1. Malaquías 3:16 textorjamajja, ¿kuna librsa Jehová Diosajj qellqaski, ukat kunas uka libron qellqasiraki?

 JEHOVÁ DIOSAJJ walja maranakaw mä suma libror sutinak qellqantaski. Uka librorojja Abel sat chachan sutipaw nayraqat qellqantasïna, jupaw Diosat jan jitheqtir nayrïr testigöna (Luc. 11:50, 51). b Ukat aksarojja Jehová Diosajj uka librorojj walja sutinakampwa qellqantarakïna, jichhajj walja waranq waranqa sutinakaw uka libronkjjaraki. Bibliarjamajja uka librojj aka sutinakaniwa: ‘amtañatak libro’, ‘jakañ libro’, ‘jakañ rollo’. Aka yatichäwinjja, uka librorojj ‘jakañ libro’ sañäniwa (Malaquías 3:16 liytʼäta; Apoc. 3:5; 17:8).

2. ¿Khitinakan sutinakapas jakañ libronki, ukat uka libror sutinakasajj qellqatäñapatakejj kunsa lursna?

² Uka suma libronjja, taqe khitinakatï Jehová Diosar wali respetomp adorapki, sutiparus munasipkaraki ukanakan sutinakapaw qellqantata. Jupanakajj alajjpachana jan ukajj aka oraqenwa wiñayatak jakasiñ suytʼasipki. Jiwasatï Jesucristo Yoqapan sacrificio loqtasitapjjar Jehová Diosamp sum apasiñatak chʼamachasiñäni ukhajja, sutisajj uka libron qellqantatarakïspawa (Juan 3:16, 36). ¿Taqenejjay uka libror sutinakasajj qellqantatäñap muntanjja?

3, 4. 1) Sutisatï jakañ libron qellqantatäjjchejja, ¿ukajj wiñayatakiw jakañäni sañti muni? 2) ¿Kunsa aka yatichäwinsa jutïr yatichäwinsa yatjjataskañäni?

³ Sutisatï jakañ libron qellqantatächi ukhajja, ¿ukajj wiñayatak  jakasiñasatak mä garantiati? Uka jisktʼarojj Éxodo 32:33 textow qhanañchistu, ukanjja Jehová Diosajj akham sasaw Moisesar säna: “Khititejj naya contra juch lurki ukan sutipakwa nayajj librojat apsöjja” sasa. Uka textorjamajja, uka libror qellqat sutinakajj apsutäspawa jan ukajj borrsutäspawa, Jehová Diosajj lapizampikis qellqkaspa ukhamawa (Apoc. 3:5, nota). Jehová Diosajj uka libror sutinakas wiñayatak tintampi qellqantañapkamajja, sutinakasajj uka libron qellqantatäskakiñapatakejj chʼamachasiskakiñasawa.

⁴ Inas akham jisktʼassna: ¿khitinakantï sutinakapajj jakañ libron qellqtʼatäki, jan qellqtʼatäkaraki ukanakat Bibliajj kamsisa? ¿Sutinakapajj uka libron qellqtʼatäki uka jaqenakajj kunapachas wiñay jakañ katoqapjjani? ¿Khitinakatï Jehová Diosar jan uñtʼas jiwapki ukanakan sutinakapajj uka libror qellqantatarakïspati? Uka jisktʼanakaruw aka yatichäwinsa jutïr yatichäwinsa qhanañchasiskani.

¿KHITINAKAN SUTINAKAPAS JAKAÑ LIBRON QELLQANTATAJJA?

5, 6. 1) Filipenses 4:3 textorjamajja, ¿khitinakan sutinakapas jakañ libron qellqantatajja? 2) ¿Kunapachas sutinakapajj wiñayatak qellqantatäjjani?

⁵ ¿Khitinakan sutinakapas uka libron qellqantatajja? Uka jisktʼar qhanañchtʼañatakejja, phesqa grupo jaqenakat parltʼañäni. Uka gruponakankir yaqhepanakan sutinakapajja, jakañ libron qellqantatäjjewa, yaqhepansti janiraki.

