43 YATICHÄWI
CANCIÓN 90 Maynit maynikam chʼamañchtʼasipjjañäni
Payachastan ukhajj ¿kunsa lursna?
“Taqe kunas ukhamapunïskiti janicha ukjja sum amuykiptʼapjjam” (1 TES. 5:21).
¿KUNANAKATSA YATJJATASKAÑÄNI?
Payachasitasajj Jehová Diosar serviñatwa jarkʼistaspa, ukatwa kunsa jan payachasiñatakejj lursna uk yatjjataskañäni.
1, 2. 1) ¿Kunanakatsa payachassna? 2) ¿Kunsa aka yatichäwin yatjjataskañäni?
TAQENIW awisajj payachastanjja. a Inas mä wayna jilatajj cheqapunit Jehová Diosajj jupat llakispacha janicha uka toqet payachaschi, ukatwa bautisasiñ jan amtkaspati. Jan ukajj inas mä jilatajj waynäkasin qollqe ganañat sipans Jehová Diosar nayrar uchañ amtchïna. Ukampis jichhajj familianëjjewa, janirakiw jupanakar mantiniñatak qollqejj alcansjjeti, ukatwa suma amtarut purpachäna janicha uka toqet payachasjjaspa. Jan ukajj mä jilïr kullakajj kuntï nayrajj lurirïkäna uk lurañatak jukʼa chʼamanïsajj desanimasjjarakispawa. Inas akham sasin jisktʼasirïsta: “¿Cheqapunit Jehová Diosajj nayat llakispacha? ¿Jupa layku sacrificionak luratajajj inamayakïpachati? ¿Jehová Dios laykojj mä kuns luriristti?” sasa.
2 Uka amuyunakamp apayassna ukhajja, janiw Jehová Diosar taqe chuym confiyjjsnati, janirakiw jupar serviñ munsjjnati. Inas Jehová Diosajj janis jiwasat llakiskaspa, kun lurañtï nayrajj amtkayätan ukajj inamayäkaspasa, jan ukajj Jehová Dios laykojj janis mä kuns lurirjamäksna ukham amuystan, kunjamsa Bibliajj uka amuyunakamp jan apayasiñatakejj yanaptʼistaspa ukwa aka yatichäwin yatjjataskañäni.
¿KUNAS JAN PAYACHASIÑATAK YANAPTʼISTASPA?
3. ¿Kunas jan payachasiñatakejj yanaptʼistaspa?
3 Mä toqet payachasiñäni ukhajj Bibliaw yanaptʼistani. Yanaptʼapampejj jukʼamp sum Jehová Diosamp apasiñäni, jukʼampiw jupar serviñäni, ‘jupar confiyañans suma saytʼatarakïñäniwa’ (1 Cor. 16:13).
4. 1 Tesalonicenses 5:21 textorjamajj ¿kunjamsa ‘taqe kunas ukhamapunïskiti janicha uk sum amuykiptʼsna’?
4 (1 Tesalonicenses 5:21 liytʼäta). “Taqe kunas ukhamapunïskiti janicha ukjja sum amuykiptʼapjjam” sasaw Bibliajj ewjjtʼistu. Ukatakejj kuntï amuyktan ukajj Bibliarjamati janicha ukwa amuytʼañasa. Cheqapunit Jehová Diosajj jupat llakisi janicha uka toqet payachasir mä waynat amuytʼañäni. Uka amuyupajj cheqäkaspas ukham janiw jankʼakejj amuyañapäkiti, antisas “taqe kunas ukhamapunïskiti janicha” uk Bibliampiw amuykiptʼañapa, ukhamatwa kunsa Jehová Diosajj jupat amuyi uk yatini.
5. Kunsa Jehová Diosajj mä toqet amuyi uk yatiñatakejj ¿kunsa lursna?
5 Diosan Arupat liytʼktan ukhajja, Jehová Diosas parlkistaspa ukhamawa. Ukampis jiwasatï mä toqet payachasstan ukhajja, kunsa Diosajj uka toqet amuyi uk yatiñatakejj chʼamachasiñasawa. Ukatakejj kunatï llakisiykistu uka toqet sum amuytʼañatakiw Bibliankir textonak thaqtañasa, ukat Jehová Diosan markapajj churkistu uka qellqatanakampiw uka toqet yatjjatañasa (Prov. 2:3-6). Bibliat sum yatjjatañatakisa kunanakatï jan payachasiñatak yanaptʼkistaspa uk jikjjatañatakis Jehová Diosaruw yanaptʼa mayiñasa. Biblian wiñay yatichäwinakapampi uka toqet parlir yatichäwinakampwa thaqtaraksna. Diosan nayra servirinakapat jiwasjam llakinïpkäna ukanakat yatjjatañajj yanaptʼarakistaspawa.
