1. ¿Kunsa Pedrojj walja chawllanak milagrot katusajj luräna?

 PEDROJJ arum paqaraw chawlla katuñatak chʼamachasiskäna, janirakiw ni mä chawlls katkänti. Ukampis Jesusajj jupar akham sänwa: “Aka botjja jukʼamp manqha toqer apam, chawlla katuñatak qänanakam qotar jaqontapjjam” sasa (Luc. 5:4). Pedrojj chawlla katuñat payachaskchïnsa, kuntï Jesusajj siskäna ukwa luräna. Ukarjam lurasasti, walja chawllanakpun katupjjäna, qänanakapas tʼaqartjjarakïnwa. Uka milagro uñjasasti, Pedrompi jupamp chikäsipkäna ukanakampejj “walpun musparapjjäna”. Pedrojj akham sasaw jachʼat säna: “Tata, jan jakʼachasistati, nayajj jucharar jaqëtwa” sasa (Luc. 5:6-9). Amuyatajja, Pedrojj janis Jesusan nayraqatapankañatakejj askïkaspa ukhamwa amuyasïna.

2. ¿Kunjamsa Pedron sarnaqäwipat yatjjatañajj yanaptʼistu?

² Pedrojj cheq saskäna: jupajj ‘jucharar jaqënwa’. Bibliarjamajja, Pedrojj walja kutiw kun arsutapatsa kun luratapatsa wal arrepentisïna. ¿Jumajj Pedrjamarakit jikjjatasta? ¿Walja tiempot suma chuymanïñatakisa jan ukajj mä jan wal apanukuñatakis chʼamachasiskta? Ukhamächi ukhajj jan aynachtʼamti. Pedrot yateqasiñaw yanaptʼiristam. Pedron walja kuti pantjasitanakap janiw Jehová Diosajj Arupar qellqaykaspänti, ukampis jiwasar yatichañatakiw qellqayäna (2 Tim. 3:16, 17). Pedron sarnaqäwipat yatjjatasajja, jiwasjam pantjasirïtapa, jiwasjam jaqekïtapwa amuytanjja, ukhamajj janiw Jehová Diosajj perfectöñas suykiti. Antisas chʼamachasiskaksna, pantjaskasas nayrar sarantaskaksna ukwa muni.

3. ¿Kunatsa jiwasajj chʼamachasiskakiñasa?

³ ¿Kunatsa chʼamachasiskakiñasajj wakisi? Kuna laykutejj mä kun lurañatak chʼamachasiskaktan ukhajja, jukʼamp sum uk lurañ yatjjtanjja. Amuytʼañäni, maynitï mä instrumento tukañ yateqañ munchi ukhajja, walja maraw ukatak chʼamachasiñapa.  Yateqkasajj inas walja kuti pantjaschini, ukampis practicasajj jukʼampiw yateqaspa. Sums tukañ yatjjchinejja, inas awisajj pantjaschini. Ukampis pantjasisajj janiw aynachtʼkiti, practicaskakiwa. Jiwasampejj ukhamarakiwa. Mä jan wal lurañ apanukjjstansa, inas wasitat uk lurañar kuttʼjjsna. Ukampis uk jaytañatakejj chʼamachasiskaktanwa. Taqeniw kun arsusasa kun lurasas arrepentistanjja. Ukampis janitï aynachtʼkañänejja, Jehová Diosaw mejoraskakiñatak yanaptʼistani (1 Ped. 5:10). Kunjamsa Pedrojj chʼamachasiskakïna uk yatjjatañäni. Pantjasirïkchïnsa Jesusajj munasiñampiw jupar uñjäna, uk yatiñaw Jehová Diosar serviskakiñatak yanaptʼistaspa.

4. ¿Kunsa Pedrojj jupa pachpat säna, ukampis kunjamsa Jesusajj jupar chuymachtʼäna? (Lucas 5:5-10).

