1. ¿Kuna regalonaksa Jesusajj churistu?

 JESUSJAM wali wajjtʼasirejj janiw aka oraqen utjkiti. Aka oraqenkkäna ukhajja, jilapartejj milagronak lurasaw jaqenakar yanaptʼäna (Luc. 9:12-17). Taqe jiwasanak layku jakañ vidap loqtasisajj mä jachʼa regalsa churawaykistaspa ukhamawa (Juan 15:13). Jiwatat jaktasajj jaqenakar yanaptʼaskakiwa. Kunjamtï arsuwaykänjja, jiwasar yatichañapatakisa chuymachtʼañapatakis Jehová Diosaruw espíritu santop mayïna (Juan 14:16, 17, nota; 16:13). Tantachäwinak toqew Jesusajj oraqpachankir jaqenakar discipulor tukuyaskakiñatak yatichistu (Mat. 28:18-20).

2. ¿‘Regalor uñtat churat chachanakajj’ khitinakäpjjesa? (Efesios 4:7, 8).

² ¿Kuna yaqha regalompsa Jesusajj churistu? Jesusajj alajjpachar makatjjäna ukhajja, ‘chachanak mä regalor uñtatwa churäna’ sasaw apóstol Pablojj qellqäna (Efesios 4:7, 8 liytʼäta). Jesusajj congregacionar kunayman toqet yanaptʼañatakiw ukanak luräna sasaw Pablojj qhanañcharakïna (Efes. 1:22, 23; 4:11-13). Jichhürunakanjja, ‘regalor uñtat churat chachanakajj’ siervo ministerialanakäpjjewa, ancianonakäpjjewa, superintendente de circuito jilatanakäpjjewa. a Jupanakajj janiw perfectöpkiti, pantjasirïpjjarakiwa (Sant. 3:2). Ukampis Tatit Jesucristojj jupanak toqew yanaptʼistu, cheqas jupanakajj wali valoran regalöpjjewa.

3. Kunjamsa Jesusajj mä regalor uñtat churkistu uka chachanakar yanaptʼsna uk mä uñachtʼäwimp qhanañchtʼam.

³ Jesusajj ‘regalor uñtat churkäna uka chachanakjja’, congregacionanakar chʼamañchtʼañatakiw churäna (Efes. 4:12). Ukampis uka wakiskir luräwimp phoqapjjañapatakejj taqeniw yanaptʼsna. Kunjamsa mä grupojj mä Salón del Reino lurapjje uk  amuytʼañäni. Yaqhepajj uka uta lurañanwa yanaptʼapjje, yaqhepasti manqʼanak wakichañana, kunanaktï necesitapki ukanak apañana, ukat yaqha ukhamanakanwa yanaptʼapjje. Siervo ministerialanakasa, ancianonakasa, circuito jilatanakas ukhamarakiw congregacionan lurañanakanïpjje, jiwasajj taqenirakiw parlatasampisa luratasampis jupanakar yanaptʼsna. Kunjamsa jupanakan wal trabajipjjatapajj yanaptʼistu, kunjamsa jupanakarusa uka regalo churkistu uka Jesusarus yuspäratas uñachtʼaysna uk jichhajj yatjjatapjjañäni.

‘MAYNINAKAR YANAPIR’ SIERVO MINISTERIALANAKA

4. Nayrïr patak maranakan ¿kunanak lurasas siervo ministerialanakajj ‘mayninakar yanaptʼapjjäna’?

⁴ Nayrïr patak maranakanjja, yaqhep jilatanakajj siervo ministerialat uttʼayatäpjjänwa (1 Tim. 3:8). Amuyatajj “mayninakar yanapirinaka” sasajj jupanakatwa Pablojj parlaskäna (1 Cor. 12:28). Ukhamajj siervo ministerialanakaw mä qhawqha lurañanakamp yanaptʼapjjäna, ukhamat ancianonakajj yatichañataki pastoreo lurañatak jukʼamp tiemponïpjjañapataki. Inas siervo ministerialanakajj Qellqatanak copiasin yanaptʼapjjchïna, jan ukajj kuna materialanakatï copiañatak wakiskäna ukanak alañamp yanaptʼapjjchïna.