⁶ Nayrïr gruponkirinakajja, Jesucristomp chik alajjpachan apnaqañatak ajllitäpki ukanakawa. ¿Jupanakan sutinakapajj jakañ libron qellqantatäjjeti? Jïsa, qellqantatäjjewa. Kuntï apóstol Pablojj Filipos markankapkäna, jupamp chik servipkarakïna ukanakar siskäna ukarjamajja, Cristomp chik apnaqañatak invitatäpki uka ajllit cristianonakan sutinakapajj jakañ libron qellqantatäjjewa (Filipenses 4:3 liytʼäta). Ukampis sutinakapajj jakañ librot jan  borrsutäñapatakejja, Jehová Diosar jan jitheqtas servisipkakiñapawa. Jupanakajj janïr jiwkasina jan ukajj janïr jachʼa tʼaqesiñ tiempo qalltkipanwa qhepïr sello katoqapjjani, ukhaw sutinakapajj jakañ libron wiñayatak qellqantatäjjani (Apoc. 7:3).

7. Apocalipsis 7:16, 17 textorjamajja, ¿yaqha ovejanakjam uñtʼatäpki uka walja jaqenakan sutinakapajj kunapachas jakañ libron wiñayatak qellqantatäjjani?

⁷ Payïr gruponkirinakajja, yaqha ovejanakjam uñtʼatäpki uka walja jaqenakawa. ¿Jupanakan sutinakapajj jakañ libron qellqantatäjjeti? Jïsa, qellqantatäjjewa. ¿Armagedón jakkir pasapkani uka qhepats qellqantatakïskaniti? Jïsa, qellqantatakïskaniwa (Apoc. 7:14). Jupanakajj ovejanakjamäpjjewa, “wiñay jakañ katoqapjjarakini” sasaw Jesusajj säna (Mat. 25:46). Ukampis Armagedón jakkir pasapkani ukanakajja, janiw ukaratpachajj wiñay jakañ katoqapkaniti. Sutinakapajj jakañ libron lapizampikis qellqtʼatäkaspa ukhamäniwa. Jesusajj Waranqa Maranak apnaqkani ukhajja, jupaw “jupanakar awatini, jakañ churir uma jalsunakaruw irparakini”. Khitinakatï Cristor istʼasipkakini, Jehová Diosat jan jitheqtas servirinakjam uñtʼatäpkani ukanakan sutinakapajja, wiñayatakiw jakañ libron qellqantatäjjani (Apocalipsis 7:16, 17 liytʼäta).

8. ¿Khitinakan sutinakapas jakañ libron jan qellqantatäki, ukat kunas jupanakar pasani?

⁸ Kimsïr gruponkirinakajja, Armagedonan tʼunjatäpkani ukanakawa, jupanakajj cabranakar uñtasitäpjjewa. Jupanakan sutinakapajj janiw jakañ libron qellqantatäkiti. “Jupanakasti wiñayatakiw jiwapjjani” sasaw Jesusajj säna (Mat. 25:46). Uka jaqenakatjja apóstol Pablojj akham sasaw Diosan amuytʼayatajj sarakïna: “Jupanakajj juchañchataw uñjasipjjani, [...] jan mayampitak tʼunjatäpjjaniwa” sasa (2 Tes. 1:9; 2 Ped. 2:9). Khitinakatï nayratpach espíritu santo contra juchachasipkäna ukanakajj janiw wiñay jakapkaniti, jan ukasti wiñayatak tʼunjatäpjjaniwa. Ukhamajj janiw jupanakajj jaktanipkaniti (Mat. 12:32; Mar. 3:28, 29; Heb. 6:4-6). Jichhasti aka oraqen jakañatak jaktanipkani uka pä gruponakat yatjjataskañäni.

JIWATAT JAKTANIRINAKA

9. ¿Kawkïr pä gruponakas oraqen jakañatak jaktanipjjani, ukat kunansa uka pä gruponakajj jan igualäpki? (Hechos 24:15).

⁹ Bibliarjamajja, pä gruponakaw aka oraqen wiñay jakañatak jaktanipjjäni: nayrïr grupojj ‘cheqapar sarnaqer jaqenakawa’, payïr gruposti ‘jan cheqapar sarnaqer jaqenakarakiwa’ (Hechos 24:15 liytʼäta). ‘Cheqapar sarnaqer jaqenakajja’, jakkasin Jehová Diosar jan jitheqtas servirinakawa. ‘Jan cheqapar sarnaqer jaqenakasti’, janïr jiwkasin Jehová Diosar jan servipkäna ukanakawa. Jupanakat waljanejja, Diosan cheqap leyinakapat wali jitheqtataw sarnaqapjjäna. Niyakejjay uka pä gruponakajj jaktanipjjchinejja, ¿sutinakapajj jakañ libron qellqantatäjjewa sañti munpacha? Uka jisktʼar qhanañchañatakejja, uka pä gruponakat sapa maynit yatjjatañäni.