⁴ Kunatsa Pedrojj “jucharar jaqëtwa” sasin säna jan ukajj kuna juchanakapats piensaskpachäna uk janiw Bibliajj qhanañchkiti (Lucas 5:5-10 liytʼäta). Inas yaqhep pantjasitanakapajj sinti jan walinakächïna. Jesusajj Pedron ajjsaratapwa amuyäna, inas jupa pachpar jan confiyasitapat ukham ajjsarchïna. Ukampis Jesusajj Pedron jan jitheqtas serviskakiñap yatïnwa. Ukatwa juparojj “jan ajjsaramti” sasin munasiñampi säna. Jesusan jupar confiyatap uñjañajj Pedrotak jan armkañänwa. Uka qhepatjja, Mesiasar jan qhepaqtas arkañatakejj Pedrompi Andrés jilapampejj chawlla katuñ negocio jaytjjapjjänwa. Uk lurañ amtapjjatapat suma bendicionanak katoqapjjäna (Mar. 1:16-18).

5. Pedrojj jan ajjsaratapatsa Jesusar arkatapatsa, ¿kuna bendicionanaksa katoqäna?

⁵ Criston discipulopjamajja, Pedrojj musparkañ milagronak uñjäna. Kunjamsa Jesusajj usutanakar qolläna, demonionak alissüna, jiwatanakarus jaktayäna ukanakwa jupajj uñjäna (Mat. 8:14-17; Mar. 5:37, 41, 42). b Kunjamsa Jesusajj Diosan Reinopan apnaqani ukwa mä musparkañ visionan uñjarakïna. Uksti Pedrojj janipuniw armkänti (Mar. 9:1-8; 2 Ped. 1:16-18). Cheqas janitï Pedrojj Jesusar arkkaspänjja, janipuniw ukanak uñjkaspänti. ¡Pedrojj jan aynachtʼatapatsa, taqe uka bendicionanak katoqatapats walpun kusispachäna!

6. ¿Kunatsa Pedrojj pantjasitanakapamp jan aynachtʼañatakejj chʼamachasiskakiñapäna?

⁶ Pedrojj Jesusan luratanakap uñjkchïnsa, arups istʼkchïnjja, pantjasitanakapampi jan aynachtʼañatakejj chʼamachasiskakiñapänwa. Ukanakat mä qhawqha uñjañäni. Biblian profecianakaparjamajj tʼaqesiyapjjetaniwa, jiwayapjjarakitaniwa sasin Jesusajj qhanañchkäna ukhajja, Pedrojj jupar toqenoqänwa  (Mar. 8:31-33). Walja kutirakiw Pedrosa mayni apostolonakas khitis jilïrejja uka toqet jiskhisipjjäna (Mar. 9:33, 34). Janïr Jesusar jiwayapkäna uka arumajja, Pedrojj coleramp atipayasisaw mä chachan jiñchup thoqoqayäna (Juan 18:10). Uka pachpa arumarakiw ajjsaratap laykojj Jesús amigopar kimsa kut jan uñtʼir tuküna (Mar. 14:66-72). Ukatsti chuymas kawkstʼataw wal jacharakïna (Mat. 26:75).

7. Jiwatat jaktasajj ¿kuna oportunidadsa Jesusajj Pedror churäna?

⁷ Pedrojj wali aynachtʼatäkäna ukhajj janiw Jesusajj jupar apanukkänti. Jiwatat jaktjjäna ukhajja, qhawqsa jupar munasïna uk sañapatakiw mä oportunidad churäna. Ovejanakapar humilde chuymampi awatiñapatakiw Pedror invittʼäna (Juan 21:15-17). Pedrojj taqe chuymaw iyaw sarakïna. Ukatwa Pentecostés urojj Jerusalén markankäna, espíritu santomp nayrïr kutin ajllitäpkäna ukanakat maynïrirakïnwa.

8. ¿Kunansa Pedrojj Antioquía markan pantjasïna?

