1. Cristojj Waranqa Maranak apnaqani uka tiemponjja, ¿kuna kusiskañanakas utjani?

 CRISTOJJ Waranqa Maranak apnaqani uka tiempon jiwatanakajj jaktañ qalltapkani uka urojj wali kusiskañäniwa. Jiwjjapjje uka munat amigonakasaru, familiaranakasar wasitat uñjañ walpun muntanjja. Jehová Diosas ukwa munaraki (Job 14:15). Jiwatat jaktirinakampejj waljaniw oraqpachan wali kusisit jikisipjjani. Kunjamtï pasïr yatichäwin yatjjataniwayktanjja, jakañ libron sutinakapajj qellqantatäpki uka ‘cheqapar sarnaqer jaqenakajja’, “jakañatakiw jaktanipjjani” (Hech. 24:15; Juan 5:29). Munat amigonakasata familiaranakasat jiwapki ukanakat waljanejja, inas aka oraqen jakañatak nayraqat jaktanipjjchini. b Diosar jan uñtʼapkäna jan ukajj janïr jiwkasajj jupar jan servipkäna uka ‘jan cheqapar sarnaqer jaqenakajja’, “juzgatäñatakiw jaktanipjjani”.

2, 3. 1) Isaías 11:9, 10 textorjamajja, ¿kunjamas oraqpachan taqe jaqenakar yatichasini? 2) ¿Kunanakatsa aka yatichäwin yatjjataskañäni?

² Jiwatat jaktirinakajj taqeniw waljanak yateqapjjani (Is. 26:9; 61:11). Ukatwa oraqpachankir taqe jaqenakar yatichañajj  wakisini (Isaías 11:9, 10 liytʼäta). Maysa toqetjja, jan cheqapar sarnaqer jaqenakajj akanakat yateqapjjañapaw wakisini: Jesucristota, Diosan Reinopata, Jesucristojj jiwañampita juchampita kutsuykistu ukata, Jehová Diosan sutipajj kunja wakiskirisa ukata, kunatsa jupa sapaki apnaqañatakejj derechoni ukampita. Cheqapar sarnaqer jaqenakasa, kuntï Jehová Diosajj amtanakapat jichha tiempon qhanstayki ukanakatwa yateqapjjañapäni. Diosar jan jitheqtas servirinakat yaqhepajja, Bibliajj qellqañ janïr tukuyaskäna ukhaw jiwjjapjjäna. Ukhamajj jan cheqapar sarnaqer jaqenakasa cheqapar sarnaqer jaqenakasa, waljanak yateqapjjañapäniwa.

³ Aka yatichäwinjja, aka jisktʼanakaruw qhanañchasiskani: ¿kunjamsa taqe jaqenakar yatichasini? ¿Khitinakatï yatichayasipkani ukanakampejj kunas pasani?¿Jan yatichayasiñ munapkani ukanakampejj kunas pasani? Uka jisktʼanakan qhanañchäwinakap jichhürunakan yatiñasajj wali importantewa. Jiwatat jaktañajj utjkani ukhajj kunas pasani uk amuytʼañatakejja, Daniel ukat Apocalipsis libronakan wali musparkañ yaqhep profecianakapat yatjjatañaw yanaptʼistani. Nayraqatjja, Daniel 12:1, 2 textonkir profeciarjamajj kuna musparkañanakatï paskani ukanakatwa yatjjataskañäni.

4, 5. Daniel 12:1 textorjamajja, ¿kunas tukuy urunakan pasani?

⁴ (Daniel 12:1 liytʼäta). Daniel libronjja, tukuy urunakan kunanakas nayraqatajj pasani, ukjjarojj kunanakas pasarakini ukwa mä qhawqhanak qhanañchistu. Daniel 12:1 textonjja, Miguelatwa parli, jupajj Jesucristowa. Jupajj Diosan ‘markap favoraw saytʼatäski’. Uka profecian nayrïr partepajja, 1914 maranwa phoqasiñ qalltjje, uka pachpa maranwa Jesucristojj Diosan Reinopan Reyit uttʼayatäjjäna.