10. ¿Kunatsa ‘cheqapar sarnaqer jaqenakajj’ jaktanipjjani? ¿Jupanakat yaqhepajj kun lurañsa katoqapjjani? (“Aka revista liytʼirinakan jisktʼäwinakapa” siski uka cheqanwa aka oraqen jaktirinakat parlki uk liytʼarakïta).

¹⁰ Pusïr gruponkirinakajja, ‘cheqapar sarnaqer jaqenakawa’. Jupanakan sutinakapajj janïr jiwapkäna ukhaw jakañ libron qellqantatäjjäna, ¿jiwjjapjjäna ukhajj sutinakapajj jakañ librot borrsutäjjänti? Janiwa. Jehová Diosajj janiw jupanakat armaskiti. “Jupajj janiw jiwatanakan Diosapäkiti, jan ukasti jakirinakan Diosapawa. Jupatakejj taqe uka jaqenakajj jakasipkiwa” (Luc. 20:38). Ukhamasti cheqapar sarnaqer jaqenakajj aka oraqen jakañatak jaktanipkani ukhajja, sutinakapajj jakañ libron qellqantatakïskaniwa. Ukampis qalltanjja, “lapizamp”  qellqtʼatäkaspas ukhamakïniwa (Luc. 14:14). Jaktanipkani jupanakat yaqhepajja, ‘taqpach oraqjjaruw principet uttʼayatäpjjani’ (Sal. 45:16).

11. Jan cheqapar sarnaqer jaqenakan sutinakapajj jakañ libror qellqantatäñapatakejja, ¿kun yateqapjjañapas wakisini?

¹¹ Tukuyañatakejj phesqër grupot parltʼañäni, jupanakajj ‘jan cheqapar sarnaqer jaqenakäpjjewa’. Jehová Diosan leyinakap jan uñtʼapjjatap laykojja, inas jupanakajj janïr jiwkasin jan cheqaparjam sarnaqapkchïnti. Ukatwa sutinakapajj jakañ libron jan qellqatäkiti. Ukampis Diosajj jupanakar jaktaykani ukhajja, tiempompejj sutinakapajj jakañ libron qellqantatäñapatakiw oportunidad churani. ‘Jan cheqapar sarnaqer jaqenakajja’, yanaptʼatäñ wal munapjjani. Janïr jiwkasinjja, jupanakat yaqhepanakajj sinti jan walinakwa lurapjjäna. Ukhamasti Jehová Diosan cheqap leyinakaparjam sarnaqañ yateqapjjañapäniwa. Taqe uka jaqenakar yanaptʼañatakejja, Diosan Reinopan yanaptʼapampejj taqe oraqpachankir jaqenakaruw yatichasini.

12. 1) ¿Khitinakas jan cheqapar sarnaqer jaqenakar yatichapjjani? 2) ¿Yateqatarjam jan sarnaqañ munirinakarojj kunas pasani?

¹² ¿Khitinakas jan cheqapar sarnaqer jaqenakar yatichapjjani? Walja jaqenakampi ukhamarak jaktanipkani uka cheqapar sarnaqer jaqenakampiw yatichapjjani. Sutinakapajj jakañ libron qellqantatäñapatakejja, ¿kunsa jan cheqapar sarnaqer jaqenakajj lurapjjañapa? Jehová Diosan amigopäpjjañapaw wakisini, jakañ vidanakapsa jupar katuyasipjjañapaw wakisini. Jesusampi ajllitanakampejja, jan cheqapar sarnaqer jaqenakajj yateqatarjam nayrar sartasipkiti janicha ukwa juezanakjamajj uñjapjjani (Apoc. 20:4). Jupanakat maynitï uka yanaptʼa jan katoqañ munkani ukhajja, 100 maranïkasas tukjataw uñjasini (Is. 65:20). Niyakejjay Jehová Diosas Jesusas jaqen chuymap yatipjjchejja, janiw khitis machaq oraqen jan walinak lurjjaniti (Is. 11:9; 60:18; 65:25; Juan 2:25).

