1. ¿Kunapachas Jehová Diosar serviñajj jukʼamp chʼamäspa?

 ¿KUNAPACHAS Jehová Diosar serviñajj chʼamakïspa? ¿Jan walin uñjastan ukapacha, jan ukajj taqe kunas sumjamäski ukhacha? Jan walinakan uñjasktan ukhajja, jankʼakiw Jehová Diosar yanaptʼa maytanjja. Ukampis taqe kunas sumakïski ukhajj ¿kunsa lurtanjja? ¿Diosar serviñajj kunja wakiskirisa ukat armasjjtanti? Jehová Diosajja uka toqet amuyasipjjañapatakiw israelitanakar ewjjtʼäna (Deut. 6:10-12).

2. ¿Kunatsa Asá reyejj jiwasatak wali yateqaskayajja?

² Asá reyejj jiwasatak wali yateqaskayawa jupajj Jehová Diosar taqe chuymaw confiyäna. Jupajj janiw jan wali tiemponak Diosar sirvkänti, suma tiemponsa servirakïnwa. Waynäkäna ukhatpachaw Diosarojj taqe chuyma servïna (1 Rey. 15:14). Judá markan falso diosanakar serviñ chhaqtayasaw uk uñachtʼayäna. “Jupasti yaqha diosanakana altaranakapjja aparpayänwa, ukhamarak idolonakan santuarionakapsa, ajjsarata qalanaksa jiskʼa jiskʼa tʼunjayäna, ukhamarak Asera idolon lantinakapsa tʼunjayarakïnwa” (2 Crón. 14:3, 5). Maacá sat awichaparusa, Judá markankir jaqenakaru mä idolor adorapjjañapatak chʼamañchatapatjja, reinäñatwa apaqarakïna (1 Rey. 15:11-13).

3. ¿Kunanakatsa aka yatichäwin yatjjataskañäni?

³ Asá reyejj janiw falso diosanakar adorañak chhaqtaykänti. Judá markankir jaqenakarusa Jehová Diosar wasitampi adorjjapjjañapatakiw yanaptʼarakïna. Jehová Diosasti Asá reyirusa Judá markankir jaqenakarus samarañ tiempo jan ukajj sumankañ tiempwa churäna. Asá reyejj apnaqkäna ukhajja, tunka maranakaw uka markankirinakajj samarañ tiempon jakasipjjäna (2 Crón. 14:1, 4, 6). Aka yatichäwinjja, kunsa Asá  reyejj uka tiempon luräna ukwa yatjjataskañäni. Ukjjarusti kunjamsa nayrïr cristianonakajj Asá reyjam samarañ tiempo aprovechapjjäna ukwa yatjjataskarakiñäni. Tukuyañatakisti aka jisktʼaruw qhanañchaskañäni: “Jakasktan uka cheqan Diosar serviñajj librëskchi ukhajja, ¿kunjamsa Diosar jukʼamp serviñatak chʼamachassna?”.

4. Kuntï 2 Crónicas 14:2, 6, 7 texton siski ukarjamajja, ¿kunsa Asá reyejj samarañ tiempon luräna?

⁴ (2 Crónicas 14:2, 6, 7 liytʼañataki). Asá reyejja, ‘marka jakʼanakasampi suman sarnaqañjja Jehová Diosaw churistu’ sasaw israelitanakar säna. Ukampis janiw uka tiemporojj jan kunat llakisiñ tiempökaspas ukham uñjkänti. Jan ukasti markanaka, perqanaka, torrenaka, punkunak lurañwa qalltäna. ‘Markasajj jiwasan munañasankkipana ukanak lurañäni’ sasaw Judá markankir jaqenakarojj säna. ¿“Munañasankkipana” sasajj kamsañsa munäna? Diosajj churkäna uka oraqenjja, jan khitin jarkʼataw jakasipjjäna, ukhamajj enemigonakapan jan ajjsarayataw markanak saytʼayapjjaspäna. Ukatwa markarojj uka samarañ tiempo aprovechañatak chʼamañchäna.

5. ¿Kunatsa Asá reyejj ejercitopar wakichtʼäna?

