1, 2. ¿Kunsa Eclesiastés 11:6 textojj predicañ toqet yatichistu?

 YAQHEP markanakanjja, jaqenakajj Reinon suma yatiyäwip kusisitaw istʼapjje, ukajj chuymaparuw purtʼaraki. Ukampis yaqhep markanjja Diosatsa Bibliatsa jukʼanikiw istʼañ munapjje. Markasan ukhamäpansa janisa, predicañajj tukusjjani ukhakam predicaskakiñaswa Jehová Diosajj muni.

² Jehová Diosajj kunapachas predicañajj tukusjjani uk amtjjewa, uka uru purinkani ukharakiw “akapachan tukusiñapajj jutani” (Mat. 24:14, 36). Janïr uka uru puriniñapkamajja, Eclesiastés 11:6 (notat liytʼañataki) * texton ‘janipun amparanakamajj samarpanti’ * siski uka arunakar istʼatas ¿kunjamsa uñachtʼaysna?

3. ¿Kunanakatsa aka yatichäwin yatjjataskañäni?

³ Pasïr yatichäwinjja, kunanakas suma predikirïñatak yanaptʼistaspa ukwa pusi toqet yatjjataniwaytanjja (Mat. 4:19). Aka yatichäwinsti jan walinak utjkipansa kunas predicaskakiñatakejj yanaptʼistaspa ukwa kimsa toqet yatjjataskañäni. 1) ¿Kunatsa predicacionajj jakäwisan nayrankañapa? 2) ¿Kunatsa paciencianïñasa? 3) ¿Kunatsa Diosar wal confiyañasa?

4. ¿Kunatsa predicacionajj jakäwisan nayrankañapa?

⁴ Jesusajj jayäkipanwa kunanakas aka qhepa urunakan pasañapäna  jaqenakas kunjamäpjjañapänsa uk yatiyjjäna. Uka jan waltʼäwinakaw discipulonakarojj predicañ jaytayaspäna. Ukatwa Jesusajj “amuyasipjjapunim” sasin ewjjtʼäna (Mat. 24:42). Noé chachajj jakkäna uka urunakanjja, jaqenakajj janiw jupan arunakapar istʼapkänti, yaqhanakakwa lurasipkäna. Jichhürunakanjja ukarakiw pasistaspa (Mat. 24:37-39; 2 Ped. 2:5). Ukatwa predicacionajj jakäwisan nayrankañapatak chʼamachasiñasa.

5. Hechos 1:6-8 textorjamajj ¿kawkikamas predicasiñapäna?

⁵ Jichhürunakan Diosan Reinopat yatiyañaw jakäwisan nayrankañapa. Jesusan aruparjamajja, aka oraqpachanwa predicasiñapäna, jiwatap qhepatsa jukʼampiw yatiyasiñapäna (Juan 14:12). Jesusajj jiwjjäna uka qhepatjja, yaqhep discipulonakajj chawlla katuñ negocioruw kuttʼjjapjjäna. Jaktjjäna uka qhepatsti mä milagro lurasaw yaqhep discipulonakaparojj walja chawll katuyäna. Ukhaw predicañajj yaqha lurañanakat sipansa wali wakiskirïtap qhanañchäna (Juan 21:15-17). Janïr alajjpachar sarkasajja, Jesusajj ‘qalltawaykta uka predicacionajj janiw Israel markanak yatiyaskaniti, jan ukasti aka oraqpachanwa yatiyasini’ sasaw säna (Hechos 1:6-8 liytʼañataki). Mä qhawqha maratjja, kunas ‘Tatitun urupan’ * pasañapäna ukwa apóstol Juanajj mä visionan uñjäna. Ukanjja, ‘wiñay suma yatiyäwinakaw taqe markankirinakaru, tribunkirinakaru, kunayman parlani jaqenakaru, kunayman kasta jaqenakaru yatiyasïna’, uksti angelanakaw pʼeqtʼapjjäna (Apoc. 1:10; 14:6). Cheqas Diosajj tukuykam predicañaswa muni.

6. ¿Kunas predicación nayrar uchañatak yanaptʼistani?