⁸ Alajjpachar sarañatak ajllitäjjäna uka qhepatsa, Pedrojj pantjasitanakapamp jan aynachtʼañatakejj chʼamachasiskakiñapänwa. 36 maranjja, kunjamsa yaqha markankiri jan circuncidat Cornelio chachajj espíritu santo katoqäna ukwa Pedrojj uñjäna. Ukaw Diosajj ‘jan khitir yaqhachirïtapa’, yaqha markankir jaqenakarus cristiano congregación taypir katoqjjatap qhan uñachtʼayäna (Hech. 10:34, 44, 45). Ukat uksarojja, Pedrojj yaqha markankir jaqenakampejj manqʼasjjänwa, nayrajj janipuniw uk lurkaspänti (Gál. 2:12). Ukampis yaqhep judío cristianonakajja, judionakampi yaqha markankir jaqenakamp manqʼapjjañapajj janiw walïkiti sasaw amuyapjjäna. Ukham amuyir yaqhep judionakajj Antioquía markar puripjjäna ukhajja, Pedrojj janiw yaqha markankir jilatanakapampejj manqʼjjänti, inas judío cristianonakar jan chuym ustʼayañatak uk lurchïna. Pedron kʼari chuymanïtap uñjasajja, Pablojj taqen uñjkataw Pedror cheqañchäna (Gál. 2:13, 14). Ukhamsa Pedrojj pantjaskchïnjja, janiw aynachtʼkänti, nayrar sarantaskakïnwa. ¿Kunas ukatak yanaptʼäna?

9. Juan 6:68, 69 textorjamajj ¿kunjamsa Pedrojj jan jaytjasirïtap uñachtʼayäna?

⁹ Pedrojj jan jaytjasirïnwa, janiw kunampis Jesusar arkañat jarkʼayaskänti. Mä kutejja, kuntï Jesusajj siskäna uk janiw discipulonakapajj amuyapkänti, ukhaw Pedrojj jan jaytjasirïtap uñachtʼayäna (Juan 6:68, 69 liytʼäta). Mayni discipulonakapajj janiw jisktʼapkänti, ni Jesusan qhanañchañaps mayipkänti, ratukiw Jesusar arkañ jaytjjapjjäna. Ukampis Pedrojj janiw uk lurkänti, taqen istʼkataw “jumaw wiñay jakañar apiri arunakanïtajja” sasin Jesusar säna.

10. ¿Kunjamsa Jesusajj Pedror confiyatap uñachtʼayäna? (Dibujo uñjjattʼarakïta).

¹⁰ Jesusajj janiw kunapachas Pedror jaytjkänti. Jesusajj janïr jiwayatäkäna uka arumajja, Pedrompi mayni apostolonakampejj jupar jaytjapjjañapätap yatïnwa. Ukhampachasa, Pedrojj kuttʼasinkaniwa, janiw jaytjkitaniti sasaw Jesusajj confiyäna (Luc. 22:31, 32). Cheqas “chuymajj qhawqsa lurañ munaskiwa, ukampis jañchejj janiw chʼamanïkiti” uk Jesusajj sum amuyäna (Mar. 14:38). Ukatwa Pedrojj jan uñtʼiris tukchïnjja, Jesusajj jupar jan apanukkänti. Jiwatat jaktjjäna ukhajja, Pedroruw uñstäna, amuyatajj jupampikiw parläna (Mar. 16:7; Luc. 24:34; 1 Cor. 15:5). Ukajj walpun apóstol Pedrorojj jan aynachtʼatäjjañatak yanaptʼpachäna.

11. ¿Kunjamsa Jesusajj Jehová Diosaw cuidaskitani sasin confiyañapatakejj Pedror chʼamañchtʼäna?

