1. Trabajonkiri jan ukajj colegionkiri compañeronakasajj ¿kunsa jisktʼapjjestaspa?

 TRABAJONKIRI jan ukajj colegionkir mä compañeromajj Biblian yatichäwinakapar creyitamat jisktʼktam ukhajj ¿kunsa lurirïta? ¿Sustjasirïtati? Waljaniw sustjasiñ yattanjja. Uka toqet jisktʼapkistu ukhajja, kunsa maynejj amuyi kunjamas jikjjatasi uk amuyañatakiw yanaptʼistu, predicaraksnawa. Ukampis awisanakajj jiskhisiñatakiw jisktʼapjjestaspa. Cheqas ukajj pasaspawa. Inas kuntï yaqhanakajj jiwasat parlapki ukanak istʼas ukham jisktʼapjjchistu (Hech. 28:22). Janiw ukakïkiti, ‘qhepa urunakanwa’ jaktanjja, jaqenakajj “jan kuna acuerdorus mantañ munirinaka”, “qhorunaka” ukhamäpjjewa (2 Tim. 3:1, 3).

2. ¿Kunatsa llampʼu chuymanïñasajj wakisi?

² Biblian yatichäwinakapat toqesiñ amtampi jisktʼapkistu ukhajj “¿kunjamarak munasiñampi pacienciampi jaysasispasti?” sasin inas jisktʼassta. Ukatakejj llampʼu chuymanïñaw yanaptʼätam. Llampʼu chuyman jaqejj janiw facilak coleraskiti, colerayapjje jan ukajj jan jaysirjamäjje ukhajja, controlasiñ yatirakiwa (Prov. 16:32). Inas jumatak llampʼu chuymanïñajj chʼamächi. ¿Kunsa llampʼu chuymanïñatakejj lursna? Biblian yatichäwinakapar creyitamat maynejj jiskhisiñ munaspa ukhajj ¿kunas llampʼu chuymanïñatakejj yanaptʼiristam? Jumatï wawanakanïstajj ¿kunjamsa Biblian yatichäwinakapar llampʼu chuymamp arjjatañapatak yanaptʼasma? Ukanak jichhajj yatjjatañäni.

3. ¿Kunatsa llampʼu chuymaninakajj chʼamaniw saytʼasipjje sistanjja? (2 Timoteo 2:24, 25).

³ Llampʼu chuymaninakajj janiw aynachtʼapkiti, antisas chʼamaniw saytʼasipjje. Jan walinakar llampʼu chuymampi saykatañatakejja,  chʼam katjjatañasaw wakisi. Llampʼu chuymanïñajj ‘espíritu santon achup’ taypinkiwa (Gál. 5:22, 23). “Llampʼu chuymani” sasin griego arut traducitäki uka arojja, awisajj salvaje caballor mansoptayañat parlañatakiw apnaqasirïna. Cheqas mä salvaje caballojj mansoptaspawa, mansösajj chʼamanirakïspawa. ¿Jiwasat kamsasirakispasa? ¿Llampʼu chuymanïsajj chʼaman saytʼasiraksnati? Janiw sapakejj puedksnati, ukatakejj Diosaruw espíritu santop mayisiñasa. Waljaniw llampʼu chuymanïñ yateqawayapjje. Walja Testigonakajja, jupanakamp jiskhisiñ munapki ukhaw llampʼu chuymanïpjjatap uñachtʼayapjje, ukaw yaqhepanakarojj Testigonakat sum amuyjjañatakejj yanaptʼawayi (2 Timoteo 2:24, 25 liytʼäta). ¿Kunsa llampʼu chuymanïñatakejj lurasma?

4. ¿Kunsa Isaacat yateqsna?

