Awk taykajajj 1940 maranakanwa Jehová Diosan Testigonakapampejj Bibliat yateqañ qalltapjjäna. Qhepat Bibliat yateqañ jaytjjapjjchïnsa, mamajajj Yatiyañataki ukat ¡Sartapjjañäni! sat revistanak katoqaskakïnwa. 1950 maranjja, Nueva York markan asamblea internacional ukaw apasïna, familiajajj ukar sarapjjänwa.

Mä qhawqha tiempotjja, Lawrence Jeffries jilataw visitapjjetäna, jupaw cheqa yatichäwinak nayar yatichañatakejj chʼamachasïna. Qalltanjja, Jehová Diosan Testigonakapajj politicar jan mitisiñ munapjjatapsa, cuartelar jan sarañ munapjjataps jan walitwa uñjayäta. “Estados Unidos markankir taqe jaqenakatï guerrar jan sarañ munapjjaspajja, enemigonakasajj markas katuntapjjaspawa” sasaw jilatar sayäta. Ukampis Jeffries jilatajj wali pacienciampiw amuytʼayitäna. Jupajj akham sitänwa: “Estados Unidos markankir taqe jaqenakatï Jehová Diosar servipjjaspa ukat enemigonakajj atacañatak jutapjjarakispa ukhajja, ¿kunsa Jehová Diosajj luraspa?” sasa. Uka toqempita yaqha toqenakampit amuytʼaykitäna ukajja, pantjatätaj amuyasiñatakiw yanaptʼitäna, ukaw jukʼamp yatjjatañajatak chʼamañchtʼarakitäna.

Mamajajj sotanor imkatayna uka Yatiyañataki ukat ¡Sartapjjañäni! sat nayra revistanakjja, walja horanakaw liyirïta. Tiempompejj cheqa yatichäwinak yateqaskatajwa amuyasiyäta, ukatwa Jeffries jilatamp Bibliat yatjjatañ qalltayäta. Tantachäwinakarus sarjjarakiyätwa. Cheqa yatichäwinakajj chuymajaruw purtʼitäna, ukatwa suma yatiyäwinak yatiyañatakejj publicadoräjjayäta. ‘Jehová Diosan jachʼa urupajj jakʼankjjatap’ amuyjjayäta ukhajja, kunanaktï nayrajj lurañ amtkayäta ukajj mayjtʼjjänwa (Sof. 1:14). Universidadar sarañ piensañat sipansa, yaqhanakaruw Bibliat yatichañ munjjayäta.

13 de junio de 1956 maranwa colegio tukuyjjayäta, ukat kimsa urunak qhepatwa mä asamblea de circuiton bautisasta. Jehová Diosat yateqañatak  chʼamachasitajata, yaqhanakar cheqa yatichäwinak yatichañatak chʼamachasitajat qhawqha bendicionanaksa katoqäjja uk janiw amuykayätti.

Bautisaskta ukat sojjta phajjsinakarojja, precursor regularäjjayätwa. Diosan Apnaqäwipat Yatiyañataki, diciembre de 1956 inglés arut mistkäna uka qellqatanjja, mä yatichäwiw mistüna. Ukanjja predikirinakajj jukʼamp munaski ukar sarapjjañapatakiw jilat kullakanakar chʼamañchasïna. Ukajj nayatakjamapunïnwa, kawkjantï jukʼa predikirinakajj utjki ukan yanaptʼañwa munayäta (Mat. 24:14).

Ukatwa Edgefield (Carolina del Sur) markar sarjjayäta, ukan pusi publicadoranakakiw mä congregacionan utjäna, nayampejj phesqanïpjjayätwa. Mä jilatan salapanwa tantachasipjjerïta. Sapa phajjsejj 100 horanakaw predikirïta. Predicación sarayasasa, asignacionanakaj phoqasasa, discursonakaj arstʼasas wali ocupatïrïtwa. Jehová Diosatak jukʼamp lurasajj jukʼampwa jupat yateqayäta.

Uka jakʼankir Johnston markajja, mä funerarian dueñaparuw Bibliat yatichayäta. Jupaw semanan mä qhawqha urunakajj trabajo churitäna, tantachäwinak apañatakisa utapwa churapjjetäna.

