41 YATICHÄWI
CANCIÓN 13 Cristot yateqasipjjañäni
Jesusan aka oraqen 40 qhepa urunakapat yateqasipjjañäni
“Jupanakajj 40 urunakaw [Jesusar] uñjapjjäna, jupasti Diosan Reinopatwa parlarakïna” (HECH. 1:3).
¿KUNANAKATSA YATJJATASKAÑÄNI?
Jesusajj jaktanisin 40 urunakamp aka oraqenkkäna ukat kunsa yateqsna ukwa yatjjataskañäni.
1, 2. Jesusan pä discipulonakapajj Emaús markar sarasipkäna ukhajj ¿kunas pasäna?
KHÄ 33 maran 16 de nisán urunjja, Jesusan discipulonakapajj wali llakitäpjjänwa, sustukïpjjarakïnwa. Jupanakat paninejj Jerusalenat Emaús markaruw sarasipkäna, uka markajj Jerusalenat 11 kilometronak jayankänwa. Uka pä chachanakajj wali llaktʼatäpjjänwa, kuna laykutejj arkapkäna uka Jesusaruw jiwayapjjäna, Mesiasajj musparkañanak judionak laykojj lurani sasaw suyapjjarakïna, ukampis Mesiasajj jiwatäjjänwa. Ukhamaruw kuntï jan suyapkäna ukajj pasäna.
2 Mä jan uñtʼat jaqew jupanakar jakʼachasisajj jupanakamp chik saräna. Kunanakatï Jesusar paskäna ukanakat wali llakitäpjjatapwa jupanakajj arstʼasipjjäna. Ukjjarusti mä toqetwa jupanakamp parläna, uksti jupanakajj janipuniw armapkänti. ‘Moisesana ukhamarak taqe Profetanakan Qellqatanakapat parlañ qalltasajja’, uka jan uñtʼat jaqejj kunatsa Mesiasajj tʼaqesiñapäna jiwañaparakïna uka toqetwa qhanañchäna. Emaús markar purjjapjjäna ukhajja, uka pä chachanakajj Jesusamp parlapjjatapwa amuyasipjjäna. Mesiasan jakaskatap yatisajj walpun kusisipjjpachäna (Luc. 24:13-35).
3, 4. 1) ¿Kunas Jesusan discipulonakapar yanaptʼäna, ukat kunsa lurapjjarakïna? (Hechos 1:3). 2) ¿Kunanaksa aka yatichäwin yatjjataskañäni?
3 Jesusajj jiwatat jaktasin 40 urunakamp aka oraqenkkäna ukhajja, walja kutiw discipulonakapar uñstäna (Hechos 1:3 liytʼäta). Jesusajj llakitäpkäna sustukïpkarakïna uka discipulonakaparuw chʼamañchtʼäna, ukatwa jupanakajj wal kusisipjjäna, confianzampi, jan ajjsartʼasaw Diosan Reinopat predicapjjäna, yatichapjjarakïna. a
4 Uka 40 urunakan kuna kusiskañ luräwinaktï Jesusajj lurawaykäna ukanakat waljanakwa yateqsna. Aka yatichäwinjja, kunsa Jesusajj uka urunakan luräna ukwa yatjjataskañäni: 1) discipulonakaparuw chʼamañchtʼäna, 2) Qellqatanakat jukʼamp sum amuyapjjañapatakiw yanaptʼäna, 3) jukʼamp luräwinak katoqapjjañapatakiw yatichäna. Ukanakat yatjjatkasajja, kunjamsa Jesusat yateqassna ukwa yatjjataskarakiñäni.
MAYNINAKAR CHʼAMAÑCHTʼAÑÄNI
5. ¿Kunatsa Jesusan discipulonakapajj chʼamañchtʼatäñ munapjjäna?
5 Jesusan discipulonakapajj chamañchtʼatäñwa munapjjäna. Kuna laykutejj Jesusar sapür arkañ laykojj jupanakat yaqhepajj utanakapa familianakapa negocionakapwa jaytapjjäna (Mat. 19:27). Yaqhepajj Jesusan arkiripäjjapjjatap laykojj yaqhachataw uñjasipjjäna (Juan 9:22). Jesusan Mesiasätap creyipjjatap laykuw taqe uka sacrificionak lurapjjäna (Mat. 16:16). Ukampis Jesusajj jiwatäjjäna ukhajja, kuntï suytʼasktan ukajj janiw phoqasjjaniti sasaw amuyapjjäna, wali llakitäpjjarakïnwa.