⁵ Ukampis Jesusajj ‘saytʼaskani’ ukhajja, “wali llakkañ tiempow utjani, mä markajj utjañ qalltkäna ukhat uka tiempokamajj janiw yaqhajj ukham utjkaniti” sasaw Daniel profetarojj qhanañchasïna. Uka ‘wali llakkañ tiempojja’, Mateo 24:21 texton ‘jachʼa tʼaqesiñ tiempot’ parlki ukampejj kikpakiwa. Jesusajj wali llakkañ tiemponwa saytʼasini, mä arunjja Armagedonanwa saytʼasini, jan ukajj Diosan markapar arjjatani. Apocalipsis libron walja jaqenakajj “jachʼa tʼaqesiñatwa mistunipjje” sasin siski ukajja, jupanakatwa parlaskaraki (Apoc. 7:9, 14).

6. Walja jaqenakajj jachʼa tʼaqesiñ tiempo jakkir pasapkani uka qhepatjja, ¿kunas pasani, ukat kunatsa ukham sistanjja? (“Aka revista liytʼirinakan jisktʼäwinakapa” siski uka cheqanwa aka oraqen jaktirinakat parlki uk liytʼarakïta).

⁶ (Daniel 12:2 liytʼäta). ¿Walja jaqenakajj wali llakkañ tiempo jakkir pasapkani uka qhepat kunas pasani? Daniel libron profeciapajj jiwatat jaktañatsa parlkchejja, janiw kunjamtï nayrajj amuykayätan ukhamäkiti. Nayrajja, Diosan servirinakapajj tukuy urunakan jupar adorañansa jaktapkaspa uka toqetwa parlaski sayätanwa. c Jichhasti machaq oraqen jiwatat jaktirinakatwa parlaski sasaw amuyjjtanjja. ¿Kunatsa ukham amuyjjtanjja? Job 17:16 textojja, ‘laqʼatwa’ parlaraki, ukham sasinjja ‘Sepulturatwa’ parlaski. Ukhamasti Daniel 12:2 textojj qhepa urunak tukuyar jiwatat jaktañajj utjkani, mä arunjja  Armagedón guerra qhepat jiwatat jaktañajj utjkani ukatwa parlaski.

7. 1) ¿Kunjamsa “yaqhepajj wiñay jakañataki” jaktanipjjani? 2) ¿Kunatsa ‘jukʼamp suma jakañatakiw jaktanipjjani’ sasin sistanjja?

⁷ Daniel 12:2 textonjja, ¿‘yaqhepajj wiñay jakañatakiw jaktanipjjani’ siski ukajj kamsañsa muni? Khitinakatï Waranqa Maranakan jiwatat jaktanipkani, Jehová Diosarusa Jesusarus uñtʼapjjani, jupanakat yatjjatasipkakini, istʼapjjarakini ukanakajj wiñay jakañwa katoqapjjani (Juan 17:3). Nayra tiempon jaktapkäna uka jaqenakat sipansa, jupanakajj ‘jukʼamp suma jakañaruw jaktanipjjani’ (Heb. 11:35). ¿Kunatsa ukham sistanjja? Nayra tiempon jaktapkäna ukanakajj wasitatwa jiwjjapjjäna.

8. ¿‘Yaqhepasti jiskʼachatäñataki ukhamarak wiñay uñisitäñatakiw’ jaktapjjani siski uka arunakajj kamsañsa muni?

⁸ Ukampis jiwatat jaktirinakat janiw taqenejj Jehová Diosampi yatichatäñ munapkaniti. Daniel profetajja, yaqhepanakajj ‘jiskʼachatäñataki ukhamarak wiñay uñisitäñatakiw’ jaktanipjjani sänwa. Kutkatasiri chuymanïpjjatapatjja, sutinakapajj janiw jakañ libron qellqantatäkaniti, janirakiw wiñay jakañsa katoqapkaniti, jupanakajj ‘wiñayatak jiskʼachatäpjjaniwa’, mä arunjja tukjatäpjjaniwa. Ukhamasti Daniel 12:2 textojja, kunatï jiwatat taqe jaktirinakampejj tukuyar paskani uka toqetwa parlaski, kuntï jaktirinakajj jiwatat jaktanisin lurapkani ukarjamaw jupanakajj uñjatäpjjani d (Apoc. 20:12). Yaqhepajj wiñay jakañ katoqapjjani, yaqhepasti janiraki.

9, 10. 1) Daniel 12:3 textorjamajja, ¿kunampis wali jachʼa tʼaqesiñ tiempo qhepat pasani? 2) ¿Khitinakas ‘alajjpachjam wal qhanapjjani’?