5. ¿Kuna lurañanakampis siervo ministerialanakajj congregacionanakan yanaptʼapjje?

⁵ Kunanaksa siervo ministerialanakajj congregacionanakan lurapjje uk amuytʼañäni (1 Ped. 4:10). Aka lurañanakampiw yanaptʼapjjaspa: congregacionan cuenta apnaqañampi jan ukajj territorionakampi, qellqatanak mayiñampi, ukanak jilat kullakanakar churañampi, audio y video apnaqañampi, acomodadorat yanaptʼañampi, jan ukajj Salonan mantenimiento lurañampi. Taqe ukanakaw mä congregacionan sumar sarañapatak yanaptʼi (1 Cor. 14:40). Yaqhep siervo ministerialanakajj Cristianjam Jakañataki ukat Yatiyañataki tantachäwina, jan ukajj taqenitak discurso arstʼasaw yanaptʼapjje. Superintendente de grupo jilatan auxiliarapjamaw yanaptʼapjjarakispa. Awisasti mä ancianojj pastoreo lurañatakiw mä siervo ministerialar invittʼaspa.

6. ¿Kunanak lurapjjatapatsa siervo ministerialanakar wal yuspärtanjja?

⁶ ¿Kunatsa siervo ministerialanakan luratanakap wali valoranit uñjtanjja? Kamsapjjes yaqhep jilat kullakanakajj uk amuytʼañäni. Bolivia markankir Beberly b kullakajj akham siwa: “Siervo ministerialanakan yanaptʼapjjatapatjja, tantachäwinakajj wali sumawa. Ukhamïpan tantachäwinakan cantañasa, comentarionak arstʼañasa, discursonak istʼañasa, videonakata, fotonakata jan ukajj dibujonakat yateqañas wali sumawa. Tantachäwinakan seguro jikjjatasiñatakisa, videoconferencia toq tantachäwinakar conectasinipjjañapatakis yanaptʼapjjarakiwa. Tantachäw tukuyatar qʼomachañansa, cuentanak lurañans yanaptʼapjjewa, qellqatanaks horasaparuw churapjjetu. ¡Walpun jupanakar yuspärta!” sasa. Colombia markan jakasir Leslie kullakan esposopajj ancianowa. Kullakajj akham siwa: “Siervo ministerialanakajj walpun esposojar yanaptʼapjje. Janitï ukham yanaptʼapkaspajja, esposojajj jukʼamp ocupatäspawa. Taqe chuyma ukat jankʼak yanaptʼasirïpjjatapat walpun yuspärta” sasa. Cheqas taqeniw siervo ministerialanakan yanaptʼasirïpjjatapat wal yuspärtanjja (1 Tim. 3:13).

7. ¿Kunjamsa siervo ministerialanakar yuspäratas uñachtʼaysna? (Fotonak uñjjattʼarakïta).

⁷ Siervo ministerialanakan yanaptʼapjjatapat walsa chuymasan yuspärstanjja, Bibliajj “yuspärasirïpjjatam uñachtʼayapjjam” sasaw ewjjtʼistu (Col. 3:15). Finlandia markankir Daavid jilatajj kunjamsa yuspärasirïtap uñachtʼayi uk akham  siwa: “Mä tarjeta jan ukajj mä mensaje apayirïta, ukanjja mä textompi ukat kunjamsa uka siervo ministerialajj chʼamañchtʼitu jan ukajj kunatsa yanaptʼap wali valoranit uñjta ukwa qellqtʼirïta” sasa. Nueva Caledonia markankir Pascal jilatampi Jael kullakampejja, sapa kutiw siervo ministerialanakatak orapjje. Jilatajj akham siwa: “Congregacionajankir siervo ministerialanakat Jehová Diosar yuspärañatakejj orapjjapuntwa, jupanakampïñapatakisa yanaptʼañapatakis ruwtʼarapipjjaraktwa” sasa. Jehová Diosajj uka oracionanak istʼapuniwa, congregacionpacharuw yanaptʼaraki (2 Cor. 1:11).

