1, 2. Katoqañat sipans churasaw jukʼamp kusisitätanjja, ¿kunjamsa ukham lurtʼatäñajj yanaptʼistu?

 JEHOVÁ DIOSAJJ lurkistäna ukhajja, katoqañat sipans churasin jukʼamp kusisitäñatakiw luristäna (Hech. 20:35). Maynejj mä regalo churistu ukhajja, wal kusistanjja. Ukampis mayninakar mä kun churasajj jukʼampiw kusistajja. Cheqas Jehová Diosamp ukham lurtʼatäñajj wal yanaptʼistu.

² Niyakejjay Jehová Diosajj ukham lurchistojja, jiwas pachpaw jukʼamp kusisitäñatakejj mä kuns lursna. Ukhamajj jukʼamp kusisitäñatakejja, kunjamats mayninakarojj mä kuns chursna uk amuytʼañasawa, ukat ukarjam lurañasarakiwa. ¿Musparkañ lurtʼatätanjjaya? (Sal. 139:14).

3. ¿Kunatsa Jehová Diosajj ‘kusisiri Diosawa’ sasin Bibliajj qhanañchi?

³ Bibliarjamajj churirinakaw jukʼamp kusisitäpjje, ukhamajj Jehová Diosan ‘kusisiri Diosätapajj’ cheqäskapuniwa (1 Tim. 1:11). Jupaw nayrïr churirejja, janirakiw khitis jupat jukʼamp churkaspati. Kunjamtï apóstol Pablojj siskänjja, “jupïpanwa jakasktanjja, sarnaqasktanjja, utjaskaraktanjja” (Hech. 17:28). Cheqas “taqe suma regalonakasa perfectöki taqe uka regalonakasa” Jehová Diosatwa juti (Sant. 1:17).

4. ¿Kunas jukʼamp kusisitäñatak yanaptʼistani?

⁴ Mayninakar churasin jukʼamp kusisitäñatakejj ¿kunsa lursna? Kunjamtï aka yatichäwin yatjjatkañänejja, Jehová Diosjam wajjtʼasirïñasawa (Efes. 5:1). Mayninakar mä kuns churtan ukhajj janis uk sum katoqasipkaspa ukham amuystan ukhajj kunsa lursna ukwa yatjjataskarakiñäni, ukaw mayninakar  churañatakisa jukʼamp kusisitäñatakis yanaptʼistani.

JEHOVÁ DIOSJAM WAJJTʼASIRÏPJJAÑÄNI

5. ¿Kunanaksa Jehová Diosajj churistu?

⁵ Kunjamsa Jehová Diosajj wajjtʼasirïtap uñachtʼayi uk mä qhawq uñjañäni. Kunanaktï necesitktan ukanakwa Jehová Diosajj churistu. Inas wali suma yänakajj jan utjkchistaniti, ukampis Jehová Diosan yanaptʼapampejja, jilapartejj kunanaktï necesitktan ukanakanïtanwa. Cheqansa Diosaw manqʼsa, issa, jakasiñatak mä lugarsa churistu (Sal. 4:8; Mat. 6:31-33; 1 Tim. 6:6-8). Diosajj janiw jiwasar churañ waktʼatap laykukejj ukanak churkistuti. Ukhamajj ¿kunatsa jupajj taqe ukanak churpachïstu?

6. ¿Kunsa Mateo 6:25, 26 textojj yatichistu?

⁶ Jehová Diosajj kunanakatï wakiski taqe ukanak jiwasar munasitap laykuw churistu. Mateo 6:25, 26 (liytʼäta) textonkir Jesusan arunakapat amuytʼañäni. Jesusajj jamachʼinakat parlasajj akham sänwa: “Jupanakajj janiw phawapkisa, ni yawipkisa, janirakiw manqʼsa imañ utanakar apthapipkiti” sasa. Ukjjarojj akham sarakïnwa: “Jupanakarojj alajjpachankir Awkimaw manqʼayi” sasa. Ukat akham sasaw jisktʼarakïna: “¿Janit jumanakajj uka jamachʼinakat sipansa jukʼamp valoranïpkta?” sasa. ¿Kunsa ukat yateqsna? Jehová Diosatakejja, animalanakat sipans jupan servirinakapajj wali valoraniwa. Jehová Diosatï animalanakar cuidchejja, jiwasarojj jukʼampwa cuidarakistani, janiw ukat payachasktanti. Niyakejjay Jehová Diosajj Awkisächejja, wal munasirakchistojja, kuntï necesitktan ukwa churistu (Sal. 145:16; Mat. 6:32).

