1, 2. Kuntï 1 Timoteo 6:20 textojj siski ukarjamajja, ¿kunanaksa Timoteojj katoqäna?

 KUNATÏ valoranïki ukanakjja, awisajj yaqhanakaruw cuidapjjañapatak jayttʼastanjja. Sañäni, qollqenïktan ukhajja, awisajj jan chhaqayañatakisa jan lunthatsuyasiñatakisa bancoruw jayttʼastanjja. Ukhamajj kunatï valoranïki uk mayninakar jaytasiñajj kunjamas uk sumwa yattanjja.

² (1 Timoteo 6:20 liytʼañataki). Apóstol Pablojja kunsa Timoteojj Diosat katoqäna ukwa amtayäna. Diosajja, kuna amtampis jaqenakar luräna ukwa jupar yatiyäna. Ukatjja arunakap predicañapatakiw mayirakïna (2 Tim. 4:2, 5). Kunanaktï Diosat katoqkäna ukanak jan apanukuñapatakiw Pablojj Timoteor ewjjtʼäna. Jehová Diosajj ukhamarakiw jiwasarojj kunatï wali valoranïki ukanak churistu. ¿Kunanaksa churistu? ¿Kunatsa ukanak sum cuidañasa?

3, 4. Biblian yatichäwinakapajj kunatsa wali valoranïpjje uk qhanañchtʼam.

³ Jehová Diosajj munasiñapatwa Bibliankir cheqa yatichäwinak uñtʼayistu. Uka yatichäwinakaw kunjamatsa Jehová Diosan amigopäsna, kunjamatsa kusisit jakassna ukanak yatichistu, ukatwa uka yatichäwinakajj wali valoranïpjje. Uka yatichäwinak yateqtan, ukarjam sarnaqaraktan ukhajja, janiw kʼari yatichäwinakamp engañjayasjjtanti, ni qʼañu juchanakansa sarnaqjjtanti (1 Cor. 6:9-11).

⁴ Biblian utjki uka yatichäwinakjja, Diosajj humildëpki ‘suma chuymanïpki’ ukanakarukiw qhanañchi, ukatwa uka yatichäwinakajj wali valoranïpjjaraki (Hech. 13:48). Humildenakajja kuntï suma phoqeri amuyasir esclavojj Bibliat yatichki ukarojj taqe chuymaw istʼapjje (Mat. 11:25; 24:45).  Cheqas janiw maynejj uka yatichäwinak jan yanaptʼampejj amuykaspati, ukanak amuyañajj taqe kunat sipansa wali valoraniwa (Prov. 3:13, 15).

5. ¿Jehová Diosajj kuna lurañsa churarakistu?

⁵ Jehová Diosajj yaqha privilegio churarakistu. Jupatsa amtanakapatsa kunatï cheqäki ukanak yatiyañaswa mayirakistu (Mat. 24:14). Uka yatiyäwejj wali valoraniwa, jaqenakarojj Diosan familiapar mantanipjjañapataki, wiñay jakañ katoqapjjañapatakiw yanaptʼi (1 Tim. 4:16). Waljsa jan ukajj jukʼaksa predickstanjja, oraqpachan apaski uka predicacionaruw yanaptʼasktanjja (1 Tim. 2:3, 4). ¡Jehová Diosamp chika ukham trabajiñajj wali kusiskañawa! (1 Cor. 3:9).

6. Jehová Diosamp trabajiñ jan valoranit uñjapkäna uka cristianonakarojj ¿kunas pasäna?

⁶ Timoteojj jakkäna uka tiemponjja, yaqhep cristianonakajj Jehová Diosamp trabajiñ jan valoranitwa uñjapjjäna. Sañäni, Demas chachajj akapachar munatap laykuw Pablomp chik serviñ apanuküna (2 Tim. 4:10). Figelompi Hermogenesampejj inas Pabljam arknaqatäñ ajjsarapjjchïna, ukatwa predicañ jaytjjapjjarakpachäna (2 Tim. 1:15). Himeneo, Alejandro, Fileto uka chachanakasti cristianonak contraw saytʼjjapjjäna, Diosatsa jitheqtjjapjjarakïnwa (1 Tim. 1:19, 20; 2 Tim. 2:16-18). Amuyatajja, uka cristianonakajj qalltan taqe chuymaw Diosar servipjjpachäna, ukampis qhepat kunatï wali valoranïkäna uk apanukupjjänwa.

