1, 2. ¿Kunatsa Diosan servirinakapajj wali kusisitätanjja? (Santiago 1:22-25).

 JEHOVÁ DIOSAMPI munat Yoqapampejj kusisitäsna ukwa munapjje. Salmo 119:2 texton akham siwa: “Khitinakatï Diosan amtayäwinakap phoqapki ukanakajj kusisitäpjjewa, khitinakatï taqe chuyma jupar thaqapki ukanakajj kusisitäpjjewa” sasa. Jesusajj akham sarakïnwa: “¡Khitinakatejj Diosan arunakap istʼapki phoqapkaraki ukanak kusisipjjpan!” sasa (Luc. 11:28).

² Jehová Diosan servirinakapajj wali kusisitätanwa, ukham kusisitäñatakejj walja razonanakaw utjistu, janiw ukakïkiti, Diosan Arup sapür liytʼatasata, kuntï liytʼasajj yateqktan ukarjam phoqañatak chʼamachasisaw wali kusisitarakïtanjja (Santiago 1:22-25 liytʼäta).

3. ¿Diosan Arupan liytʼktan ukarjam phoqañajj kunjamsa yanaptʼistu?

³ ‘Diosan arunakap phoqañajj’ walja toqenakanwa yanaptʼistu. Mä toqetjja, Jehová Diosaruw kusisiytanjja, uk yatiñajj wal kusisiyistu (Ecl. 12:13). Maysa toqetjja, Diosan Aruparjam sarnaqañajj familiasansa congregacionans mayninakamp sum apasiñatakiw yanaptʼistu. Inas jumarojj ukham yanaptʼarakstam. Janiw ukakïkiti, Jehová Diosan mandatonakapar jan istʼirinakajj kunayman jan walinakanwa uñjasipjje, ukampis jiwasajj janiw ukhamanakan uñjasktanti. Jehová Diosan leyinakapampita, mandatonakapampita, juicionakapampit mä cancionan parlasajja, David reyejj akham sarakïnwa: “Ukanak phoqañanwa jachʼa bendicionajj utji” sasa (Sal. 19:7-11).

4. ¿Kunatsa Biblia liytʼañasa ukarjam phoqañas chʼamakïspa?

 ⁴ Biblia liyiñasa kuntï liytʼktan ukarjam phoqañas janiw faciläkapuniti. Niyakejjay walja lurañanakanïstanjja, Biblia liyiñatakisa yatjjatañatakis tiempo apstʼasiñasapuniwa, ukhamatwa kuntï Jehová Diosajj lurañas munki uk amuyañäni. Ukhamajj sapüru Biblia liyiñatakejj kunanakas yanaptʼistaspa ukwa mä qhawq aka yatichäwin yatjjataskañäni. Kunas liytʼktan ukanak amuykiptʼañatakejj yanaptʼistaspa, kunjamsa liytʼktan ukarjam phoqaraksna ukanaks yatjjataskarakiñäniwa.

DIOSAN ARUP LIYIÑATAK TIEMPO APSTʼASIM

5. ¿Kuna luräwinakamp phoqasas ocupatätanjja?

⁵ Diosan markapankirinakat jilapartejj wali ocupatätanwa. Bibliajj qhanañchki uka wakiskir luräwinakamp phoqasaw ocupatätanjja. Jiwasanakat jilapartejja, familiasar yanaptʼañatakisa jiwasar yanaptʼasiñatakis trabajiñasawa (1 Tim. 5:8). Walja jilat kullakanakaw usut familiaranakaparus jan ukajj jilïrkipstat familiaranakaparus cuidapjje. Taqenirakiw cuerposan kʼumaräñapatakejj tiempo apstʼastanjja. Taqe uka luräwinakanïsas congregacionan lurañanakamp phoqañasarakiwa. Ukatjja predicañasarakiwa, uka luräwejj wali wakiskiriwa. Taqe uka luräwinakanïsajj inas akham jisktʼaschisma: “Sapüru Biblia liyiñatakisa, liytʼkta uk amuykiptʼañatakisa, ukarjam sarnaqañatakis ¿kunjamsa tiempo apstʼasirista?” sasa.