7. ¿Kunjamsa Jehová Diosat yateqasisajj wajjtʼasirirakïsna? (Fotonak uñjjattʼarakïta).

⁷ Jiwasajj Jehová Diosjamarakiw kuntï necesitapki uk mayninakar munasiñat chursna. Inas mä jilatana jan ukajj mä kullakan manqʼa jan ukajj isi necesitatap yatsta. Jehová Diosajj juma toqew kuntï necesitki uk churaspa. Jan waltʼäwinakajj utjki ukhajj Jehová Diosan markapankirinakajj yanaptʼasipjjapuntanwa, cheqas ukhamat uñtʼatätanwa. COVID-19 pandemiajj utjkäna ukhajja, jilat kullakanakajj manqʼañanaksa, isinaksa, yaqha ukhamanaks necesitapkäna ukanakarojj churapjjapunïnwa. Waljanirakiw obra mundial ukarojj donacionat qollqe churapjjäna, ukampiw oraqpachankir jilat kullakanakarojj yanaptʼasïna. Jupanakajj kuntï  Hebreos 13:16 texton siski ukarjamaw lurapjjäna, ukan akham siwa: “Kunatï walïki uk lurañsa kunanakatï utjapktam ukanakamp mayninakar yanaptʼañsa jan armasipjjamti, Diosarojj ukham sacrificionakaw wal kusisiyi” sasa.

8. ¿Kunjamsa Jehová Diosajj chʼamapamp yanaptʼistu? (Filipenses 2:13).

⁸ Jehová Diosajj chʼam churistu. Jehová Diosan chʼamapajj jan tukuskiriwa. Ukatwa jupat jan jitheqtir servirinakapar chʼam churasajj wal kusisi (Filipenses 2:13 liytʼäta). Mä tentacionan uñjasisasa, mä chʼama yantʼar saykatañatakisa, jan ukajj kunanaktï mä urun lurañamäki ukanakamp phoqañatakis ¿Jehová Diosar oracionan chʼam mayisirïtati? Mayisitamarjam chʼam katjjatasajja, apóstol Pabljamarakiw akham sispachätajja: “Khititejj nayar chʼam churkitu ukan chʼamapampejja taqe kunatakiw nayajj chʼamanïta” sasa (Filip. 4:13).

9. ¿Kunjamsa Jehová Diosjamajj mayninakar yanaptʼsna? (Foto uñjjattʼarakïta).

⁹ Janiw Jehová Diosjamajj mayninakar chʼam churksnati, ukampis chʼamasarjamaw mayninakar yanaptʼsna. Inas mä jilïri jan ukajj mä usut jilat kullakar utan kuna lurañanakamp yanaptʼsna, jan ukajj kuntï necesitapki uk altʼanirapsna. Puedstan ukhajja, Salón qʼomachañana mantenimiento lurañanwa yanaptʼaraksna. Jiwasatï chʼamasarjam ukanak lurañäni ukhajja jilat kullakanakasaruw wal yanaptʼaskañäni.

10. ¿Kunjamsa arunakasampejj mayninakar yanaptʼsna?

¹⁰ Amtapuniñäni, arunakasajj chʼamaniwa, ukampiw mayninakar chʼamañchtʼsna. ¿Khitirus munasiñamp arstʼat arunakamamp chʼamañchtʼasma? ¿Khitis chuymachtʼatäñ muni? Ukhamächi ukhajj ¿janit jupar chʼamañchtʼkasma, jan ukajj chuymachtʼkasma? Inas utapar visittʼir sarchisma, telefonot jawschisma, mä tarjeta apaychisma, jan ukajj mä mensaje qellqtʼchisma. Kuntï siskäta qellqarakïta ukat jan añch llakisimti. Munasiñampi mä qhawqha arunak chuymatpach satamajj wal maynir yanaptʼaspa, ukaw mä urump Diosat jan jitheqtañatakisa jan ukajj sum jikjjatasiñatakis yanaptʼaspa (Prov. 12:25; Efes. 4:29).

11. ¿Kunjamsa Jehová Diosajj mayninakar yatiñ churi?

¹¹ Jehová Diosajj yatiñ churistu. Santiago discipulojj akham sasaw qellqäna: “Jumanakat maynirutejj yatiñanïñajj faltchejja, Diosar mayiskakpan, ukatsti katoqaniwa, jupajj taqenirus walja chuririwa, khititejj maykani ukatakis janirakiw coleraskaniti” sasa (Sant. 1:5). Uka arunakarjamajja, Jehová Diosajj janiw jupa sapatakik yatiñ imaskiti. Taqe chuymaw mayninakar walj churi. Janiw ukakïkiti, Jehová Diosajj yatiñ churi ukhajja, ‘jan colerasisaw’  churaraki, mä arunjja janiw yatiñ mayitasat llakisiyañ munkistuti, antisaw jupajj yatiñ mayiñasatak chʼamañchistu (Prov. 2:1-6).

