1. ¿Apóstol Pedron jiwañapajj jakʼankjjäna ukhajj kuna luräwsa Jehová Diosajj jupar churäna?

 APÓSTOL PEDROJJ walja maranakaw Jehová Diosar jan jitheqtas serviwayäna. Jesusamp chikaw Diosan arunakap yatiyäna, juparakiw jan judiöpki ukanakar predicañ qalltäna, cuerpo gobernante taypinkarakïnwa. Niya jiwañampëjjäna, jiwañap jakʼankjjatap yatisjjarakïna ukhajja, Jehová Diosat yaqha wakiskir luräwi katoqäna. 62 marat 64 marakamajja, Jehová Diosajj primera Pedro segunda Pedro cartanak qellqañapatakiw amuytʼayäna. Apóstol Pedrojja, jiwatap qhepat uka cartanakajj cristianonakar yanaptʼaskakispa ukwa munarakïna (2 Ped. 1:12-15).

2. ¿Kunatsa Pedron cartanakapajj horasarupuniw qellqasïna sasin sissna?

² Cristiano jilat kullakanakapajj “kunayman tʼaqesiñanakamp llakisiyat” uñjasisipkäna ukhaw Pedrojj uka cartanak qellqäna (1 Ped. 1:6). Jan wali jaqenakaw jilat kullakanakarojj kʼari yatichäwinak yatichasipkäna, qʼañu juchanakaruw jilat kullakanakarojj purtʼasiyapjjarakïna (2 Ped. 2:1, 2, 14). Jerusalenan jakir cristianonakajj niyaw ‘taqe kunan tukusïwip’ uñjapjjañapäna, mä arunjja Jerusalén markasa templosa Roma markan ejercitonakapamp tukjatäñapänwa (1 Ped. 4:7). Cheqas Pedron cartanakapajja, kuna yantʼanakantï uñjasisipkäna ukanak aguantañataki, kuna yantʼanakantï jutïrin uñjasipjjañapäkäna ukatak wakichtʼatäñatakiw uka tiempon yanaptʼañapäna. b

3. ¿Kunatsa Pedron cartanakapat yatjjatañasa?

³ Pedrojj nayrïr patak maranakan jakir cristianonakarus uka cartanak qellqkchïnjja, Jehová Diosan munañapatwa uka cartanakajj Biblianki. Ukhamajj uka cartanakat suma yatichäwinak yateqsna (Rom. 15:4). Qʼañu juchanak lurañar  chʼamañchir mundonwa jakaraktanjja, jan walinakan uñjasiñajj Diosar serviñan chʼamtʼayarakistaspawa. Mä qhawqha tiempotjja, Jerusalenampir templompir tukjkäna ukat sipans jukʼamp jachʼa tʼaqesiñajj niyaw utjani. Pedrojj qellqkäna uka wali wakiskir yatichäwinakan pä cartanakapajja, Jehová Diosan urup suytʼaskakiñataki, mayninakar jan ajjsarjjañataki, jilat kullakanakar taqe chuym munasiñatakiw yanaptʼistani. Uka pachpa ewjjtʼanakaw ancianonakarojj Diosan congregacionapar sum uñjapjjañapatak yanaptʼani.

4. ¿Kunas Diosar confiyatas aynachtʼayaspa? (2 Pedro 3:3, 4).

⁴ Jilaparte jaqenakajja, kuntï Bibliajj jutïrit siski ukarojj janiw creyipkiti. Niyakejjay walja maranak akapachan tukusiñapat taqe chuym yatiyaskstanjja, jiwas conträpki uka jaqenakajj inas jiwasat burlasipjjchi, janiw kunapachas aka mundojj tukuskaniti sasin sapjjarakchi (2 Pedro 3:3, 4 liytʼäta). Maynitï predicacionansa jan ukajj trabajonkir mä compañerosasa jan ukajj mä familiarasas ukham sistaspa ukhajja, Diosar confiyañan aynachtʼjjsnawa. Kunas jan aynachtʼañatak yanaptʼistaspa uk apóstol Pedrow qhanañchäna.

5. ¿Kunas akapachan tukusiñap pacienciamp suytʼañatak yanaptʼistani? (2 Pedro 3:8, 9).