CONGREGACIONAN ‘WAL TRABAJIR’ ANCIANONAKA

8. ¿Kunatsa ancianonakajj wal trabajisipki sasin Pablojj säna? (1 Tesalonicenses 5:12, 13).

⁸ Nayrïr patak maranakan jakir ancianonakajja, congregacionan wal trabajipjjäna (1 Tesalonicenses 5:12, 13 liytʼäta; 1 Tim. 5:17). Jupanakaw congregacionan irpapjjäna, tantachäwinak sarayapjjäna, mä wawakirakiw amtanakar puripjjäna. Congregacionanakar jarkʼaqañatakejj munasiñampiw jilat kullakanakar qhan ewjjtʼapjjarakïna (1 Tes. 2:11, 12; 2 Tim. 4:2). Janiw ukakïkänti, Diosar serviñan suma saytʼatäñatakisa familianakapar sum uñjañatakis wal chʼamachasipjjarakïna (1 Tim. 3:2, 4; Tito 1:6-9).

9. ¿Kuna lurañanakampis ancianonakajj phoqapjje?

⁹ Jichha tiemponjja, ancianonakajj wali ocupatäpjjarakiwa. Jupanakajj Diosan arunakap predicapjje (2 Tim. 4:5). Jupanakaw predicañan nayrankapjje, kawkïr territorionsa predicasispa ukwa organiztʼapjje, predicañatakis sum yatichañatakis yatichapjjarakistuwa. Juezanakat servisaw mayninakar munasiñampi jan yaqhachasiñamp uñjapjjaraki. Mä cristianojj jachʼa juchar purtʼasi ukhajja, ancianonakajj Jehová Diosamp wasitat sum apasjjañapatakiw jupar yanaptʼapjje. Congregacionan qʼomäñapatakis yanaptʼapjjarakiwa (1 Cor. 5:12, 13; Gál. 6:1). Jukʼampis ancianonakajj awatirinakat uñtʼatäpjjewa (1 Ped. 5:1-3). Suma wakichtʼat discursonakwa arstʼapjje, congregacionan taqenir uñtʼañatakiw chʼamachasipjje, pastoreonaks lurapjjarakiwa. Yaqhep ancianonakajj construccionansa, Salonan mantenimiento lurañansa, asambleas regionales ukanak organiztʼañansa, Comités de Enlace con los Hospitales ukanakansa, Grupos de Visita a Pacientes ukanakansa, yaqha lurañanakans yanaptʼapjjarakiwa. ¡Ancianonakajj jiwas laykojj wal trabajipjje!

10. ¿Kunanak lurapjjatapats ancianonakar wal yuspärtanjja?

¹⁰ Awatirinakajj sum ovejanakajar uñjapjjani, jupanakajj “janiw ajjsarjjapjjaniti, ni sustjasjjapjjanisa” sasaw Jehová Diosajj mä profecian arsüna (Jer. 23:4). Ukaw Finlandia markankir Johanna kullakan mamapajj wal usuntkäna ukhajj pasäna. Kullakajj akham siwa: “Kunjamas chuymajan jikjjatasta uk mayninakar awistʼañajj nayatak chʼamakiwa. Ukampis jan sum uñtʼkayäta uka ancianow wali pacienciamp istʼitäna, nayamp chikaw oräna, qhawqsa Jehová Diosajj munasitu uks amtayarakitänwa. Jilatajj kamsitänsa uk janiw sumpach amtaskti, ukampis janiw wal llakisjjayätti. Amuyatajj wakiskäna ukhaw Jehová Diosajj nayar yanaptʼañatak jupar khitanïna” sasa. ¿Kunjamsa congregacionamankir ancianonakajj yanaptʼawayapjjtam?

11. ¿Kunjamanakatsa ancianonakar yuspäratas uñachtʼaysna? (Fotonak uñjjattʼarakïta).