6. ¿Kunsa Biblia sapüru liytʼañatakejj lurasma? (Foto uñjjattʼarakïta).

⁶ Jiwasatakejj Biblia liyiñajj “kunanakatejj jukʼamp importantëki” ukanak taypinkiwa, ukatwa Biblia liyiñasapuni (Filip. 1:10). Kusisit jaqet parlkasajja, nayrïr Salmo qellqatajj akham siwa: “Jupajj Jehová Diosan leyiparojj wal munasi, uruy arumaw Diosan leyipat liytʼi lupʼiraki” sasa (Sal. 1:1, 2). Ukatakejj tiempow munasi. Ukhamajj ¿kunapachas Biblia liytʼañajj jukʼamp walïspa? Sapa mayniw uk amtjjañapa. Ukampis kuna horasas sapüru Biblia liytʼsna ukarjam amtañasawa.  Víctor jilatajj akham siwa: “Alwanakaw Biblia liytʼañajj gustitu. Janisay alwat sartasiñajj gustkchitojja, uka horasanwa jan kunan pantjasiyatajj Biblia liytʼta. Kuntï liytʼkta uk amuytʼañas facilakirakiwa” sasa. ¿Ukham lurañajj jumatakejj walirakïspati? Akham sasin jisktʼasim: “¿Kuna horasas nayatakejj Biblia liytʼañajj jukʼamp walïspa?” sasa.

KUNTÏ LIYTʼKTA UK AMUYKIPTʼAM

7, 8. ¿Biblia liytʼkasajj kunsa jan lurañasäki? Mä uñachtʼäwimp uk qhanañchtʼam.

⁷ Kuna horasas Biblia liytʼañäni uk amtasajj akwa amuytʼañasaraki, inas mä kun liytʼasajj jan kuns amtasjjstati, ukajj ¿may kutis pasirïtamti? Taqeniruw ukajj pasistu, Biblia liytʼktan ukhajj ukaw pasarakistaspa. Inas mä qhawqha capitulonak Biblia sapüru liytʼañ amtstan, ukajj walikïskiwa, uk phoqañatakejj chʼamachasiñasarakiwa (1 Cor. 9:26). Ukampis Bibliamp yanaptʼayasiñatakejj janiw liyi mayak liyiñasäkiti.

⁸ Ak amuytʼañäni, chʼojjña alinakan jakasipkakiñapatakejj awasirojj wali wakiskiriwa, ukampis mä jukʼa tiemponak wal jallojj purintjjaspa ukhajja, uka alinakarojj jan waltʼayaspawa, janirakiw oraqerojj chʼachʼantkaspati, ni alinakarus chʼojjñaskakiñapatak yanaptʼkaspati. Chʼojjña alinakan jiltaskakiñapatakisa oraqer chʼachʼantañapatakis sullantañapakiw wakisi. Biblia liytʼañampejj niya ukhamarakiwa, janiw Biblia apur apur liyiñasäkiti, mä arunjja kuntï liytʼktan uk jan amuytʼasasa, jan amtasasa, jan kun yateqasas janiw ratuk liyirpayañasäkiti (Sant. 1:24).

9. ¿Jan ratuk Biblia liyirpayañatakejj kunsa lursna?