⁵ Inas yaqhepanakajj sintjamakiw Jehová Diosajj aka jan wali mundor tukjañatak qheptʼaski sasin amuyapjjchi. Ukampis kuntï Pedrojj siskäna ukajj cheqapar amuyañatakiw yanaptʼistu. Jehová Diosajj janiw kunjamtï jaqenakajj uñjapki ukham tiempor uñjkiti, ukwa Pedrojj amtayistu (2 Pedro 3:8, 9 liytʼäta). Diosatakejj waranq maranakajj mä urump sasikiwa. Ukhamarus jupajj pacienciampiw suytʼaski, janiw khitin tukjatäñaps munkiti. Ukampis urupajj purininiwa, aka mundos tukjatarakïniwa, ukhamajj tiempo utjkipan taqe markanakankir jaqenakar predicañajj mä jachʼa privilegiowa.

6. ¿Kunas Jehová Diosan urup wali amuyump suytʼaskakiñatakejj yanaptʼistani? (2 Pedro 3:11, 12).

⁶ Jehová Diosan urup ‘wali amuyump suytʼaskakiñatakiw’ Pedrojj ewjjtʼistu (2 Pedro 3:11, 12 liytʼäta). ¿Kunas ukatakejj yanaptʼistaspa? Machaq mundon kunja sumas jakasjjañäni uka toqet sapüruw lupʼiñasa. ¿Anqansa suma aire samskasma, suma manqʼanaksa manqtʼaskasma ukham amuyasmati? ¿Jiwatat jaktanipki uka amigonakamarusa jan ukajj familiaranakamarus katoqkasma ukham amuyasmati? Walja patak maranak nayra jakapkäna ukanakarojj ¿kunjamsa Biblian profecianakapajj phoqasïna uk yatiyaskatam amuyaraktati? Uka toqenakat lupʼiñaw taqe chuym suytʼaskakiñatakisa qhepa urunakan jakaskatas amtañatakis yanaptʼätam. Niyakejjay kunas jutïrin pasani uk yatjjstanjja, janipun kʼari yatichäwinak yatichapki ukanakampejj apayasiñäniti (2 Ped. 3:17).

7. ¿Jaqer ajjsaratas laykojj kunsa jan lurjjsna?

⁷ Niyakejjay Jehová Diosan urupan jakʼankatap yatstanjja, taqe jaqenakaruw Reinon suma yatiyäwinakap yatiyañ muntanjja, ukampis awisanakajja jaqer ajjsaratas laykojj yatiyañ ajjsarayassnawa. Ukaw Jesusar juzgapkäna uka arumajj Pedror pasäna. Jupajj janiw Jesusan discipulopjam uñtʼayasiñ munkänti, walja kutiw Jesusar jan uñtʼir tukurakïna (Mat. 26:69-75). Ukampis ukham ajjsarañarojj atipänwa, ukatwa qhepat akham säna: “Kunarutï jaqenakajj ajjsarapki ukarojj jan ajjsarapjjamti, janirak sint llakisipjjamti” sasa (1 Ped. 3:14). Uka arunakaparjamajja, jaqer ajjsarañar atipsnawa.

8. ¿Kunas jaqer jan ajjsarjjañatak yanaptʼistaspa? (1 Pedro 3:15).

⁸ Jaqer jan jukʼamp ajjsarjjañatakejja, Pedron aka ewjjtʼapaw yanaptʼistaspa, jupajj  akham sänwa: “Chuymanakamanjja Cristorojj Tatiturjam jachʼañchapjjam” sasa (1 Pedro 3:15 liytʼäta). Ukatakejj Jesucristo Tatit Reyisajj qhawqha autoridadanisa, kunja chʼamanisa uka toqet lupʼiñasawa. Maynir predicañjamäki ukhatï jan arsuñ puedksta jan ukajj ajjsarayassta ukhajja, Reyisat amuytʼam. Kunjamsa alajjpachan millón millón angelanak taypin apnaqaski uk amuytʼam. Amtapunim, ‘Diosaw juparojj taqe autoridad churi, alajjpachansa ukhamarak aka oraqensa’, ukatsti “sapürupuniw [jumampïskani], akapachajj tukuskani ukapachkama” (Mat. 28:18-20). Biblian yatichäwinakap arjjatañatakejj “wakichtʼatäpjjam” sasaw Pedrojj chʼamañchtʼistu. ¿Trabajonsa, escuelansa jan ukajj yaqha cheqans predicañ munasmati? Ukatakejj kuna horasas predicasma uk amuytʼam, kamsasas predicäta uk wakichtʼasirakim. Jan ajjsarañatak Jehová Diosar yanaptʼa mayisim, jupaw jaqenakar jan ajjsarañatakejj yanaptʼitani sasin confiyarakim (Hech. 4:29).