⁶ Jehová Diosajj kunjamsa yanaptʼaskistu uka toqetwa lupʼiñasa, ukaw jakäwisan  predicación nayrar uchañatak yanaptʼistani. Sañäni, Diosajj kunayman qellqatanaka, grabacionanaka, videonaka churistu, JW Broadcasting^® programsa churarakistuwa. Internetan utjkistu uka jw.org cheqat amuytʼañäni, ukanjja waranqats jila arunakanwa kunayman qellqatanakajj utji (Mat. 24:45-47). Akapachankir jaqenakajj janiw mayachtʼatäpkiti, may may politiconakaruw apoyapjje, kunayman religionanakaruw sarapjje, yaqhepajj wali qollqenïpjjewa, yaqhepasti wali pobrëpjjarakiwa, ukampis Diosan servirinakapajj 8.000.000 jiläkstansa mä familiakïtanwa. Sañäni, viernes 19 de abril 2019 uka urojj aka oraqpachanwa Testigonakajj mä video uñtapjjtanjja, ukanjja Sapür yatjjatañataki sat folletotwa qhanañchasïna. Arum cheqarojja, 20.919.041 ukhaniw Jesusan jiwatap amtañatakejj tantachasiraktanjja. Diosan markapankañasa kunjamsa uka markajj nayrar sartaski uk uñjañasa wali kusiskañawa, ukaw predicación nayrar uchañatakejj wal chʼamañchistu.

7. ¿Kunjamsa Jesusat yateqasiñajj predicación nayrar uchaskakiñatak yanaptʼistani?

⁷ Predicación nayrar uchañatakejja, Jesusat yateqasiñaw yanaptʼarakistani. Jesusajj kunatï cheqäki uk predicañatakejj janiw kunampis jarkʼayaskänti (Juan 18:37). Janirakiw “aka oraqenkir taqe markanaka, ukhamaraki kunja qamirïpkitejj taqe ukanakwa” churäma sasin Supayajj siskäna ukhas engañjayaskänti, ni jaqenakajj reyit uttʼayañ munapkäna ukarus istʼkänti (Mat. 4:8, 9; Juan 6:15). Jesusajj janiw qamiriptañ munañampejj apayaskänti, janirakiw uñisirinakaparus ajjsarkänti (Luc. 9:58; Juan 8:59). Apóstol Pablojj ‘jan qarjtañatakisa jan thayjtañatakisa’ Jesusat yateqasipjjam sasaw chʼamañchtʼistu (Heb. 12:3). Yantʼat uñjaskañäni ukhajja uka arunak amtañaw predicación nayrar uchaskakiñatak yanaptʼistani.

8. ¿Kunatsa paciencianïñajj wali wakiskirejja?

⁸ Mä kunan phoqasiñap suyktan ukhasa, jan walinakajj utjki ukhasa, paciencianïñaw munasi. Sañäni, Habacuc profetajja Judá markan jankʼak jan walinakajj chhaqtjjaspa ukwa munäna (Hab. 1:2). Jesusan discipulonakapajja “Diosan Reinopajj mä akatjamatwa uñstani” sasaw amuyapjjäna, romanonakat qhespiyatäñwa suyapjjarakïna (Luc. 19:11). Jiwasanakasti Diosan Reinopajj jankʼaki jan walinak tukj-jjaspa, aka oraqes cheqapar sarnaqer jaqenakampi phoqantatäjjaspa ukwa suyaraktanjja (2 Ped. 3:13). Kunapachas ukanakajj phoqasini uk Jehová Diosajj amtjjewa, ukhamajj paciencianïñaw wakisi. Jichhajja kunjamsa Diosajj paciencianïñ yatichistu uk mä qhawqha uñjañäni.

9. ¿Kunanakas Diosan paciencianïtap uñachtʼayistu?

⁹ Jehová Diosatwa paciencianïñ yateqassna. Amuytʼañataki, Noé chacharojj arca lurañapatakisa “kunatï cheqapäki uk” yatiyañapatakisa qhawqha tiempotï munaskäna ukha tiempow pacienciamp suytʼäna (2 Ped. 2:5; 1 Ped. 3:20). Sodoma, Gomorra markanakar Jehová Diosajj tukjañ amtkäna ukhajja, Abrahanajj walja kutiw Diosar jisktʼäna. Ukampis Diosajj pacienciampiw jupar istʼäna (Gén. 18:20-33). Jan istʼasir israelitanakarojj walja tiempow cambiapjjañapatakejj pacienciamp suytʼarakïna (Neh. 9:30, 31). Jichha tiemponjja, ukhamarakiw Jehová Diosajj paciencianïtap uñachtʼayaski, amigopäpjjañapatak ‘irpanki’ ukanakarojj arrepentisipjjañapatakiw tiempo churaski (Juan 6:44; 1 Tim. 2:3, 4; 2 Ped. 3:9). Jehová Diosajj kunja paciencianisa ukaw pacienciampi  predicañatakisa yatichañatakisa yanaptʼistu. Jupajj mä uñachtʼäwimpiw paciencianïñ yaticharakistu, uk jichhajj yatjjatañäni.