⁹ (Daniel 12:3 liytʼäta). Wali jakʼankki uka ‘wali llakkañ tiempo’ pasatatjja, ¿kunampis pasarakini? Daniel 12:2 texton yatjjataniwayktan ukjjarojja, kunas jachʼa tʼaqesiñ qhepat pasani ukwa Daniel 12:3 textojj qhanañchi.

¹⁰ ¿Khitinakas ‘alajjpachjam wal qhanapjjani’? Uk yatiñatakejja, Jesusan arunakapajj Mateo 13:43 textonkki ukaw yanaptʼistani. Jupajj akham sänwa: “Khä tiemponjja kunjamtï intejj kʼajkejja, ukhamarakiw cheqapar sarnaqer jaqenakajj Awkipan Reinopan kʼajapjjani” sasa. Jesusajj uka arunak siskäna ukhajja, ‘Reinon wawanakapata’, mä arunjja jupamp chik alajjpach Reinon apnaqapkani uka ajllit jilatanakapatwa parlaskäna (Mat. 13:38). Ukhamajj Daniel 12:3 textojja, ajllit cristianonakampita, Cristojj Waranqa Maranak apnaqkani ukhajj kunanaktï jupanakajj lurapkani ukanakampitwa parlaski.

11, 12. ¿Kunsa 144.000 ajllitanakajj Waranqa Maranakan lurapjjani?

¹¹ Ajllitanakajj ‘waljaniruw kunatï cheqapäki ukarojj apapjjani’. ¿Kunjamsa uk lurapjjani? Jupanakajj Waranqa Maranakanwa aka oraqenkir jaqenakar yatichasiñapatakejj Jesucristomp chik pʼeqtʼapjjani. 144.000 ajllitanakajja, janiw reyinakakïpkaniti, jan ukasti sacerdotenakäpjjarakiniwa (Apoc. 1:6; 5:10; 20:6). Ukhamatwa ‘markanakar qollañatak’ yanaptʼapjjani, jaqenakan jukʼat jukʼat perfector tukupjjañapatakis yanaptʼapjjarakini (Apoc. 22:1, 2; Ezeq. 47:12). ¡Ukham lurasajj ajllitanakajj wal kusisipjjani!

¹² Niyakejjay kunatï cheqapäki ukar ‘waljanir’ apaschinejja, ¿khitinakas uka taypinkapjjani? Jiwatat jaktanirinakampi, Armagedón  jakkir pasirinakampi, machaq oraqen nasir wawanakampi. Waranqa Maranak tukuyatarojja, oraqen taqe jakirinakajj perfectöjjapjjaniwa. Ukhamajj ¿kunapachas sutinakapajj jakañ libron lapizamp qellqantatäñat sipans tintamp qellqantatäjjani?

13, 14. Aka oraqen jakapkani taqe uka perfecto jaqenakajja, ¿kunsa janïr wiñay jakañ katoqkasajj uñachtʼayapjjañapäni?

¹³ Ak amtapuniñäni, maynejj perfectöjjchinisa, janiw wiñay jakañ katoqañatakejj derechonïkaspas ukham sañ munkiti. Adanampit Evampit amuytʼañäni, jupanakajj perfectöpkchïnsa, wiñay jakañ katoqañatakejj Jehová Diosar istʼapjjatapwa uñachtʼayapjjañapäna. Ukampis jupanakajj janiw istʼapkänti (Rom. 5:12).

¹⁴ Kunjamtï yatjjataniwayktanjja, Waranqa Maranak tukuyarojj taqeniw aka oraqen jakirinakajj perfectöjjapjjani. ¿Taqe uka perfecto jaqenakat Jehová Diosan gobiernoparojj wiñayatak apoyapjjpachäni? Jan ukajj ¿yaqhepanakajj perfectökasin Diosat jitheqtapkäna uka Adán Evar uñtasitäpjjpachänicha? ¿Uka jisktʼanakarojj kunjamsa qhanañchasini?

15, 16. 1) ¿Kunapachas taqe jaqenakajj Jehová Diosat jan jitheqtirïpjjatap uñachtʼayapjjañapäni? 2) ¿Qhep qhepa yantʼa tukuyarojj kunas pasani?

¹⁵ Supayajj Waranqa Maranakaw jistʼantatäni, uka tiempon janiw khitirus engañjkaniti.  Ukampis Waranqa Maranak tukuyarojja, Supayajj antutatäniwa, perfecto jaqenakar engañjañwa yantʼarakini. Yantʼaskani uka tiemponjja, Jehová Diosan sutiparojj respetapjjeti, gobiernoparus apoyapjjeti janicha uk taqenin uñachtʼayapjjañapaw wakisini (Apoc. 20:7-10). Kunanaktï lurapkani ukarjamaw sutinakapajj jakañ libron wiñayatak qellqantatäniti janicha ukajj uñjasini.