7. ¿Kunanakampis Supayajj engañjañ munistu?

⁷ Diosajj churkistu ukanak apanukuñasatakejj ¿kunanakampis Supayajj engañjañ munistu? Ukanakat mä qhawqha uñjañäni. Kunatï televisionansa, peliculanakansa, Internetansa, yaqha qellqatanakansa uñstki ukanakampiw engañjañ munistu. Ukanak toqew amtanakassa amuyunakassa mayjtʼayañ muni, jan wal sarnaqañasatakiw chʼamañcharakistu, ukhamatwa Supayajj jukʼat jukʼat cheqa yatichäwinak apanukuyañ munistu. Ukat kuntï jaqenakajj sapki ukanak ajjsarasa, arknaqatäñ ajjsarasa predicación jaytjjsna ukwa munaraki. Ukatjja, apostatanakan yatichäwinakap istʼasa cheqa yatichäwinak jaytjjsna ukwa munaraki (1 Tim. 6:20, 21).

8. Kunatï Daniel waynar paskäna ukat ¿kunsa yateqsna?

⁸ Janitï amuyasksna ukhajja, jukʼat jukʼatwa cheqa yatichäwinak apanukjjsna. Daniel * sat waynat parltʼañäni. Juparojj videojuegonak anatañaw wal gustäna. Jupajj akham siwa:  “10 maranïkayät ukhaw videojuegonak anatañ qalltayäta. Qalltanjja waljamäkäna ukanakampikiw anatayäta. Ukampis jukʼat jukʼatwa nuwasiñanakani layqasiñanakani magianakani videojuegonakamp anatjjayäta” sasa. Tiempompejja, uka waynajj 15 horanakaw sapür anatjjäna. Jupajj akham siwa: “Uka jan wali anatañanakasa qhawqha tiemptï anatkayäta ukasa, Jehová Diosatwa jayarstʼayaskitäna uk yatiskayätwa. Ukampis Biblian yatichäwinakapajj janiw nayatakïkiti sasaw amuyjjayäta” sasa. ¿Kunsa ukat yateqsna? Jan amuyasksna ukhajja, televisionasa, Internetasa, yaqha ukhamanakasa facilakwa jukʼat jukʼat Diosat jitheqtayistaspa. Ukhamäspa ukhajja, Diosajj kunanaktï churkistu ukanak facilakwa apanukjjsna.

9. ¿Pablojj 1 Timoteo 1:18, 19 texton Timoteor kamsänsa?

⁹ (1 Timoteo 1:18, 19 liytʼañataki). Pablojja, Timoteorojj ‘mä soldador uñtat suma nuwasïwin nuwasiskakim’ sasaw säna. Ukampis Pablojj janiw cheqpach nuwasiñat parlkänti. ¿Kunjamatsa cristianonakajj guerran nuwasiri soldador uñtasitätanjja? ¿Criston soldadonakapajj kunjam chuymanïñasasa? Pablojj parlkäna uka uñachtʼäwitjja, kuna phesqa yatichäwinaksa yateqsna uk jichhajj yatjjatañäni. Ukanakaw cheqa yatichäwinak janipun apanukuñatak yanaptʼistani.

10. Dios chuymäñajj ¿kamsañs muni, kunatsa ukajj wali wakiskirejja?

¹⁰ Dios chuymäpjjañäni. Mä suma soldadojj taqe chuymaw markapat saytʼasi. Khitinakarutï munaski kunanakarutï wali valoranit uñjki ukanakarus taqpach chʼamapampiw jan walinakat jarkʼaqe. Pablojj Timoteor akham sänwa: “Dios chuymäñatak chʼamachasiskakim” sasa. ‘Dios chuymäñajj’ ¿kamsañsa muni? Diosar taqe chuyma munasiña, janipun jupat jitheqtaña sañwa muni (1 Tim. 4:7). Dios chuymäñäni ukhajja, janipuniw cheqa yatichäwinak apanukkañäniti (1 Tim. 4:8-10; 6:6).

11. ¿Kunatsa chʼamachasiñajj wakisi?

