1. Jehoás, Uzías, Josías reyinakajj ¿kuna jan walinakarus saykatapjjäna?

 WAWÄKASIN jan ukajj waynitükasin ¿Diosan markapan reyipäsmati? ¿Kunsa autoridadanïsajj lurasma? Bibliarjamajja Judá markan yaqhep reyinakapajj wali waynitüpkäna ukhaw reyit apnaqapjjäna. Jehoás wawajj 7 maraniw reyïna, Uzías waynitojj 16 maraniw reyïna, Josías wawasti 8 maraniw reyëjjarakïna. ¡Jupanakatak reyïñajj janiw faciläkpachänti! Janis faciläkchïnjja, taqeniw Jehová Diosatsa mayninakatsa kunatï walïki uk lurañatakejj yanaptʼa katoqapjjäna.

2. ¿Kunatsa Jehoás, Uzías, Josías reyinakat yatjjatañasa?

² Jiwasajj janiw reyïktanti ni reinäktansa, ukampis Biblian parlki uka kimsa reyinakat wali wakiskir yatichäwinak yateqsna. Suma jan ukajj jan wali amtanakapat waljanakwa yateqsna. Suma amigonak ajlliñasa, humilde chuymanïskakiñasa, Jehová Diosar thaqaskakiñas kunja wakiskirisa ukwa sarnaqäwinakapat yateqsna.

3. ¿Kunsa Jehoás wawajj Jehoiadá jachʼa jilïr sacerdoten yanaptʼatajj luräna?

³ Jehoás reyjam suma amtanakar purim. Jehoás wawajj jiskʼäskäna ukhaw tatapajj jiwjjäna, Jehoiadá sat jachʼa jilïr sacerdotew wawaparjam uywasïna, Jehová Diosats waljanak yaticharakïna. Jehoás wawajj Jehoiadá sacerdoten ewjjanakap istʼatapat wali yatiñanïnwa, yanaptʼapampejj Diosar serviña, markar uka pachpa lurañapatak yanaptʼañwa amtäna. Templo askichañatakiw organizarakïna (2 Crón. 24:1, 2, 4, 13, 14).

4. ¿Kunjamsa Jehová Diosan mandamientonakapar wali valoranit uñjañajj yanaptʼistu? (Proverbios 2:1, 10-12).

⁴ Awk taykamatï jan ukajj maynitï Jehová Diosar munasiña, leyinakaparjam sarnaqañ yatichaskstam ukhajja, mä suma  regalo churasktamjja (Proverbios 2:1, 10-12 liytʼäta). Awk taykanakajj kunayman toqenakatwa wawanakapar yatichapjjaspa. Katia kullakan tatapajj kunsa suma amtanakar puriñapatakejj luräna uk uñjañäni. Escuelar sarkasajja, tatapajj sapüruw ukürutak ajllit textot jupamp parltʼirïna. Katia kullakajj akham siwa: “Ukham parltʼasipjjerïta ukaw uka urun jan walinakar saykatañatak yanaptʼitäna” sasa. Maysa toqetjja, inas awk taykamajj Bibliarjamajj kunsa lurañama kunsa jan lurañamäkaraki uk sapjjchïtam. Ukhamïpansti, taqe kun lurañatsa jarkʼapkiristam ukham inas amuysta. ¿Kunas jupanakar istʼañatakejj yanaptʼiristam? Anastasia kullakat parltʼañäni, awk taykapajj janiw kuntï lurañapäki jan lurañapäki ukak sapkänti, jan ukasti kunatsa ukham sapjje uk qhanañchtʼañatakiw tiempo apstʼasipjjerïna. Anastasia kullakajj akham siwa: “Qhanañchtʼapkitäna ukajja, ak amuyañatakiw yanaptʼitäna: kuntï mayipkitäna ukajj janiw nayar controlañatakïkänti, jan ukasti qhawqsa nayar munasipjjetäna, jan walinakat jarkʼaqañ munapjjetäna uk uñachtʼayañatakïnwa” sasa.

5. ¿Suma amtanakar puritamat kunjamsa Jehová Diosas awk taykamas jikjjatasipjjani? (Proverbios 22:6; 23:15, 24, 25).