6. ¿Kunsa Jesusajj jiwatat jaktasin luräna?
6 Jesusajj jupan jiwatapat wali llakitäpjjatap sum amuyäna, ukajj janis Diosar confiyjjapjjaspa ukham janiw sañ munkänti. Ukatwa jaktkäna ukürpachajj amigonakapar chʼamañchtʼañ qalltäna. María Magdalenajj sepulturapan jachaskäna ukhaw Jesusajj jupar uñstäna (Juan 20:11, 16). Párrafo 1 ukan parlaniwayktan uka pä discipulonakarus uñstarakïnwa. Apóstol Pedrorus uñstarakïnwa (Luc. 24:34). ¿Kunsa Jesusat yateqsna? Ukatakejj María Magdalenar uñstkäna uka toqet parltʼañäni.
7. ¿Jesusajj kun luraskirsa Mariar uñjäna, ukat kunsa jupa laykojj luräna? (Juan 20:11-16; dibujo uñjjattʼarakïta).
7 (Juan 20:11-16 liytʼäta). 16 de nisán urunjja, alwa toqerojj walja warminakaw Jesusan sepulturaparojj sarapjjäna (Luc. 24:1, 10). Jupanakat maynïrejj María Magdalenänwa. Uka Mariajj Jesusan sepulturapar purïna ukhajja, chʼusakïtapwa uñjäna. Ukatwa Pedrompir Juanampir yatiyir tʼijüna, jupanakajj tʼijukamaw Jesusan sepulturapar sarapjjäna, Mariajj jupanakan qhepapwa tʼijurakïna. Uka pä discipulonakajj Jesusan jan sepulturankatap uñjasajj utanakaparuw kuttʼjjapjjäna. Ukampis Mariajj jachtʼasisaw ukankaskäna. Jesusan jupar uñchʼukiskataps janiw amuyaskänti. Mariar jachaskir uñjasajj wal jupat sinttʼasïna, ukatwa Mariar uñstasajj chʼamañchtʼäna. Jupamp parlasajj aka mä importante luräw churäna: Jesusan jilanakaparuw jupan jaktatapat yatiyañapäna (Juan 20:17, 18).
Jesusat yateqasisajja, desanimatäpki ukanakajj kunjamäsipkisa ukwa amuyañasa, chuymachtʼañasarakiwa. (Párrafo 7).
8. ¿Kunsa Jesusat yateqasisajj lurañasa?
8 ¿Kunjamsa Jesusat yateqasitas uñachtʼaysna? Jilat kullakanakarojj Jehová Diosar servisipkakiñapatakiw chʼamañchtʼsna. Ukatakejj Jesusat yateqasisaw kuna llakinakanïpjjesa uk amuyañasa, kunjamas jikjjatasipjje uk amuyasajj chuymachtʼañasarakiwa. Jocelyn kullakat amuytʼañäni, kullakapajj mä accidentenwa jiwäna. Jupajj akham siwa: “Walja phajjsinakaw wali llakitapunïyäta” sasa. Ukampis mä jilatampi esposapampiw utapar invittʼapjjäna, jupar taqe chuyma istʼasajja Jehová Diosatakejj qhawqha valoranisa ukwa amtayapjjäna. Jocelyn kullakajj akham sarakiwa: “Janiw kamachtʼirjamäkayätsa, thayampi jallumpi jawqʼsut lamar qota taypinkkiristsa ukhamwa amuyasiyäta, ukampis Jehová Diosaw uka jilat kullak toqejj yanaptʼitäna, jupanakajj Jehová Diosar serviskakiñatakiw yanaptʼapjjetäna” sasa. Jiwasatï mayninakar chʼamañchtʼañ munstan ukhajja, chuymatpach arstʼasisipki ukhajj wali atencionampiw istʼañasa, ukhamatwa jupanakar chuymachtʼañäni, Jehová Diosar servisipkakiñapatakiw chʼamañchtʼarakiñäni (Rom. 12:15).
QELLQATANAKAT JUKʼAMP SUM AMUYAPJJAÑAPATAK YANAPTʼAÑÄNI
9. ¿Kunsa Jesusan discipulonakapajj jan sum amuyapkäna, ukat kunjamsa Jesusajj jupanakar yanaptʼäna?