¹¹ Kunatï walïki uk lurañatak chʼamachasipjjañäni. Mä soldadojj lurañanakap sum phoqañ munchi ukhajja, chʼamachasiñapawa. Timoteojj Pablon ewjjtʼaparjamajja, jan wali munañanak apanukuñataki, suma chuymanïñataki, jilat kullakanakampïñatakiw chʼamachasïna, ukhamatwa Criston suma soldadopätap uñachtʼayäna (2 Tim. 2:22). Jan wali munañanakar atipjañ munstan ukhajja, ukhamwa chʼamachasiñasaraki (Rom. 7:21-25). Ukatjja, kunjam jaqëkayätantï uk apanukusajj machaq jaqëñampiw isthapisiskakiñasa (Efes. 4:22, 24). Qaritäktan ukhasa, tantachäwir sarañatakejj chʼamachasiñasarakiwa (Heb. 10:24, 25).

12. ¿Kunanakas suma yatichirïñatak yanaptʼistani?

¹² Mä soldadotï armadurap sum apnaqañ munchi ukhajja yatsuñapawa. Cristianonakajj uka soldadjamarakiw Diosan Arup sum apnaqañ yatiñasa (2 Tim. 2:15). Tantachäwinakanwa kunjamsa Diosan Arup sum apnaqsna uk yateqtanjja. Ukampis cheqa yatichäwinakajj kunjamsa yanaptʼaspa uk jaqenakar amuytʼayañ munstan ukhajja, Bibliatwa sapak yatjjatañasa, ukatakejj mä programanïñasawa. Diosar jukʼamp confiyañatakejj Diosan Arupampiw yanaptʼayasiñasa. Ukampis janiw aleqakejj liyiñasäkiti, jan ukasti lupʼiñasarakiwa, Bibliat apstʼat qellqatanakatsa jukʼampwa yatjjatañasa, ukaw Biblian yatichäwinakap sum amuyañatakisa jaqenakar sum qhanañchañatakis yanaptʼistani  (1 Tim. 4:13-15). Ukhamatwa jaqenakar Bibliampi yatichañatakejj wakichtʼatäñäni. Cheqas janiw aleqakejj Biblia liytʼarapiñasäkiti, jan ukasti kamsañsa muni jan ukajj kunjamsa jakäwipan yanaptʼaspa uk amuyañapatakiw yanaptʼañasa. Ukhamasti, Bibliat sapa kuti yatjjatañäni ukhajja, suma yatichirïñäniwa (2 Tim. 3:16, 17).

13. Hebreos 5:14 textorjamajja, ¿kunatsa amuytʼasirïñasa?

¹³ Amuytʼasirïpjjañäni. Mä soldadojj jan walinakan uñjasisajj kunjamsa jarkʼaqasispa uk janïräkipanwa amuytʼasi. Jiwasajj ukhamarakiw kunanakas jan waltʼayistaspa, kunjamsa ukanakat jarkʼaqassna uk janïräkipan amuytʼasiñasa (Prov. 22:3; Hebreos 5:14 liytʼañataki). Sañäni, kuna peliculanaksa jan ukajj kuna programanaksa televisionan uñtañäni ukjja sumwa ajlliñasa. Jilapartejj qʼañu jucha lurañanakaw ukan uñsti. Diosajj qʼañu jucha lurañanakjja uñisiwa, khitinakatï qʼañu juchan sarnaqapki ukanakajj jupanak pachpaw jan waltʼayasipjje, yaqhanakarus jan walinwa uñjasiyapjjaraki. Cristianonakajj janiw ukanak uñchʼukiñasäkiti, ukanakajj jukʼat jukʼatwa Jehová Diosat jitheqtayistaspa (Efes. 5:5, 6).

14. ¿Kunjamsa amuytʼasirïñajj Danielur yanaptʼäna?

¹⁴ Kimsaqallqo parrafon parlkayätan uka Daniel waynajja, nuwasiñanakani layqasiñanakani magianakani videojuegonakajj jan walïtapwa amuyasïna. Ukatwa kunjamsa uka vicio jaytaspa ukjja Watchtower Library ukan yatjjatäna. Ukaw uka jan wali anatañanak jaytañ yanaptʼäna, jan wali amigonakapampis janiw chikachasjjänti. Jupajj akham siwa: “Videojuegonak anatañat sipansa, anqan kuna lurañanakatï utjkäna ukanakwa lurjjayäta jan ukajj jilat kullakanakamp chikäñatakiw tiemp apstʼasiyäta” sasa. Jichhajj Daniel jilatajja, precursoräjjewa, jilïr irpiritwa serviskaraki.

15. ¿Kunatsa kʼari cuentonakat amuyasiñasa?