6. ¿Kunjamsa tantachäwinakajj yanaptʼistu?
6 Jehová Diosajj tantachäwinakanwa parlarakistu. Jan faltasis tantachäwinakankasajja, kuna toqettï payachasktan uka toqetwa mä discurson arstʼasispa jan ukajj mä jilatas mä kullakas comentariopan arstʼaraskispa (Prov. 27:17). Jichhajj kunanakats payachassna, kunsa ukanakat jan payachasiñatakejj lursna ukwa yatjjataskañäni.
“¿CHEQAPUNIT JEHOVÁ DIOSAJJ NAYAT LLAKISPACHA?”
7. ¿Kamsasas jisktʼassna?
7 ¿Jehová Diosajj janis yäqkiristam ukham amuyasirïtati? Ukhamïpan inas taqe kun Luriri Diosan amigopäñajj wali chʼamäkaspas ukham amuyaraksta. David reyejj inas ukham amuyarakchïna. Kunjamsa Jehová Diosajj aleq jaqenakar yäqäna uk amuyasajj wal musparäna, ukatwa akham säna: “Jehová Dios Tata, ¿kunarak jaqesti jupar yäqañamatakisti? ¿Kunarak jiwir jaqen yoqapasti jupar istʼañamatakisti?” sasa (Sal. 144:3). Jichhajj uka jisktʼanakar qhanañchañäni.
8. 1 Samuel 16:6, 7, 10-12 textorjamajj ¿kunsa Jehová Diosajj jaqenakan uñji?
8 Bibliarjamajj jaqenakatak jan yäqañjamäki ukanakarojj wali valoranitwa Jehová Diosajj uñji. Ak amuytʼañäni, mä kutejj Samuel profetaruw Jehová Diosajj Jesé chachan utapar khitäna, ukanwa Israelan reyïñapatakejj yoqanakapat ajlliñapäna. Jesé chachajj yoqanakapat paqallqoniruw jawsayanïna, janiw sullkäkäna uka Davidarojj jawsaykänti. b ¡Ukampis Jehová Diosajj Davidaruw ajllïna! (1 Samuel 16:6, 7, 10-12 liytʼäta). Kuna laykutejj Davidajj kunjam chuymanis uk Diosajj sum yatïna, jupar wal munasitaps yatirakïnwa.
9. Jehová Diosajj cheqpachapuniw jumat llakisi, ¿kunatsa ukat jan payachasiñamäki? (Foto uñjjattʼarakïta).
9 Jehová Diosajj qhawqsa jumat llakisi uk amuyañamatakejj kunanaksa jupajj luri uk amuytʼam. Jumatakjamaw ewjjtʼanak churtamjja (Sal. 32:8). Janitï sum uñtʼkiristamjja, janiw uk lurkaspati (Sal. 139:1). Jumatï Jehová Diosan ewjjtʼanakaparjam luräta, kunjamsa yanaptʼtam uk amuyarakïta ukhajja, qhawqsa jupajj jumat llakisi ukat janiw payachasjjätati (1 Crón. 28:9; Hech. 17:26, 27). Qhawqsa jupar serviñatak chʼamachasta uk Jehová Diosajj yatiwa, kunja suma chuymanïtasa uk uñjaskiwa (Jer. 17:10). Jupajj wal juman amigomäñ muni, amigopätamat wal kusisirakini (1 Juan 4:19).
“Jumatejj jupar thaqätajja, jumampejj katuyasiniwa” (1 Crón. 28:9). (Párrafo 9). c
“¿SUMA AMTANAKARUT PURPACHÄTJJA?”
10. Nayra tiempot amtasisajj ¿kamsasas jisktʼassna?
10 Tiempompejja, kun lurañtï amtapkäna ukajj janis mä suma amtäkaspäna ukhamwa yaqhepajj amuyapjjaspa. Yaqhepajj Jehová Diosar jukʼamp serviñatakejj inas mä suma trabajsa jan ukajj mä jachʼa negocio qalltañs jaytapjjchïna. Ukampis jichhajj walja maranak pasjjepanjja, inas khitinakarutï uñtʼapki ukanakajj jachʼa negocionak lurapjjatapat walja qollqenïpjjchi, sumas jakasipkaspa ukhamarakïchi. Ukatwa akham sasin jisktʼasipjjaspa: “¿Jehová Dios layku sacrificionak luratajajj inamayakïpachati? ¿Jan ukajj yaqha amtar puriñajach wakispachäna?” sasa.