⁹ Awisajj ¿ratukis Biblia liyirpaykasma ukhamti amuyasta? Ukhamächi ukhajj ¿kunsa lurasma? Jan llakisimti, liytʼaskta ukjjat lupʼiñatakejj kʼachitatakwa liytʼañama, jan ukajj liyiñ tukuyjjasaw lupʼirakisma. Lupʼiñatï jumatak chʼamjamächi ukhajj janiw aynachtʼañamäkiti, kuntï liytʼawaykta uka toqet amuykiptʼañamakiw wakisi. Ukatakejj liytʼkta ukjjat lupʼiñatakiw jukʼamp tiempo apstʼasisma, jan ukajj jukʼa versiculonakak liytʼasma, ukhamat tiempo utjkipan kuntï liytʼawaykta uka  toqet amuykiptʼañataki. Párrafo 6 ukan parlaniwayktan uka Víctor jilatajj akham siwa: “Mä qhawqha versiculonakakwa liytʼta, awisajj mä capituloraki. Niyakejjay alwa toqer Biblia liytʼstjja, kuntï liytʼawaykta uka toqet uru jurnälaw amuykiptʼta” sasa. Kunjam liytʼañjjay amtsta, ukampis liytʼkta ukat sum yateqañatakiw chʼamachasiñama (Sal. 119:97; “ Lupʼiñatak jisktʼanaka” sat recuadro liytʼäta).

10. ¿Kunsa Biblian liytʼkta uk sum amuyañatakisa ukarjam phoqañatakis lurasma? (1 Tesalonicenses 5:17, 18).

¹⁰ Kunapachay Biblia liytʼsta ukat qhawqha tiempoy liytʼaraksta ukarjamaw kuntï yateqawaykta ukarjam lurañatak chʼamachasiñama. Diosan Arupat yatjjatkasajj akham sasaw jisktʼasiñama: “¿Kunsa yateqkta ukarjamajj jichhasa jan ukajj jutïrins lurirista?” sasa. Biblia liytʼkasajj 1 Tesalonicenses 5:17, 18 (liytʼäta) textsa liytʼkasma ukham amuytʼañäni. Uka versiculonak liytʼasajj akhamwa jisktʼasisma: “¿Chuymatpachti orastjja? ¿Qhawqha kutis Diosar orastjja? ¿Kunanakatsa Diosar yuspärañ muntjja?” sasa. Ukanakat amuykiptʼasajj kimsa toqenakat Jehová Diosar yuspärañwa amtasma. Mä qhawqha minutonakan ukanakat lupʼisajja, Diosan Arupar istʼirïtama ukarjam phoqaskatamwa uñachtʼayäta. Ukhamtï Biblia liytʼasajj sapüru lurätajja, tiempompejj Jehová Diosan suma serviripäyätawa. Ukampis Biblia liytʼkasatï walja toqenakan mejorañam wakisitap amuyassta ukhajj ¿kunsa lurasma?

KUNTÏ PHOQERJAMÄKTA UK LURAÑ AMTAM

11. ¿Kunatsa Biblia liytʼasajj awisajj desanimasisma? Mä uñachtʼäwimp uk qhanañchtʼam.

¹¹ Biblia liytʼasajj inas awisajj desanimaschisma, kuna laykutejj walja toqenakan mejorañamätamwa amuyasisma. Akham amuytʼañäni: nayrïr urun mayninakar jan yaqhachañ toqetwa Biblian liytʼtajja (Sant. 2:1-8). Kunjamsa mayninakar uñjaskta uka toqen mejorañamätamwa amuyastajja, ukatwa mä qhawqha cambionak lurañ amttajja. ¡Ukham lurañ amtatamajj askipuniwa! Payïr urun amuyump parlañajj kunja wakiskirisa ukwa liytʼtajja (Sant. 3:1-12). Awisajj desanimir arunakamp parlatamwa amuyastajja, ukatwa chʼamañchtʼkir arunakamp parlañ amttajja. Kimsïr urun akapachan amigopäñajj kunja jan walisa ukwa liytʼtajja (Sant. 4:4-12). Kuna peliculanaksa uñchʼukiskta, kuna musicanaksa ischʼukiskta ukanak jukʼamp sum ajlliñamätamwa amuyastajja. Pusïr urunjja, walja toqenakan mejorañamätam amuyasisajj inas desanimasjjchisma.