¹⁵ Timoteo waynjamarakiw apostatanakan yatichäwinakapat amuyasiñasa, ukanakajj jan waliruw puriyistaspa (1 Tim. 4:1, 7; 2 Tim. 2:16). Sañäni, apostatanakajj jilat kullakanakat kʼari cuentonakwa parlapjjaspa, Jehová Diosan markapatsa pächasiyistaspawa. Uka kʼari arunakajj jukʼat jukʼatwa Diosat apaqestaspa, ukhamajj janipun engañjayasipjjañäniti. Ukanakajj “jan wali amuyunïpki, kunatï cheqäki ukanaksa jan amuyapkaraki”  uka jaqenakatwa juti, jupanakajj chʼajjwaña jiskhisiña ukakwa munapjje (1 Tim. 6:4, 5). Jupanakajj uka kʼarinakapar creysna, jilat kullakanakasats pächasjjsna ukwa munapjje.

16. ¿Kunanakampis jan apayasiñasäki?

¹⁶ Diosar serviñ nayrar uchapjjañäni. Timoteojj ‘Criston mä suma soldadopänwa’, jupatakejj qollqe thaqañat sipansa, akapachan nayrar sartañat sipansa, Diosar serviñaw jakäwipan nayrankäna (2 Tim. 2:3, 4). Jiwasajj jupjamarakiw qollqe munañampi jan apayasiñasäkiti. ‘Qollqen chʼamapamp engañjayassna’ ukhajja, janiw Jehová Diosar munasjjsnati, janirakiw Diosan Aruparus valoranit uñj-jjsnati, ni predicañsa munjjsnati (Mat. 13:22). Ukhamasti, kunatï wakiski ukampik jakañäni, ukatjja ‘Diosan Reinop nayraqat thaqañatak’ chʼamachasiñäni, tiempsa ukatak apstʼasiñäni (Mat. 6:22-25, 33).

17, 18. Jehová Diosan amigopäñat jan apaqayasiñatakejj ¿kunsa lurañasa?

¹⁷ Jankʼak jarkʼaqasiñatak wakichtʼasipjjañäni. Mä soldadojj kunjamsa jan walinakat jankʼak jarkʼaqasispa uk janïräkipanwa wakichtʼasiñapa. Kunanaktï Jehová Diosajj churkistu ukanak sum cuidañ munstan ukhajja, jankʼakiw jan walinakat jarkʼaqasiñasa. ¿Kunas ukatakejj yanaptʼistani? Mä jan waltʼäwejj utjaspa ukhajja, kunsa lursna uk janïräkipan amuytʼasiñaw yanaptʼistani.

¹⁸ Amuytʼañataki, yaqhep markanakanjja, mä conciertojj utjki jan ukajj yaqha ukhamanakajj utjki ukhajja, kawkjanakansa punkojj mistuñatak utji ukanakaw nayraqatajj yatiyasi, ukhamatwa mä jan waltʼäwejj utjaspa ukhajj jankʼak mistupjjaspa. Jiwasajj niya ukhamarakiw janïräkipan wakichtʼasiñasa. Internetansa, mä peliculansa, jan ukajj televisionansa, apostatanakan yatichäwinakapaw uñstaspa, jan ukajj qʼañu juch luririnakasa nuwasirinakasa uñstarakispawa, ukapachajj kunsa jankʼak lursna ukatakejj wakichtʼatäñasawa. Wakichtʼasiñäni ukhajja, kunanakatï Jehová Diosan amigopäñat apaqkistaspa ukanakatjja jankʼakiw jarkʼaqasiñäni, ukhamatwa Jehová Dios nayraqatan qʼomäskakiñäni (Sal. 101:3; 1 Tim. 4:12).

19. Kuna privilegionaktï Diosajj churkistu ukanak sum cuidañäni ukhajja, ¿kuna bendicionanaksa katoqañäni?

¹⁹ Amtañäni, Jehová Diosajj Bibliankir cheqa yatichäwinak uñtʼayistu, predicañasatakiw khitarakistu. Uka privilegionakjja sumwa cuidañasa. Ukham lurañäni ukhajja, qʼoma conciencianïñäniwa, vidasas janirakiw inamayäkaniti, ukatjja Jehová Diosar uñtʼapjjañapatak jaqenakar yanaptʼasas kusisitaw jakasiñäni. Kunanaktï Diosajj churkistu ukanakjja yanaptʼapampejj janiw apanukkañäniti (1 Tim. 6:12, 19).