¹¹ Jesusajj Jehová Diosaw cuidaskitani sasin confiyañapatakiw Pedror chʼamañchtʼäna. Jiwatat  jaktjjäna ukhajja, Jesusajj wasitatwa Pedrompiru mayni apostolonakampirojj mä milagro toqejj walja chawllanak katuyäna (Juan 21:4-6). Uka milagro uñjañajja, jakañatak wakiski ukanak Diosaw churitani sasin confiyañatakiw Pedror yanaptʼpachäna. Jesusajj ‘Diosan Reinop nayraqat thaqerinakarojj’ Jehová Diosaw cuidaskani sasin siskäna ukjja, Pedrojj uka horasanwa uk amtpachäna (Mat. 6:33). Uk yatiñaw Pedrorojj chawlla negocio jaytjjañatakisa, predicañ nayrar uchañatakis yanaptʼpachäna. 33 maran Pentecostés urunjja, jan ajjsartʼasaw jupajj Diosan arunakap yatiyäna, ukhamatwa waranq waranqa jaqenakajj suma yatiyäwinak istʼapjjäna (Hech. 2:14, 37-41). Qhepatjja, walja samaritanonakampiru yaqha markankir jaqenakampiruw Criston discipulopäpjjañapatak yanaptʼäna (Hech. 8:14-17; 10:44-48). Ukhamajj Pedro toqew Jehová Diosajj kunayman jaqenakar congregacionapar irpanïna.

12. Walja tiempos mä jan wal jaytañatak chʼamachasiskstanjja, ¿kunjamsa Pedron sarnaqäwipajj yanaptʼistu?

¹² Jehová Diosajj jan aynachtʼañatak yanaptʼarakistaspawa. Awisajj aynachtʼañajj utjakipunispawa, mä jan wal jaytañatak chʼamachasisksna ukhaw chʼamäspa, jukʼampis mä jan wal jaytañatak walja tiempo chʼamachasisktan ukhaw chʼamäspa. Inas pantjasitanakasajj Pedron pantjasitanakapat jukʼamp jan walïkaspas ukham amuysna. Ukampis Jehová Diosajj nayrar sarantaskakiñatakejj chʼam churistaspawa (Sal. 94:17-19). Mä jilatat amuytʼañäni, janïr Testigökasajj walja maranakaw chacha masipamp sarnaqäna. Uka jan wal apanukjjchïnsa, awisajj uka jan wal lurañ munañaw chuymapan utj-jjarakïna. ¿Kunas juparojj chʼamachasiskakiñatak yanaptʼäna? Jilatajj akham siwa: “Jehová Diosaw chʼam churistu. Diosan espíritu santopan yanaptʼapampejja […], cheqa thakin saraskaksnawa […] ukwa nayajj yateqta” sasa. Ukatsti akham sarakiwa: “Jehová Diosaw jupar serviñajatakejj yanaptʼawayitu […], pantjasirïkstsa chʼamañchtʼaskakituwa” sasa.

13. ¿Kunjamsa Pedrot yateqasitas uñachtʼaysna? (Hechos 4:13, 29, 31; fotonak uñjjattʼarakïta).

¹³ Kunjamtï yatjjataniwayktanjja, Pedrojj jaqer ajjsaratapatwa walja kuti pantjasïna. Ukampis Jehová Diosan yanaptʼap mayisisajj janiw ajjsarjjänti (Hechos 4:13, 29, 31 liytʼäta). Jiwasarojj ukhamarakiw Jehová Diosajj jan ajjsarirïñatak yanaptʼistaspa. Horst jilatat amuytʼañäni, jupajj waynitutpachaw  Testigöna, nazi partidojj apnaqkäna ukhaw Alemania markan jakasïna. Walja kutiw colegion mayninakan waytʼatajj “¡Heil, Hitler!” sirïna. Toqeñat sipansa, tatap mamapajj jupampiw orapjjerïna, Jehová Diosaruw jan ajjsarañapatak yanaptʼa mayipjjerïna. Tatap mamapan yanaptʼatasa, Diosar confiyatapatsa, Horst jilatajj janiw jaqer ajjsarjjänti. Qhepat jilatajj akham sänwa: “Jehová Diosajj janipuniw kunapachas jaytjkitänti” sasa. c

14. ¿Kunjamsa awatirinakajj aynachtʼatanakar munasiñamp chʼamañchtʼapjjaspa?