Bibliat yatichkitäna uka jilatan Jolly Jeffries yoqapaw Brooklyn (Nueva York) markat nayajj jakkayäta uka markar purinïna, jupampiw precursorat servipjjayäta. Mä jilatajj mä jiskʼa remolque auto maytʼapkitäna ukanwa jakapjjayäta.

Estados Unidos markat aynach toqenjja, trabajot jukʼakwa pagasipjjeri. Sapa uru trabajitat paya jan ukajj kimsa dolaranakakwa ganapjjerïta. Mä urojja, manqʼa alasisajj taqpach qollqejwa tukuntasjjayäta. Tiendat mistuskayäta ukhajja, mä chachaw akham sasin jisktʼitäna: “¿Trabajti thaqaskta? Sapa horat mä dólar pagäma” sasa. Kimsa urunakaw construccionapan qʼomachasajj trabajiyäta. Jehová Diosajj Edgefield markan quedasiñajatakiw yanaptʼaskitäna. Ukhamanakan uñjaskasinsa, 1958 maran Nueva York markan apaskäna uka asamblea internacionalaruw sarayäta.

Uka asamblean payïr urupanjja, Ruby Wadlington sat kullakaruw uñtʼayäta, jupajj Gallatin (Tennessee) markanwa precursor regularat serviskäna. Panpachaniw misionerot serviñ munapjjayäta, ukatwa Galaad escuelar sarañ munirinakatak utjki uka tantachäwir sarapjjayäta. Qhepatjja, carta toqew qellqasjjapjjayäta. Mä kutejja, Gallatin markan discurso arstʼañatakiw invittʼapjjetäna, ukhaw Ruby kullakarojj “¿nayamp casarasiñ munasmati?” sasin jisktʼayäta. Qhepatjja congregacionaparuw sarjjayäta, 1959 maranwa casarasipjjarakta.

Gallatin markankir congregacionanjja, 23 maranïkayäta ukhaw siervo de congregacionat uttʼayapjjetäna (jichhajj ancianonakan coordinadorapa satäjjewa). Charles Thompson sat machaq circuitow congregacionajar nayraqat visitapjjetäna. Jupajj wali experienciani jilatänwa. Ukhamäkchïnsa, jilat kullakanakajj kunan yanaptʼatäñsa munapjje, jupanakar yanaptʼañatakejj kunsa mayni circuitonakajj lurapjje sasaw jisktʼitäna. Janïr mä amtar  purkasajj jisktʼanak lurañasa, taqe kun yatjjatañasa wali wakiskirïtapwa jupat yateqayäta.

Mayo de 1964 maranwa Escuela del Ministerio del Reino ukar invittʼapjjetäna, ukajj mä phajjsiw apasïna, South Lansing (Nueva York) markana. Uka escuelan yatichapkitäna uka jilatanakajja, Jehová Diosar jukʼamp uñtʼañataki, Diosar serviñan jiltaskakiñatakiw chʼamañchapjjetäna.

Enero de 1965 maranjja, esposajampiru nayampirojj superintendente de circuitot serviñatakiw invittʼapjjetäna. Wali jachʼa territorion mä circuitoruw khitapjjetäna. Uka territoriojj Knoxville (Tennessee) markat niya Richmond (Virginia) markakamänwa. Carolina del Norte, Kentucky, Virginia Occidental markankir congregacionanakas uka territorionkapjjarakïnwa. Estados Unidos markat aynach toqenjja, chʼiyar jañchininakaru janqʼo jañchininakaru yaqhachañajj waliw utjäna, ukatwa chʼiyar jañchini jilat kullakanakan congregacionanakaparuk visitayäta. Chʼiyar jañchininakampi janqʼo jañchininakampejj janirakiw tantachasipjjañapäkänti. Jilat kullakanakajj janiw wali utjirinïpkänti, ukatwa kunatï utjapkitäna uk wajjtʼapjjerïta. Wali experienciani mä circuito jilatajja, kunatï wal yanaptʼkitaspäna ukwa yatichitäna. Jupajj akham sitänwa: “Mayninakatakejj jilapäkasmas ukhamäñamawa. Janipuniw congregacionanakarojj jefëkasmas ukham puriñamäkiti. Jupanakan jilapäkasmas ukhampun uñtʼayasim, ukhamatwa jupanakarojj jukʼamp yanaptʼäta” sasa.