⁵ Awk taykamajj Bibliarjam ewjjtʼapktam ukarjam luräta ukhajja, jupanakajj wal kusisipjjani. Jukʼampis Jehová Diosaw kusisini, jupamp sum apasitamajj wiñayatakirakïniwa (Proverbios 22:6; 23:15, 24, 25 liytʼäta). ¿Janit ukajj Jehoás waynat yateqasiñatak yanaptʼktamjja?

6. ¿Khitinakarus Jehoás reyejj istʼäna, ukham amtatapat kunjamansa uñjasïna? (2 Crónicas 24:17, 18).

⁶ Jehoás reyin jan wali amtanakapat yateqam. Jehoiadá sacerdotejj jiwjjäna uka qhepatjja, Jehoás reyejj jan wali amigonakwa ajllïna (2 Crónicas 24:17, 18 liytʼäta). Jehová Diosar jan munasipkäna uka Judá markankir principenakaruw istʼjjäna, inas jumajj janiw istʼañapäkänti sasin amuysta (Prov. 1:10). Ukampis jupajj jan wal luräna, uka jan wali amigonakapampiw apayasirakïna. Zacarías primopajj cheqañchkäna ukhajja, Jehoás reyejj jiwayapjjañapatakiw mä orden churäna (2 Crón. 24:20, 21; Mat. 23:35). ¡Ukham luratapajj jan walipunïnwa! Jehoás reyejj jan amuytʼasirïnwa. Qalltanjja, kunatï walïki ukwa luräna, ukampis jupajj apostatäjjänwa, jaqe jiwayirirakïnwa. Qhepatsti, pachpa servirinakapaw jupar jiwayapjjäna (2 Crón. 24:22-25). Jupatï Jehová Diosampiru Diosar munasirinakampir istʼaskakispäna ukhajj ¡janiw ukhaman uñjaskaspänti! ¿Kunsa sarnaqäwipat yateqasma?

7. ¿Kuna kasta amigonaks ajlliñama? (Foto uñjjattʼarakïta).

 ⁷ Jehoás reyin jan wali amtanakapat aka wakiskir yatichäwi yateqsna: yanaptʼapkistaspa uka amigonak ajlliñasawa, mä arunjja Jehová Diosar munasipki kusisiyañ munapki uka amigonak ajlliñasawa. Cheqas amigonakasajj jiwasat jilïrinakäspawa jan ukajj sullkanakäspawa. Amtañäni, Jehoás reyejj Jehoiadá sacerdotet sipans wali sullkänwa. Amigonakam ajlliñatakejj akham jisktʼasim: “¿Jehová Diosar jukʼamp confiyañatakit yanaptʼapjjetu? ¿Diosan leyinakaparjam sarnaqañatakit chʼamañchtʼapjjetu? ¿Jehová Diosat parlañasa Bibliat yatjjatapki ukanakat parlañas jupanakar gustiti? ¿Diosan leyinakapar respetapjjeti? ¿Pantjasitajat cheqañchapjjetuti jan ukajj kuntï istʼañ munkta ukakcha sapjjetu?” sasa (Prov. 27:5, 6, 17). Cheqas amigonakamatï Jehová Diosar jan munasipkchejja, janiw amigonakamäpkaspati, ukampis amigonakamatï Jehová Diosar munasipjjchejja, jan jupanakar apanukumti, jupanakajj yanaptʼapjjapunïtamwa (Prov. 13:20).  

8. Redes sociales ukanak apnaqsta ukhajj ¿kunanakatsa amuyasiñama?

⁸ Redes sociales ukanakajj familiaranakampi amigonakampi parltʼasiñatakejj wali wakiskiriwa. Ukampis waljanejja, yaqhanakar musparayañatakiw kunanaktï alapki jan ukajj lurapki uka fotonaka jan ukajj videonak apkatapjje. Jumatï redes sociales ukanak apnaqstajja, akham sasaw jisktʼasisma: “¿Yaqhanakarut musparayañ muntjja? ¿Kunsa ukampejj jikjjatañ muntjja? ¿Mayninakar chʼamañchtʼañti muntjja, jan ukajj nayach wal jachʼañchayasiñ muntjja? ¿Mayni jaqenakjamat jan walinak amuyjjta, parltjja, lurjjaraktjja?” sasa. Mä kutejja, Cuerpo Gobernantenkir Nathan Knorr jilatajj akham sasaw ewjjtʼäna: “Jan jaqenakan chuymapar purtʼañatak chʼamachasipjjamti, ukham lurasajj janiw khitin chuymaparus purtʼapkätati, antisas Jehová Diosan chuymapar purtʼañatak chʼamachasipjjam, ukham lurasajj Diosan taqe munasirinakapan chuymaparuw purtʼapjjäta” sasa.

