Betelankir jilatanakajj Staten Island (Nueva York) markan mä mara jilaw mä estación de radio utjañapatak mä uta lurasipkäna, uka radiojj WBBR satänwa. Oraqet qoqanak apsusajja, mä jachʼa uta trabajirinakatakejj lurapjjäna, radiotakejj yaqha uta lurapjjarakïna. Uka utanak lurañ tukuyjjapjjäna ukhajja, jilatanakajj wali kusisitaw radio toqe parlañatakejj equiponak instalapjjäna. Ukampis yaqhep jan waltʼäwinakar saykatapjjañapänwa.

Nayraqatajj radion jachʼa antenap instalañaw jilatanakatakejj wali chʼamäna. Uka antenajj largorojj 91 metronak ukchʼänwa, winktʼayataw 61 metronakan pä jachʼa lawanakar warkkatasiñaparakïna. Qalltan uchapkäna uka antenajj janiw waltʼkänti. Ukampis Jehová Diosan yanaptʼapampejj uka antena uchapjjänwa, ukan yanaptʼir Calvin Prosser jilatajj akham siwa: “Janitï qalltan uka antena uchañatak kuna problemas utjkaspänjja, ‘nanakaw uk uchapjjta’ sasaw jachʼañchasipjjeriskayäta” sasa. Jilatanakajj Jehová Diosaruw jachʼañchapjjäna. Ukampis yaqha jan walinakaruw saykatapjjañaparakïna.

Niyakejjay radion parlañajj ukhak qalltasiskchïnjja, janiw taqpach equiponakajj utjkänti. Ukampis jilatanakajj uka jakʼan lurat mä merqʼe transmisor jikjjatapjjäna, 500 vatios ukhanirakïnwa. Mä micrófono alañat sipansa, mä telefonon jiskʼa microfonopak uchapjjäna. Ukhamwa febrero phajjsin mä arumajj taqe ukanakamp radion parlañ yantʼapjjäna. Ukan parlañatakejj janiw mä programajj utjkänti, ukatwa jilatanakajj Reino toqet parlir cancionanak cantapjjäna. Kunas uka arumajj pasäna uk amthapisajja, Ernest Lowe jilatatakejj laruñjamänwa. Uka arumajj cantasipkäna ukhajja, juez Rutherford b jilataw jupanakar telefonot  jawsatayna. Uka jilatajj Brooklyn markanwa jupanakar radion istʼatayna, uka markajj uka lugarat mä 25 kilometronak sarañankänwa.

Rutherford jilatajj “¿kunas ukajja? Jiwayapjjam. Phisitunakjamaw ukan wararipjjtajja” sasaw sawkasiñat jupanakar säna. Jilatanakajj phenqʼasiñat jankʼakiw uk radio jiwtʼayapjjäna. Ukampis uka radion sum funcionatap yatjjapjjänwa, radion parlañatakis wakichtʼatäjjapjjarakïnwa.

24 de febrero de 1924 maranjja, Rutherford jilatajj “Mesiasan Reinopatakiw” uka radio Diosar katuyäna, ukharakiw nayrïr transmisionamp qalltasïna. Uka radiojj “taqe jaqenakan Biblian cheqa yatichäwinakap yatipjjañapataki, kuna tiemponakans jakasktan uk amuyapjjañapatakiw” utji sasaw jilatajj sarakïna.

Uka nayrïr programajj wali sumaw mistüna. Ukjjarojj 33 maranakampiw Diosan markapajj WBBR radio toq yatiyäna.

Julio de 1924 maran Estudiantes de la Biblia ukankir jilat kullakanakajj Columbus (Ohio) markanwa mä asambleatak tantachasipjjäna. Yaqha markanakat jutir jilat kullakanakajj alemán, árabe, francés, griego, Europat alay toqen parlaskäna uka arunakata, inglés, italiano, lituano, polaco, ruso ukat ucraniano arunakanwa discursonak istʼapjjäna. Uka asamblean yaqhep discursonakapajj radio toqew jaqenakar istʼayasïna, Ohio State Journal sat periodicorojj uka asambleat parlir informenak apsuñapatakiw mayipjjarakïna.

Janiw ukakïkänti, jueves 24 de julio urojj 5.000 jila jilat kullakanakaw predikir mistupjjäna. Niya 30.000 libronak lakirapjjäna, waranq waranqaniruw Bibliat yatichañ qalltapjjarakïna. Uka urun “uk lurañajj wali kusiskañänwa” sasaw inglés arut qellqatäkäna uka Yatiyañataki revistajj säna.