9. ¿Kunapachas Pedrojj munasiñ jan uñachtʼaykäna? (Dibujo uñjjattʼarakïta).

⁹ Pedrojj mayninakar munasitap uñachtʼayañ yateqänwa. Pedrojj Jesusan aka arunakap istʼpachänwa, jupajj akham sänwa: “Nayajj mä machaq mandamiento churapjjsma: jumanakajj maynit maynikam munasipjjam. Kunjamtï nayajj munasipksmajja, ukhamarak jumanakajj maynit maynikam munasipjjam” sasa (Juan 13:34). Ukampis qhepatjja, judío cristianonakar  ajjsarasajj janiw Pedrojj jan judiöpkäna uka cristianonakamp manqʼañ munjjänti. Apóstol Pablojj Pedron kʼari chuymanïtap qhan sarakïna (Gál. 2:11-14). Pedrosti Pablon cheqañchatap katoqasisajj cambiarakïnwa. Pä cartapanjja, janiw jilat kullakanakar munasiñatak parlkänti, jan ukasti uka munasiñ uñachtʼayañatwa parlarakïna.

10. ¿Kunas “jilapurjam cheqa chuymampi” munasiñ uñachtʼayañatakejj yanaptʼistu? (1 Pedro 1:22).

¹⁰ Pedrojj jilat kullakanakar “jilapurjam cheqa chuymampi” munasiñatakiw ewjjtʼistu (1 Pedro 1:22 liytʼäta). “Kunatï cheqapäki” ukar istʼasaw ukham munastanjja, “Diosajj janiw khitirus yaqhachkiti” siski uka yatichäwejja, “kunatï cheqapäki” uka taypinkarakiwa (Hech. 10:34, 35). Jiwasatï congregacionan yaqhep jilat kullakanakaruk munasstan ukhajja, Jesusajj munasipjjam siskäna ukarojj janiw istʼktanti. Inas yaqhep jilat kullakanakampejj jukʼamp suma amigöstan, Jesusajj ukhamarakiw yaqhep discipulonakapampejj jukʼamp suma amigöpjjäna (Juan 13:23; 20:2). Ukampis Pedrojja, taqe jilat kullakanakasar “jilapurjam” munasiñ uñachtʼayañatakiw amtayistu, mä arunjja familia taypin munasiñajj utjki uka pachpa munasiñ uñachtʼayañasawa (1 Ped. 2:17).

11. ‘Chuymatpach wal munasiñajj’ ¿kamsañs munaraki?

¹¹ Pedrojj akham sänwa: “Chuymatpach maynit maynikam wal munasipjjam” sasa. Uka textonjja, “wal munasipjjam” siski ukajj khitinakarutï chuymatpach jan munasirjamäksna ukanakamppachar munasiñatwa parli. Ak amuytʼañäni, mä jilatatï jan ukajj mä kullakatï chuym ustʼayistaspa jan ukajj mä jan wal luristaspa ukhajj ¿kunsa lursna? Inas munasiñ uñachtʼayañat sipans ukhamat ukham kuttʼaysna. Ukampis uk luratasajj janiw Jehová Diosar gustkaspati, ukwa Pedrojj Jesusat yateqäna (Juan 18:10, 11). Apóstol Pedrojj akham sasaw qellqäna: “Jan wal luratajja, jan jumanakajj jan walimpi kuttʼayapjjamti, insultatajj janirak insultapjjamti. Antisas jupanakarojj bendisipjjam” sasa (1 Ped. 3:9). Jumatï mayninakar wal munasïtajja, jan wal lurapktam ukanakarus munasiñampiw sum uñjarakïta.