¹¹ Ancianonakarojj ‘luratanakapat’ yuspärsna ukwa Jehová Diosajj muni (1 Tes. 5:12, 13). Finlandia markankir Henrietta kullakajj akham siwa: “Ancianonakajj taqe chuymaw mayninakar yanaptʼapjje, ukhamäkchisa jupanakajj tiemponïpkaspasa, chʼamapajj janis tukuskaspa, jan ukajj janis kuna problemanïpkaspa ukham janiw sañ munkiti. Awisajj jupanakar akham  sistwa: ‘Jilata, suma chuyman ancianötawa, ukak sañ munayäsma’ sasa”. Turquía markankir Sera kullakajj akham siwa: “Ancianonakan lurañanakapamp phoqasipkakiñapatakejj chʼamañchtʼañaw wakisi. Nayajj tarjetanak jupanakatak qellqtʼirïta, manqtʼasiñatakiw invitta, jupanakampiw predikir misturakta” sasa. Inas mä ancianon mä kun luratapat chuymaman wal yuspärsta, ¿janit jupar yuspäratam uñachtʼaykasma? (1 Cor. 16:18).

CHʼAMAÑCHTʼIR CIRCUITO JILATANAKA

12. ¿Khitinak toqes Jesusajj congregacionanakar chʼamañchtʼäna? (1 Tesalonicenses 2:7, 8).

¹² Jesusajj yaqha regalo congregacionanakar churarakïna. Nayrïr patak maranakanjja, jupan yanaptʼapampiw Jerusalenankir ancianonakajj Pablompiru, Bernabeampiru, yaqha jilatanakampir superintendente de circuitot khitapjjäna (Hech. 11:22). ¿Kunatakis khitapjjäna? Kuntï siervo ministerialanakasa ancianonakas lurapki uk lurapjjañapatakiw khitapjjäna: jupanakajj congregacionanakaruw chʼamañchtʼapjjañapäna (Hech. 15:40, 41). Uka circuito jilatanakajj uka luräwimp phoqañatakejj walja sacrificionakwa lurapjjäna, awisajj mayninakar yatichañatakisa chʼamañchtʼañatakis niyaw vidaps aptʼasipjjäna (1 Tesalonicenses 2:7, 8 liytʼäta).

13. ¿Kuna lurañanakampis circuito jilatanakajj phoqapjje?

¹³ Circuito jilatanakajj wal viajipjje. Jupanakat yaqhepajj mä congregacionat yaqha congregacionar sarañatakejj walja kilometronak viajipjje. Sapa semanaw walja discursonak arstʼapjje, pastoreonak lurapjje, precursoranakatak tantachäw sarayapjje, ancianonakampiw tantachtʼasipjje, predicacionar mistuñatak tantachäwsa sarayapjjarakiwa. Discursonak wakichtʼapjje, asambleas de circuito  asambleas regionales ukanakwa organiztʼapjje. Precursoranakatak escuelanwa yatichapjje, circuitopankir precursoranakatak tantachäw organiztʼapjje, yaqha importante lurañanakampis phoqapjjarakiwa, awisajj sucursalan asignataw ukanak jankʼak lurapjjañaparaki.

14. ¿Kunanak lurapjjatapats circuito jilatanakar wal munastanjja?

¹⁴ ¿Kunjamsa circuito jilatanakajj congregacionanakar yanaptʼapjje? Turquía markankir mä jilatajj akham siwa: “Sapa kuti jilatajj visitapkitu ukhajja, jilat kullakanakar yanaptʼañatakejj jukʼamp tiempo apstʼasiñatakiw chʼamañchtʼitu. Walja circuito jilatanakaruw uñtʼawayta, ukampis jupanakat janipuniw khitis wali ocupatäkaspasa janis parljjayañjamäkaspa ukhamïrïkiti” sasa. Párrafo 10 ukan parlaniwayktan uka Johanna kullakajja, mä circuito jilatampiw predikir mistüna, ukampis janiw khitirus utanakapan jikjjatapkänti. Kullakajj akham siwa: “Ukhamäkchïnsa, janipuniw uka urut armaskäti. Ukhanakakiw pä kullakajajj yaqha lugarar jakir sarjjapjjäna, jupanakatjamajj wal llakisirakiyäta. Circuito jilatajj munasiñampiw chʼamañchtʼitäna, familiat jayan serviñajj mä qhawqha tiempokïniwa, machaq mundon walja tiempow juntuk servipjjäta sasaw amuytʼayarakitäna” sasa. Cheqas visitawayapki uka jilat kullakanakat waljaniw circuito jilatanakar munasipjje (Hech. 20:37-21:1).

