajj quedaskaniti. Wali colerataw mayachtʼat markanakarojj Jehová Diosan markapar atacapjjañapatakejj amtayani. Bibliarjamajj uka mayachtʼat markanakajj Magog oraqenkir Gog satawa (Ezeq. 38:2, 10, 11). Jachʼa tʼaqesiñ tiemponjja, ajllit cristianonakat aka oraqenkasipkani ukanakaruw alajjpachan tantachthapisini. Jupanakajj alajjpachanwa Armagedón guerran nuwasiñatakejj Cristompiru alajjpachankir ejercitonakapampirojj mayachtʼasipjjani, ukampiw jachʼa tʼaqesiñ tiempojj tukuyani (Mat. 24:31; Apoc. 16:14, 16). c Ukjjarusti, oraqpachjjaru Cristojj Waranqa Maranak apnaqkani ukaw qalltani (Apoc. 20:6).

11. ¿Wiñayatak jakasjjañäni ukajj kunjamas jumatakejja? (Fotonakampi dibujompi uñjjattʼarakïta).

¹¹ Waranqa maranak pasatat kunjamänis jakañajj uk amuytʼañäni. Luririsajja, “jaqen chuymaparusa wiñay jakañ munañwa uchäna” sasaw Bibliajj qhanañchi (Ecl. 3:11). ¿Wiñay jakasiñasa Jehová Diosamp sum apasiñas kunjamänisa uk amuyasmati? Jehová Diosar jakʼachasipjjañäni sat libronjja, página  319 ukan akham siwa: “Patak pataka, waranq waranqa jan ukajj millón millón maranak jakasajj jukʼampiw Jehová Diosat yateqañäni. Ukampis Jupa toqet yateqañajj utjaskakiniwa, janiw tukuskaniti. […] Jïsa, wiñay jakañäni ukhajja, kunayman askinakaw utjani, ukat Dios Jehová Awkisar jukʼamp jukʼampi jakʼachasisajj wali kʼuchikiw sarnaqasiñäni” sasa. Uka urunakan puriniñapkamajj ¿kuna toqenakatsa Diosan Arupat yatjjatsna?

12. Kunjamsa alajjpachat yatjjatsna uk qhanañchtʼam.

¹² Jehová Diosajj ‘alajjpachan’ kunja jachʼañchatasa uk amuytʼañasatakiw Diosan Arupajj yanaptʼistu (Is. 33:5). Bibliajj Jehová Diosatsa alajjpachankir servirinakapats musparkañanakwa yatichistu (Is. 6:1-4; Dan. 7:9, 10; Apoc. 4:1-6). Kunapachatï ‘alajjpachanakajj jistʼartäna’, Ezequielajj ‘Diosat jutir visionanak uñjkarakïna’ ukhajj kuna musparkañanakas pasäna uka toqetwa liytʼsna (Ezeq. 1:1). 

13. ¿Kunanaktï Jesusajj alajjpachan lurki uk amuytʼañajj kunjamsa yanaptʼtam? (Hebreos 4:14-16).

¹³ Kunanaksa Jesusajj alajjpachankir Reyjamasa, khuyapayasir Jachʼa Jilïr Sacerdotjamas luri uk amuytʼarakiñäni. Jupa toqew oracionan “wali khuyaptʼayasir Diosan tronopar” jakʼachassna, ukhamatwa jiwasat khuyaptʼayasiñapatakisa, “horasapar jiwasar yanaptʼañapataki[s]” mayissna (Hebreos 4:14-16 liytʼäta). Kunanaktï Jehová Diosas Jesusas alajjpachatpach jiwas layk lurawayapki jichhas lurasipkaki ukanakat sapüruw amuytʼañasa. Qhawqsa jupanakajj munasistu ukajj chuymasaruw purtʼañapa, Diosar taqe chuyma serviñasatakiw yanaptʼañaparaki (2 Cor. 5:14, 15). 

14. ¿Kunjamatsa Jehová Diosampir Jesusampir yuspäratas uñachtʼaysna? (Fotompi dibujompi uñjjattʼarakïta).

¹⁴ Jehová Diosampir Yoqapampir yuspäratasjja,  jaqenakar Jehová Diosan Testigopar tukupjjañapataki Jesusan discipulopäpjjañapatak yanaptʼasaw uñachtʼaytanjja (Mat. 28:19, 20). Ukwa apóstol Pablojj Diosampir Cristompir yuspäratap laykojj luräna. “[Jehová] Diosajj taqe kasta jaqenakan salvasipjjañapa ukhamarak kunatejj cheqäki uk sum uñtʼapjjañapwa muni”, apóstol Pablojj uk yatïnwa (1 Tim. 2:3, 4). Ukatwa predickasajj walja jaqenakar yanaptʼañatakejj chʼamachasïna, “ukhamat mä qhawqhanir kunjamatsa salvañataki” (1 Cor. 9:22, 23).

15. Salmo 1:2 qellqatarjamajj ¿kunas kusisiñ churistani?

¹⁵ Wali kusisitäki taqe kunas jupatak wali sum sarki uka jaqejja, “Jehová Diosan leyiparojj wal munasi, uruy arumaw Diosan leyipat liytʼi lupʼiraki” sasaw Salmo qellqerejj qhanañchäna (Sal. 1:1-3). Uka textot parlkasinjja, Biblia liytʼki uka jaqejj “Diosan arunakapar wal munatap laykojja, ukanak thaqañapawa, lupʼiskakiñaparakiwa” sasaw Biblia traducir mä jaqejj säna. Ukatjja, “maynejj Biblia mä uru jan liytʼki ukhajj inamayäkaspas uka urojj ukhamwa uñjañapa” sasaw sarakïna (Studies in the Psalms, Joseph Rotherham). Jumatï Biblian taqpach suma yatichäwinakap amuyañataki, kunjamsa yatichäwinakapajj mayachtʼasi uk amuyañatak chʼamachasïta ukhajja, kusisitaw Bibliat yatjjatäta. ¡Diosan Arupat wali amuyump yatjjatañajj wali kusiskañawa!

16. ¿Kuna toqetsa jutïr yatichäwin yatjjataskañäni?

¹⁶ Jehová Diosajj Arup toqe churkistu uka suma yatichäwinak taqeniw yateqsna. Jutïr yatichäwinjja, jan fácil amuykañ yatichäwinakat may yatjjataskañäni: ukajj Jehová Diosan alajjpachankir jachʼa templopawa, apóstol Pablojj hebreo cristianonakar qellqkäna uka cartanwa uk templot qhanañchäna. Cheqas uka toqet yatjjatasajj taqeniw wal kusisiñäni.