1. ¿Kamsasas jichhürunakan mä angelajj parlaski, ukat kun lurañatakis ukajj jiwasar yanaptʼañapa?

 MÄ ANGELATÏ parliristam ukhajj ¿taqe chuymajjay istʼasmajja? Jichhürunakanjja, mä angelaw “taqe markanakaru, tribunakaru, kunayman parlani jaqenakaru, kunayman kasta jaqenakaru” parlaski. ¿Jupajj kamsisa? Jupajj akham siwa: “Diosar ajjsarapjjam, jachʼañchapjjarakim, [...] khititejj alajjpachsa, oraqsa, lamar qotsa, uma jalsunaksa lurki uka Diosar adorapjjam” sasa (Apoc. 14:6, 7). Taqeniw Jehová Diosar adorañasa, jupaw cheqpach Diosajja. Jachʼa templopan jupar adoratasat wal yuspärtanjja. ¡Ukajj mä jachʼa bendicionawa!

2. ¿Kunas Jehová Diosan templopajja? (“ Diosan templopajj janiw akanakäkiti” sat recuadro liytʼarakïta).

² ¿Kunas Diosan templopajja, ukat Biblian kawkjansa uka toqet qhanañchistu? Diosan templopajj janiw mä cheqpach utäkiti. Jan ukasti, Jehová Diosajj adoracionas katoqasiñapatakejj kunjamsa jupar adorañasa ukawa, ukajj juchampit jiwañampit jiwasar kutsuyañatak Jesusajj sacrificiot loqtaskäna ukarjamawa. Nayrïr patak maranakanjja, apóstol Pablojj kunjamsa adorasiñapa uka toqet waljanakwa qhanañchäna. Judea markankir hebreo cristianonakar qellqkäna uka cartankiw Pablon uka qhanañchatanakapajja. b

3, 4. ¿Kunatsa apóstol Pablojj hebreo cristianonakat llakisïna, ukat kunjamsa jupanakar yanaptʼäna?

³ ¿Kunatsa apóstol Pablojj Judea markan jakir hebreo cristianonakar qellqäna? Inas aka pä importante razonanakat qellqchïna:  Maya, jupanakar chʼamañchtʼañataki. Jupanakat jilapartejj judionakan religionaparjam uywatäpjjänwa, uka religionan pʼeqtʼirinakajj inas cristianöjjapjjatap laykojj jupanakat burlasipjjchïna, kuna laykutejj judionakat sipansa, cristianonakajj janiw Diosar adorañatakejj mä templonïpkänti, janiw sacrificionak loqtañatakejj mä altaranïpkänti, ni sacerdotenakanïpkänsa. Inas ukajj Criston discipulonakapar aynachtʼaychispäna, janirakiw Diosarus taqe chuym confiyjjapjjaspänti (Heb. 2:1; 3:12, 14). Inas jupanakat yaqhepajj judionakan religionapar kuttʼañ amtjjapjjchïna.

⁴ Paya, Hebreo cristianonakajj janiw ‘waña manqʼar’ uñtasitäki uka machaq yatichäwinaka jan ukajj jan fácil amuykañ yatichäwinak amuyañatakejj chʼamachasipkänti, uk amuyasipjjañapatakiw apóstol Pablojj jupanakar qellqarakïna (Heb. 5:11-14). Amuyatajj jupanakat yaqhepajj Moisesan Leyiparjamaw phoqasipkäna. Ukampis Pablojj Leyirjam loqtaski uka sacrificionakajj janiw juchanakas taqpach qʼomachañatak yanaptʼkiti sasaw jupanakar qhanañchäna. Ukatwa Leyejj maysar apanukutäjjäna. Ukjjarusti apóstol Pablojj jan fácil amuykañ yatichäwinakat mä qhawqhanakwa jupanakar qhanañchäna. Jesusan sacrificiot loqtasitapat ‘kuna suma suytʼañatejj’ utjkäna, jupanakan ‘Diosar jakʼachasipjjañapatakis’ yanaptʼkäna ukwa jupanakar amtayäna (Heb. 7:18, 19).

5. ¿Kun amuyañasas wakisi, ukat kunatsa?

