1, 2. ¿Kunatsa Sansonan sarnaqäwipat yatjjatañasa?

 SANSÓN chachat parlir istʼkta ukhajj ¿kuns amtasta? Inas wali chʼamani jaqëtapat amtasta. Cheqas wali chʼaman jaqënwa, ukampis pantjasitapat jan walinakanwa uñjasirakïna. Ukhamäkchïnsa, kunjamsa Sansonajj jakäwipan Diosar confiyatap uñachtʼayäna ukaw Jehová Diosatak jukʼamp importantënjja, Sansonat yateqañasatakejj Bibliaruw sarnaqäwip qellqayäna.

² Jehová Diosajj Israel markapar yanaptʼañatakejj musparkañanakwa Sansonarojj lurayäna. Sansonajj jiwjjäna uka walja patak maranak qhepatjja, Sansonan sutip Diosar taqe chuyma confiyir jaqenakamp chik qellqañapatakiw Jehová Diosajj apóstol Pablor amuytʼayäna (Heb. 11:32-34). Sansonajj sinti jan walinakan uñjaskasas Jehová Diosarupuniw confiyäna. Aka yatichäwinjja, kunjamsa Sansonan sarnaqäwipajj chʼamañchtʼistu, kuna suma yatichäwinaksa sarnaqäwipat yateqsna ukwa yatjjataskañäni.

3. ¿Kuna luräwsa Sansonajj katoqäna?

³ Sansonajj naskäna ukhajja, filisteonakaw Israel markar apnaqaskäna, wal tʼaqesiyapjjarakïna (Juec. 13:1). Niyakejjay filisteonakajj wali qhoru jan ukajj wali phiru jaqenakäpjjchïnjja, israelitanakarojj wal tʼaqesiyapjjäna. Ukatwa Jehová Diosajj Sansonar ajllïna, ukhamat “filisteonakan amparapat Israelar salva[ñapataki]” (Juec. 13:5). ¡Uka luräwimp phoqañajj wali chʼamänwa! Ukhamajj Jehová Diosaruw Sansonajj confiyañapäna.

4. ¿Kunjamsa Jehová Diosajj Sansonar yanaptʼäna? (Jueces 15:14-16).

⁴ Mä kutejj kunjamsa Sansonajj Jehová Diosar confiyäna  uk uñjañäni. Sansonar katuntañatakejja, Filisteo soldadonakat mä jachʼa grupow Lehí markar sarapjjäna, uka markajj inas Judá markankchïna. Judá markankir chachanakajj wal ajjsarayasipjjäna, ukatwa Sansonarojj enemigonakapar apjjaruyapjjäna. Pachpa israelit jilanakapaw pä machaq pitanakamp ñachʼantasajj filisteonakan ukar apapjjäna (Juec. 15:9-13). Ukampis “Jehová Diosan espiritu[paw] jupar chʼam churäna”, ukhamatwa Sansonajj salvasïna. Ukatjja, “asnon mä quijada chʼakhap uñjäna”, uk katusaw ¡1.000 filisteonakar jiwarayäna! (Jueces 15:14-16 liytʼäta).

5. ¿Kunjamsa Sansonajj Jehová Diosar confiyatap uñachtʼayäna?

⁵ ¿Kunatsa Sansonajj asnon mä quijadapampik filisteonakar jiwaraypachäna? Kuna laykutejj asnon quijadapar confiyañat sipansa Jehová Diosaruw confiyañapäna, uk Sansonajj yatïnwa. Diosat jan jitheqtir uka chachajja, kunatï amparapan utjkäna ukampiw Jehová Diosan munañap phoqäna. Niyakejjay Sansonajj Jehová Diosar confiychïnjja, taqe kunaw jupatak wali sum saräna.

6. ¿Kunsa Sansonan sarnaqäwipat yateqsna?

⁶ Jehová Diosajj ukhamarakiw markapan katoqtan uka luräwinak phoqañatakejj chʼam churistani, amuyatajj jan phoqañjamäki ukanaks phoqarakiñäniwa. Kunjamanakatsa Diosajj yanaptʼistu uk uñjasajj musparsnawa. Jumatï Jehová Diosar confiyätajja, Sansonarjamarakiw Diosajj munañap phoqañamatakejj yanaptʼätam, chʼams churarakïtam (Prov. 16:3).

7. ¿Kuna experiencias Jehová Diosan yanaptʼap thaqañajj wali importantëtap uñachtʼayi?