Maysa toqetjja, viernes 25 de julio urojj jan ajjsartʼasaw Rutherford jilatajj mä documento liytʼäna, ukanwa religión pʼeqtʼirinakarojj juchañchasïna. Uka documentojj leyinakarjam qellqtʼatänwa, “política pʼeqtʼirinakasa, religión pʼeqtʼirinakasa, empresanak pʼeqtʼirinakas kunatï cheqäki uk yateqapjjañapataki, ukanak toq bendicionanak katoqapjjañapatakiw jaqenakar jarkʼapjje” sasaw ukan qhanañchäna. Ukat “uka jaqenakajj Sociedad de Naciones ukarus apoyapkaspa, uka organización toqes Diosajj jaqenakar apnaqkaspa” ukhamwa qhanañchasirakïna. Jilat kullakanakajj jan ajjsartʼasaw jaqenakar uk yatiyapjjañapäna.

Uka asambleajj kunjamsa jaqenakar chʼamachtʼäna uk akham sasaw Yatiyañataki revistajj säna:  “Columbus markan apaskäna uka asambleajj Tatitun taqpach ejercitoparuw wal chʼamañchtʼawayi, [...] enemigojj kunayman jan walinakampis jupanakar jan waltʼaykchejja, jupanakajj predicañatak jukʼamp chʼamañchtʼatäpjjewa” sasa. Leo Claus jilatajj uka asambleat akham sarakïnwa: “Wali kusisitaw uka juchañchäwi arunak yatiyirejj sarañ amtapjjayäta” sasa.

Octubre phajjsinjja, jilat kullakanakajj Eclesiásticos denunciados (Ecclesiastics Indicted) tratadonakwa lakirañ qalltapjjäna, ukajj kuntï Rutherford jilatajj asamblean liytʼkäna uka pachpa documenton copiapänwa. Cleveland (Oklahoma) sat jiskʼa markanjja, Frank Johnson jilatajj ratukiw uka qellqatanak lakiräna, jilat kullakanakan jupar irptir sarapjjañapatakejj 20 minutonak faltaskäna ukhaw territoriopan lakirañ tukuyjjäna. Juparojj predicatapat wali colerat jaqenakaw thaqasipkäna, ukatwa taqenin uñjkatajj callen jan suykaspänti. Ukhamasti jilatajj uka jakʼankir mä iglesianwa imantasïna. Uka iglesian chʼusakïtap uñjasajj tatacuran Bibliaparu ukat sapa asientoruw uka tratadonak jaytäna. Ratukirakiw uka iglesiat kutsunïna. Tiempo utjaskipanjja, yaqha pä iglesianakar sarasaw uka pachp luräna.

Frank jilatajj jankʼakiw irptapjjañapäkäna uka lugarar kuttʼjjäna. Jupar thaqapkäna uka chachanakamp jan katjayasiñatakejja, gasolinera uta qhepäjjaruw imantasïna. Uka chachanakajj uka cheq autot pasasajj janiw jilatar uñjapkänti. Jupanakajj sarjjapjjäna ukhaw uka jakʼan predicasipkäna uka jilat kullakanakajj Frank jilatar irptasajj sarjjapjjäna.

Jupanakat mä jilatajj akham sänwa: “Uka markat mistjjapjjayäta ukhajja, jilatajj sarkäna uka kimsa iglesianak jakʼwa pasapjjayäta. Mä 50 jila jaqenakaw uka iglesia nayräjjanakan saytʼatäsipkäna. Yaqhepajj uka qellqatat liytʼasipkäna, yaqhepasti pastoraparuw uñjjatayasipkarakïna. ¡Niyapuniw katjayasipjjayäta! Ukampis Jehová Diosaruw wal yuspärapjjayäta, jupaw jarkʼaqapjjetäna, Reinon enemigonakapamp jan katjayasiñatakis yanaptʼapjjetäna” sasa.

Yaqha markanakanjja, ukhamarakiw jilat kullakanakajj jan ajjsartʼas predicapjjäna. Francia markat alay toqenjja, Józef Krett jilatajj uka markar jakir sarapkäna uka polaco mineronakaruw predicäna. “Niyaw jiwatanakajj jaktanipjjani” sat discurso jilatajj arstʼañapäna. Uka tantachäwitak invitacionanakajj niy lakirasjjäna ukhajja, uka markankir tatacurajj jan sarapjjañapatakiw iglesiapankirinakar mayïna. Ukampis janiw ukhamäkänti, antisaw 5.000 jila jaqenakajj uka tantachäwir sarapjjäna, ¡uka tatacuras ukar sararakïnwa! Józef jilatajj kunarutï uka tatacurajj creyki uka toqet arstʼañapatakiw jupar mayïna, ukampis uka tatacurajj janiw munkänti. Diosan Arupat wal yatiñ munapjjatapat taqpach qellqatanak churatapwa Józef jilatajj yatiyäna (Amós 8:11).