⁵ Nayra tiempon Jehová Diosar adorapkäna ukat sipans kunatsa cristianonakjam Diosar adorapjjatapajj jukʼamp sumajja, ukwa Pablojj hebreo jilat kullakanakapar qhanañchtʼäna. Kunjamtï judío religionankirinakajj Diosar adorapki ukajja, “jutañapäkäna ukanakan chʼiwi[pakïnwa], ukampis kunatï cheqäki uk uñachtʼayirejj Cristowa” sasaw jupanakar säna (Col. 2:17). Mä chʼiwejja, janiw kunan chʼiwipasa uk sumpach uñachtʼaykiti, aleq chʼiwikiwa, janirakiw uka chʼiwejj kuntï amuyktan ukapunïkaspati. Nayra tiempon judionakajj Diosar adorapkäna ukampejj ukhamarakiwa, ukajj jutañapäkäna ukanakan chʼiwipakïnwa. Kunas Diosan templopajja, mä arunjja kunjamsa Jehová Diosar adorañasa uk amuyañasajj wali wakiskiriwa, ukhamatak juchanakasajj perdonatäspa, kunjamtï jupajj munki ukhams adorsna. Jichhajj ‘chʼiwimpi’, “kunatï cheqäki” ukamp igualtʼayañäni. ‘Chʼiwejj’ kunjamtï judionakajj Diosar adorapkäna ukawa. “Kunatï cheqäki” ukajj kunjamtï cristianonakajj Diosar adorapki ukarakiwa. Ukatakejj hebreonakar qellqat cartat yatjjataskañäni. Ukaw kunas Diosan templopajja, kunjamsa ukajj jiwasar yanaptʼistu uk jukʼamp sum amuyañatak yanaptʼistu.

6. ¿Kunatakis tabernaculojj utjäna?

⁶ Chʼiwi. 1512 antes de Cristo maran Moisesajj tabernáculo saytʼaykäna uka toqet parlasaw Pablojj Diosan templopat qhanañchäna (“Chʼiwimpi kunatï cheqäki ukampi” siski uka cheq uñjjattʼäta). Tabernaculojj ‘Diosamp jikisiñ carpa’ satarakiwa, uka lugaranwa israelitanakajj Diosar adorañatakisa sacrificionak loqtañatakis tantachasipjjerïna (Éx. 29:43-46). Sapa kuti wasaran mä lugarat yaqha lugarar sarjjapjjäna ukhajja, jupanakamp chikaw uk apasipjjerïna (Éx. 25:8, 9; Núm. 9:22). Jerusalenan templojj luraskäna ukhakamaw israelitanakajj niya 500 maranak uka tabernáculo apnaqapjjäna. Kunatï cristianonakatakejj tiempompejj jutañapäkäna, jukʼamp sumäkarakïna ukwa uñachtʼayäna.

7. ¿Kunapachas Diosan templopajj utj-jjäna?

⁷ Kunatï cheqäki. Tabernaculojj “kunatï alajjpachan utjki ukanakwa uñachtʼa[yäna]”, Jehová Diosan jachʼa templopwa uñachtʼayarakïna. Pablojj akham sänwa: “Uka carpajja [jan ukajj tabernaculojja] kunanakatï jichha tiempon pasaski ukanakwa uñachtʼayi” sasa (Heb. 8:5; 9:9). Ukhamajj hebreonakar uka arunak qellqkäna ukhajja, Diosan templopajj utj-jjänwa. Cheqas 29 maranwa ukajj utj-jjäna. Uka maranwa Jesusajj bautisasïna, espíritu santomp ajllitäna, Jehová Diosan ‘jachʼa jilïr sacerdotepatwa’ Diosan templopan serviñ qalltarakïna (Heb. 4:14; Hech. 10:37, 38). c

8, 9. Hebreos 7:23-27 textorjamajj ¿Israel markan jachʼa jilïr sacerdotenakampi Jesucristo Jachʼa Jilïr Sacerdotempejj kunansa jan igualäpki?