⁷ Construccionan yanaptʼapki uka jilat kullakanakat waljanejja, Jehová Diosar confiyapjjatapwa uñachtʼayapjje. Pasïr maranakanjja, Salonanakasa yaqha construccionanakas kunjamänisa kunjamas lurasini uk Jehová Diosan markapaw amtirïna. Ukampis Jehová Diosan markapan jiljjattatapatjja cambionak lurañaw wakisïna. Uka proyectonakat encargat jilatanakajj Jehová Diosan yanaptʼapwa thaqapjjäna, ukatwa kunjamtï nayrajj luraskäna uk mayjtʼayañ amtapjjäna. Luratpach utanak alasajj askichañwa amtapjjäna. Robert  jilatat parltʼañäni, jupajj aka qhepa maranakan walja construccionanakanwa oraqpachan trabajiwayi. Jilatajj akham siwa: “Qalltanjja, kunjamtï jichhajj lurasjje ukarjam lurañajj janiw faciläkänti. Walja maranak lurapkayäta ukat sipansa kuntï jichhajj lurapkayäta ukajj wali mayjäjjänwa. Ukampis jilatanakajj jankʼakiw uka cambionakar yatinoqtapjjäna, Jehová Diosajj uka cambionakar bendisiskatapajj qhanaw amuyasirakïna” sasa. Robert jilatan arunakapajja, kunjamsa Jehová Diosajj markaparojj munañap phoqapjjañapatakejj irpaski uk qhanwa uñachtʼayistu. Akham sasaw sapa kutejj jisktʼasiñasa: “¿Jehová Diosan yanaptʼap thaqapuntti, cambionakar yatinoqtañatak chʼamachasiraktti?” sasa.

8. ¿Umat wal pharjayaskäna ukhajj kunsa Sansonajj luräna?

⁸ Sansonan yaqha musparkañ luratanakapat inas amtaraksta. Mä kutejja, Sansonajj mä leonamp nuwasisajj jiwayänwa, ukat Asquelón markankir 30 filisteo chachanakaruw jiwarayäna (Juec. 14:5, 6, 19). Jehová Diosatejj jan yanaptʼkaspänjja, janiw Sansonajj taqe ukanak lurkaspänti. Diosapar taqe chuym confiyatapajja, 1.000 filisteonakar jiwarayasin umat wal pharjayaskäna ukhaw qhan amuyasïna. Jupa pachpa um jikjjatañat sipansa Jehová Diosaruw yanaptʼa mayïna (Juec. 15:18).

9. ¿Kunjamsa Jehová Diosajj Sansonan mayisitapar istʼäna? (Jueces 15:19).

⁹ ¿Kunjamsa Jehová Diosajj Sansonan mayisitapar jaysäna? Mä milagro lurasaw um jalsuyanïna. Sansonajj “um umtʼäna ukhajja, mayampiw chʼamanëjjäna, jakatatarakïnwa” (Jueces 15:19 liytʼäta). Walja maranak qhepatjja, uka uma jalsojj utjaskakïnwa, cheqas Jehová Diosajj Samuel profetar Jueces libro qellqañapatak amuytʼaykäna uka tiempon utjaskakïnwa. Israelitanakajj uka uma jalsu uñjasajj akwa amtapjjpachäna: jupanakatï Jehová Diosar confiyapjjasapänjja Jehová Diosajj jan waltʼäwinakan yanaptʼaspänwa.

10. ¿Kunsa Jehová Diosamp yanaptʼayasiñatakejj lurañasa? (Dibujompi fotonakampi uñjjattʼarakïta).

¹⁰ Jiwasajj Sansonjamarakiw Jehová Diosan yanaptʼap thaqañasa. Inas jiwasajj mä kun sum lurañ yatstan jan ukajj Diosar serviñan walja lurañanakamp phoqawaystan, ukampis Jehová Diosan yanaptʼap thaqaskakiñasawa. Humilde chuymanïñasawa, amtapuniñäni Diosan yanaptʼapampikiw kuns sum lursna. Jehová Diosajj churkäna uka um umtʼasaw Sansonajj chʼam katjjatäna. Jiwasampejj ukhamarakiwa, Jehová Diosajj churkistu taqe ukanakamp yanaptʼayasiñäni ukhajja, janiw kunäkipans jupat jitheqtkañäniti (Mat. 11:28).

11. ¿Kunsa Jehová Diosan yanaptʼapat askinak jikjjatañatakejj lurañasa, kunsa Alexéi jilatampit esposapampit yateqsna?