 JAKAÑATAK JAKTIRINAKAMPI JUZGATÄÑATAK JAKTIRINAKAMPI

13, 14. 1) Juan 5:29 texto liytʼasajja, ¿kunjamsa nayrajj Jesusan arunakapat amuyayätanjja? 2) Jesusan uka arunakap liytʼasajja, ¿kunanakatsa amuytʼañasa?

¹³ Jesusajj oraqen jaktirinakatwa parlarakïna. Jupajj akham sänwa: “Horasajj purininiwa, ukapachaw taqe khitinakatï sepulturankapki ukanakajj arup istʼapjjani, ukatjja mistunipjjaniwa, khitinakatï suma luräwinak lurapki ukanakajja, jakañatakiw jaktanipjjani, khitinakatï jan walinak lurapki ukanakajja, juzgatäñatakiw jaktanipjjani” sasa (Juan 5:28, 29). ¿Uka arunakampejj kamsañsa Jesusajj munäna?

¹⁴ Nayrajja, jaktanipkani uka qhepat kunanaksa jaktanirinakajj lurapjjani ukanakatsa Jesusajj parlkaspa ukhamwa amuyayätanjja, mä arunjja jaktirinakat yaqhepajj suma luräwinaksa lurapjjañapäkaspa, yaqhepajj jan walinaksa lurapjjañapäkaspa ukhamwa amuyayätanjja. Ukampis jiwatat jaktirinakat parlkasinjja, Jesusajj janiw suma luräwinakwa lurapjjani, jan ukajj jan walinakwa lurapjjani sasajj siskänti. Kunanakatï pasatäjje ukanakatwa jupajj parlaskäna, ukatwa jupajj “khitinakatï suma luräwinak lurapki”, “khitinakatï jan walinak lurapki” sasin säna. Ukham sasinjja, kunanaktï janïr jiwkasajj lurapkäna ukanakatwa parlaskäna. Cheqas ukajj ukhampunïskaspawa. Machaq oraqenjja, jan walinak luririnakarojj janiw ukhamak uñchʼukiskaniti. Jan cheqapar sarnaqer jaqenakajja, janïr jiwkasaw jan walinak lurapjjäna. Ukhamajj “jakañatakiw jaktanipjjani”, “juzgatäñatakiw jaktanipjjani” sasinjja, ¿kamsañsa Jesusajj munäna?

15. ¿Khitinakas ‘jakañatak jaktanipjjani’, ukat kunatsa?

¹⁵ Cheqapar sarnaqer jaqenakajja, mä arunjja khitinakatï janïr jiwkasin suma luräwinak lurapkäna ukanakajja, “jakañatakiw jaktanipjjani”, jupanakan sutinakapajj jakañ libron qellqantatäjjatap layku. Juan 5:29 texton “suma luräwinak lurapki” ukanakan jaktäwipat parlki ukajja, Hechos 24:15 texton ‘cheqapar sarnaqer jaqenakan’ jaktäwipat parlki ukampejj pachpakiwa. Uka qhanañchäwejja, kuntï Romanos 6:7 texton siski ukampejj igualtʼiwa, ukan akham siwa: “Maynejj jiwjje ukhajja, juchanakapat perdonatäjjewa” sasa. Cheqapar sarnaqer jaqenakajj jiwjjapjje ukhajja, juchanakapajj borrsutäjjewa, ukampis kunanaktï Diosat jan jitheqtas lurapkäna ukanakajj janiw armatäkiti (Heb. 6:10). Cheqapar sarnaqer jaqenakajj jaktanipkani ukhajja, sutinakapajj jakañ librot jan borrsutäñapatakejj jan jitheqtas Diosar servisipkakiñapäniwa.

16. ¿‘Juzgatäñatak jaktañajj’ kamsañsa muni?

¹⁶ ¿Janïr jiwkasin jan walinak lurapkäna ukanakat kamsasirakispasa? Jiwjjapjjepan juchanakapajj borrsutäjjchisa, jakkasajj janiw jupanakajj Jehová Diosat jan jitheqtas servipkänti. Sutinakapajj janirakiw jakañ libron qellqantatäkänti. Ukhamasti, “khitinakatï jan walinak lurapki” ukanakan jaktäwipajja, Hechos 24:15 texton “jan cheqapar sarnaqer” jaqenakan jaktäwipat parlki ukampejj pachpakiwa. Jupanakajj “juzgatäñatakiw jaktanipjjani”. c Ukhamajj ¿kunjamsa jan cheqapar sarnaqer jaqenakarojj juzgasini? Luräwinakapaw uñakipasini (Luc. 22:30). Khitinakan sutinakapas jakañ libror qellqantasiñapa uk amtañatakejj tiempow munasini. Ukatakejja, jan cheqapar sarnaqer jaqenakajj jan wali luräwinakap jaytapjjañapäniwa, Jehová Diosaruw jakäwips katuyasipjjañaparakïni.