⁴ Biblian parlki uka sarnaqäwinakajja, llampʼu chuymanïñajj kunja wakiskirisa ukwa qhanstayi. Isaacajj Guerar markan jakkäna ukhajja, uka cheqan jakir filisteonakajj jupat envidiasiñ qalltapjjäna, ukatwa tatapan servirinakapajj allsupkäna uka phujunak laqʼampi tapantapjjäna, uka phujunakat chʼajjwañat sipansa Isaacajj wali jayar sarjjasaw yaqha phujunak allsüna (Gén. 26:12-18). Ukampis filisteonakajj nanakankiwa sasaw sapjjarakïna. Ukhamäkchïnsa, Isaacajj llampʼu chuymanïtapwa uñachtʼayäna (Gén. 26:19-25). Walja kuti jan walinak lurapkäna ukhajja, ¿kunas llampʼu chuymanïñatakejj Isaacar yanaptʼäna? Jupajj awk taykapat yateqpachäna. Abrahanajj pacienciampiw kuns lurirïna, Sarasti ‘pacienciani llampʼu chuymani’ ukhamänwa (1 Ped. 3:4-6; Gén. 21:22-34).

5. Awk taykanakajj wawanakapar llampʼu chuymanïñ yatichapjjaspawa, ¿kuna experiencias uk uñachtʼayi?

⁵ Cristiano awk taykanakajja, wawanakaparojj llampʼu chuymanïñ wal valorapjjañapatakiw yatichapjjaspa. Kunas 17 marani Maxence waynarojj pasäna uk amuytʼañäni. Colegionsa predicacionansa, toqesir jaqenakampiw parlañapäna. Awk taykapajj llampʼu chuymanïñatakiw pacienciamp yanaptʼapjjäna. Akham sapjjarakiwa: “Colerasiñat sipansa jan ukajj ukhamat ukham kuttʼayañat sipansa, ukanak jan lurañataki controlasiñatakiw chʼam katjjatañajj wakisi, ukwa yoqajajj amuyäna” sasa. ¡Maxence waynajj llampʼu chuymanïñwa yateqäna!

6. ¿Kunjamsa orasiñajj jukʼamp llampʼu chuymanïñatak yanaptʼistaspa?

⁶ Mayninakas colerayapkistaspa ukham amuytʼañäni. Inas maynejj Jehová Diosat jan walinak parlchispa, jan ukajj Biblian yatichäwinakapat burlaschispa. ¿Kunas uka horasan yanaptʼistaspa? Jehová Diosaruw espíritu santopsa yatiñanïñsa mayisiñasa, ukhamat llampʼu chuymampi jaysañasataki. Jukʼamp sum jaysañajänwa sasin amuyasstan ukhajj ¿kunsa lursna? Jehová Diosaruw wasitat orasiñasa, kunjamsa yaqha horasan jukʼamp sum jaysaraksna uka toqetwa lupʼiñasa. Ukhamtï lurañänejja, controlasiñatakisa llampʼu chuymanïñatakis Jehová Diosaw espíritu santop churistani.

7. ¿Kunjamsa Biblian yaqhep textonakap pʼeqer yatsuñajj jan walinakan yanaptʼistaspa? (Proverbios 15:1, 18).

⁷ Llampʼu chuymamp parlañajj jiwasatak chʼamäki ukhajja, Biblian yaqhep textonakapaw yanaptʼistaspa. Espíritu santon yanaptʼataw Biblian yaqhep versiculonakap amtsna (Juan 14:26). Proverbios libronjja, Biblian wiñay yatichäwinakapaw utji, ukaw llampʼu chuymanïñatak yanaptʼistaspa (Proverbios 15:1, 18 liytʼäta). Mä jan walin controlasitasat kuna askinakas utji uksa uñachtʼayarakiwa (Prov. 10:19; 17:27; 21:23; 25:15).

8. Maynejj jisktʼkistu ukhajj ¿kun amtañasas wakisi?

⁸ Amuytʼasirïñajj jiwasar yanaptʼarakistaspawa (Prov. 19:11). Biblian yatichäwinakapar creyitapat maynejj jiskhintki ukhajja, amuytʼasir jaqejj controlasiñ yatiwa. Niya jilapartejja, jaqenakajj jisktʼapkistu ukhajj kunatsa ukham jisktʼapjjestu uk janiw sapkistuti. Ukhamätapatjja, janïr jayskasajj kunatsa maynejj ukham jisktʼistu uk jan yatitas amtañasawa (Prov. 16:23).

