1. Maynejj congregacionat jaqsuta uñjasi ukhajja, ¿kunjamas familiapajj jikjjatasipjjaspa?

 MAYNEJJ congregacionat jaqsuta uñjasi ukhajja, familiapajj chuyma ustʼataw jikjjatasipjje. Hilda * sat kullakajj akham siwa: “Esposojampejj 41 maranakaw jakasiwayapjjta, jupajj Diosat jan jitheqtasaw jiwawayi. Jiwjjäna ukhajja, janipuniw ukham llakisiñajj utjkpachati sayätwa. Ukampis yoqajajj congregación jaytjjäna, esposaparusa wawanakaparus jaytawayjjäna ukhajja, jukʼamp llakitaw jikjjatasiyäta” sasa.

2, 3. Salmo 78:40, 41 qellqatarjamajja, ¿maynejj Jupar serviñ jaytawayjje ukhajj kunjamas Diosajj jikjjatasi?

² Familiap taypinkapkäna ukanakat walja angelanakajj Jupa contra saytʼjjapjjäna ukhajja, Diosajj wali chuyma ustʼataw jikjjataspachäna (Jud. 6). Munat Israel markapajj kutin kutin Jupa contra saytʼapkäna ukhajj wali llakitaw jikjjatasirakpachäna (Salmo 78:40, 41 liytʼañataki). Familiamat maynejj Diosar jaytjje ukhajja, alajjpachankir Awkisajj wali llakitaw jikjjatasiraki. Kunjsa tʼaqesta uk amuyiwa, Jupaw jumat khuyaptʼayasisajj chʼamañchtʼätam yanaptʼarakïtam.

³ Mä munat familiasajj congregacionat jaqsuta uñjasi ukhajja, kunsa Jehová Diosan yanaptʼap katoqañatakejj lursna ukwa aka yatichäwin yatjjataskañäni. Ukatjja, congregacionasan ukhaman uñjasipki uka jilat kullakanakarojj kunjamsa yanaptʼsna ukwa yatjjataskarakiñäni. Ukampis kunanaksa jan amuyañasäki ukwa nayraqat yatjjatañäni.

4. Mä wawapajj Jehová Diosar jaytjje ukhajja ¿kunjamas walja awk taykanakajj jikjjatasipjje?

⁴ Mä munat wawapajj Jehová Diosar jaytjje ukhajja, kunampsa jan jaytañapatakejj luririskayäta sasaw walja awk taykanakajj jisktʼasipjje. Yoqapajj congregacionat jaqsutäna ukhajja, Luke sat jilatajj akham sänwa: “Nayas juchanïkirista ukhamwa amuyasiyäta. Arumas ukampiw samkasiyäta, awisajj jachayätwa, chuymas usjjetänwa” sasa. Elizabeth sat kullakajj ukhaman uñjasisajj akham sarakiwa: “¿Kunansa taykjamajj pantjaspachäta? Diosar munasiñapatakejj janiw yoqajarojj sum yatichkpachätti sasaw sapa kuti lupʼiyäta” sasa.

5. ¿Maynejj Diosar jaytjje ukhajj khitin juchapasa?

⁵ Jehová Diosajj jiwaspachp kuns amtirwa lurawayistu, uk amtañasapuniwa. Ukhamajja, Diosar istʼañäniti janicha uk sapa mayniw amtsna. Yaqhepajj janiw yateqaskay awk taykani jilsuwayapkiti, ukhamäkchisa Diosar serviñwa amtawayapjje, jan jitheqtasaw servisipkaraki. Yaqheparusti, awk taykapajj Diosar munasiñapatakiw wal yanaptʼawayapjje, ukampis jilsjjasajj Diosar jaytjjapjjewa. Cheqas Diosar serviniti janicha uk sapa mayniw amtjjañapa (Jos. 24:15). Awk taykanaka, wawamatï Diosar jaytjjchejja, jan jumanak pachpa ukat juchañchasipjjamti.