¹⁴ Jehová Diosampi Jesusampejj janipuniw jaytjkistaniti. Pedrojj Cristor jan uñtʼir tuküna ukhajja, Jesusarojj arkaskakiniti jan ukajj ukharukich jaytjjani uka wakiskir amtaruw puriñapäna. Jesusajj Jehová Diosaruw Pedrotak ruwtʼarapïna, ukhamat Diosar confiyañan jan aynachtʼañapataki. Ukatjja Pedrotak orasitapwa jupar yatiyäna, jumaw jilanakamar chʼamañchtʼäta sasaw jupar sarakïna (Luc. 22:31, 32). ¡Jesusan uka arunakap amtañajj walpun Pedror chʼamañchtʼpachäna! Jiwasarojj ukhamarakiw wali wakiskir amtanakar puriñajj waktʼistani. Jehová Diosar jan jitheqtas serviskakiñatakejja, inas jupajj awatirinak toqejj munasiñamp chʼamañchtʼchistani (Efes. 4:8, 11). Walja maranak ancianot serviri Paul jilatajja, mayninakar chuymachtʼañatakejj wal chʼamachasi. Diosar serviñan aynachtʼirjamäpki uka jilat kullakanakarojja, kunjamsa Jehová Diosajj cheqa yatichäwinak uñtʼapjjañapatak yanaptʼäna ukwa amtayi. Niyakejjay Jehová Diosajj munasiri jan jaytjasiri Diosächejja, janipuniw kunäkipansa jaytjapkätamti sasaw jupanakar saraki. Uka anciano jilatajja, kunjamsa walja aynachtʼat jilat kullakanakajj Jehová Diosan yanaptʼapampejj nayrar sarantasipkaki ukwa uñjawayi.

15. ¿Kunjamsa Pedron sarnaqäwipasa Horst jilatan experienciapas Mateo 6:33 texton phoqasitap uñachtʼayi?

 ¹⁵ Kunjamtï uñjktanjja, Jehová Diosajj Pedrompiru mayni apostolonakampirojj kunanakatï jakañatak wakiski ukanak churapunïnwa. Jiwasatï Diosar serviñ nayrar uchañäni ukhajja, ukhamarakiw kunanakatï jakañatak wakiski ukanak churistani (Mat. 6:33). Segunda Guerra Mundial pasatatjja, parlaniwayktan uka Horst jilatajj precursorat serviñwa amtäna. Ukampis jupajj wali pobrënwa, janjamakiw nayatakejj qollq ganasiñ puedkäti, janirakiw Jehová Diosarus sapürunjam serviñ puedkäti sasaw payachasïna. ¿Kunsa jupajj luräna? Jehová Diosaruw yantʼäna, circuitojj visitkäna ukhajj semanpachaw predikir misturakïna. Seman tukuyarojja, circuito jilatajj qollqeni mä sobre jupar churäna, uk katoqasisajj walpun jupajj musparäna, janirakiw khitis uk churäna uk jupar yatiykänti. Uka qollqempejj walja phajjsinakaw precursorat servispäna. Jehová Diosaw cuidaskitani sasin confiyañatakiw Horst jilatarojj uka regalojj yanaptʼäna. Ukat uksarojj Diosan Reinop nayrarupuniw uchäna (Mal. 3:10).

16. ¿Kunatsa Pedron sarnaqäwipatsa jupajj qellqkäna uka cartanakats yatjjatañasa?

¹⁶ Pedrojj “Tata, jan jakʼachasistati” sasas Jesusar siskchïnjja, ¡Jesusan jupat jan jitheqtatapat walpun kusispachäna! Jan jitheqtir apostolöskakiñapatakisa, cristianonakatak yateqaskayäñapatakisa Jesusajj Pedror wakichtʼaskakïnwa. Kunjamsa Pedror wakichtʼäna ukat walja suma yatichäwinakwa yateqsna. Kunanaktï Pedrojj yateqkäna ukanakat yaqhepanaksa yaqha ukhamanaksa, nayrïr patak maranakankir congregacionanakar apaykäna uka pä cartanakanwa aytäna, uka pä cartanakajj Bibliankarakiwa. Jutïr yatichäwinjja, uka pä cartanakat wali wakiskir yatichäwinak yatjjataskañäni, kunjamsa jichhürunakan uka yatichäwinakarjam sarnaqsna ukwa yatjjataskarakiñäni.