África toqenjja, Claude Brown jilatajj Costa de Oro toqeruw suma yatiyäwinak yatiyir saräna, jichhajj Ghana satäjjewa. Discurso arstʼatanakapatsa, qellqatanak lakiratapats jankʼakiw Biblian cheqa yatichäwinakapajj ukan yatiyasïna. Farmacia toqet estudiaskäna uka John Blankson jilatajj Claude jilatan mä discursop istʼäna. Uk istʼasajj jankʼakiw cheqätap amuyäna. John jilatajj akham sänwa: “Kunatï Biblian cheqäki uk yatiñajj wal chʼamañchtʼitäna, ukatwa Farmacia toqet estudiaskayäta ukan jankʼak parlañ qalltarakiyäta” sasa.

Mä urojja, John jilatajj mä iglesia anglicana ukaruw saräna, ukanwa tatacurarojj Trinidad  toqet jisktʼäna, jilatajj uka yatichäwin kʼarïtap sum amuyjjäna. Ukampis uka tatacurajj akham arnaqjasaw jilatar alisnuküna: “¡Jumajj janiw cristianöktati! ¡Supayan wawapätawa! ¡Saram akata!” sasa.

Utar purisajja, John jilatajj mä carta uka tatacuratak qellqäna, uka cartanwa Trinidad toqet mä tantachäwin qhanañchañapatak mayïna. Tatacurajj Farmacia toqet yatichaskäna uka pʼeqtʼir profesoran oficinapar sarañapatakiw jilatar mayïna. Ukanwa uka profesorajj cheqapunit uka tatacurar qellqäna janicha uk jilatar jisktʼäna.

“Jïsa, qellqaskapuntwa” sasaw jilatajj säna.

Profesorapasti, tatacurat disculpasiñapatakejj yaqha carta qellqañapatakiw jilatar mayïna.

Ukatwa jilatajj akham sasin qellqäna: “Profesorajajj juma tatacurat disculpasiñajatakiw aka carta qellqañ mayitu, ukampis kʼarinak yatichatam reconosïta ukhakiw nayajj jumat disculpasirisma” sasa.

Uka profesorapajj mayjtʼasisaw jilatar akham sasin jisktʼäna: “John, ¿cheqapunit jupar ak qellqañ munta?” sasa.

“Jïsa profesor. Ukak nayajj qellqerista” sasaw jilatajj säna.

Profesorajj akham sarakïnwa: “John, akat alisnukupjjätamwa. Janiw Gobiernon Iglesiapankir tatacura contra parlasajj Gobiernotak trabajkasmati” sasa.

Ukham satajj akham sasaw jilatajj sarakïna: “Profesor, jumajj yatichapkista ukhajj ¿janit jan sum amuyapkta uka cheqanak wasitat jisktʼasipksma?” sasa.

Profesorajj “jïsa, jisktʼasipjjestawa” sasaw säna.

Jilatajj sarakïnwa: “Uka tatacurampejj ukaw pasaraki. Jupajj Bibliat yatichasipkitäna ukhajj nayajj mä toqet jupar jisktʼasta, ukat janiw uka jisktʼar qhanañchkituti. Ukhamajj ¿kunatarak jupajj disculpasiñaj mayitaspasti?” sasa.

John jilatarojj janiw alisnukupkänti, janirakiw disculpasiñatakejj qellqkänti.

Kunanakatï uka marajj luraskäna ukanak akham sasaw Yatiyañataki revistajj qhanañchäna: “Jiwasajj Davidjamarakiw cheqpachans akham sistanjja: ‘Jumaw nayarojj guerran nuwasiñatak chʼam churitäta’ sasa (Salmo 18:39). Uka marajj wali chʼamañchtʼkir luräwinakaw utjäna, kuna laykutejj kunjamsa Diosajj yanaptʼawayapjjetu ukwa uñjawayapjjta. [...] Tatitun wawanakapajj [....] wali kusisitaw yatiyasipki” sasa.

Uka mara tukuyanakarojja, jilat kullakanakajj jukʼampiw radio toqejj Diosan Arupat yatiyañ munapjjäna. Ukatwa Chicago markan yaqha estación de radio utjañapatak chʼamachasipjjäna, uka radiojj WORD satänwa, ukajj inglés arut traducitajj Diosan ARUPA sañ muni, 5.000 vatios ukhanirakïnwa. Ukhamatwa Diosan Reinopat suma yatiyäwinakajj Canadá marka alay toqerus purïna.

1925 maranjja, Jehová Diosajj Apocalipsis capítulo 12 sum amuyapjjañapatakiw jilat kullakanakar yanaptʼäna. Uka textot mayj amuyasjjepanjja, yaqhepanakajj janiw Jehová Diosar sirvjjapjjänti. Ukampis waljaniw kunatï alajjpachan pasaskäna uk amuyasasa, kunjamsa ukajj aka oraqenkir markaparojj yanaptʼaspa uk amuyasas wal kusisipjjäna.