1, 2. 1) Proverbios 16:31 textorjamajja, ¿kunjamsa edadani jilat kullakanakar uñjañasa? 2) ¿Kuna jisktʼanakarus aka yatichäwin qhanañchaskañäni?

 MÄ DIAMANTEJJ enteröski, janirak qʼomachatäki ukhajja, janiw munkayäkiti ni kʼajkarakisa. Maynitï uka diamante uñjaspa ukhajja, aleq qalakïkaspas ukhamwa amuyaspa, janiw wali valoranïtap amuykaspati.

² Diosar jan jitheqtas serviri edadani jilat kullakanakajja, uka wali valorani diamanter uñtasitäpjjewa. Janqʼo ñikʼutanakapajj mä coronjamawa sasaw Bibliajj qhanañchi (Proverbios 16:31 liytʼañataki; 20:29). Ukampis qhawqha valoranïpjjesa uk amuyañajj chʼamakïspawa. Edadani jilat kullakanakar valoranit uñjiri wayn tawaqonakajja, diamantet sipans jukʼamp valoranwa jikjjatapjje. Aka yatichäwinjja, aka kimsa jisktʼanakaruw qhanañchaskañäni: ¿kunatsa Jehová Diosajj edadani jilat kullakanakar wali valoranit uñji? ¿Kunatsa uka jilat kullakanakajj Diosan markapatak wali wakiskirïpjje? ¿Kunsa jupanakat sum yateqasiñatakejj lursna?

3. Salmo 92:12-15 qellqatarjamajja, ¿kunatsa Jehová Diosajj edadani jilat kullakanakarojj wali valoranit uñji?

³ Jehová Diosajj wali valoranitwa edadani jilat kullakanakar uñji. Jupanakajj kunjam jaqëpjjesa uk yatiwa, kunjam chuymanïpjjesa uksa valoranitwa uñjaraki. Jupar walja maranak jan jitheqtas servisajj kunanaktï yateqapki ukanak wayn tawaqonakar yatichir uñjasajja, Diosajj wal kusisi (Job 12:12; Prov. 1:1-4). Walja maranak aguantapjjataps valoranitwa uñjaraki (Mal. 3:16). Jakäwipan jan walinakansa uñjasiwayapkchejja, Diosar confiyasipkakiwa. Diosar uñtʼañ  qalltapkäna ukat sipansa, jichhajj jukʼamp confiyasaw jutïr uru suytʼapjje. Diosan sutipatsa ‘awkëjjapjje ukhakam’ parlasipkakiwa, ukatwa Diosajj jupanakar wal munasi (Salmo 92:12-15 liytʼañataki).

4. ¿Kunas edadani jilat kullakanakarojj chʼamañchtʼaspa?

⁴ Jumatï edadankipstasksta ukhajja, akwa amtañama: Diosajj jupar serviñatak kunanaktï lurawaykta ukanakat janiw armaskiti (Heb. 6:10). Jumajj taqe chuymaw predicawayta, Jehová Diosajj ukham luratamat wal kusisi. Kunayman yantʼanakaruw atipjawayarakta, ukanakat yaqhepajj wali chʼamänwa. Biblian leyinakapsa arjjatawaytawa. Diosan markapan wali wakiskir privilegionak katoqasajj sumwa phoqawaytajja, yaqhanakarus uk yatichawayaraktawa. Diosan markapan walja cambionak utjawayki ukarjam lurañatakis wal chʼamachasiwaytajja. Diosar precursorat servisipki ukanakarus yanaptʼawaytawa, chʼamañchtʼawayaraktawa. Jehová Diosajj jupar jan jitheqtas servitamat wal munastamjja, Jupajj ‘nayat jan jitheqtirinakarojj janiw jaytanukkäti’ sasaw arsuwayi (Sal. 37:28). Ukatsti akham sarakiwa: “Janqʼo pʼeqekëjjäta ukhasa nayajj yanaptʼaskakïmawa” sasa (Is. 46:4). Ukhamajja, edadanëjjatamat janis Diosan markapan wakiskirëjjasma ukham jan amuyamti. ¡Wali wakiskirïtawa!

5. ¿Kunsa edadani jilat kullakanakajj amtapjjañapa?