¹¹ Rusia markankir Alexéi jilatat amuytʼañäni, uka markan Jehová Diosan servirinakapar arknaqañ utjatapatwa jilatajj tʼaqesiski. ¿Kunas jilatarojj aguantañatak chʼam churi? Juparus esposaparusa, sapür Bibliat yatjjatañaw chʼam churi. Alexéi jilatajj akham siwa: “Nayajj sapüruw Bibliat yatjjatañataki, Biblia liyiñatak chʼamachasta. Sapa alwaw esposajampejj ukürutak ajllit textot parltʼasipjjta, juntuw Jehová Diosar orasipjjarakta” sasa. ¿Kunsa ukat yateqsna? Jiwas pachpar confiyasiñat sipansa, Jehová Diosaruw confiyañasa. Ukatakejj Bibliat yatjjatañasawa, orasiñasawa, tantachäwirus predicacionarus sarañasarakiwa, ukanakaw Jehová Diosar jukʼamp confiyañatak yanaptʼistani. Taqe ukanak lurañäni ukhajja, Jehová Diosajj wal bendisistani, jupar serviskakiñatakis yanaptʼarakistaniwa. Kunjamtï Sansonar chʼam churkänjja, ukhamarakiw jiwasar chʼam churistani.

12. ¿Kuna jan wali amtarus Sansonajj purïna, ukat kunatsa Dalilamp casarasiñ amtatapajj jan walïkäna?

¹² Sansonajj jiwasjam pantjasirirakïnwa, ukatwa awisanakajj jan wali amtanakar purïna. Mä kutejja, kuntï Jehová Diosajj luram siskäna ukarjam jan luratapat sinti jan walinakanwa uñjasïna. Mä qhawqha tiempo juezat serviskäna ukhajja, “Sorec sat vallenkir Dalila sutini warmitwa wal enamorasïna” (Juec. 16:4). Dalilar janïr uñtʼkasinjja, mä filistea warmimpiw casarasiñ munäna. Ukampis uka filistea warmimp casarasiñ munatapajj “Jehová Diosatwa jutäna [...] Diosajj filisteonak contra nuwasiñ thaqaskäna” sasaw Bibliajj qhanañchi. Yaqha horasanjja Sansonajj filisteonakan Gaza markapar sarasajj mä prostituta warmin utapanwa quedasïna. Jehová Diosasti Sansonarojj uka markan punkup apasiñapatakiw chʼam churäna, ukhamat markan jarkʼaqasiñap aynachtʼayañataki (Juec. 14:1-4; 16:1-3). Ukampis Dalilampejj janiw ukhamäkänti. Inas jupajj israelitächïna, ukhamajj Dalilamp casarasiñajj janiw Sansonarojj filisteonak contra nuwasiñatakejj yanaptʼkaspänti.

13. ¿Sansonajj jan arsuñapäkäna uk kunjamatsa Dalilajj arsuyäna?

¹³ Dalilajj Sansonar aljantañatakejj walja qollq filisteonakat katoqasïna. Ukampis ¿kunatsa Sansonajj Dalilan jan wali amtanakapat jan amuyaskpachäna? ¿Sintipunit Dalilarojj munasjjpachäna? Ukhamächïn janisa, Dalilajj kunatsa Sansonajj wali chʼamanïna uk arsuñapatakejj kutin kutiniw waytʼäna, Sansonasti kunatsa wali chʼamanïna uk Dalilar yatiyjjänwa. Ukatwa Sansonajj mä tiempojj jan chʼamanëjjänti, Jehová Diosampis janiw sumat uñjatäjjänti (Juec. 16:16-20).

14. ¿Kuna jan walinsa Sansonajj Dalilar confiyatapat uñjasïna?

 ¹⁴ Sansonajj Jehová Diosar confiyañat sipansa Dalilaruw jukʼamp confiyäna, ukatwa sinti jan walin uñjasïna. Filisteonakajj Sansonar katuntasajj nayranakapwa apsupjjäna. Ukatjja jupajj punkunakap kallsusin jiskʼachkäna uka Gaza markanwa mä carcelar llawintapjjäna, ukanwa grano moleñapatak esclavor tukuyapjjäna. Ukatjja filisteonakajj mä fiesta lurapjjäna, Dagón sat falso diosaparuw sacrificionak loqtapjjarakïna, amparanakapar Sansonar katuyañatakejj uka falso diosas yanaptʼkaspäna ukhamwa filisteonakajj amuyapjjäna. Ukatsti, ‘Sansonar carcelat irptanisaw jupat larusipjjäna’, mä arunjja jupat burlasipjjänwa, jiskʼachapjjarakïnwa (Juec. 16:21-25).

15. ¿Kunjamsa Sansonajj Jehová Diosar wasitat confiyatap uñachtʼayäna? (Jueces 16:28-30; nayrïr paginankir dibujo uñjjattʼäta).

¹⁵ Sansonajj sintipunis pantjaskchïnjja, Jehová Diosar serviskakïnwa. Jehová Diosajj filisteonakar nuwasiñapatak uttʼaykäna ukamp phoqañatak chʼamachasiskakïnwa (Jueces 16:28-30 liytʼäta). Ukhamajj akham sasaw Sansonajj Jehová Diosar ruwtʼasïna: ‘Filisteonakat vengasiyita’ sasa. Niyakejjay Diosajj oracionapar istʼchïnjja, Sansonajj wasitatwa wali musparkañ chʼamanëjjäna. Ukatwa Sansonajj jakaskäna uka urunakat sipans uka urojj jukʼamp filisteonakar jiwarayäna.