⁸ Chʼiwi. Jachʼa jilïr sacerdotejj marka lantiw Jehová Dios nayraqatan uñstirïna. Israel markan nayrïr jachʼa jilïr sacerdotepajj Aaronänwa, tabernaculojj inauguraskäna ukhaw Jehová Diosajj jupar uttʼayäna. Ukampis Pablojj akham sasaw qhanañchäna: “Sacerdotenakajj jiwirïpjjatap laykojj janiw luräwinakamp phoqerjamäpkänti, ukatwa jupanak lantejj yaqha sacerdotenak uttʼayañajj wakisïna” sasa (Hebreos 7:23-27 liytʼäta). d Niyakejjay jachʼa jilïr sacerdotenakajj pantjasirïpjjchïnjja, pachpa juchanakapatwa sacrificionak loqtapjjañapäna. Ukhamajj Israel markan jachʼa jilïr sacerdotenakapampi Jesucristo Jachʼa Jilïr Sacerdotempejj janipuniw kunans igualäpkiti.

⁹ Kunatï cheqäki. Jesucristo Jachʼa Jilïr Sacerdotesajja, “cheqpach carpan serviripawa, Jehová Diosaw uka carpa saytʼayi, janiw jaqen saytʼayatäkiti” (Heb. 8:1, 2). “Jesusajj wiñayatak jakiriwa, ukhamajj janiw jupa lantejj yaqhanakar uttʼayañajj wakiskiti” sasaw Pablojj qhanañchäna. “Janiw jupajj qʼañuchatäkiti janirakiw jucharar jaqenakjamäkisa”, Israel markan jachʼa jilïr sacerdotenakat sipansa, Jesusajj pachpa juchanakapat “janiw sapüru sacrificionak loqtañapäkiti” sasaw sarakïna. Jichhajj altaranakampit sacrificionak loqtañampit parltʼañäni. Chʼiwimpi kunatï cheqäki ukampejj kunanakansa jan igualäpki ukanakat yatjjataskañäni.

10. ¿Cobret lurat altaran loqtaskäna uka sacrificionakajj kunamp sasïnsa?

¹⁰ Chʼiwi. Tabernaculor mantañäki uka anqäjjanjja, cobret lurat mä altaraw utjäna, ukanwa Jehová Diosar animalanakajj loqtasirïna (Éx. 27:1, 2; 40:29). Ukampis uka sacrificionakajj janiw markan juchanakap taqpach perdonañatak yanaptʼkänti (Heb. 10:1-4). Tabernaculon sapa kuti animalanak sacrificiot loqtaskäna ukajja, jaqenakan juchanakap phoqatpach qʼomachañapäkäna uka sacrificiomp sasïnwa.

11. ¿Kawkïr altaransa Jesusajj mä sacrificior uñtat loqtasïna? (Hebreos 10:5-7, 10).

 ¹¹ Kunatï cheqäki. Jehová Diosajj jaqenakar juchampit jiwañampit kutsuyañatakiw Jesusarojj aka oraqer khitanïna, Jesusajj uk yatïnwa (Mat. 20:28). Ukatwa bautisaskäna ukhajj Jehová Diosan nayraqatapan uñstäna, ukhamat jupan munañap lurañataki (Juan 6:38; Gál. 1:4). Mä altaransa sacrificiot loqtaskaspa ukhamänwa. Uka altarajj Diosan ‘munañapamp’ sasïnwa, Jehová Diosan munañaparjamajja, Yoqapaw perfecto jakäwip sacrificiot loqtasiñapäna. Jesusajj ‘mä kutikiw wiñayatak’ jakäwip loqtasïna, ukhamat taqe khitinakatï jupar confiyapki ukanakan juchanakapajj wiñayatak perdonatäñapataki (Hebreos 10:5-7, 10 liytʼäta). Jichhajj kunanakas tabernáculo manqhan utjäna, ukanakat yaqhepajj kunamp sasisa ukwa yatjjataskañäni.

12. ¿Khitikis tabernaculon sapa lugarapar mantaspäna?