9 Jesusan discipulonakapajj Diosan arunakaparojj creyipjjänwa, ukarjam sarnaqañatakis chʼamachasipjjarakïnwa (Juan 17:6). Ukampis kunatsa Jesusarojj jan walinak lurir mä jaqerjam jiwayapjjäna uk janiw amuyapkänti. Jesusajj jupanakan suma chuymanïpjjatap yatïnwa, Qellqatanakat jukʼamp sum amuyapjjañapakiw wakisïna (Luc. 9:44, 45; Juan 20:9). Ukatwa Qellqatanakat sum amuyapjjañapatak yanaptʼäna. Pä discipulonakajj Emaús markar sarasipkäna ukhajj kunsa Jesusajj jupanakar uñstasin luräna uk amuytʼañäni.
10. ¿Kunjamsa Jesusajj Mesiasätap discipulonakapar qhanañchäna? (Lucas 24:18-27).
10 (Lucas 24:18-27 liytʼäta). Jesusajj janiw jankʼakejj jupajj khitïnsa uk pä discipulonakapar qhanañchkänti. Jan ukasti jupanakarojj may jisktʼäna. ¿Kunatsa uk luräna? Inas kunsa amuyasipki kunjamas chuymapan jikjjatasipjje uk arstʼasipjjañap munchïna. Jesusaw Israel markarojj romanonakat salvani sasaw jupar sapjjarakïna. Llakinakap arstʼasipjjäna ukhajja, Jesusajj Qellqatanakampiw walja profecianak phoqasitap jupanakar amuytʼayäna. b Arumjjarusti mayni discipulonakapamp jikisisajj uka pachpa profecianakatwa qhanañchäna (Luc. 24:33-48). ¿Kunsa ukat yateqsna?
11, 12. 1) ¿Jesusajj kunjamsa Qellqatanakat qhanañchäna, ukat kunsa ukat yateqsna? (Fotonak uñjjattʼarakïta). 2) ¿Kunjamsa yatichiripajj Nortey jilatar yanaptʼäna?
11 ¿Kunjamsa Jesusat yateqasitas uñachtʼaysna? Bibliat yatichkasajj wali amuyumpiw yateqerisar jisktʼañasa, ukhamat kunanaksa amuyaski kunjamas chuymapan jikjjatasi uk yatiñataki (Prov. 20:5). Kunjamas chuymapan jikjjatasi uk yatisajja, kawkïr textonakas jupar yanaptʼaspa uk jupa pachpa jikjjatañapatakiw yanaptʼañasa. Ukjjarojj kunsa jupajj luraspa uk janiw sañasäkiti. Antisas kunsa Biblian liytʼki uka textonakat amuyi, kunjamsa ukanakarjam luraspa ukanakwa jisktʼsna. Jichhajj Ghana markankir Nortey jilatan experienciapat amuytʼañäni.
12 Nortey jilatajj 16 maranïkäna ukhaw Bibliat yateqañ qalltäna. Ukampis mä jukʼa tiempotjja, familiapajj jupa conträjjänwa. ¿Kunas Bibliat yateqaskakiñatakejj yanaptʼäna? Yatichiripajj Mateo capítulo 10 ukarjamaw cheqpach cristianonakan arknaqatäpjjañap amuytʼayäna. Nortey jilatajj akham siwa: “Familiajajj naya contra saytʼäna ukhajja, cheqpach religionankatajwa amuyayäta” sasa. Yatichiripajj Mateo 10:16 texton “chʼikïpjjam” siski uk uñachtʼayäna, ukat kunarutï creyki ukanak kunjamsa familiaranakapar qhanañchtʼaspa ukwa amuytʼayarakïna. Bautisasjjäna uka qhepatjja, Nortey jilatajj precursoräñ munäna, ukampis tatapajj universidadar sarañapwa munäna. Yatichiripajj kunsa Nortey jilatajj lurañapa uk sañat sipansa, jisktʼanakampi textonakampiw amuytʼayäna. ¿Kunsa Nortey jilatajj luräna? Precursorat serviñwa qalltäna. Ukhamïpansti tatapajj utapat alisnukjjänwa. Ukhaman uñjasitapat Nortey jilatajj akham siwa: “Mä suma amtar puritajat janiw akchʼas payachaskti” sasa. Diosan arunakapat amuytʼapjjañapatak mayninakar yanaptʼtan ukhajja, Diosar serviñan suma saytʼatäpjjañapatakiw yanaptʼtanjja (Efes. 3:16-19).
Jesusat yateqasisajja, Qellqatanakat sum amuytʼapjjañapatakiw mayninakar yanaptʼañasa. (Párrafo 11). e
LURÄWINAK KATOQAPJJAÑAPATAKIW JILATANAKAR YANAPTʼAÑASA
13. ¿Kunsa Jesusajj predicasiskakiñapatak luräna? (Efesios 4:8).