⁵ Edadani jilat kullakanakajj Diosan markapan wal yanaptʼapjjaspa. Janis nayrjam chʼamanëjjapjjchejja, Diosar walja maranak servisajj wali experiencianïpjjewa. Jehová Diosajja janis kunatak sirvjjapjjaspa ukham janiw amuykiti, antisas kunayman luräwinakwa jupanakar churi. ¿Kunjamsa nayrajj uk luräna, jichha tiemponsa uk luraskaki? Ukwa jichhajj yatjjataskañäni.

6, 7. Diosar jan jitheqtas servirinakat Bibliajj parlki uka edadani servirinakaparojj kunjamsa Diosajj bendisïna uk qhanañchtʼam.

⁶ Edadanëjjasas kunjamsa Diosan nayra servirinakapajj Jupar jan jitheqtas servisipkakïna, ukajj Biblian qellqatajj waljaw utji. Ukanakat mayajj Moisés chachawa, jupajj mä 80 maranëjjäna ukhaw Diosan profetapat  servïna, Israel markarus pʼeqtʼarakïna. Yaqhasti Daniel profetawa, amuyatajj 90 jila maranis profetat Jehová Diosar serviskakïnwa. Apóstol Juanajj ukhamarakiw Diosan amuytʼayatäsin Apocalipsis libro qellqkäna ukhajj 90 jila maranëjjpachäna.

⁷ Diosar jan jitheqtas servirinakat yaqhepajj janiw wali uñtʼatäpkänti, inas jaqenakajj jupanakan utjatap jan yatipkchïnti. Ukampis Jehová Diosajj yatïnwa, Jupar jan jitheqtas servipjjatapatsa bendisirakïnwa. Sañäni, ‘Simeón sutini, cheqapar sarnaqeri ukhamarak Dios chuyma jaqet’ jukʼakwa Bibliajj parli. Ukampis Diosajj jupar sumwa uñtʼäna, ukatwa aka privilegionak churäna: Jesús wawaruw uñjayäna, Jesusatsa, mamitapats mä profecía arsuñapatakiw yanaptʼarakïna (Luc. 2:22, 25-35). Ana profetisat parltʼarakiñäni. Jupajj 84 marani viuda warmïnwa, “templorojj sarapunirïnwa”. Jehová Diosajj jupar jan jaytjasa servitapatjja, Jesús wawar uñjayasaw bendisïna. Cheqas Simeón chachasa, Ana profetisas Jehová Diosatakejj wali valoranïpjjänwa (Luc. 2:36-38).

8, 9. ¿Kunjamsa viuda kullakanakajj yanaptʼasipkaki?

⁸ Jichha tiemponjja, edadani walja jilat kullakanakajj wayn tawaqonakatakejj wali yateqaskayäpjjewa. Lois Didur sat kullakat parltʼañäni. 21 maranikïskäna ukhaw Canadá markan precursora especialat serviñ qalltäna. Qhepatsti, John sat esposopampejj walja maranakaw superintendente de circuitot servipjjäna. Qhepatsti, Canadá markankir Betelanwa 20 jila maranak servipjjarakïna. 58 maranëjjäna ukhasti, Ucrania markan servipjjañapatakiw invittʼapjjarakïna. ¿Kunsa lurapjjäna? ¿‘Edadanëjjapjjtwa janiw yaqha markar sarañ puedjjapjjerïstti’ sasat sapjjäna? Janiwa, antisas uka invitación katoqasipjjänwa. John esposoparojj Comité de Sucursal ukan serviñapatakiw uttʼayapjjäna. Paqallqo maranak pasatatsti esposopajj jiwjjänwa, kullakasti ukan serviskakiñwa amtäna. Jichhajja, Lois kullakajj 81 maranëjjewa, Diosarojj jan jitheqtasaw uka sucursalan serviskaki. Taqeniw jupar wal munasipjjaraki.

⁹ Yaqhep kullakanakajja, viudäjjapjje ukhajj Lois kullakjamarakiw jan nayrjam wali uñtʼatäjjapjjeti, ukampis Jehová Diosajj wali valoranitwa jupanakar uñjaskaki. Esposonakapar walja maranak yanaptʼapjjatapatsa, Diosar jan jitheqtasa servisipkakitapatsa, wali valoranitwa Diosajj jupanakar uñji (1 Tim. 5:3). Uka kullakanakajj wayn tawaqonakar wal chʼamañchtʼapjjaraki.

10. ¿Kunsa Tony jilatat yateqassna?