12. Biblia liytʼasatï mejorañamätam amuyassta ukhajj ¿kunatsa jan desanimasiñamäki? (Nota liytʼarakïta).

 ¹² Mä qhawqha toqenakan mejorañamätam amuyassta ukhajja, jan desanimasimti. Antisas uk amuyasitamajj suma chuymanïtama, humildëtama, kunanakansa mejorañama uka amtamp Biblia liytʼatamwa uñachtʼayi. a Ukat akwa amtañamaraki: sapüruw “machaq jaqëñampi” isthapisiñama (Col. 3:10). ¿Kunas Diosan Aruparjam phoqaskakiñatak yanaptʼätam?

13. ¿Kun lurañas yanaptʼiristam? (Fotonak uñjjattʼarakïta).

¹³ Taqpach toqenakan mejorañat sipansa, maya jan ukajj pä toqenakan mejorañwa amtasma (Prov. 11:2). Akwa lurasma: kunanakantï mejorañamäki ukanak mä listaruw qellqtʼasisma, ukjjarusti uka listat maya jan ukajj pä toqenakan mejorañwa ajllisma, qhepatwa listaman utjki uka yaqha toqenakan mejorañatak chʼamachasirakisma. ¿Kawkïrimpis qalltasma?

14. ¿Mejorañamäki ukanakat kawkïrimpis qalltasma?

¹⁴ Kawkïritï jukʼamp faciläki ukampiw qalltasma jan ukajj kawkïr toqentï mejorañamapunejj wakiski ukampiw qalltasma. Kawkïrimpis qalltäta uk amtasajja, qellqatanakasanwa uka toqet yatjjatasma, inas Índice de las publicaciones Watch Tower ukampi jan ukajj Jehová Diosan Testigonakapan Bibliat yatjjatapjjañapataki sat qellqatampi yanaptʼayaschisma. Mejorañ munkta uk “lurañ munañatakisa phoqañatakisa chʼam churita” sasin Jehová Diosar orasim (Filip. 2:13). Ukjjarojj kuntï yatjjatawaykta ukarjam phoqañatak chʼamachasim. Mejorañ amtawaykta uka toqentï mejorjjäta ukhajja, yaqha toqen mejorañwa  munarakïta. Jumatï listaman qellqtʼaskta uka nayrïr toqen mejorjjsta ukhajja, ukjjar jutki ukanakan mejorañamajj jukʼamp facilakëjjaniwa.

DIOSAN ARUPAMP YANAPTʼAYASIM

15. Biblia liytʼir walja jaqenakampi Jehová Diosan markapankirinakampejj ¿kunansa jan igualäpki? (1 Tesalonicenses 2:13).

¹⁵ Yaqhep jaqenakajja, walja kutiw Biblia liytʼta sasaw sapjje. Ukampis ¿cheqpachapunit kuntï Bibliajj siski uk creyipjje? ¿Biblian yatichäwinakaparjamat jakäwipan cambionak lurapjje? Cheqas janiw ukhamäkapuniti. Ukampis Jehová Diosan servirinakapajj janiw ukhamäktanti, nayrïr patak maranakan jakir cristianonakjamaw Bibliajj “Diosan arunakapäskapuniwa” sasin sistanjja. Ukatwa Biblian ewjjtʼanakaparjampun lurañatak chʼamachastanjja (1 Tesalonicenses 2:13 liytʼäta).

16. ¿Kunas Diosan Aruparjam phoqañatak yanaptʼistani?

¹⁶ Diosan arunakap liytʼañasa ukarjam phoqañas janiw faciläkapuniti. Biblia liytʼañatak tiempo apsusiñajj chʼamakïspawa. Jan ukajj Biblia ratuk liytʼasajj janiw kuns yateqksnati. Jan ukajj walja toqenakan mejorañätas amuyasajj desanimasjjaksnawa. Ukhamanakan uñjasisajj janiw aynachtʼañamäkiti, Jehová Diosan yanaptʼapampejj ukanakar atipjasmawa. Jan aleqak istʼiri armasiri jaqjam Biblia liyimti, jan ukasti liykta ukarjam phoqañatak chʼamachasim. Diosan arunakaptï sapa kut liytʼäta, ukarjam sarnaqarakïta ukhajja, jukʼamp kusisitäyätawa (Sant. 1:25).