15. 1) ¿Kunjamsa 3 Juan 5-8 textorjamajj circuito jilatanakar munasitas uñachtʼaysna? (Fotonak uñjjattʼarakïta). 2) ¿Kunjamsa congregacionan irpir jilatanakan esposanakapar yuspäratas uñachtʼaysna, ukat kunjamsa uk lursna? (“ Esposanakapat jan armasipjjamti” sat recuadro liytʼäta).

¹⁵ Apóstol Juanajj congregacionanakar chʼamañchtʼañatak visitapki uka jilatanakar sum katoqtʼañapatakiw Gayo jilatar chʼamañchtʼäna, akham sarakïnwa: “Jupanakajj viajipkani ukhajj kunjamtï Diosajj munki ukarjam jupanakar yanaptʼam” sasa (3 Juan 5-8 liytʼäta). ¿Kunjamsa  jiwasajj uk luraraksna? Circuito jilatarojj manqtʼasiñatakiw invitsna, uka semanatak predicañatak wakichtʼaski ukarjam predikir mistuñatakiw chʼamachasiraksna. Párrafo 6 ukan parlaniwayktan uka Leslie kullakajja, yaqha toqenakatwa yuspärasirïtap uñachtʼayi. Jupajj akham siwa: “Jehová Diosaruw kuntï circuito jilatanakajj necesitapki uk churañapatak mayta. Esposojampejj cartanak qellqapjjarakta, kunjamsa visitanakapajj wal yanaptʼawayapjjetu ukanakwa uka cartanakan qellqapjjta” sasa. Amtapunim, circuito jilatanakajj jiwasjamarakiw jan waltʼäwinakan uñjasipjje, qaritas jikjjatasipjjaraki. Awisajj usuntapjjewa, llakimpiw aynachtʼapjje, desanimasipjjarakiwa. Munasiñamp arstʼat arunakamasa jan ukajj mä jiskʼa regalo churatamas circuito jilatan oracionaparjamäspawa (Prov. 12:25).

‘REGALOR UÑTAT CHURAT CHACHANAKAJJ’ WAKISIPUNIWA

16. ¿Kunanaks jilatanakajj jisktʼasipjjañapa? (Proverbios 3:27).

¹⁶ Aka oraqpachanwa ‘regalor uñtat churat chachanakajj’ wakisi. Jumatï bautisat jilatästajja, yanaptʼirjamästa ukhajj yanaptʼam (Proverbios 3:27 liytʼäta). ¿Siervo ministerialat serviñatakejj chʼamachasisktati? Jumatï siervo ministerialästa ukhajj ¿ancianot serviñatakejj chʼamachasisktati? c ¿Escuela para Evangelizadores del Reino ukar sarañatakejj chʼamachasisktati? Uka escuelar saratamatjja, Jesusajj jukʼamp luräwinakwa churiristam. Janis ukanakatak wakichtʼatäkasma ukhamtï amuyassta ukhajja, Jehová Diosar orasim. Kuna asignaciontï katoqkta uk sum phoqañatakejj juparuw espíritu santop mayisiñama (Luc. 11:13; Hech. 20:28).

17. Jesusajj mä regalor uñtat churawayki uka jilatanakan wal trabajipjjatapajj ¿kunsa uñachtʼayi?

¹⁷ Jesusajj cheqapuniw aka qhepa urunakan jiwasar irpaskistu, ukwa ‘regalor uñtasit churawayki’ uka jilatanakan wal trabajipjjatapajj uñachtʼayi (Mat. 28:20). Reyisajj wal munasistu, wali wajjtʼasirirakiwa, kuntï necesitktan uks sum yati, yanaptʼasir jilatanakwa churarakistu. Ukhamajj wali trabajtʼir uka jilatanakar yuspäratas uñachtʼayañatakejj chʼamachasipuniñäni. Jehová Diosar yuspärañat janipun armasiñäniti, jupaw ‘taqe suma regalonaksa perfectöki taqe uka regalonaks’ churistu (Sant. 1:17).