Mä kutejja, jukʼa publicadorani mä congregacionaruw visitasipkayäta, ukhaw Ruby esposajajj mä tawaq warmir Bibliat yatichañ qalltäna, jupan imill wawapajj mä maranikïskänwa. Niyakejjay uka congregacionan jan khitis jupar yatichirjamäkchïnjja, Ruby esposajajj carta toqew yatichaskakïna. Wasitat uka congregacionar visitapkayäta ukhajja, uka warmejj taqpach tantachäwiruw jutäna. Qhepatjja pä precursora especial kullakanakaw uka congregacionar sarapjjäna, jupanakaw uka warmirojj bautisasiñapkam yatichasipkakïna. 30 maranak qhepatjja, 1995 maran Patterson markankir Betelan mä tawaq kullakaw Ruby esposajar aruntäna. Jupajj Ruby esposajamp Bibliat yateqkäna uka warmin phuchapänwa, jupasa esposopasa Galaad escuelankir clase 100 ukankapjjänwa.

Ukatjja Florida markankir mä circuitoruw asignapjjarakitäna. Ukatakejja mä auto necesitapjjayäta. Ukatwa mä auto minusampik alasipjjayäta. Ukampis nayrïr semanaw autojan bomba de aguapajj arruinasjjäna, janirakiw uk askichayañatakejj qollqenïpkayätti. Ukatwa mä jilatarojj yanaptʼayasiñatak jawsayäta. Jupajj mä trabajiripampiw autoj askichayäna, janirakiw pagayasiñ munkänti, “ukhamakïpan” sänwa. Qollqs wajjtʼapjjarakitänwa. Uka jilatajj Jehová Diosajj servirinakapar cuidaskatapwa uñachtʼayapjjetäna, mayninakar wajjtʼañajj kunja wakiskirisa ukwa amtayapjjarakitäna.

Congregacionanakar visitapjjerïta ukhajja, jilat kullakanakan utanakapanwa quedasipjjerïta, ukhamatwa suma amigonak jikjjatapjjta. Mä urojja, visitkayät uka congregacionan informepwa jan qellqañ tukuyasin maquinajar jaytayäta. Jaypʼur kuttʼasajja, alojasipkayät uka familian kimsa marani jiskʼa yoqall wawapaw uka informe “tuktʼayjjatayna”. Walja maranakas pasjjchïnjja, uk amtasin jupampejj larusisipkakiyätwa.

1971 maranjja, Nueva York markan superintendente de distritot serviñatakiw mä carta katoqapjjayäta. Janiw uk suyapkayätti. Uka markar sarjjapjjayäta ukhajj 34 maranikïskayätwa. Uka markanjja, nayaw nayrïr chʼiyar jañchini superintendente de distritöyätjja, ukampis jilat kullakanakajj wali kusisitaw katoqtʼapjjetäna.

Distritot sirvkayäta ukhajja, seman tukuyanakajj asamblea de circuitonakan Jehová Diosat yatichañajj wal gustitäna. Uka circuitonakat waljanejja, nayat sipans jukʼamp experiencianïpjjänwa. Nayajj bautisaskayäta uka urus jupanakat mayniw bautismotak discurso churäna. Yaqhasti Theodore Jaracz jilatänwa, qhepatjja Cuerpo Gobernantenkirinakat maynirëjjänwa. Brooklyn markankir Betelan servirinakatjja, waljaniw experienciani jilat kullakanakajj utjarakïna. Uka circuitonakasa Betelitanakasa nayan sumak jikjjatasiñajatak yanaptʼapjjatapat walpun yuspärta. Kunjamsa uka munasir awatirinakajj Diosan Arupar confiyapjjäna, Diosan markaparus jan jitheqtas yanaptʼapjjäna ukwa  uñjawayta. Jupanakan humilde chuymanïpjjatapatjja, superintendente de circuitot serviñajj janiw nayatak chʼamäkänti.

1974 maranjja, Cuerpo Gobernantejj walja superintendente de circuito jilatanakaruw distritot servipjjañapatak asignäna. Ukatwa nayajj circuitot wasitat sirvjjayäta, Carolina del Sur uksaruw asignapjjetäna. Uka tiempotakejja, congregacionanakasa circuitonakasa janiw yaqha yaqhäjjapjjänti, ukatwa jilat kullakanakajj wal kusisipjjäna.