¹² Chʼiwi. Tabernaculosa Jerusalén markan qhepat luraskäna uka templonakasa, manqhajj niya pachpak luratänwa. Uka manqhanjja, ‘Santompi’ ‘Santisimompiw’ utjäna, mä cortinamp jaljatarakïnwa (Heb. 9:2-5; Éx. 26:31-33). Santo lugaranjja, qorit lurat mä candelabrompi, incienso nakhayañatak mä altarampi, Diosar loqtañatak tʼantʼan mä mesampiw utjäna. ‘Sacerdotet serviñatak uttʼayatäpkäna’ ukanakakiw sagrado lurañanakapamp phoqañatakejj Santo lugarar mantapjjaspäna (Núm. 3:3, 7, 10). Santísimo lugaranjja, pactor mantat arcaw ukankäna, ukajj qorit luratänwa, Jehová Diosajj ukankaskatapwa uñachtʼayarakïna (Éx. 25:21, 22). Jachʼa jilïr sacerdotekiw cortin pasaspäna, Santísimo lugararus mantaspäna.  Juchanakat Qʼomachasiñ Urojja, maran may kutiw amtasïna, uka uruw pachpa juchanakapa ukhamarak markan juchanakap qʼomachañatakejj animalanakan wilapamp mantirïna (Lev. 16:2, 17). Tiempompejja, Jehová Diosajj espíritu santop toqew kunanakatï tabernaculon utjkäna ukanakajj kunanakamp sasisa uk qhanañchäna (Heb. 9:6-8). e

13. ¿Santomp Santisimompejj kunamp sasisa?

¹³ Kunatï cheqäki. Espíritu santomp ajllit 144.000 cristianonakaw utji, jupanakajj wali sum Jehová Diosamp apasipjje. Jesusamp chikaw alajjpachan sacerdotenakat servipjjani (Apoc. 1:6; 14:1). Aka oraqenkasipki ukhaw Diosajj espíritu santopamp jupanakar ajlli, wawanakapjams katoqaraki. Tabernaculonkir Santo lugarajja, kunja sumas Diosamp apasipjje ukwa uñachtʼayi (Rom. 8:15-17). Tabernaculonkir Santísimo lugarajja, kawkjantï Jehová Diosajj jakki uka alajjpachamp sasiwa. Santompi Santisimomp jaljki uka “cortinajj” Jesusan jañchi cuerpopamp sasiwa. Jañchi cuerpopajja, Diosan templopan Jachʼa Jilïr Sacerdotjam alajjpachar mantañatwa jarkʼäna. Jañchi cuerpop jaqenak layku sacrificiot loqtasisajja, Jesusajj taqe ajllit cristianonakatakiw alajjpachan jakapjjañapatak mä thaki jistʼaräna. Alajjpachar sarañatakejja, ajllitanakajj jañchini chʼakhani cuerponakap jaytjjapjjañaparakiwa (Heb. 10:19, 20; 1 Cor. 15:50). Jesusajja, jiwatat jaktjjasajj Diosan templopankir Santísimo lugararuw mantäna, tiempompejj ukanwa ajllit cristianonakajj Jesusamp chik tantachtʼasipjje.

14. Hebreos 9:12, 24-26 textorjamajj ¿kunatsa Jehová Diosan templopajj wali jilanki?

¹⁴ Cheqpachans Jehová Diosajj jupa saparuk adorasiñapatak uttʼayki ukajja, wali jilankiwa. Jesucristojj juchampit jiwañampit kutsuykistu Jachʼa Jilïr Sacerdotet sirvki ukarjamaw ukajj uttʼayasiwayi. Israel markan jachʼa jilïr sacerdotepajj mantkäna uka Santísimo lugarajja, jaqenakan amparapamp luratakïnwa, animalanakan wilapampiw ukar mantarakïna. Ukampis Jesusajj taqet sipans jukʼamp santöki uka lugararuw mantäna: “pachpa alajjpacharuw jupajj mantäna”, Jehová Diosan nayraqataparu. Ukanwa taqe jiwasanak layku churkäna uka perfecto jakäwipajj qhawqha valoranisa uk katuyäna, ‘ukhamat jupa pachpa sacrificiot loqtasisajj jucha chhaqtayañataki’ (Hebreos 9:12, 24-26 liytʼäta). Jesusan sacrificiot loqtasitapaw taqet sipans jilanki, ukaw juchanakas phoqatpach qʼomachi. Alajjpachan jakañsa jan ukajj aka oraqen jakañs suytʼaskstanjja, taqeniw Jehová Diosarojj templopan adorsna ukwa jichhajj yatjjataskañäni.

15. ¿Khitinakas tabernaculon patiopan servipjjäna?