10. Santiago 5:7, 8 texton parlki uka yapuchirit ¿kunsa yateqassna?

¹⁰ Santiago 5:7, 8 (liytʼañataki) texton yapuchirit parlki ukajj paciencianïñwa yatichistu. Yaqhep alinakajj ratukiw jilapjje, ukampis jilapart alinakajj janiw ukhamäpkiti, yamas achunïpki ukanakajj janiw ratuk poqopkiti. Israel markanjja, yapu lurañ tiempojj sojjta phajjsïnwa. Yapuchirinakajja octubren jallojj qalltkäna ukhaw satañ qalltapjjerïna, ukatsti abrilan jallojj tukuyjjäna ukharakiw cosechjjapjjerïna (Mar. 4:28). Jiwasatï yapuchirinakat paciencianïñ yateqasiñäni ukhajja, yatiñanïtaswa uñachtʼayañäni. Ukampis paciencianïñajj chʼamakïspawa.

11. ¿Kunjamsa paciencianïñajj predicacionan yanaptʼistani?

¹¹ Jucharar jaqenakjamajj ratukiw kunan phoqasiñapsa muntanjja. Ukampis huertoni mä jaqetï alinakapan sum poqoñap munchi ukhajja, janiw ukhamak jaytañapäkiti, jan ukasti sukachjasaw satantañapa, ukjjarojj umampiw regañapa, ukatjja qorsuñaparakiwa. Jaqenakar Jesusan discipulopar tukuyañatakejj niya ukhamarakwa chʼamachasiñasa. Estudionakasan jan yaqhachasirïpjjañapatakisa munasirïpjjañapatakisa tiempow munasi. Predicacionan jaqenakajj jan istʼañ munapkistu ukhas paciencianïñaw jan aynachtʼañatakejj yanaptʼistu. Istʼapkistu ukhasa paciencianïñaw wakisiraki, janiw munkir jan munkir nayrar sartapjjañapatak obligksnati. Awisajja Jesusan discipulonakapas janiw kuntï Jesusajj yatichkäna uk jankʼak amuyapkänti (Juan 14:9). Amtapjjañäni, jiwasajj satantsnawa, umampis regaraksnawa, ukampis Diosakiw jiltayaspa (1 Cor. 3:6).

12. Familiaranakasar predicktan ukhajj ¿kunjamsa paciencianïtas uñachtʼaysna?

¹² Familiaranakasar predicktan ukhaw paciencianïñajj chʼamarakïspa. Eclesiastés 3:7  textonjja ‘amuktʼañ horasa parlañ horasaw utji’ sasaw sistu, uka arunakaw familiar predicañatakejj yanaptʼistani. Suma sarnaqatasampis Diosar uñtʼapjjañapatak yanaptʼkstanjja, parlañjamäni ukhajj Jehová Diosat parlañasawa (1 Ped. 3:1, 2). Taqe chuymaw jaqenakarojj predicañasa yatichañasaraki, ukampis pacienciampiw taqenir uñjañasa, familiaranakasarus ukhamaraki.

13, 14. ¿Khitinakatsa paciencianïñ yateqassna?

¹³ Diosan nayra servirinakapata ukhamarak jichha tiempon servirinakapatwa paciencianïñ yateqaraksna. Habacuc profetajj jan walinakan jankʼak tukusiñapsa munkchïnjja, “ischʼukiskakïwa, uñanaqaskakirakïwa” sasaw säna, ukhamatwa paciencianïtap uñachtʼayäna (Hab. 2:1). Apóstol Pablojj asignacionap jankʼak tukuyañsa munkchïnjja, pacienciampiw “suma yatiyäwinak phoqatpach” yatiyaskakïna (Hech. 20:24).

¹⁴ Galaad Escuelat graduasiri mä matrimoniot parltʼarakiñäni, jupanakarojj kawkjantï Testigonakajj jukʼanikïpkäna ukaruw khitapjjäna, ukanjja jan Cristor creyipki uka religionanakaw utjäna, mä qhawqhanikiw Bibliatsa yateqañ munapjjarakïna. Ukampis uka escuelat yaqha markanakar sarir jilat kullakanakajja, kunjamsa jaqenakarojj bautisasipjjañapatak yanaptʼapjjäna ukwa jupanakar cuenttʼapjjäna. Uka chacha warmirojj jukʼanikis Diosat istʼapkchïnjja, jupanakajj pacienciamp predicasipkakïnwa. Kimsaqallq maranakaw predicjjapjjäna, ukhaw mä estudiopajj bautisasjjäna, uk uñjasajj walpun kusisipjjäna. Diosan nayra servirinakapasa jichha tiempo servirinakapasa ¿kunsa yatichistu? Jupanakajj janiw jayrasipkänti, ni amparanakapsa samarayapkänti, ukatwa Jehová Diosajj paciencianïpjjatapat bendisïna. Ukhamasti “khitinakatejj Diosar confiyapjjatap laykusa paciencianïpjjatap laykusa Diosan promesap herenciar uñtat katoqapki ukanakat” yateqasipjjañäni (Heb. 6:10-12).