11. ¿Kunatsa Salmo 73 qellqerejj wal llakisïna?
11 Jumatï ukhamanak jisktʼasiraksta ukhajja, kuntï Salmo 73 qellqerejj siskäna uk amuytʼam. Jehová Diosar jan servirinakajj kunja sumas jakasipjjäna, kʼumaraki, walja qollqeni ukwa jupajj uñjäna (Sal. 73:3-5, 12). Jupanakajj wali sumas jakasipkaspa ukham uñjasajja, Jehová Diosar serviñatak chʼamachasitapajj inamayäkaspas ukhamwa amuyjjäna. Ukak piensasajj “uru jurnälaw” wal llakisïna (Sal. 73:13, 14). ¿Kunas jupar yanaptʼäna?
12. Salmo 73:16-18 textorjamajj ¿kunas salmistarojj sum amuytʼasiñatak yanaptʼäna?
12 (Salmo 73:16-18 liytʼäta). Salmistajj Jehová Diosan temploparuw saräna. Uka suma lugarankasaw jupajj sum amuytʼasïna. Yaqhepanakajj wali sumjamas jakasipkchejja, kuna jan walinakans jutïrin uñjasipjjaspa ukwa salmistajj sum amuyjjäna. Jehová Diosar serviñ nayrar uchañ amtañajj kunja sumasa uk amuyäna, ukatwa sumak jikjjatasjjäna, Diosar jukʼamp serviskakiñatakis chʼamanëjjarakïnwa (Sal. 73:23-28).
13. ¿Kunas sumak jikjjatasiñatakejj yanaptʼiristam? (Fotompi dibujompi uñjjattʼarakïta).
13 Jumajj salmistar uñtasitarakiw sumak jikjjatasjjasma. Ukatakejj kuna sumanakatï utjktam, kuna bendicionanaktï Jehová Diosajj churktam ukanak amthapim. Ukampis Diosar jan servirinakajj ¿kunanïpjjesa? Kunanaktï aka mundojj churkaspa ukanakanikïpjjewa. Jupanakajj kunanaktï akapachan jikjjatapkaspa ukanakatakwa llakisipjje, janiw jutïrit llakisipkiti. Ukampis Jehová Diosajj amuytʼksna ukat sipans jukʼamp jachʼa bendicionanak jiwasar churañwa arsuwayi (Sal. 145:16). Maysa toqetjja, jiwasatï nayra tiempon yaqha amtar purisäna ukhajj kunjamans uñjasisäna uk janiw kunjamats yatksnati. Jiwasajj akwa yattanjja: khitinakatï Diosampiru jaqe masipampir munasipjjatapat mä kun lurañs amtapjje ukhajja, janipuniw kunatï cheqpachapun sumäki ukajj jupanakar faltkaniti.
Jehová Diosan promesanakapat amuytʼapuniñäni. (Párrafo 13). d
“¿JEHOVÁ DIOS LAYKOJJ MÄ KUNS LURIRISTTI?”
14. ¿Kunjamans Jehová Diosan yaqhep servirinakapajj uñjasipjje, ukat kamsasas jisktʼasipjjaspa?
14 Jehová Diosan yaqhep servirinakapajja, jilïrkipstatäsasa, usutäsasa jan ukajj mä kun jan lurañ puedisasa, munapkchi ukas janiw Diosar serviñan jukʼampinak lurañ puedipkiti. Ukatwa Jehová Diosatakejj janis valoranïpkaspa ukham amuyasipjjaspa. “¿Jehová Dios laykojj mä kuns luriristti?” sasaw jisktʼasipjjarakispa.
15. ¿Kuna toqetsa Salmo 71 qellqerejj jan payachaskänjja?
15 Salmo 71 qellqerejj ukhamarakiw janis chʼamanëjjaspa ukham jikjjatasïna. Jehová Diosarojj akham sänwa: “Chʼamajajj tukusjjani ukhajj janikiy jaytanuktʼasistati” sasa (Sal. 71:9, 18). Ukampis niyakejjay salmistajj Jehová Diosar jan jitheqtas serviskakchïnjja, jupajj yanaptʼitaniwa sasajj janiw payachaskänti. Kunjamtï jupajj yateqkänjja, Jehová Diosajj khitinakatï mä kun jan lurañ puedisas jupar serviñatak chʼamachasipjje ukhajj wal kusisi (Sal. 37:23-25).
16. ¿Kunanaksa jilïrinakajj Jehová Dios laykojj lurapjjaspa? (Salmo 92:12-15).