6. Awk taykapajj Jehová Diosar jaytjje ukhajja, ¿kunjamas wawanakapajj jikjjatasipjjaspa?

⁶ Awisajj awkiwa jan ukajj taykawa Jehová Diosar jaytjjapjje, yamas yaqhepajj familiap kunwa jaytjjapjje (Sal. 27:10). Awk taykapar suma ejemplot uñjiri wawanakajja, uk uñjasajj wali llakitaw jikjjatasipjje. Esther sat kullakan tatapajj congregacionat jaqsutäjjäna ukhajja, kunjamas jikjjatasïna uka toqet akham siwa: “Papitujajj janiw jukʼat jukʼat Diosat jitheqtkänti, jan ukasti jupapachpaw yatkasina Diosar jaytañ amtäna, ukatwa sapa kuti jachayäta. Papitujar wal munasta, ukatwa jaqsutäjjäna ukhajj kunjamäskpachasa sasin sapa kuti llakisiyäta. Awisajj wal ajjsarayasiyäta” sasa.

7. ¿Congregacionat jaqsut awkini jan ukajj taykani wayn tawaqonakarojj kunjamsa Diosajj uñji?

⁷ Wayn tawaqonaka, awkimatï jan ukajj taykamatï jaqsuta uñjaschi ukhajja, jumanakjamarakiw wali llakita jikjjatasipjjta. Kunjamas jumanakajj jikjjatasipjjta uk Diosajj yatirakiwa, jan ukat pächasipjjamti. Jupajj wal munasipjjtam, Jupar jan jitheqtas servisipkakitamat wal kusisi. Jilat kullakanakas wal kusisipjjarakta. Awkimana jan ukajj taykamana jan wal amtatapatjja janiw jumanakajj juchanïpktati, uk jan armapjjamti. Kunjamtï yatjjataniwayktanjja, Diosajj jupar serviñäniti janicha uk jiwaspachpa amtirwa lurawayistu. Diosar jakäwip katuyasipki bautisasipki ukanakajj “sapa mayniw qʼepip apañapa” (Gál. 6:5, nota).

8. Congregacionat jaqsuta familiapajj Diosan markapar kuttʼaniñapkamajja, ¿kunsa Diosar jan jitheqtas servisipki uka familiapajj lurapjjaspa? (“ Jehová Diosajj kuttʼaniñamwa muni” sat recuadro uñjjattʼäta).

⁸ Familiamat maynitï Diosar jaytawayjjchi ukhajja, ‘kuttʼanjjaniwa’ sasaw suyaskpachätajja. ¿Ukañkamajj kunsa lurasma? Diosar serviñan suma saytʼatäskakiñatakejj chʼamachasiskakim. Ukhamti lurätajja, familiamajj jumat yateqasipjjaniwa, jaqsutäki ukas yateqasirakiristamwa. Ukham lurañajj jan sinti llakisisa aguantañatakiw yanaptʼarakïtam. Diosar  serviñan suma saytʼatäskakiñatakejj kunanaksa lurasma uk mä qhawqhanak uñjañäni.

9. ¿Diosar serviñan suma saytʼatäskakiñatakejj kunsa lurasma? (“ Familiamat maynejj Diosar jaytjjchi ukhajja, aka textonakaw chʼamañchtʼiristam” sat recuadro uñjjattʼäta).

⁹ Diosar serviñan suma saytʼatäskakiñatakejj kunatï wakiski uk luraskakim. Diosamp sum apasiñataki chʼamachasiñamasa, familiaman Jupamp sum apasiñapatak yanaptʼañamas wali wakiskiriwa. ¿Kunjamsa uk lurasma? Sapüruw Biblia liyiñama, kuntï liykta ukats lupʼiñamarakiwa, tantachäwinakats janiw faltasiñamäkiti. Yovana sat kullakan papitupampi kullakapampiw Diosan markap jaytjjapjjäna, kullakajj akham siwa: “Biblian Abigaíl, Ester, Job, José ukat Jesús jupanakan sarnaqäwipat liyta ukhajja, sumakiw jikjjatasta. Sarnaqäwinakapajj wal chʼamañchtʼitu, jan llakisiñatakiw yanaptʼarakitu. JW Broadcasting programan utjki uka cancionanakas wal chʼamañchtʼarakitu” sasa.