15. Kuntï predicktan ukar taqe chuyma confiyañajja, ¿kunjamsa predicañatak chʼamañchistu?

¹⁵ Kuntï predicktan ukarojj taqe chuymaw confiytanjja, ukatwa taqe jaqenakan uk yatipjjañap muntanjja. ¿Kunatsa kuntï predicktan ukarojj taqe chuyma confiytanjja? Diosan promesanakapajj phoqasipuniwa (Sal. 119:42; Is. 40:8). Biblian qellqat yaqhep profecianakas ukhamarakiw jichhürunakan phoqasiski. Biblian yatichäwinakapajj walja jaqenakaruw cambiapjjañapatak yanaptʼaskaraki. Taqe ukanak uñjasaw kuntï predicktan ukarojj taqe chuyma confiytanjja. Ukatwa taqe jaqenakan Reinon suma yatiyäwinakap istʼapjjañap muntanjja.

16. 1) Salmo 46:1-3 qellqatarjamajj ¿kunjamsa Diosar confiyañajj jukʼamp predicañatak chʼamañchtʼistu? 2) ¿Kunjamsa Jesusar confiyañajj yanaptʼarakistu?

¹⁶ Jehová Diosar Jesusar confiyañaw jukʼamp predicañatak chʼamañchtʼarakistu, cheqas kuntï predicktan ukajj Jehová Diosatwa juti, Jesusarusti Diosaw Reinopan Reyipäñapatak uttʼayaraki (Juan 14:1). Jan walinakansa uñjaskchiñänejja, Diosaw jarkʼaqestani, chʼamsa churarakistani (Salmo 46:1-3 liytʼañataki). Ukatjja ak amtañasarakiwa, Jesusajj Jehová Diosatwa munañanïñsa chʼamsa katoqe, ukampiw predicación alajjpachat pʼeqtʼasinki (Mat. 28:18-20).

17. Kunatsa predicaskakiñatakejj chʼamachasiñasa uk mä experienciampi qhanañchtʼam.

¹⁷ Jehová Diosajj chʼamachasitasar bendisistaniwa, janiw ukat pächasktanti. Awisajj kuntï suyktan ukat sipansa jukʼampwa bendisistani (Ecl. 11:6). Amuytʼañataki, aka oraqpachan  carritonakampi mesanakampi predicktan ukjja waranq waranqa jaqenakaw sapür uñjapjje. ¿Ukham predicañajj cheqapunit yanaptʼaski? Jïsa, wal yanaptʼaski. Diosan Apnaqäwipat Yatiyañataki noviembre de 2014 qellqatanjja, universidadan yateqer mä tawaqotwa parläna, jupajj Jehová Diosan Testigonakap toqet mä qellqatwa apsuñ munäna. Ukampis janiw ni mä Tantachasiñ Utsa jikjjatkänti. Antisas universidadanwa mesampi Testigonakar predicaskir uñjäna. Ukanwa kuntï yatiñ munkäna uk jikjjatäna. Uka tawaqojja tiempompejj bautisasjjänwa, jichhajj precursora regularatwa serviski. Ukham experiencianak istʼañaw jukʼamp predicaskakiñatak chʼamañchistu, cheqas walja jaqenakaw Diosan Reinopat istʼañ munasipki.

18. Predicañajj tiempoparuw tukuyani sasajj ¿kunatsa sissna?

¹⁸ Predicañajj tiempoparuw tukuyjjani. Noé chachan urunakapat amtañäni. Uka tiemponjja Jehová Diosajj taqe kunsa horasapar lurirïtapwa uñachtʼayäna. Mä 120 maranak faltkipanwa, kunapachas Uma Juiciojj jutani uk amtjjäna. Walja maranak qhepatjja, arca lurañapatakiw Diosajj jupar mayïna. Noé chachajj mä 40 jan ukajj 50 maranakaw jan samartʼas trabajïna. Jaqenakajj janis istʼañ munapkchïnjja, arcar animalanak anantañajj horasäjjewa sasin Diosajj siskäna ukhakam yatiyaskakïnwa. Jehová Diosajj tiempoparuw ‘arcan punkupjja jistʼantjjäna’ (Gén. 6:3; 7:1, 2, 16).

19. Amparanakas jan samaraykañäni ukhajja, ¿kunanak phoqasirsa uñjañäni?

¹⁹ Niyaw Diosajj ‘predicacionajj tukusjjewa’ sasin sistani. Supayan apnaqat akapacharus niyaw tukj-jjarakini. Cheqapar sarnaqer jaqenakakiw aka oraqen jakjjapjjani. Uka uru puriniñapkamajja, Noé chachata, Habacuc profetata, amparanakap jan samarayas Diosar servipkäna ukanakat yateqasipjjañäni. Ukhamajj predicación nayrar uchapjjañäni, paciencianïpjjañäni, Jehová Diosampir promesanakapampir confiyapjjarakiñäni.