9. ¿Kunjamsa Gedeonajj amuytʼirïtapsa llampʼu chuymanïtapsa uñachtʼayäna?

⁹ Gedeón chachat amuytʼañäni. Mä kutejja, Efraín tribunkirinakajj wali colerataw jupar toqentapjjäna, jupanakajj Israel markan enemigonakap contra nuwasir sarañatak jan invitatäpjjatapatwa colerasipjjäna. Ukampis ¿kunatsa jupanakajj cheqpachans coleratäsipkäna? ¿Jiskʼachatjam amuyasisat colerasipjjpachäna? Ukhamächïnsa janisa, Gedeonajj wali amuytʼirïnwa, kunjamas chuymanakapan jikjjatasipjjäna uk respetänwa, llampʼu chuymampiw jaysarakïna. ¿Ukhamätapat kunas jikjjatasïna? “Jupanakajj colerap apjtayasipjjänwa” (Juec. 8:1-3).

10. Jaqenakajj Biblian yatichäwinakapar creyitasat jisktʼapkistu ukhajj ¿kunas suma chuymamp jaysañatak yanaptʼistaspa? (1 Pedro 3:15).

¹⁰ Inas trabajonkiri jan ukajj colegionkir compañerosajj akham jisktʼchistaspa: “¿Kunatsa  jumajj Biblian ewjjanakaparjam sarnaqta?” sasa. Cheqansa, kunarutï creyktan uk arjjatañ muntanwa, ukampis jisktʼkistu ukan amuyunakapar respetasaw jaysañasa (1 Pedro 3:15 liytʼäta). Maynejj jisktʼkistu ukajja, kunas jupar llakisiyi uk amuyañatakiw yanaptʼistaspa, janiw jiskhisiñsa munkaspa jan ukajj jiskʼachañsa munkistaspa ukham amuyañasäkiti. Kuna amtampisay maynejj jisktʼkchistojja, munasiñampi llampʼu chuymampi jaysañaw jukʼamp wakiskirejja. Ukaw kunatsa ukham amuyi uk sum amuytʼasiñapatak yanaptʼaspa. Jaqenakajj jiwasar toqeñataki jan ukajj jiskʼachañatakis parlkchistojja, jiwasajj munasiñampipuniw jaqenakar uñjañasa (Rom. 12:17).

11, 12. ¿Kunsa janïr jayskasajj lurañasa? Kunjamsa ukajj sum parltʼasiñatak yanaptʼistaspa uk mä qhawqhanak qhanañchtʼam. (Foto uñjjattʼarakïta).

¹¹ Trabajosankir mä compañerosajj “¿kunatsa cumpleaño jan amtapkta?” sasas jisktʼkistaspa ukham amuytʼañäni. Jisktʼapar janïr jayskasajj ¿kunsa nayraqat amuytʼañasa? ¿Mä rat kusistʼañats jarkʼapkistaspa ukhamti jupanakajj amuyapjjpacha? Jan ukajj ¿trabajon sum apasiñsa aptʼasiyirjamäksna ukhamti amuypacha? Qalltañatakejja, trabajonkir compañeronakat llakisitapat wal yuspärsna, ukatjja trabajonkirinakamp sum apasiñ utjatapajj jiwasar wal gustatapwa saraksna. Inas ukajj jupar yanaptʼchispa, Bibliajj kunsa cumpleañonak amtañ toqet amuytʼayistu uk qhanañchañatakejj inas yanaptʼarakchispa.