16 Jumatï jilïrëjjsta ukhajja, kunjamsa Jehová Diosajj jumar uñjtam uk amuyañatak chʼamachasim. Jumatï mä kuns jan lurañ puedksta ukhajj Jehová Diosaw jupar serviskakiñamatakejj yanaptʼätam (Salmo 92:12-15 liytʼäta). Kuntï jichhajj jan lurirjamäkta ukar chuym uchañat sipansa, kuntï lurirjamäkta ukaruw chuym uchañama. Mä toqetjja, Diosar jan jitheqtas servitamampiw mayninakar chʼamañchtʼasma, jan ukajj jupanakat taqe chuym llakisitamwa uñachtʼayarakisma. Maysa toqetjja, kunjamsa Jehová Diosajj taqe aka maranakan yanaptʼawaytam jan ukajj jutïrin kuna profecianaks wal phoqasiñap suyaskta uka toqenakatwa mayninakar parltʼasma. Kunjamsa mayninak layku taqe chuym oratamajj jupanakar yanaptʼaspa uk janirak armamti (1 Ped. 3:12). Kunjaman uñjaskasas taqeniw Jehová Dios laykusa mayninak laykus mä kuns lursna.
17. ¿Kunatsa mayninakamp jan igualayasiñatak chʼamachasiñasa?
17 Jumatï munkasma ukarjam Jehová Dios layk jan lurañ pueditamat llakissta ukhajja, amtapunim, qhawqtï lurirjamäkta ukarjam chʼamachasitam Jehová Diosajj wali valoranit uñji. ¡Janipun ukat payachasimti! Maysa toqetjja, inas mayninakamp igualayasiñ munsta, ukampis jan uk luramti. Jehová Diosajj janipuniw mayninakamp igualaykistuti (Gál. 6:4). Ak amuytʼañäni, Mariajj wali jila alani suma olorani aceitempiw Jesusarojj kayunakapat warjjattʼäna (Juan 12:3-5). Ukampis pobre viuda warmejj wali jukʼa valorani pä jiskʼa monedanakak templon uchäna (Luc. 21:1-4). Ukampis Jesusajj qhawqsa jupanakajj Jehová Diosar confiyapjjäna ukak uñjäna. Alajjpachankir Jehová Dios Awkimajj kuntï jupar confiyatamatsa jupar munasitamats lurkta ukanak wali valoranit uñji, kuntï lurkta ukajj jumatak wali jukʼäkchisa, jupajj wali valoranit uk uñji.
18. ¿Kunas jan payachasiñatak yanaptʼiristam? (“ Diosan Arupaw jan payachasiñatak yanaptʼätam” sat recuadro liytʼarakïta).
18 Taqeniw awisajj mä kunats payachastanjja. Ukampis kunjamtï yatjjatawayktanjja, Diosan Arupaw jan payachasiñatak yanaptʼistaspa. Ukhamajj Biblianwa kuna toqetsa payachasta ukanak thaqtasma, ukham lurasajj janiw payachasjjätati, jukʼampiw Diosar confiyarakïta. Jehová Diosajj jumat llakisipuniwa, kuna sacrificionaktï jupa laykojj lurkta ukanak wali valoranitwa uñji, bendisirakïtamwa. Janipun payachasimti: Jehová Diosajj jupat jan jitheqtir servirinakaparojj wal munasi, cuidarakiwa.
CANCIÓN 111 Wali kusisitäpjjtanwa
a AMTAÑATAKI: Aka yatichäwinjja, payachasiñanakat parlasajj janiw Jehová Diosampir promesanakapampir jan confiyañat parlkiti, jan ukasti kunapachatï maynejj janis Jehová Diosatakejj valoranïkaspa, jan ukajj kun lurañtï nayra tiempon amtkäna ukajj inamayäkaspasa ukham amuyjje uka toqenakatwa parlaski.
b Bibliajj janiw qhawqha maranirus Jehová Diosajj Davidar ajllïna uk qhanañchkiti, inas uka tiempon waynitüskchïna (Yatiyañataki 1 de septiembre de 2011, página 29, párrafo 2 liytʼäta).
c FOTOT JUKʼAMP QHANAÑCHTʼAÑATAKI: Kunatï llakisiyki uka toqet kunsa Jehová Diosajj amuyi uk yatiñatakejja, mä tawaqet kullakajj Biblianwa ewjjtʼanakap thaqtaski.
d FOTOMPIT DIBUJOMPIT JUKʼAMP QHANAÑCHTʼAÑATAKI: Mä jilatajj familiapar mantiniñatakiw ventananak qʼomachas trabajiski, ukañkamajj kuna bendicionanaktï Paraison katoqkani ukanakatwa amuytʼaski.