⁵ Asá reyejj samarañ tiempo utjkäna ukhajj ejercitopwa wakichtʼarakïna (2 Crón. 14:8). ¿Kunatsa ukham luräna, janit Jehová Diosar confiykpachäna? Cheqas confiyänwa ukampis jupaw reyjamajj markaru wakichañapäna, ukhamatwa jutïrin jan walinakar saykatapjjaspäna. Samarañ tiempojj mä jukʼa tiempokiw utjañapäna uk jupajj yatïnwa. Qhepatjja cheqapuniw uka tiempojj tukusjjäna.

6. ¿Kunsa nayrïr cristianonakajj sumankañajj utjkäna ukhajj lurapjjäna?

⁶ Nayrïr cristianonakajj jan waltʼayañatak  walja kutis arknaqat uñjasipkchïnjja, samarañ tiempojj jan ukajj sumankañ tiempojj jupanakatak utjarakïnwa. ¿Kunsa uka tiempon lurapjjäna? Diosat jan jitheqtiri uka cristianonakajj suma yatiyäwinak taqe chuyma predicañatakiw chʼamachasipjjäna. Hechos libronjja, cristianonakajj ‘Jehová Diosar ajjsarasaw sarnaqapjjäna’ sasaw qhanañchi. Jupanakajj Diosan suma yatiyäwinakap predicasipkakïnwa, ukatwa ‘jiljjattasipkakïna’. Sumankañ tiempon taqe chuyma predicasipkakitapatwa Jehová Diosajj bendisïna (Hech. 9:26-31).

7, 8. Pablompi mayni cristianonakampejj ¿kunsa sumankañ tiempo utjkäna ukhajj lurapjjäna?

⁷ Jesusan nayrïr discipulonakapajja, taqe horasanwa Diosan suma yatiyäwinakap predicapjjäna. Sañäni, Éfeso markanjja, walja jaqenakaw istʼañ munapjjäna, ukatwa apóstol Pablojj uka markar quedasiñ amtäna, ukhamat uka jaqenakar predicasin Jesusan arkiripar tukuyañataki (1 Cor. 16:8, 9).

⁸ Pablompi mayni cristianonakampejj 49 maranwa jukʼamp predicapjjarakïna, ¿kunatsa? Ukapachaw apostolonakampi jilïr irpirinakampejj circuncisión toqet mä amtar puripjjäna (Hech. 15:23-29). Congregacionanakar uk yatiyapjjäna ukhajja, nayrïr cristianonakajj ‘Jehová Diosan arunakap jukʼamp yatiyañatakiw’ chʼamachasipjjäna (Hech. 15:30-35). Ukatwa ‘congregacionanakajj taqe chuyma Diosar confiyasipkakïna, urut urutjamas yapjjattaskarakïna’ (Hech. 16:4, 5).

9. ¿Walja markanakan predicañajj kunjamäskisa, ukat kunsa jisktʼasiñasa?

⁹ Jichhürunakanjja, walja markanakanwa predicañajj jan jarkʼatäkiti. Jiwasatï ukham markanakan jakasstan ukhajja, ¿uk aprovechasktanti? Aka qhepa urunakanjja, Jehová Diosan servirinakapajj oraqpachanwa wali kusisita predicasipki yatichasipkaraki (Mar. 13:10). Ukhamajj kunayman luräwinakanwa jiwasajj yanaptʼsna.

10. ¿Kun lurañatakis 2 Timoteo 4:2 textojj chʼamañchistu?

¹⁰ Markasan sumankañ tiempo utjaskchi ukhajja, ¿kunsa lurañasa? (2 Timoteo 4:2 liytʼañataki). Diosar kunjamsa jukʼamp sirvsna ukwa amuytʼasiñasa. ¿Janit jiwasas familiasas jukʼampi predicañatak chʼamachasksna? ¿Janit precursorat sirvksna? Jichha tiempojja, janiw qollqe thaqañataki cosasanak jikjjatañatak tiempökiti, ukanakajj wali tʼaqesiñ tiemponwa tukusjjani (Prov. 11:4; Mat. 6:31-33; 1 Juan 2:15-17).

11. ¿Kunsa walja publicadoranakajj waljanir predicañatakejj lurawayapjje?