¹⁰ Diosar jan jitheqtas serviri edadani walja jilat kullakanakajja, edadaninakar cuidapki uka utanakanwa jakasipjje, yaqhepajj pachpa utapanwa jakasipjje, jupanakajj ukhamarakiw wali valoranïpjje. Sañäni, Tony jilatajj edadaninakar cuidapki uka utanwa jakasi. Jupajj agosto, 1942 maranwa 20 maraniru  bautisasïna, Pensilvania (Estados Unidos) markana. Uka qhepatsti, cuartelar jan sarañ munatapat pä mara chikataniw carcelar jistʼantapjjäna. Jilatajja, Hilda esposapampejj jiskʼatpachwa pä wawapar Diosar uñtʼayapjjäna. Tony jilatajja, kimsa congregacionanakanwa superintendente presidentet (jichhajj coordinador del cuerpo de ancianos sasin uñtʼatäjjewa) servïna, superintendente de asamblea de circuito ukansa servirakïnwa. Janiw ukakïkiti, mä carcelaruw visitirïna, ukanjja tantachäwinakwa sarayäna, Bibliatsa yaticharakïnwa. 98 maranëjjchisa, jan qarjtasaw Diosatak trabajiskaki. Congregacionapansa jilat kullakanakamp chika Jehová Diosar serviñatakiw wal chʼamachasiskaki.

11. Edadaninakar cuidapki uka utanakan jakasiri jan ukajj utapat jan mistuñ puedipki uka edadani jilat kullakanakarojj ¿kunjamsa valoranit uñjatas uñachtʼaysna?

¹¹ Edadaninakar cuidapki uka utan jakasiri, jan ukajj utapat jan mistuñ puedipki uka edadani jilat kullakanakarojj ¿kunjamsa respetatas uñachtʼaysna? Congregacionapankir ancianonakajja, predicapjjañapataki, tantachäwinakar jutapjjañapataki jan ukajj tantachäwinak istʼapjjañapatakiw wakisitarjam yanaptʼapjjañapa. Jiwasajj visitasa, jan ukajj videollamada toqe jawsasaw jupanakat llakisitas uñachtʼaysna. Uka utanakan jakasipki, congregacionat jayankapkaraki uka jilat kullakanakatwa jukʼamp llakisiñasa, janiw jupanakat armasiñasäkiti. Yaqhepanakatakejja, jupanak pachpat parlañajj chʼamakïspawa, jan ukajj janis walïkaspa ukhamwa amuyapjjaspa. Ukampis kunjamsa Jehová Diosan markapan kusisita servipjjäna ukanak jisktʼañatakisa, cuenttʼapkistani uk istʼañatakis tiempo apstʼasiñäni ukhajja, wali chʼamañchtʼataw jikjjatasiñäni.

12. ¿Kunjam jilat kullakanaksa congregacionasan jikjjatsna?

¹² Inas congregacionasan Diosar jan jitheqtas serviri yateqaskay edadani jilat kullakanakajj utjchi. Estados Unidos markan jakasiri, Harriette sat kullakajja, Jehová Diosarojj walja maranakaw jan jitheqtas Nueva Jersey congregacionan serviwayäna. Qhepat phuchapampiw jakasir sarjjäna. Uka machaq congregacionankir jilat kullakanakajj jupar sum uñtʼañatakiw tiempo apstʼasipjjäna, Diosar serviñan wali yateqaskayätapwa amuyapjjarakïna. Khä 1925 maranakan Jehová Diosar uñtʼkäna ukhajj kunjamsa predikirïna ukanak cuenttʼasaw jupanakar chʼamañchtʼäna. Uka tiemponjja, predikir sarirïkäna ukhajj katuntataw uñjasispäna, ukatwa laka jarisiñ cepillo apasipunirïna. Cheqansa, pä kutiw 1933 maran carcelar jistʼantat mä semana uñjasïna. Esposopajj janiw Testigökänti, ukampis jupar apoyänwa, ukatwa carcelankkäna ukhajj kimsa jiskʼa wawanakapar cuidäna. Ukhamajja Harriette kullakjam Diosar jan jitheqtas serviri jilat kullakanakarojj valoranitwa uñjañasa.

13. ¿Edadani jilat kullakanakajj Diosan markapan qhawqha valoranïpjjesa uka toqet kunsa yateqawaytan?

