1 Corintios 15:8 textonjja, apóstol Pablojj akham sänwa: “Qheparusti nayaruw uñstarakitäna, janïr horasäkipan nasit wawäkiristsa ukhama” sasa. Apóstol Pablojj kunapachatï Jesusajj alajjpachan kʼajkir qhanapamp mä visionan uñstkäna uka horasatwa parlaski. Nayrajja, alajjpachan jakañatak jaktañajj janïr utjkipansa jupajj alajjpachan jakañatak naskaspäna jan ukajj jiwatat jaktayatäkaspäna ukhamwa qhanañchayätanjja. Ukampis wasitat uka versiculot jukʼamp yatjjatasajja, kunatï nayrajj qhanañchaskäna uk cambiañaw wakisi.

Cheqas uka versiculonjja, apóstol Pablojj cristianor tukkäna uka horasatwa parlaskäna. Ukampis “janïr horasäkipan nasit wawäkiristsa” ukhamätwa sasinjja, ¿kamsañsa apóstol Pablojj munaskäna? Uka arunakapat walja qhanañchäwinakaw utjaspa.

Cristianor tukutapajj mä akatjamatwa pasäna, jupatakejj chʼamarakïnwa. Jilapartejja, janïr horasäkipan mä warmin ususiñapajj mä akatjamatwa pasaspa. Saulo sasin uñtʼatäkäna uka apóstol Pablojja, cristianonakar arknaqañatakiw Damasco markar saraskäna, jiwatat jaktir Jesucristorus janirakiw mä visionan uñjañ suykänti. Janiw apóstol Pablokejj mä akatjamat cristianor tukuñap suykänti, Damasco markan arknaqañ amtkäna uka cristianonakas janiw uk suyapkarakïnti. Kunatï jupar paskäna ukajj jupatak wali chʼamänwa, kimsa urunakaw jan kuns uñjkarakïnti (Hech. 9:1-9, 17-19).

Cristianor tukuñap horasajj “faltaskänwa”. Griego arut ‘janïr horasäkipan nasit wawa’ sasin traducitäki uka arunakajja, “nasiñap faltkipan nasit wawa” sasaw traducisirakispa. Qullan Arunaka, 2011 Biblianjja, uka cheqajj akham sasin traducitarakiwa: “Nayax jan yuriñat yurir wawäkirista ukhama” sasa. Pablojj cristianor tukjjäna ukhajja, Jesusajj niyaw alajjpachar kuttʼjjäna. Kuntï Pablojj uka capítulo qalltan siskäna ukarjamajja, Jesusajj jaktasin alajjpachar makatjjäna uka nayrajj janiw jupajj mayninakjam Jesusamp jikiskänti (1 Cor. 15:4-8). Jesusar uñjañ horasajj “faltkaspas” ukhamäkchïnsa, mä akatjamatwa Pablojj Jesusar uñjäna.

Humilde chuymampiw jupa pachpat parlaskäna. Yaqhep yatjjatat jaqenakan arunakaparjamajja, kuntï Pablojj uka versiculon siskäna ukajj jiskʼachañatakïkaspas ukhamawa. Pablotejj jiskʼachasiñatak ukham sischïnjja, apostolöñajj janis jupar waktʼkaspa ukham sañwa munaskäna. Ukatwa jupajj akham sarakïna: “Nayajj apostolonak taypitjja jukʼamp sullkätwa, janirakiw apóstol satäñatakis walïkti, kuna laykutejj Diosan congregacionaparuw nayajj jan waltʼayañatak arknaqayäta. Ukampis Diosan wali khuyapayasiñapatwa nayajj apostoljam serviskta” sasa (1 Cor. 15:9, 10).

Ukhamasti, amuyatajj mä akatjamat Jesusajj jupar uñstkäna, jupajj cristianor tukjjäna jan ukajj uka musparkañ visión uñjañajj janis jupar waktʼkaspa uka toqetwa Pablojj parlaskpachäna. Ukhamächïns janisa, kunatï jupar paskäna ukajj jupatak wali wakiskirïnwa. Jesusan jaktatapajj jupatak wali qhanänwa. Ukatwa jupajj Jesusan jaktatapat yatiykasajj kunatï jupar mä akatjamat paskäna uka toqet parlapunirïna (Hech. 22:6-11; 26:13-18).