13 Jesusajj aka oraqenkkäna ukhajja, kuna lurañtï Awkipajj churkäna uk sum phoqäna (Juan 17:4). Ukampis “mä kuns sum lurasiñapatakejj naya pachpaw lurañajja” sasin janiw amuykänti. Kimsa mara chikatani aka oraqen predickasajja, uka pachpa luräwitakiw mayninakar yatichäna. Jesusajj discipulonakapar wal confiyäna, ukatwa jupanakarojj suma yatiyäwinak predicapjjañapatakisa, yatichapjjañapatakisa, Jehová Diosan wali valoran ovejitanakapar cuidapjjañapatakis confiyäna, discipulonakapat yaqhepajj inas 20 jila maranikïpjjchïna (Efesios 4:8 liytʼäta). Diosat jan jitheqtir uka chachanakajj Jesusamp chikaw wal trabajipjjäna. Ukhamäkchïnsa janïr alajjpachar kuttʼkasajj mä regalor uñtasitäpjjañapatakiw Jesusajj discipulonakapar yatichawayäna. ¿Kunjamsa uk yatichäna?
14. Jesusajj jiwatat jaktanisin 40 urunakamp aka oraqenkäna ukhajj ¿kunsa discipulonakapar yatichäna? (Dibujo uñjjattʼarakïta).
14 Jesusajj discipulonakaparojj qhana arunakampis ewjjtʼkchïnjja munasiñampiw ewjjtʼäna. Discipulonakapat yaqhepajj jiwatat jaktanitapat payachasipjjänwa, ukatwa jupanakar ewjjtʼäna (Luc. 24:25-27; Juan 20:27). Qollqe jikjjatañatak chʼamachasiñat sipansa, Diosan servirinakapar yanaptʼapjjañapatakiw ewjjtʼäna (Juan 21:15). Kunanaktï Diosar serviñan lurapkäna ukanak jan mayninakamp igualayapjjañapatakiw amtayarakïna (Juan 21:20-22). Reino toqet pantjat amuyunak utjatapatjja, cheqañchasajj predicapjjañapatakiw chʼamañchäna (Hech. 1:6-8). ¿Kunsa ancianonakajj Jesusat yateqasipjjaspa?
Jesusat yateqasisajja, congregacionan jukʼamp luräwinak katoqapjjañapatakiw jilatanakar yanaptʼañasa. (Párrafo 14).
15, 16. 1) ¿Kunjamanakatsa ancianonakajj Jesusat yateqasipjjatap uñachtʼayapjjaspa? 2) ¿Kunjamsa mä jilatan ewjjtʼapajj Patrick jilatar yanaptʼäna?
15 ¿Kunjamsa ancianonakajj Jesusat yateqasipjjatap uñachtʼayapjjaspa? Jilatanakaruw congregacionan jukʼamp luräwinak katoqapjjañapatak yanaptʼapjjañapa, wayna jilatanakarus ukhamaraki. c Ancianonakajj janiw jilatanakan perfectöpjjañap suyapkiti. Antisas munasiñampiw wayna jilatanakar experiencianïpjjañapatak ewjjtʼapjje, ukhamat humildëña, confiykayäña, mayninakar yanaptʼirïñ yateqapjjañapataki (1 Tim. 3:1; 2 Tim. 2:2; 1 Ped. 5:5).
16 Patrick jilatat amuytʼañäni. Jupajj waynitükäna ukhajja, chuym ustʼayir arunakampiw parlirïna, janirakiw mayninakarus munasiñap uñjirïkänti, kullakanakampis ukhamarakïnwa. Experienciani mä ancianow uk amuyäna, ukatwa Patrick jilatarojj munasiñampi qhana arunakap ewjjtʼäna. Patrick jilatajj akham siwa: “Nayar ewjjtʼatapat wal yuspärta. Munkayäta uka privilegionak mayninakar katoqer uñjasajj desanimasirïyätwa. Jilatan ewjjtʼapajj congregacionan mä privilegio katoqañat sipans humildëñataki, jilat kullakanakar munasiñamp uñjañatakiw yanaptʼitäna” sasa. Patrick jilatajj 23 maraniw ancianot uttʼayatäjjäna (Prov. 27:9).
17. ¿Kunjamsa Jesusajj discipulonakapar confiyatap uñachtʼayäna?