¹² Mä chʼama jisktʼa jisktʼapkistu ukhajj ukhamarakwa lursna. “Testigonakajj kuntï chachapura jan ukajj warmipura sarnaqañ toqet amuyapki uk cambiapjjañapawa” sasin inas mä compañerosajj sischistaspa. ¿Kuntï Testigonakajj uka toqet sapki uk jan wal amuyatapatti ukham saskpacha? ¿Mä amigopati jan ukajj mä familiarapach ukham sarnaqpacha? ¿Chachapura jan ukajj warmipura sarnaqerinakarojj uñisksnasa ukhamti amuypacha? Inas taqe jaqenakat llakisitasa, sapa maynejj amtañatak derechonïki ukar respetatas qhanañchsna (1 Ped. 2:17). b Inas ukhamat kunatsa Biblian mandatonakapar istʼañajj wakisi uk qhanañchsna.

13. ¿Diosar creyiñajj janipuniw walïkiti siski ukarojj kunjams yanaptʼasispa?

¹³ Maynitï Biblian yatichäwinakapat jan jiwasjam amuyatap qhan arstʼaschi ukhajja, kunsa amuyi uk yatksnas ukham janiw jankʼakejj amuyañasäkiti (Tito 3:2). Diosar creyiñajj janipuniw walïkiti sasas colegionkir mä compañerosajj siskistaspa ukham amuytʼañäni. ¿Jupajj evolucionaruw creyi, uka toqet wal yatiraki sasin jankʼakit sasma? Inas kuntï mayninakajj sapki ukarjamak uk sischi. Evolución toqet jiskhisiñat sipansa, kunatï uka toqet jukʼamp amuytʼañatak yanaptʼkaspa uk sañamaw jukʼamp walïspa. Inas jw.org cheqan taqe kunas Diosan lurtʼatätapat parlki uka yatichäwina jan ukajj videon enlacep apaychisma. Inas ukan utjir yaqhanakampi parltʼañ munchispa. Jumatï respetomp parlätajja, Bibliat yatjjatañ munañapatakiw yanaptʼasma.

14. Testigonakat kʼarinak amuykäna ukan jan cheqätap compañeropar amuytʼayañatakejj ¿kunjamsa Niall jilatajj jw.org cheqamp yanaptʼasïna?

¹⁴ Kuna kʼarinaktï yaqhepanakajj Testigonakat sapki ukan jan cheqätap uñachtʼayañatakejja, Niall sat qʼajjo wayna jilatajj jw.org cheqampiw yanaptʼasi. Niall jilatajj akham siwa: “Colegionkir mä compañerojajja, janiw cienciarojj creyktati, pruebanak utjatapar creyiñat sipans cuentonakan mä aleq librorukiw confiytajja sasaw sirïtana” sasa. Compañeropajj Biblian yatichäwinakapar creyitap jan  qhanañchayasiñ munkäna ukhajja, Niall jilatajj jw.org cheqan “Bibliampi cienciampi” siski uka cheq liytʼañapatakiw mayirïna. Qhepatjja, Niall jilatajj compañeropan uka yatichäwinak liytʼatapwa yatïna, ukaw jakañ vidajj kunjamatsa utjawayi uka toqet facilak parltʼañatak yanaptʼäna. Jiwasarojj ukaw yanaptʼarakistaspa.

15. ¿Wawanakapan llampʼu chuymampi jaysapjjañapatakejj kunjamsa awk taykanakajj yanaptʼapjjaspa?

¹⁵ Awk taykanakajja, Biblian yatichäwinakapar creyitapat maynejj jisktʼki ukar llampʼu chuymampi jaysapjjañapatakiw wawanakapar yatichapjjaspa (Sant. 3:13). Yaqhep awk taykanakajj familiampi Bibliat yatjjatkasaw uka toqenakat practicapjje. Colegion kuna toqenakat parlañas utjaspa, ukanakatwa yatjjatapjje, kunjamsa colegion jaysapjjaspa ukwa practicapjjaraki. Ukhamarus wawanakaparojja, llampʼu chuymamp parlapjjañapataki, mayninakan yatiñ munapjjañapatak parlapjjañapatakiw yatichapjjaraki (“ Practicañajj familiamaruw yanaptʼaspa” sat recuadro liytʼäta).

16, 17. ¿Kunjamsa wayn tawaqonakarojj mayninakamp parltʼañatak practicañajj yanaptʼaspa?