17, 18. ¿Aka oraqen jakañatak jaktanipkani ukanakajj kun lurapjjañapas wakisini? ¿Apocalipsis 20:12, 13 texton “luratanakaparjam” siski ukajj kunasa?

 ¹⁷ Jiwatat jaktanipkani ukanakajj nayra tiempon cheqapar sarnaqer jaqenakäpkchïnsa jan ukajj jan cheqapar sarnaqer jaqenakäpkchïnsa, machaq rollonakan utjkani uka leyinakar istʼapjjañapaw wakisini. Jesusajj Waranqa Maranak apnaqkani ukhaw uka rollonakajj jistʼarasini. Kuntï apóstol Juanajj mä visionan uñjkäna ukjja, akham sasaw qhanañchi: “Ukatjja jiwatanakaruw uñjarakta, jiskʼan jachʼaniw jupanakajj trono nayraqatan saytʼatäsipkäna, rollonakas jistʼarasirakïnwa. Ukampis yaqha rollow jistʼarasïna, ukajja jakañ rollönwa. Jiwatanakajja kunanakatï uka rollonakan qellqatäkäna ukarjamaw luratanakaparjam juzgatäpjjäna” sasa (Apoc. 20:12, 13).

¹⁸ ¿Kuna ‘luratanakaparjamas’ jaktanirinakarojj juzgasini? ¿Janïr jiwkasin lurapkäna ukarjamäniti? Janiwa. Jupanakajj jiwjjapjje ukhajja, juchanakapajj perdonatäjjewa. Ukhamajj “luratanakaparjam” sasinjja, kunanaktï janïr jiwkasin lurapkäna ukanakat janiw parlkiti. Jan ukasti, uka luratanakapajj kuntï machaq oraqen yatichaskani ukarjamat sarnaqapjjani janicha ukanakatwa parlaski. Diosar jan jitheqtas servipkäna uka Noé, Samuel, David, Daniel chachanakasa, Jesucristot yateqapjjañapaw wakisini, sacrificiot vidap loqtasitaparus confiyapjjañaparakïniwa. Uka chachanakantï ukham yateqapjjañapajj wakischinejja, ¡jan cheqapar sarnaqer jaqenakajj jukʼamp yateqapjjañapaw wakisini!

19. ¿Khitinakatï sutinakapajj jakañ libron jan qellqantasiñap munapkani ukanakarojj kunas pasani?

¹⁹ ¿Khitinakatï sutinakapajj jakañ libron jan qellqantasiñap munapkani ukanakarojj kunas pasani? Apocalipsis 20:15 textojj akham siwa: “Khitinakatejj jakañ libron jan qellqantatäpkäna ukanakajja, nina qotar jaqontatäpjjänwa” sasa. Ukhamajj wiñayatakiw jupanakajj tukjatäpjjani. Sutinakasajj jakañ libron qellqantatäñapatakisa jan borrsutäñapatakis chʼamachasiskakiñasawa.

20. Jesusajj Waranqa Maranak apnaqkani ukhajja, ¿kuna kusiskañ luräwis lurasini? (Nayrïr paginankir dibujo uñjjattʼäta).

²⁰ Jesusajj Waranqa Maranak apnaqkani uka tiempojja, wali kusiskañäniwa. Ukanjja Jehová Diosan markapankirinakajj oraqpachankir taqe jaqenakaruw yatichapjjani. Ukampis cheqapar sarnaqer jaqenakana, jan cheqapar sarnaqer jaqenakan sarnaqäwinakapaw uñakipasirakini (Is. 26:9; Hech. 17:31). ¿Kunjamsa taqe jaqenakar yatichasini? Jutïr yatichäwinwa uka toqet qhanañchasiskani, yatichaskani ukar wali valoranit uñjañatakis yanaptʼarakistani.