10. Salmo 32:6-8 qellqatarjamajja, ¿kunsa wali llakitäktan ukhajj lursna?

¹⁰ Llakinakam Diosar yatiyam. Wali llakitäkäta ukhajj orasiñ jan armasimti. Kunjamtï Jupajj amuyki ukham amuyañataki, suma amuyu jumar churañapataki kunsa lurasma uk yatichañapataki munasiri Diosasar ruwtʼasim (Salmo 32:6-8 liytʼañataki). Kunjamas jikjjatasta uk Diosar yatiyañajj awisajj chʼamakïspawa. Ukampis Jupajj uk sumwa yati. Diosajj wal munastam, taqe llakinakam yatiyañatakiw invitaraktam (Éx. 34:6; Sal. 62:7, 8).

11. Hebreos 12:11 textorjamajja, ¿kunatsa Jehová Diosajj munasiñat cheqañchkistu ukar confiyañasa? (“ Congregacionat maynir jaqsuski uk Jehová Diosaw munasiñat uttʼayi” sat recuadro uñjjattʼäta).

¹¹ Ancianonakajj kuna amtarutï puripjjani ukar istʼañamawa. Congregacionat maynir jaqsuski  uk Diosaw munasiñat uttʼayi. Ukajj taqeniruw yanaptʼi, juchachasirirus yanaptʼarakiwa (Hebreos 12:11 liytʼañataki). ‘Ancianonakajj maynir jaqsusajj pantjasipjjewa’ sasin inas yaqhepajj sapjjchispa. Jupanakajj juchachasirit sumanakakwa parlapjjaspa. Kunjamapunïnsa uk janiw yatktanti. Ukhamajja, comité judicial ukan uñjawayapki uka ancianonakar confiyañasawa. ¿Kunatsa? Jupanakajj Biblian wiñay yatichäwiparjam lurañatakiw wal chʼamachasipjje, “Jehová Diosatakiw” juzgapjjaraki (2 Crón. 19:6).

12. ¿Congregacionat jaqsutampi jan akchʼas parlasajj kuna askinaksa yaqhepajj jikjjatawayapjje?

¹² Juchachaski uka familiamar ancianonakajj congregacionat jaqsuñ amtawayapki ukar apoyäta ukhajja, juchachasir familiamarojj Diosar kuttʼaniñapatakiw yanaptʼasma. Párrafo 4 ukan parlaniwayktan uka Elizabeth kullakajj akham siwa: “Yoqajampi janipun akchʼas parlañajj nanakatak wali chʼamapunïnwa. Ukampis Jehová Diosar kuttʼanjjäna ukhajja, congregacionat jaqsutäñapajj wakisiskapunitapwa yatiyapjjetäna. ‘Jaqsutäñajja walja wakiskirinak yateqañatakiw yanaptʼawayitu’ sasaw qhepat sapjjarakitäna. Ukaw Diosan cheqañchäwip wali valoranit uñjañatak yanaptʼawayitu” sasa. Mark sat esposopasti akham sarakiwa: “‘Nayampi jan akchʼas parlapjjatamaw Diosar kuttʼaniñatakejj yanaptʼawayitu’ sasaw yoqajajj mä qhawqha maranak qhepat yatiyitäna. Diosajj jupar istʼasirïñataki yanaptʼatapatjja walpun yuspärta” sasa.

13. ¿Kunas jan sinti llakisiñatak yanaptʼirïstam?

¹³ Kunjamas jikjjatasta uk kawkïr amigonakamas amuyiristam ukanakampiw parltʼañama. Diosar serviñan suma saytʼatäpki uka jilat kullakanakampiw chikachasiñama, jupanakaw jan llakisiñatakejj yanaptʼapjjätam (Prov. 12:25; 17:17). Párrafo 9 ukan parlaniwayktan uka Yovana kullakajj akham siwa: “Cheqas wali sapakjamakiw jikjjatasiyäta, ukampis confiykay amigonakampi parltʼañaw wal yanaptʼawayitu” sasa. ¿Mä jilatatï jan ukajj mä kullakatï arsutapampejj jukʼampik chuym ustʼayjjeristam ukhajj kunsa lurasma?