9. ¿Kunanaksa Uzías reyejj Jehová Diosan yanaptʼapampejj luräna? (2 Crónicas 26:1-5).

⁹ Uzías reyjam suma amtanakar purim. Waynäkäna ukhajja, Uzías reyejj humilde chuymanïnwa, “cheqpach Diosar” ajjsarañwa yateqarakïna. Jupajj 68 maranakaw jakäna, jilapartejj jakäwipan Jehová Diosajj bendisïnwa (2 Crónicas 26:1-5 liytʼäta). Uzías reyejj walja enemigo markanakaruw atipjäna, Jerusalén markarus wali sum jarkʼaqarakïna (2 Crón. 26:6-15). Kunanaktï Jehová Diosan yanaptʼapampejj jikjjatkäna taqe ukanak uñjasajja, Uziasajj wal kusispachäna (Ecl. 3:12, 13).

10. ¿Kuna jan walinsa Uziasajj uñjasïna?

¹⁰ Uzías reyin jan wali amtanakapar puritapat yateqam. Uzías reyejj mayninakar ordenañar yatintatänwa. Inas ukhamätapat munañapar kuns lurirïchïna. Mä urojja, Jehová Diosan templopar mantasaw altar patjjan incienso nakhayäna, ukampis uk lurañajj janiw reyinakar waktʼkänti (2 Crón. 26:16-18). Azarías sat jachʼa jilïr sacerdoten cheqañchatajja, Uzías reyejj wal colerasïna. Uka reyejj Jehová Diosar jan jitheqtas servitap aptʼasïnwa, lepra usumpiw Jehová Diosajj castigarakïna (2 Crón. 26:19-21). Uzías reyitejj humilde chuymanïskakisapänjja, ¡janiw ukhaman uñjaskaspänti!

11. ¿Kunsa humilde chuyman mä jaqejj luri? (Fotonak uñjjattʼarakïta).

¹¹ Uziasajj wali chʼamani reyëjjäna ukhajja, taqe kunanaktï jikjjatkäna ukanak Jehová Diosan yanaptʼapamp jikjjatatap armasjjänwa. ¿Kunsa ukat yateqsna? Kunanaktï jakäwisansa Jehová Diosar serviñans jikjjatawayktan ukanakajj Jehová Diosatwa juti, janiw uk armasiñasäkiti. Ukanakat jachʼañchasiñat sipansa,  Jehová Diosaruw taqe ukanakat jachʼañchañasa (1 Cor. 4:7). b Humilde chuymanïñasawa, pantjasirïtassa mayninakan cheqañchatäñ wakisitapsa, janiw armasiñasäkiti. 60 jila maranakan mä jilatajj akham siwa: “Naya pachpar jan sinti importancia churasiñwa yateqawayta. Pantjasitajat cheqañchapkitu ukhajja, mejorañataki nayrar sarantaskakiñatakiw chʼamachasta” sasa. Humilde chuymanipunïñäni ukhajja, jakäwisan taqe kunaw sumar sarani (Prov. 22:4).

12. ¿Kunsa Josías reyejj waynitükäna ukhajj Jehová Diosar jakʼachasiñatak luräna? (2 Crónicas 34:1-3).