¹¹ Walja publicadoranakajja yaqhanakar predicañatakisa yatichañatakis yaqha arunakwa yateqawayapjje. Diosan markapajj jupanakar yanaptʼañatakejj kunayman arutwa Bibliat apstʼat qellqatanaka videonaka apsuwayi. Sañäni, 2010 maranjja niya 500 arunakanwa Bibliat apstʼat qellqatanakajj utjäna, ukampis jichhajja waranqatsa jila arunakanwa utj-jje.

12. ¿Pachpa arupat jaqenakajj Diosan arunakap istʼapjje ukhajj kunjamas jikjjatasipjje?

¹² Cheqa yatichäwinak pachpa arupat parlir istʼasajja ¿kunjamas jaqenakajj jikjjatasipjje? Mä kullakat parltʼañäni. Jupajja, kiniaruanda arupat apaskäna uka kimsa uru jachʼa tantachäwiruw saräna. Ukajj Memphis (Tennessee, Estados Unidos) sat markanwa apasïna. Uka arjja, Ruanda, Uganda, República Democrática del Congo uka markanakanwa parlapjje. Jachʼa tantachäwejj tukuyjjäna ukhajja, “17 maranakaw Estados Unidos markan jakjjta, ukampis jichhapuniw taqpach discursonak  sum entiendiwayta” sasaw kullakajj säna. Cheqas pachpa arupat istʼañaw chuymapar purtʼäna. Jiwasatï yaqha aru yateqerjamäskstanjja, ¿janit jaqenakar yanaptʼañatakejj territoriosan parlapki uka aru yateqksna? Jumatï jaqenakar pachpa arupat parlasma ukhajja, ¿janit jukʼamp istʼañ munapkiristam? Chʼamachasitamajj janiw inamayäkaniti.

13. ¿Kunsa Rusia markankir jilat kullakanakasajj sumankañ tiempo utjkipan lurapjjäna?

¹³ Yaqhep markanakanjja, gobiernonakaw predicañ jarkʼapjje, ukatwa jilat kullakanakasajj jan libre predicapkiti. Rusia markankir jilat kullakanakasat parltʼañäni, jupanakajj walja maranakaw jarkʼata uñjasipjjäna, ukampis marzo 1991 maranjja, libre predicapjjañapatakiw gobiernojj permiso churjjäna. Ukapachajja, mä 16.000 publicadoranakakiw utjäna. Pä tunka maranak qhepatsti, 160.000 publicadoranakats jukʼampiw utj-jjäna. Jilat kullakanakasajj jan jarkʼatäpkäna ukhajj wal predicapjjäna, ukaw qhan amuyasi. Jichhajj janis librëjjapjjchejja, Jehová Diosarojj taqe chuymaw servisipkaki, qhawqtï lurirjamäpki ukarjamaw chʼamachasisipkaraki.

14, 15. ¿Kunjamsa Jehová Diosajj Asá reyir yanaptʼäna?

¹⁴ Asá reyit wasitampi parltʼañäni. Uka tiemponjja, Judá markan sumankañajj utjkäna ukajj tukusjjänwa. Etiopía markankir mä millón soldadonakaw jupanakamp nuwasir sarapjjäna. Zérah sat comandantepajj ‘Judá markarojj atipjapjjäwa’ sasaw wal confiyasïna. Ukampis Asá reyejj Jehová Diosaruw confiyäna. Ukatwa “¡yanaptʼapjjetaya, nanakan Tatit Diosajja, nanakasti jumaruwa [confiyapjjsma], juman sutimarurakiw aka ejercitompi nuwasiñatakejj jutapjjarakta!” sasaw Jehová Diosar mayisïna (2 Crón. 14:11).

 ¹⁵ Etiopía markankir soldadonakajj Judá markankir soldadonakat sipan mä ukhampïpkchïnsa, Asá reyejj Jehová Diosan chʼamaparuw confiyäna, jupaw yanaptʼapjjetani sasaw sarakïna. Jehová Diosajj cheqapuniw jupanakar yanaptʼäna, ukatwa Etiopía markankir soldadonakarojj atipjapjjäna (2 Crón. 14:8-13).

16. ¿Kunatsa Diosar libre serviñajj tukusiniwa sasajj sissna?