16. ¿Kunsa Sansonat yateqsna?

¹⁶ Sansonajj pantjasitapat jan walinakans uñjaskchïnjja, Jehová Diosan munañap phoqañatakejj chʼamachasiskakïnwa. Ukhamajj inas pantjasitasat cheqañchapjjchistani jan ukajj mä privilegio aptʼaschiñäni, ukampis janiw aynachtʼañasäkiti. Ak amtapuniñäni: Jehová Diosajj jiwasar perdonañatakejj jankʼakiwa (Sal. 103:8-10). Pantjaskstansa Jehová Diosajj kunjamtï Sansonar chʼam churkänjja, ukhamarakiw jiwasarojj munañap phoqañasatakejj chʼam churistani.

17, 18. ¿Kunatï Michael jilatarojj paskäna ukajj kunjamsa jumar chʼamañchtʼawaytam? (Fotonak uñjjattʼarakïta).

¹⁷ Kuntï Michael sat wayna jilatarojj paskäna uk amuytʼañäni. Jupajj siervo ministerialata, precursor regularata ukhamaw Jehová Diosar wali ocupat serviskäna. Ukampis pantjasitapatjja congregacionan katoqkäna uka privilegionak aptʼasïnwa. Jupajj akham siwa: “Uka tiempon Jehová Diosar serviñatakejj wal chʼamachasiskayäta. Ukampis mä akatjamatwa, janis kunsa Jehová Diosar serviñatak lurjjerista ukham amuyasjjayäta. Cheqas Jehová Diosajj  janiw apanukkitänti, ukampis akham sasaw jisktʼasirïta: ‘¿Mä urojj wasitat Jehová Diosan suma amigopäjjeristti, nayrjamat congregacionan sirvjjerista?’ sasa”.

¹⁸ Michael jilatajj janiw aynachtʼkänti. Jupajj akham siwa: “Jehová Diosar jukʼamp jakʼachasiñatakiw chʼamachasta. Ukatakejj sapa kuti chuymatpach orasiña, Bibliat yatjjataña, kuntï yatjjatkta uka toqet lupʼiñaw yanaptʼawayitu” sasa. Tiempompejja, Michael jilatajj wasitatwa congregacionan privilegionak katoqjjäna, jichhajj ancianota, precursor regularatwa serviski. Jilatajj akham sarakiwa: “Jilapartejj ancianonakaw yanaptʼapjjetäna, chʼamañchtʼapjjarakitäna, uk uñjañajj qhawqsa Jehová Diosajj munasiskakitäna uk amuyañatakiw yanaptʼawayitu. Jehová Diosarojj wasitatwa suma concienciamp serviskakirista. Maynitï cheqpachapun arrepentischi ukhajja, Jehová Diosajj perdonaspawa, ukwa kunatï nayar paskitäna ukajj yatichawayitu” sasa. Inas jiwasajj pantjasiwaystan, ukampis jiwasatï uk askichañatak chʼamachasiskstan, Jehová Diosarus confiyaskakstan ukhajja, Jehová Diosarojj serviskaksnawa, bendicionanakaps katoqaraksnawa, Michael jilatjamarakiw ukat jan payachasiñasäkiti (Sal. 86:5; Prov. 28:13).

19. ¿Kunjamsa Sansonan sarnaqäwipajj jumar chʼamañchtʼawaytam?

¹⁹ Aka yatichäwin mä qhawqhak Sansonat yateqawaytanjja. Jupajj janiw perfecto jaqëkänti, Dalilamp casarasiñ munasajj pantjasirakïnwa, ukampis janiw aynachtʼkänti, Jehová Diosarojj serviskakïnwa. Jehová Diosajj janiw Sansonar apanukkänti, wali musparkañ mä luräwi lurañapatakis yanaptʼaskakïnwa. Jehová Diosajj jupar taqe chuyma confiyiri mä jaqerjamaw uñjaskakïna, ukatwa Sansonan sutip Diosat jan jitheqtirinakan sutinakapamp chik Hebreos capítulo 11 ukan qellqayäna. Alajjpachankir Awkisajj chʼamwa churañ munistu, jukʼampis jan walinakan uñjasktan yanapap munktan ukhaw chʼam churañ munistu, ¿uk yatiñajj waljjay chʼamañchtʼistojja? Ukhamajj Sansonjam akham sasin mayisipjjañäni: “Jehová Dios Tata, nayat amtasikimaya, mirä amp suma, chʼam churakitaya” sasa (Juec. 16:28).