17 Janiw Jesusajj discipulonakaparojj predicapjjañapak maykänti, jan ukasti yatichapjjañapwa mayirakïna (Mateo 28:20 liytʼasajj “Enséñenles” siski ukwa español arut utjki uka Biblia de estudion notap liytʼäta). Inas discipulonakajj uka luräwi janis phoqerjamäpkaspa ukham amuyasipjjchïna. Ukampis jupanakajj uka luräwimp phoqapjjaspänwa, Jesusajj jupanakar confiyänwa, uk yatipjjañapwa munarakïna. Ukatwa jupanakar akham säna: “Kunjamtï alajjpachankir Awkejj nayar khitankitu ukhamarakiw nayajj jumanakar khitapjjsma” sasa (Juan 20:21).
18. ¿Kunjamsa ancianonakajj Jesusat yateqasipjjaspa?
18 ¿Kunjamsa ancianonakajj Jesusat yateqasipjjatap uñachtʼayapjjaspa? Experienciani ancianonakajj mayninakaruw luräwinak churapjjañapa, uka luräwinak phoqapjjañapatakiw yatichapjjañaparaki (Filip. 2:19-22). Salón qʼomachañana, mantenimiento lurañan yanaptʼapjjañapatakiw wayna jilatanakar mayipjjaspa. Maynir mä luräwi churasajja, ancianonakajj jupar yatichasa uka luräwimp sum phoqapjjani sasin amuyasaw jupar confiyapjjatap uñachtʼayapjje. Jichhak ancianot uttʼayat Matthew jilatajja, kunjamsa experienciani ancianonakajj jupar kunayman asignacionanak phoqañapatak yatichapjje, confiyapjjaraki ukat wal yuspäri. Jupajj akham siwa: “Pantjasiñajj utjakipuniwa, ukampis ancianonakajj uka pantjasitanakajat yateqañajataki, jutïrin jukʼamp sum lurjjañatakiw yanaptʼapjjetu” sasa. d
19. ¿Kun lurañsa amtañasa?
19 Jesusajj jaktanisin 40 urunakamp aka oraqenkkäna ukhajj mayninakaruw chʼamañchtʼäna, yaticharakïna. Ukhamajj Jesusat yateqasipuniñäni (1 Ped. 2:21). Jupaw ukatakejj yanaptʼistani, kuna laykutejj akham sasaw arsuwayi: “Nayajj sapürupuniw jumanakampïskta, akapachajj tukuskani uka tiempokama” sasa (Mat. 28:20).
CANCIÓN 15 ¡Diosan jilïr Yoqapar jachʼañchapjjañäni!
a Evangelionakasa Bibliankir mayni libronakasa Jesusajj jiwatat jaktanisin walja discipulonakapar uñstatapwa qhanañchi, akanakaruw uñstäna: María Magdalenaru (Juan 20:11-18); mayni warminakaru (Mat. 28:8-10; Luc. 24:8-11); pä discipulonakaru (Luc. 24:13-15); apóstol Pedroru (Luc. 24:34); mayni apostolonakaru, ukampis Tomás apostolojj janiw ukankkänti (Juan 20:19-24); mayni apostolonakaru, Tomás apostolojj ukankarakïnwa (Juan 20:26); paqallqo discipulonakaru (Juan 21:1, 2); 500 jila discipulonakaru (Mat. 28:16; 1 Cor. 15:6); Santiago jilaparu (1 Cor. 15:7); taqe apostolonakaru (Hech. 1:4), Betania jakʼanwa taqe apostolonakapar uñstarakïna (Luc. 24:50-52). Khitinakampirus Jesusajj uñstäna ukajj inas Biblian jan qellqatäkchiti (Juan 21:25).
b Mesiasat parlir profecianakat jukʼamp yatjjatañatakejja, “¿Prueban las profecías de la Biblia que Jesús fue el Mesías?” sat yatichäwi jw.org cheqan liytʼäta.
c Awisajj superintendente de circuito jilatanakarojj 25 maranit 30 marankamaw uttʼayasispa. Ukampis uka jilatanakajj ancianot servisajj experiencianïpjjañapawa.
d Kunjamsa wayna jilatanakarojj congregacionan jukʼamp luräwinak katoqapjjañapatakejj yanaptʼasispa uk yatiñatakejja, Yatiyañataki agosto de 2018, páginas 11 y 12, párrafos 15 al 17 liytʼäta, Yatiyañataki 15 de abril de 2015, páginas 3 al 13 liytʼarakïta.
e FOTONAKAT JUKʼAMP QHANAÑCHTʼAÑATAKI: Mä jilataw yateqeripar Qellqatanakajj kamsisa uk amuytʼayaski, Bibliat yateqeristi navidadatak adornonakapajj utjki uk jaqtañwa amtaraki.