12. 1) Jilat kullakanakar wal munasstan ukhajj ¿kunampsa lurañäni? 2) Mayachtʼatäñatak chʼamachasisipkakiñäni sat videojj ¿kun lurañatakis jumar chʼamañchtamjja?

¹² Nayrïr cartapanjja, Pedrojj “wal munasipjjam” sasaw sarakïna. Ukham munasirejj janiw mä qhawqha juchanakak perdonkiti, jan ukasti “walja juchanakwa perdoni” (1 Ped. 4:8). Uka arunak qellqkasajja, inas Pedrojj kuntï walja maranak nayrajj Jesusajj perdonañ toqet yatichkäna uk amtaschïna. Kunapachatï Pedrojj “paqallq kuti” perdonañ toqet parlaskäna ukhajja, inas wali perdonirïkaspas ukham amuyaschïna. Ukampis Jesusajj “77 kuti” perdonañamawa sasaw säna, mä arunjja perdonatapajj jan jaktʼkayäñapänwa uksti jiwasajj yateqañasarakiwa (Mat. 18:21, 22). ¿Uka ewjjtʼarjam lurañajj jumatak chʼamakiti? Ukhamächi ukhajj chʼamachasiskakim, jan aynachtʼamti. Niyakejjay pantjasirïstanjja, Jehová Diosan servirinakapatakejj mayninakar perdonañajj awisajj chʼamakïspawa. Ukhamächi ukhajj ¿kunsa lurasma? Taqe kunat sipansa, jilatamaru jan ukajj kullakamar perdonaña, jupamp sumankañaw jukʼamp importantejja. c

13. ¿Kunatsa ancianonakatakejj congregacionar awatiñajj chʼamäspa?

¹³ Cheqas kuntï Jesusajj jiwatat jaktanisajj jupar siskäna uk janiw Pedrojj armkpachänti, Jesusajj akham sänwa: “Jiskʼa ovejanakajar awatirapita” sasa (Juan 21:16). Jumatï ancianöstajja, uka arunakar phoqañamätam  yatirakpachätawa. Ukampis uka wakiskir luräwimp phoqañatak tiempo apstʼasiñajj chʼamakïspawa. Nayraqatjja, ancianonakajj familiaparuw cuidañapa, ukatakejj kunanaktï familiapajj jakañatak necesitki ukanakwa churañapa, munasiñampiw uñjañapa, Jehová Diosar jakʼachasiñatakiw yanaptʼañaparaki. Ukhamarus ancianonakajj predikir sarañanwa yateqaskañ sarnaqapjjañapa, tantachäwinakan yatichañatakisa, asambleanakan discursonak arstʼañatakis sum wakichasipjjañapawa. Yaqhep ancianonakajja, Comités de Enlace con los Hospitales jan ukajj Departamento Local de Diseño y Construcción ukanakanwa yanaptʼapjje. Cheqas ancianonakajj wali ocupatäpjjewa.

14. ¿Kunatsa ancianonakajj congregacionar awatipjjañapa, ukat kunas ukatak yanaptʼaspa? (1 Pedro 5:1-4).

¹⁴ Pedrojj akham sasaw mayni ancianonakar säna: “Diosan congregacionaparojj sum awatipjjam” sasa (1 Pedro 5:1-4 liytʼäta). Cheqas ancianonakajj jilat kullakanakar munasipjjatapsa, jupanakar awatiñ munapjjataps yattanwa. Ukampis inas awisajj wali ocupatäpjjatapatsa jan ukajj qaritäpjjatapats uka lurañanakamp jan phoqerjamäpjjatap amuyasipjjchi. Jumatï ukham amuyassta ukhajj ¿kunsa lurasma? Kunjamsa jikjjatasta uk Jehová Diosar yatiyam. Pedrojj akham sänwa: “Maynitejj [...] mayninakar yanaptʼchejja, Diosajj churki uka chʼamampis yanaptʼkaspa ukham yanaptʼpan” sasa (1 Ped. 4:11). Inas jilat kullakanakajj kunanakatï akapachan jan askichañjamäki uka jan walinakan uñjasipjjchi. Ukampis amtapunim, jichhasa machaq mundonsa, jumat sipans Jesucristo ‘jilïr awatiriw’ jukʼampinak luraspa. Ancianonakajj jilat kullakanakapar munasipjjaspa, awatipjjaspa, “congregacionatakejj yateqaskayäp[jjaspa]” ukwa Jehová Diosajj muni.