14. ¿Kunatsa maynit maynikam aguantasiskakiñasa taqe chuyma perdonasiskakiñasa?

¹⁴ Jilat kullakanakar pacienciampiw uñjañama. Cheqas janiw taqenipunejj jan pantjasis parlkistaspati (Sant. 3:2). Niyakejjay pantjasirïstanjja inas yaqhepajj jan munkasin arsutapamp chuym ustʼaychïtam, jan ukajj inas jan kamsañs puedkchïtamti, ukat janiw mayjtʼasiñamäkiti. Pablon ewjjtʼapwa amtasiñama, jupajj akham sänwa: “Maynitejj yaqha contra quejasiñatak razonanïchi ukhasa, maynit maynikam aguantasisipkakim, jumanakkamajj taqe chuyma perdonasisipkakim” sasa (Col. 3:13). Mä kullakan yoqapaw congregacionat jaqsut uñjasïna, kullakajj akham siwa: “Yaqhep jilat kullakanakajj chʼamañchtʼañ munasajj jukʼampikiw pantjasirïpjjatapat chuym ustʼayapjjetäna, Diosaw perdonañatak yanaptʼawayitu” sasa. Congregacionat jaqsutan familiapajj Diosar jan jitheqtas servisipki ukanakarojj kunjamsa jilat kullakanakajj yanaptʼapjjaspa uk uñjañäni.

15. ¿Congregacionat jichhak jaqsuta uñjaski ukan familiaparojj kunjamsa yanaptʼsna?

¹⁵ Congregacionat jaqsutan familiapajj Diosar jan jitheqtas servisipki ukanakarojj munasiñampiw uñjañasa. Míriam sat kullakan jilapajj jaqsut uñjasïna ukhajja, tantachäwinakar sarañ mä jukʼa ajjsarayasïnwa. Kullakajj akham siwa: “Mayninakajj kamsapjjetanisa sasaw ajjsarayasiyäta. Ukampis walja jilat kullakanakajj nayjamarakiw llakitäpjjäna, janirakiw jilajat kuna jan walsa parlapkänti. Ukaw jan sapakjam jikjjatasiñatak yanaptʼawayitu” sasa. Yaqha kullakajj akham sarakiwa: “Yoqajajj congregacionat jaqsutäkäna ukhajja, jilat kullakanakaw nanakar chuymachtʼañatak jutapjjäna. Yaqhepajj janiw kamsañs puedksmati sasaw sapjjetäna. Jupanakajj nayampiw jachapjjäna, yaqhepasti, chʼamañchtʼkir cartanakwa qellqanipjjetäna. Ukham lurapjjatapajj walpun yanaptʼawayitu” sasa.

16. ¿Kunjamsa jilat kullakanakajj congregacionat jaqsutäpki ukan familianakaparojj yanaptʼasipkakispa?

¹⁶ Congregacionat jaqsutan familiapar yanaptʼaskakiñäni. Jupanakajj jichhaw munasiñamp uñjatäña, chʼamañchtʼatäñ munapjje (Heb. 10:24, 25). Jaqsutanakan familianakapat yaqhepajja, ‘nanakamppachas congregacionat jaqsutäpkirista ukhamwa yaqhepajj uñjapjjetu, janiw parljjapjjetuti’ sasaw sapjje. ¡Janipun ukham lurañäniti! Yamas awkipa jan ukajj taykapajj jaqsutäki uka wayn tawaqonakajj chʼamañchtʼatäña felicittʼatäñwa munapjje. María sat kullakan esposopajj congregacionat jaqsutaw uñjasïna, familiaparus jaytawayjjarakïnwa, kullakajj akham siwa: “Yaqhep amigonakajajj utajaruw jutapjjäna, manqʼwa phaytʼapjjäna, familiajampi Bibliat yatjjatañatakis yanaptʼapjjarakitänwa. Kunjamas jikjjatasiyäta uk amuyapjjetänwa, nayamp chikaw jachapjjarakïna. Yaqhep jaqenakajj nayat kʼarinak parlapkäna ukhas arjjatapjjetänwa. Walpun chʼamañchtʼapjjetäna” sasa (Rom. 12:13, 15).