¹⁵ Chʼiwi. Tabernaculon mä patiow utjäna, uka patiojj jachʼänwa, telamp muytayatarakïnwa, ukanwa sacerdotenakajj lurañanakapamp phoqapjjäna. Pation cobret lurat mä jachʼa altaraw utjarakïna, ukanwa nakhantayat ofrendanakajj loqtasïna. Uka pationjja, cobret lurat mä jachʼa fuentew utjarakïna, ukanwa sacerdotenakajj sagrado lurañanakapamp janïr phoqkasajj umamp jarisipjjerïna (Éx. 30:17-20; 40:6-8). Qhepat luraskäna uka templonakanjja, anqäjjankir patiow utjarakïna, ukanwa jan sacerdotëpkäna ukanakajj Diosar adorapjjäna.

16. ¿Khitinakas Diosan templopan manqha pations anqäjj pations servipjje?

¹⁶ Kunatï cheqäki. Aka oraqenkasipki uka ajllit cristianonakajja, janïr Jesusamp chik sacerdotenakat sirvkasajj Diosan templopankir manqhäjj pationwa Jehová Diosar jan jitheqtas servipjje. Tabernaculompin templompin utjkäna uka jachʼa uma fuentejja, sarnaqäwinsa Diosar serviñansa kunatsa qʼomäñajj wali wakiskiri ukwa ajllitanakarusa taqe cristianonakarus amtayistu.  Walja jaqenakat uñtʼatäpki, Criston jilanakapar jan jitheqtas apoyapkaraki ukanakajj ¿kawkinsa Diosar adorapjje? Apóstol Juanajj ‘Diosan tronop nayraqatanwa’ jupanakar uñjäna, ‘uruy arumarakiw Diosar servisipkäna’. Walja jaqenaka sasin uñtʼatäpki uka jaqenakajja, aka oraqenwa Diosan templopankir anqäjj patiopan servisipki (Apoc. 7:9, 13-15). ¡Jehová Diosar templopan adoratasat walpun yuspärtanjja!

17. ¿Kuna sacrificionaksa Jehová Dios laykojj lursna?

¹⁷ Taqpach cristianonakaw Jehová Diosarojj sacrificionak loqtsna, ukajj mä privilegiowa. ¿Kunanak lurasas sacrificionak loqtsna? Tiemposampi, chʼamasampi, utjirinakasamp Diosan Reinopar yanaptʼasaw sacrificionak loqtsna. Kunjamtï apóstol Pablojj hebreo cristianonakar siskänjja, “jachʼañchir sacrificio Diosar loqtapjjapuniñäni, mä arunjja lakasat misturi arunakampejja sutipat taqenir yatiyapjjañäni” (Heb. 13:15). Jiwasatï Jehová Diosar serviñatak qhawqtï lurirjamäktan uk lurañatak chʼamachasiñäni ukhajja, jupar adoratas mä privilegiot uñjataswa uñachtʼayañäni.

18. Hebreos 10:22-25 textorjamajj ¿kunanaksa lurañasapuni, ukat kunanaks jan armañasäki?

¹⁸ (Hebreos 10:22-25 liytʼäta). Hebreonakar mä carta qellqkäna uka qhep qhepa arunakapanjja, Jehová Diosar adorkasajj kunanaks lurañasapuni ukwa Pablojj qhanañchäna. Jehová Diosar orasiñasa, suytʼäwisat yaqhanakar parlañasa, jilat kullakanakasamp tantachtʼasiñasa, “[Jehová] Diosan urupajj jakʼankjjatap yatisajj” maynit maynikam chʼamañchtʼasiñas kunja wakiskirisa uka toqetwa parläna. Apocalipsis libron qhep qhepa capitulonakapanjja, Jehová Diosan angelapajj akham siwa: “¡Diosar adoram!” sasa. Uk lurañajj kunja importantesa uk qhanstayañatakejja, pay kutiw ukham arsu (Apoc. 19:10; 22:9). Kunanaktï Jehová Diosan jachʼa templopat yateqawayktan uka jan fácil amuykañ yatichäwinak janipun armapjjañäniti, jachʼa Diosasar adorañajj kunja jachʼa privilegiosa uk janirak armapjjañäniti.