¹² Josías reyjam suma amtanakar purim. Josías reyejj waynitüskäna ukhatpachaw Jehová Diosar jakʼachasïna. Diosapar jukʼamp uñtʼañsa munañap lurañs wal munarakïna. Ukampis Josiasatakejj janiw reyïñajj faciläkänti; uka tiemponjja jilaparte jaqenakajj falso diosanakaruw adorapjjäna. Ukhamajj cheqpach religionar arjjatañatakejj jan ajjsartʼirïñapänwa. ¡Cheqas jan ajjsartʼirïtapwa jupajj uñachtʼayäna! Janïraw 20 maranïkänsa ukhaw kunanakatï falso diosanakar adorañatakïkäna taqe ukanak chhaqtayäna (2 Crónicas 34:1-3 liytʼäta).

13. ¿Kunjamsa Jehová Diosar jakäwim katuyasitamajj jakäwiman yanaptʼätam?

¹³ Jumajj wali waynitükasas Josiasjamarakïsmawa. Ukatakejj Jehová Diosaruw jakʼachasiñama, jupajj kunjam chuymanisa uk jukʼampiw yatjjataskakiñama. Ukham lurañajja, jupar katuyasiñamatakiw chʼamañchätam. ¿Kunjamsa Jehová Diosar jakäwim katuyasitamajj jakäwiman yanaptʼätam? 14 maranïkasin bautisasiri Luke jilatajj akham siwa: “Jichhat uksarojj Jehová Diosar serviñaw nayatakejj nayrankani, jupar kusisiyañatakiw chʼamachasirakëjja” sasa (Mar. 12:30). Jumatï ukham lurätajja, walja bendicionanakwa katoqäta.

14. ¿Kunjamsa yaqhep wayn tawaqonakajj Josías reyit yateqasipjje?

¹⁴ ¿Kuna jan walinakans Jehová Diosar servir wayn tawaqonakajj uñjasipjjaspa? 12 maranïkasin bautisasiri Johan jilatat parltʼañäni, juparojj colegionkir compañeronakapaw cigarrillos electrónicos ukanak fumayañ munapjje. Ukampis ukar jan purtʼasiñatakejja, kunjamsa  uka cigarrillonak fumañajj cuerpoparusa Jehová Diosamp sum apasitaparus jan waltʼayaspa ukwa amuytʼasi. 14 maranïkasin bautisasir Rachel kullakat amuytʼarakiñäni. Kuna jan walinakantï colegion uñjaski ukanakar saykatañatakejj kunsa luri uk akham sasaw qhanañchi: “Kunanakatï Bibliatsa Jehová Diosatsa amtaykitaspa ukanak thaqañatakiw chʼamachasta. Awisajj kuntï clasenkasajj historia toqet yateqapkta ukajja, Bibliankir mä sarnaqäwipata jan ukajj mä profeciapatwa amtayitu. Awisajj maynimp parlkta ukhajja, Biblian mä textopwa amtayitu, ukhamatwa uka textompejj yaqhar yanaptʼjjarakta” sasa. Inas jumajj Josías reyejj uñjaskäna uka pachpa jan walinakan jan uñjaskstati, ukampis jupjam yatiñanïsmawa, janirakiw Diosat jitheqtkasmati. Jichhatï jan walinakar saykatañ yateqäta ukhajja, jutïrin utjkani uka jan waltʼäwinakar saykatañatakejj jukʼamp wakichtʼatäjjätawa.

15. ¿Kunas Josías reyirojj Jehová Diosat jan jitheqtañatakejj yanaptʼäna? (2 Crónicas 34:14, 18-21).

¹⁵ Josías reyejj 26 maranïkäna ukhaw templo askichañ qalltäna. Templo askichkasajja, “Jehová Diosan Leyinakan librop” katjapjjäna, “uka librojj Moisés taypi churatänwa”. Kuntï uka libron siskäna uk istʼasajja, jankʼakiw Jehová Diosan leyinakap istʼañatakejj cambionak luräna (2 Crónicas 34:14, 18-21 liytʼäta). ¿Jumajj sapüru Biblia liyiñ munasmati? Uk lurañatak chʼamachasisksta ukhajja, ¿Biblia liyiñajj gusttamti? Jumar yanaptʼir versiculonakat jan armasiñatakejj ¿kunsa lurta? Párrafo 13 ukan parlaniwayktan uka Luke jilatajja, wakiskir yatichäwinak jikjjatasajj mä cuadernoruw qellqtʼasi. ¿Janit jan armasiñatakejj gustktam uka textonaksa yatichäwinaks qellqtʼaskarakisma? Jumatï Biblia jukʼamp sum uñtʼjjäta, Bibliar jukʼamp munasjjarakïta ukhajja, taqe chuymaw Jehová Diosar sirvirakïta. Kunjamtï Diosan Arupajj Josías reyirojj kunatï cheqäki uk lurañatak yanaptʼkänjja, ukhamarakiw jumarojj yanaptʼätam.