¹⁶ Diosan servirinakaparojj kunajjay sapa maynir paschini uk janiw sum yatktanti, ukampis Diosar libre serviñajj tukusiniwa. Jesusajja, ‘qhepa urunakan taqe markankir jaqenakaw discipulonakajarojj uñisipjjani’ sasaw säna (Mat. 24:9). Apóstol Pablojj akham sarakïnwa: “Cristo Jesusan arkiripjam jakañsa Dios chuym jakañsa munapki ukanakajja, jan waltʼayañatak arknaqataw uñjasipjjarakini” sasa (2 Tim. 3:12). Maysa toqetjja, Supayajj ‘wali coleratawa’, ‘janiw nayarojj kamachkitanisa’ sasin janiw amuyañasäkiti, taqeniruw aynachtʼayañ munistani (Apoc. 12:12).

17. ¿Kuna jan waltʼäwinakansa uñjassna?

¹⁷ Jutïrinjja, Diosan taqe servirinakapaw yantʼat uñjasiñäni. Niyaw ‘wali tʼaqesiñ tiempojj jutani’. “Akapachan qalltapat jichhakamajj janipuniw ukham tʼaqesiñajj utjkänti, janirakiw mayampis utjkaniti” sasaw Bibliajj sistu (Mat. 24:21). Inas uka tiempon familiaranakasajj jiwas contra saytʼapjjchini, Diosar serviñas jarkʼatäjjarakchini (Mat. 10:35, 36). Jiwasajj ¿Asá reyjamat Jehová Diosaw yanaptʼitani, jarkʼaqarakitani sasin confiyañäni?

18. Hebreos 10:38, 39 textorjamajja, ¿kunas wakichtʼatäñasatakejj yanaptʼistani?

¹⁸ Jehová Diosajj kunatï jutïr urun paskani ukatak wakichtʼatäsna ukwa muni, ukatwa jupar jukʼamp confiyañasatak chʼamañchistu. Suma saytʼatäñasatakejja, ‘suma phoqeri amuyasir esclavo’ toqew ‘tiempoparu manqʼa churistu’, mä arunjja tiempoparu yatichistu (Mat. 24:45). Ukhamasti jiwasajj Jehová Diosar jukʼamp confiyañatakejj chʼamachasiñasarakiwa (Hebreos 10:38, 39 liytʼañataki).

19, 20. Kuntï 1 Crónicas 28:9 texton siski ukarjamajja, ¿kunanaksa jisktʼasiñasa, ukat kunatsa?

¹⁹ Jiwasajj Asá reyjamarakiw Jehová Diosaru thaqañasa (2 Crón. 14:4; 15:1, 2). Cheqas  Diosar uñtʼtan, bautisastan ukhaw jupar thaqañ qallttanjja. Jupar jukʼamp munasiskakiñatakejja, chʼamachasiskakiñasawa. Uk lurasktanti janicha uk yatiñatakejja, “¿taqpach tantachäwinakar sarañatakejj chʼamachasisktti?” sasaw jisktʼasiñasa. Uka tantachäwinakanwa Jehová Diosar serviskakiñatakejj chʼamañchastanjja, ukanwa jilat kullakanakasampi jikisisajj wal kusisiraktanjja (Mat. 11:28). Ukatsti, akhamwa jisktʼasiñasa: “¿Bibliat sum yatjjatañatakejj tiempo apsusisktti?” sasa. Familiamamp jakassta ukhajja, ¿sapa semanat Familiampi Bibliat Yatjjatasipkta? Jan ukajj sapak jakassta ukhajja, ¿kunjamtï familianakajj lurapki ukhamti Bibliat yatjjataskarakta? ¿Predicañatakisa jaqenakar yatichañatakis chʼamachasisktati?

²⁰ ¿Kunatsa ukanak jisktʼasiñasa? Jehová Diosajj amuyunakassa kunatï chuymasan utjki uksa uñakipiwa sasaw Bibliajj qhanañchi. Jiwasajj ukhamarakiw chuymasajj kunjamäskisa uk uñakiptʼasiñasa (1 Crónicas 28:9 notat liytʼañataki). * Ukatjja, inas kuntï lurañ amtkayätan, kuntï amuykayätan ukanak cambiañajj wakischini, ukhamäni ukhajja, Jehová Diosaruw yanaptʼa mayiñasa. Jichhaw kuna yantʼanakantï jutïrin uñjaskañäni ukatakejj wakichtʼasiñasa. Ukhamajja, jichhatï Diosar libre serviskstanjja, jan uk ina chʼusar aptʼañäniti.