¹⁶ Yaqhepanakajj Adán chachjamäpjjaniwa, yaqhepasti Eva warmjamäpjjaniwa, Jehová Diosan gobiernopsa rechazapjjaniwa, qhawqhanis ukhamäpjjani uk janiw yatktanti. Ukampis ¿kunas jupanakarojj pasani? Apocalipsis 20:15 textojj akham siwa: “Khitinakatejj jakañ libron jan qellqantatäpkäna ukanakajja, nina qotar jaqontatäpjjänwa” sasa. Ukhamasti uka jan istʼasir jaqenakajj wiñayatak tukjatäpjjaniwa. Ukampis perfecto jaqenakat jilapartejja, uka qhep qhepa yantʼa pasapjjaniwa, jupanakan sutinakapajj wiñayatakiw jakañ libror qellqantatarakïni.

17. ¿Jichhürunakan kunaw pasani sasinsa mä angelajj Danielar säna? (Daniel 12:4, 8-10).

¹⁷ ¡Kunanakatï jutir urunakan paskani ukanakat amuytʼasajj walpun kusistanjja! Daniel  profetarojja, kunanakas jichhürunakana, mä arunjja ‘tukuy urunakan’ pasañapäna uka toqetwa mä angelajj qhanañchtʼarakïna (Daniel 12:4, 8-10 liytʼäta; 2 Tim. 3:1-5). Uka angelajj akham sänwa: “Kunatï cheqäki uk uñtʼañajj waljarakïniwa” sasa. Ukhamajja Daniel libron utjki uka profecianakwa Diosan markapajj jukʼamp sum amuytʼañapäna. Uka angelajj tukuy urunakat akham sarakïnwa: “Jan wali jaqenakajj jan walinak lurapjjani, janirakiw ni mä jan wali jaqes uka arunak amuykaniti” sasa.

18. ¿Kunas jan wali jaqenakarojj niya pasañampïski?

¹⁸ Jichhürunakanjja, jan walinak lurir jaqenakarojj janjamakiw castigaskiti (Mal. 3:14, 15). Ukampis niyaw Jesusajj cabranakar uñtasit jaqenakarojj juzgani, ovejanakar uñtasitäpki uka jaqenak taypitsa yaqhachjjarakini (Mat. 25:31-33). Uka jan wali jaqenakajj janiw jachʼa tʼaqesiñ jakkir pasapkaniti, janirakiw machaq oraqen jakañatakis jaktanipkaniti. Malaquías 3:16 texton parlki uka ‘amtañatak libronjja’, janirakiw sutinakapajj qellqantatäkaniti.

19. ¿Kunsa jichhürunakan lurañasa, ukat kunatsa? (Malaquías 3:16-18).

¹⁹ Jichha tiemponwa jan wali jaqenak kikpa jan sarnaqatas uñachtʼayañasa (Malaquías 3:16-18 liytʼäta). Jehová Diosajj wali valoranit uñjki uka ‘markaparojj’ tantachtʼaskiwa. ¿Jiwasajj jupanak taypinkañjjay munaraktanjja?

20. ¿Kuna promessa Jehová Diosajj Daniel profetar arsüna, kunatsa jumajj uk phoqasiñap munta?

²⁰ Wali kusiskañ urunakanwa jakasktanjja. Ukampis niyaw mä jukʼampit jukʼamp musparkañanakajj pasani. Kunürutï taqe jan walinakajj chhaqtjjani uka urojj jakʼachasisinkiwa. Ukatsti kuntï Jehová Diosajj Daniel profetar mä promesa arskäna uk phoqasirwa uñjañäni, jupajj akham sänwa: “Tukuy urunakanwa kunatï waktʼktam uk katoqañatak sartäta” sasa (Dan. 12:13). ¿Kunürutï Daniel profetasa, munat amigonakamasa, familiaranakamas jaktanipkani uka uru suytʼasktati? Ukhamächi ukhajja, Jehová Diosat jan jitheqtañataki chʼamachasim. Ukhamtï lurätajja, sutimajj Jehová Diosan jakañ libropan qellqantatakïskaniwa, janipun ukat payachasimti.