1976 mara tukuyarojja, Georgia markaruw circuitot asignapjjetäna. Uka circuitojja, Atlanta ukhamarak Columbus markanak taypinkänwa. Mä kutejja, chʼiyar jañchini phesqa wawanakaw utapan nakhantayat jiwapjjatayna, jupanakatakiw mä discurso arstʼayäta, uk janipuniw armaskti. Mamitapajja, ninamp nakharatäsajj hospitalaruw mantarakïna. Hospitalarojj chʼiyar jañchini janqʼo jañchini walja jilat kullakanakaw sarapjjäna, ukhamat papit mamitapar chuymachtʼañataki. Jilat kullakanakan wali munasirïpjjatapwa uñjayäta. Ukham khuyaptʼayasiñajja, Diosan servirinakaparojj sinti jan walinakar saykatañatakiw yanaptʼaspa.

1977 maranjja, Brooklyn markankir Betelaruw mä qhawqha phajjsinak mä trabajotak invittʼapjjetäna. Uka trabajojj niya tukuyañampëjjäna ukhajja, Cuerpo Gobernantenkirinakat paniniw nayamp tantachtʼasipjjäna, ukatjja “¿Ruby esposamampejj Betelan quedasipjjasmati?” sasaw jisktʼapjjetäna. Nanakajj iyaw sapjjayätwa.

Departamento de Servicio ukanjja, 24 maranakaw yanaptʼayäta, jilapartejj chʼama jisktʼanakaruw ukan qhanañchapjje. Tiempompejj Cuerpo Gobernantejj Biblian wiñay yatichäwinakaparjamaw capacitapjjetäna. Ukarjamaw jichhajj jisktʼanakar qhanañchasi, circuitonakarusa, ancianonakarusa, precursoranakarus capacitasjje. Uka capacitaciönajj waljaniruw Diosar serviñan jiltañatak yanaptʼawayi, Diosan markaparus chʼamañchtʼawayaraki.

1995 marat 2018 marakamajja, walja sucursalanakaruw central mundialan representantepjam visitayäta, nayrajj superintendente de zona satänwa. Comité de Sucursal ukankirinakampi, betelitanakampi, misioneronakampiw tantachtʼasirïta, ukhamat jupanakar chʼamañchtʼañataki, llakinakapans yanaptʼañataki. Cuenttʼapkitäna uka experiencianakajja, Ruby esposajampirojj wal chʼamañchtʼapjjerïtu. 2000 maranjja, Ruanda markaruw visitapjjayäta. Kunjamsa uka markan 1994 maran jaqe jiwayasiñanak uñjapjjäna ukwa jilat kullakanakasa betelitanakas cuenttʼapjjetäna, ukajj wal chuym chʼalljjtayapjjetäna. Waljaninwa amigonakapasa familiaranakapas jiwapjjatayna. Ukhampachas jilat kullakanakajj Jehová Diosar confiyasipkakïnwa, suytʼäwinïsipkakïnwa, kusisitäsipkakïnwa.

Jichhajj 80 jila maranëjjapjjtwa. Aka qhepa 20 maranakajja, Estados Unidos markankir Comité de Sucursal ukankayätwa. Janis universidadar sarkstjja, Jehová Diosampi markapampejj wali sum yatichapjjetu. Ukaw Bibliat yaqhanakar yatichañatak yanaptʼawayitu, uka yatichäwinakakiw jaqenakarojj wiñayatak yanaptʼaspa (2 Cor. 3:5; 2 Tim. 2:2). Kunjamsa Bibliajj jaqenakar sum jakasiñataki, Jehová Diosamp sum apasiñatak yanaptʼi ukwa uñjawayta (Sant. 4:8). Puediski ukhajja, Jehová Diosat yateqañasa, Biblian cheqa yatichäwinakap yaqhanakar yatichañas kunja valoranisa uk uñjapjjañapatakiw Ruby esposajampejj yaqhanakar chʼamañchtʼapjjta. Cheqas Jehová Diosar ukham serviñajj wali kusiskañapuniwa.