¹⁶ Familian practicañajja, janiw wayn tawaqonakarojj mayninakan chuymapar purtʼkir yatichañatakik yanaptʼkiti, jan ukasti kunatsa Biblian yatichäwinakaparojj creyi uk jupanak pachpa amuytʼasipjjañapatakiw yanaptʼaraki. “Los jóvenes preguntan” ukat “Ponlo por escrito” sat cheqanakaw jw.org cheqan utji, ukanakajj wayn tawaqonakan Diosar jukʼamp confiyapjjañapatak lurtʼatawa. Biblian yatichäwinakapat yaqhanakar pachpa arunakapamp qhanañchtʼañatak yanaptʼañatakirakiwa. Jiwasatï uka yatichäwinakat familian yatjjatañäni ukhajja, taqeniw  Biblian yatichäwinakap llampʼu chuymampi chuymar purtʼkir qhanañchañ yateqsna.

¹⁷ “Familian practicañajj walpun yanaptʼawayitu” sasaw Matthew sat mä wayna jilatajj säna. Familiampi Bibliat yatjjatkasajja, kuna toqenakatti colegion parlañajj utjkaspa uka toqenakatwa jilapartejj awk taykapamp yatjjatapjje. Jupajj akham siwa: “Colegion kunanakat parlañas utjaspa ukwa amuytʼapjjta, kuntï yatjjatapkta ukarjamaw maynimpejj kunjamsa parltʼirista uk practicapjjta. Kunatsa Biblian yatichäwipar creyta uk qhan amuyta ukhajja, facilakiw mayninakarojj jan payachasis llampʼu chuymamp parltjja” sasa.

18. Colosenses 4:6 textorjamajj ¿kunas jiwasatak wali importantëñapa?

¹⁸ Kunatsa Biblian yatichäwinakapar creytan ukajj qhan amuykañäkchinisa, janiw ukajj maynir jiwasjam amuyañapatakejj yanaptʼkapunispati. Ukampis wali amuyumpi llampʼu chuymampi parltʼañaw maynirojj yanaptʼaspa (Colosenses 4:6 liytʼäta). Biblian yatichäwinakapar creyktan ukat maynimp parltʼañajja, mä pelot jaqtʼañampi sasiwa. Pelotajj kʼachatakwa jaqtʼasispa, jan ukajj wali chʼamampiw jaqtʼasispa. Kʼachatak jaqtʼsna ukhajja, maynejj facilakwa katoqaspa, jiwasampis anataskakispawa. Wali amuyumpi llampʼu chuymampi arstʼañäni ukhajja, maynejj istʼaskakistaspawa. Maynitï jiwasamp jiskhisiñ munchi jan ukajj burlasiñ munchi ukhajja, parlaskakiñasajj janiw wakiskapuniti (Prov. 26:4). Ukampis waljanejj janiw ukhamäpkiti, istʼapjjarakistaspawa.

19. Biblian yatichäwinakap arjjatktan ukhajj ¿kunas llampʼu chuymanïñatak yanaptʼistaspa?

¹⁹ Kunjamtï yatjjatawayktanjja, llampʼu chuymanïñatak chʼamachasisajj walja askinakwa jikjjatsna. Chʼama jisktʼanak jisktʼapkistani jan ukajj ina chʼusat jiskʼachapkistani ukhajja, llampʼu chuymamp jupanakar parlañatakejj Jehová Diosar chʼam mayisipjjañäni. Llampʼu chuymanïñajja, jan jiwasjam amuyapki ukanakamp jan jiskhisiñatakiw yanaptʼistani. Respetompi llampʼu chuymampi arsuñajja, kuntï jiwasata Biblian yatichäwinakapat amuyapki ukajj kʼarïtap amuyañatakiw yaqheparojj yanaptʼaspa. Ukhamajj ‘arjjatañatak wakichtʼatäpjjañäni, ukampis llampʼu chuymampi wali respetompi uk lurapjjañäni’ (1 Ped. 3:15). ¡Llampʼu chuymanïsajj chʼamani saytʼasirakiñäni!