¹³ Edadani jilat kullakanakajj Jehová Diosan markapan wali wakiskirïpjjewa. Kunjamsa Diosajj markaparusa, jupanakarus bendisiwayi uk jupanakajj uñjawayapjjewa. Pantjasitanakapatsa waljanakwa yateqawayapjje. Ukhamajj wali ‘yatiñanïpjjewa’, uk valoranit uñjapjjañäni, experiencianakapatsa yateqasipjjarakiñäni (Prov. 18:4). Jupanakar sum uñtʼañataki tiempo apstʼasiñäni ukhajja, Jehová Diosarojj jukʼampiw confiyañäni, waljanakwa uka jilat kullakanakat yateqarakiñäni.

14. ¿Deuteronomio 32:7 textojj kunsa wayn tawaqonakar ewjjtʼi?

¹⁴ Edadani jilat kullakanakampi parltʼañatakejj jiwasaw jupanakar jakʼachasiñasa (Deuteronomio 32:7 liytʼañataki). Inas jupanakajj jan nayrjam sum uñj-jjapjjchiti, inas kʼachataki sarnaqjjapjjchi, inas arupas jan nayrjamäjjchiti. Ukampis chuymapan wayn tawaqösipkiwa, Jehová Diosampis ‘sumat uñjatäpjjewa’ (Ecl. 7:1). Kunatsa Diosajj jupanakar wali valoranit uñji uk amtañasapuniwa, respetaskakiñasarakiwa. Eliseo profetjamäñasawa. Jupajj qhepakamaw Elías profetarojj jan jaytanukkänti, kimsa kutinakanwa “janipuniw jaytanukkämati” sasin sarakïna (2 Rey. 2:2, 4, 6).

15. ¿Kunanaksa edadani jilat kullakanakarojj jisktʼsna?

¹⁵ Edadani jilat kullakanakar wali amuyumpiw jisktʼañasa, ukhamatwa jupanakat cheqapun llakisitas uñachtʼayañäni (Prov. 1:5; 20:5). Inas akham jisktʼsna: “¿Kunas cheqa thakinkatamat jan pächasiñatakejj yanaptʼawaytam? ¿Kunanakas Diosar jukʼamp jakʼachasiñatak yanaptʼawaytam? ¿Kunas Jehová Diosar kusisita serviskakiñatakejj yanaptʼawaytam?” sasa (1 Tim. 6:6-8). Ukatjja, kuntï siskistani uk sumwa istʼañasa.

16. Wayn tawaqonakajj edadani jilat kullakanakampi parltʼapjje ukhajja, ¿kunatsa panpachani chʼamañchtʼat jikjjatasipjje?

¹⁶ Mä wayna jilatampi edadani mä jilatampi parltʼapjje ukhajja, panpachaniw chʼamañchtʼat jikjjatasipjje (Rom. 1:12). Wayna jilatajja, Jehová Diosajj jupat jan jitheqtas servirinakaparojj kunjamsa cuide ukarojj jukʼampiw confiyi, edadani jilatasti wali munatätapwa amuyasi, Diosajj kunjamsa bendisiwayi ukanak cuenttʼasajj wali kusisitarakiwa.

17. ¿Edadani jilat kullakanakajj sapa maratjamaw jukʼamp suma uñnaqtʼanïpjje sasajj kunatsa sissna?

¹⁷ Maynejj edadanëjje ukhajj inas nayrjam jan suma uñnaqtʼanëjjchiti. Ukampis Jehová Diosatakejja, sapa maratjamaw Jupat jan jitheqtas servirinakapajj jukʼamp suma uñnaqtʼanïpjje (1 Tes. 1:2, 3). ¿Kunatsa? Diosan espiritupaw sapa maratjam jukʼamp suma jaqer tukupjjañapatak yanaptʼawayi. Edadani jilat kullakanakar jukʼamp uñtʼañäni, jupanakat jukʼamp yateqasirakiñäni ukhajja, jukʼamp valoranitwa uñjañäni.

18. ¿Kunsa akjjar jutki uka yatichäwin yatjjataskañäni?

¹⁸ Janiw wayn tawaqonakajj edadani jilat kullakanakar valoranit uñjapjje ukhakejj congregacionajj chʼamañchtʼatäkiti, jan ukasti, edadani jilat kullakanakajj wayn tawaqonakar valoranit uñjapjje ukhaw chʼamañchtʼataraki. Akjjar jutki uka yatichäwinjja, kunjamsa edadani jilat kullakanakajj congregacionankir wayn tawaqonakar valoranit uñjapjjatap uñachtʼayapjjaspa ukwa yatjjataskañäni.