17. ¿Llakitäpki ukanakar chuymachtʼañatakejj kunsa ancianonakajj lurapjjaspa?

¹⁷ Ancianonaka, congregacionat jaqsutanakan familianakapar chʼamañchtʼapjjapunim. Jupanakar chuymachtʼañatakejj jumanakaruw Diosajj jaytapjjtam (1 Tes. 5:14). Jumanakaw tantachäwi qalltarusa tukuyarusa chʼamañchtʼañatakejj  jupanakar jakʼachasipjjañama. Visittʼapjjam, jupanakatakis orapjjarakim. Jupanakampiw predicapjjarakisma, jan ukajj familiamampi Bibliat yatjjatapkta ukarus awisajj invittʼapjjarakismawa. Ancianonakajja, Diosan ovejitanakapajj llakitäpki ukanakarojj khuyaptʼayasiñampi, munasiñampiw uñjapjjañapa, kunantï yanaptʼatäñ munapki ukans yanaptʼapjjañaparakiwa (1 Tes. 2:7, 8).

18. 2 Pedro 3:9 textorjamajja, ¿Jupar jaytawayjjapjje ukanakan kun lurapjjañapsa Jehová Diosajj muni?

¹⁸ ‘Diosajj janiw khitin jiwañapsa munkiti, jan ukasti taqenin arrepentisipjjañapwa muni’ (2 Pedro 3:9 liytʼañataki). Maynejj jachʼa juchsa lurkchejja, Diosatakejj valoranikïskiwa. Jupajj Yoqapan vidapampiw sapa maynir alawayistu, uk janiw armañasäkiti. Jehová Diosajja, munasiñampiw Jupar jaytawayjjapjje ukanakan kuttʼaniñapatakejj yanaptʼañ muni. Kuttʼanipjjañapwa suyaskaraki. Jesusajj herencia tukuntir waynat parlkäna uka uñachtʼäwiw uk amuytʼayistu (Luc. 15:11-32). Congregacionat jaqsutäpkäna ukanakat waljaniw Diosar kuttʼanjjapjje, jilat kullakanakasti munasiñampiw jupanakar katoqjjapjje. Parlaniwayktan uka Elizabeth kullakajja, yoqapan kuttʼanjjatapat wal kusisïna. Kullakajj akham siwa: “Yoqajan kuttʼaniñap suytʼaskakiñataki chʼamañchtʼapkitäna uka jilat kullakanakarojj walpun yuspärta” sasa.

19. ¿Kunatsa Jehová Diosar confiyaskaksna?

¹⁹ Diosar confiyañasapuniwa. Janipuniw kunatï jan waltʼaykistaspa uk maykistaspati. Jupajj wajjtʼasiri khuyaptʼayasiri Diosawa, Jupar munasipki, adorapki ukanakarojj taqe chuymaw munasi. Llakinakan uñjaskañäni ukhajj janipuniw jaytkistaniti, ukat janipun pächasipjjañäniti (Heb. 13:5, 6). Párrafo 12 ukan parlaniwayktan uka Mark jilatajj akham siwa: “Diosajj janipuniw jaytanukupkituti. Jan walinakan uñjaskañäni ukhajj yanaptʼapunistaniwa” sasa. “Jaqen chʼamapat jilankki uka chʼama” churaskakistaniwa (2 Cor. 4:7). Ukhamajja, familiasat maynejj congregacionat jaqsutächi ukhasa, kuttʼaniniwa sasin suytʼaskaksnawa, Jehová Diosar jan jitheqtasas serviskaksnawa.