15. ¿Kunsa mä ancianojj congregacionar awatiñatak luri? (Foto uñjjattʼarakïta).

¹⁵ William sat experienciani mä ancianotakejja, congregacionar awatiñajj wali importantewa. COVID-19 pandemiajj qalltkäna ukhajja, jupatakis mayni ancianonakatakis gruponakapankir publicadoranakamp parltʼañajj wali wakiskirïnwa. ¿Kunatsa? William jilatajj akham siwa: “Jilat kullakanakat waljaniw utanakapan sapakïpjjäna. Jankʼakiw maynejj jan walinak amuyjjaspäna” sasa. Mä jilatas jan ukajj mä kullakas llakinakan uñjasi ukhajja, William  jilatajj wali atencionampiw jupar istʼi, ukhamat kunsa necesiti, kunas llakisiyi uk yatiñataki. Ukatsti ukarjamaw yanaptʼaraki; jilapartejj jw.org cheqankir mä videompiw yanaptʼi. William jilatajj akham sarakiwa: “Nayra tiempot sipans jichhaw ovejitanakar awatiñajj jukʼamp importantejja. Jaqenakar Jehová Diosar uñtʼapjjañapatak yanaptʼañatakejj wal chʼamachastanjja, ukhamarakiw congregacionar awatiñatakisa, Jehová Diosan ovejitanakapar cheqa yatichäwinakat jan jitheqtapjjañapatak yanaptʼañatakis chʼamachasiñasa” sasa.

16. ¿Kunjamanakats Pedron cartanakapat yateqawayktan ukarjam lursna?

¹⁶ Aka yatichäwinjja, Pedron pä cartanakapat mä qhawqha yatichäwinakak yatjjatawaytanjja. Inas kunansa jumajj mejorañama uk amuyaraksta. ¿Kunja sumas machaq mundon jakasjjañäni uka toqet jukʼampit lupʼiñ munasma? ¿Trabajonsa, escuelansa jan ukajj yaqha lugarans jukʼamp predicañti amtta? ¿Kunjamsa yaqha toqenakat jilat kullakanakar wal munasitam uñachtʼayasma uk amtaraktati? Jumatï ancianöstajja, ¿Jehová Diosan ovejitanakapar taqe chuyma jan qarjtas awatiñti amtarakta? Juma pachpat amuykiptʼasatï kunansa mejorañama uk amuyassta ukhajja, jan desanimasimti. Amtapunim, ‘Tatitojj khuyapayasiriwa’, jupaw mejorañamatak yanaptʼätam (1 Ped. 2:3). Apóstol Pedrojj akham sarakistuwa: “Diosajja, […] jumanakar wakichañ tukuyjjaniwa. Jupaw sum saytʼayapjjätam, chʼamaniruw tukuyapjjarakïtam. Suma cimientjjaruw uttʼayapjjarakïtam” sasa (1 Ped. 5:10).

17. Jiwasatï chʼamachasiskakiñäni Diosampis wakichayasiskakiñäni ukhajj ¿kuna premios jiwasatak utjani?

¹⁷ Mä kutejja, janis Diosan Yoqap nayraqatapankañatak askïkaspa ukhamwa Pedrojj amuyasïna (Luc. 5:8). Ukampis Jehová Diosampi Jesusampiw Pedror yanaptʼapjjäna, ukatwa Pedrojj Cristor jan jitheqtas arkäna. Ukhamätapatjja, “Salviri Jesucristo Tatitusan wiñay Reinoparuw [mantäna]” (2 Ped. 1:11). ¡Ukajj mä jachʼa bendicionapunïnwa! Jumatï Pedrjam chʼamachasiskakïta, Jehová Diosampis wakichayasiskakïta ukhajja, wiñay jakañ premio katoqarakïta. ‘Diosar confiyatam laykojja wali kusisitaw salvación katoqäta’ (1 Ped. 1:9).