16. ¿Kunatsa Josías reyejj sinti jan wal pantjasïna, ukat kunsa ukat yateqsna?

¹⁶ Josías reyin jan wali amtanakar puritapat  yateqam. Josías reyejj 39 maranïkäna ukhaw pantjasïna, pantjasitapajj jiwañaruw purtʼasiyäna. Jehová Diosar yanaptʼa mayiñat sipansa, jupa pachparuw confiyasïna (2 Crón. 35:20-25). ¿Kunsa ukat yateqsna? Qhawqha maranïskstansa, qhawqha tiempos Bibliat yatjjataskstanjja, Jehová Diosar jakʼachasiskakiñasawa. Jehová Diosar jakʼachasiñatakejja, yanaptʼap thaqapuniñasawa, Arupats yatjjataskakiñasawa, experienciani cristianonakan ewjjtʼanakaparus istʼañasarakiwa. Ukham lurasajja, janiw sinti jan wal pantjaskañäniti, kusisitaw jakasirakiñäni (Sant. 1:25).

17. ¿Kunsa Judá markan kimsa reyinakapan sarnaqäwinakapat yateqsna?

¹⁷ Wayn tawaqonakajj walja suma luräwinak lurapjjaspa. Jehoás, Uzías, Josías reyinakan sarnaqäwinakapajj ukwa uñachtʼayistu. Wawanakas wayn tawaqonakas suma amtanakaruw puripjjaspa, Jehová Diosar kusisiykirwa jakasipjjarakispa. Cheqas uka reyinakajj pantjasipjjatapatjja, jan walinakanwa uñjasipjjäna. Ukampis jumatï suma luräwinakapat yateqasïta, jupanakjam jan pantjasiñatak chʼamachasirakïta ukhajja, kusisitaw jakasisma.

18. ¿Khitinakan sarnaqäwipas kusisitaw jakassna sañatakejj yanaptʼistu? (Dibujo uñjjattʼarakïta).

¹⁸ Bibliajj Jehová Diosar jakʼachasir yaqha waynanakat parlarakiwa, jupanakajj Dios nayraqatan wali suma uñjatäpjjänwa, kusisitaw jakasipjjarakïna. Davidat parltʼañäni. Jupajj waynäkasaw Jehová Diosan amigopäñ amtäna, tiempompejj Diosat jan jitheqtir reyëjjänwa. Pantjaskchïnsa, Jehová Diosajj jupat jan jitheqtiri serviriparjamaw uñjäna (1 Rey. 3:6; 9:4, 5; 14:8). Davidan jakäwipat yatjjatañajja, Jehová Diosar jan jitheqtas serviñatakiw yanaptʼätam. Marcosar jan ukajj Timoteor jukʼamp sum uñtʼañatakiw yatjjatarakisma. Jupanakajj waynäkasaw Jehová Diosar serviñ amtapjjäna. Diosat jan jitheqtiri servirinakat uñtʼatäpjjarakïnwa. Ukham amtasajja, Jehová Diosaruw kusisiyapjjäna, jupanakas kusisitaw jakasipjjarakïna.

19. ¿Kunjamsa jakasisma?

¹⁹ Kuntï jichhajj lurkäta ukarjamaw jutïrin sum jakasïta jan ukajj jan wals jakasïta. Juma pachpar confiyasiñat sipans Jehová Diosar confiyäta ukhajja, jupaw suma amtanakar puriñatak yanaptʼätam (Prov. 20:24). Wali kusisitaw sum jakasisma, taqe kunanaktï Jehová Dios layk lurkta ukjja, jupajj wali valoranitwa uñji, jan uk armasimti. Jiwasar wal munasiri alajjpachankir Awkisar serviñajj janiw inamayäkiti.