12. ¿Kunjamanakatsa kuntï yatktan uk yaqhanakar yatichsna?

¹² ¿Jiwasajj Jehová Diosjamarakit kuntï yatktan uk mayninakar yatichsna? (Sal. 32:8). Jïsa, yatichsnawa, kunaymanitwa uk lursna. Jilapartejj machaq publicadoranakaruw yatichtanjja. Ancianonakajj siervo ministerialanakarusa, jichhak bautisat jilatanakarus congregacionan asignacionanakapamp phoqañatakiw pacienciamp yanaptʼapjje. Construccionana mantenimiento lurañan experiencianïpki ukanakajja, Salones del Reino ukat yaqha ukhamanakan yanaptʼapjjañapatakejj yaqhanakaruw yatichapjjaraki.

13. Mayninakar yatichtan ukhajj ¿kunjamsa Jehová Diosat yateqasitas uñachtʼaysna?

¹³ Jehová Diosat yateqasisaw mayninakar capacitación chursna. Kunjamtï yatjjataniwayktanjja, Jehová Diosajj yatiñap walj chuririwa. Jiwasajj ukhamarakiw yateqasipki ukanakarojj kuntï yatktan uk taqpach yatichtanjja. “Jupaw naya lantejj trabajo lurjjaspa” sasin ajjsarasajj janiw kuntï yatktan uksa jan ukajj experiencianïtassa imtʼasiñasäkiti. Janirakiw jiwasajj “janiw nayarojj khitis yatichkituti, jupa pachp yateqañapawa” sasajj amuyañasäkiti. Ukham amuyañajj janipuniw Jehová Diosan markapan utjañapäkiti. Janiw kuntï yatktan ukanakak mayninakar yatichañasäkiti, antisas taqe chuymaw sum yatichañasa (1 Tes. 2:8). “Ukhamatwa jupanakajj yaqhanakar yatichañatakejj suma wakichtʼatäpjjani” (2 Tim. 2:1, 2). Jiwasatï yatiñasat walj mayninakar churañänejja, mayninakas jiwasas jukʼamp yatiñanïñäniwa, jukʼamp kusisitarakïñäniwa.

INAS YAQHEPAJJ JAN YUSPÄRAPKCHISTUTI

14. Mayninakar mä kuns churtan ukhajj ¿kunsa jilapartejj lurapjje?

¹⁴ Jilapartejj mayninakar mä kuns churtan ukhajja, yuspärapjjestuwa, jukʼampis jilat kullakanakaw wal yuspärapjjestu. Inas yuspärañatakejj mä tarjeta lurapjjchispa, jan ukajj yaqha toqenakatwa yuspärasirïpjjatap uñachtʼayapjjaspa (Col. 3:15). Ukham yuspärasirïpjjatap uñjasajj wal kusistanjja.

15. Jan yuspärapkistani ukhajj ¿kunsa amtañasa?

¹⁵ Qhana arun janiw yaqhepanakajj yuspärasirïpjjatap uñachtʼayapkiti. Awisajj tiemposampi chʼamasampi jan ukajj kunanakatï utjkistu ukanakampiw mayninakar yanaptʼsna. Ukampis awisajj janis mayninakajj uk valorapkaspa ukhamwa amuysna. Ukhamächi ukhajj ¿kunas jan llakisiñatakisa jan colerasiñatakis yanaptʼistaspa? Kuntï Hechos 20:35 texton siski ukwa amtañasa. Mayninakar churasajj wal kusistanjja, janiw ukajj qhawqsa yuspärapjjestu ukarjamäkiti. Amuyatajj janis churktan uk khitis valorkchinejja, mayninakar churasajj kusisitakïsksnawa. Kunjamats kusisitakïsksna uk jichhajj uñjañäni.

16. Mayninakar churktan ukhajj ¿kunsa amtañasa?

¹⁶ Churasajj Jehová Diosatwa yateqasisktajja. Juparojj yuspärapjjpans janisa, kunatï sumäki ukwa taqe jaqenakar churi (Mat. 5:43-48). ‘Janiw khitirus kuttʼayjjetaniwa’ sasajj mä kuns churañasäkiti, “ukhamatwa mä jachʼa bendicionajj [jiwasatak] utjani”, ukwa Jehová Diosajj servirinakapar arsuwayi (Luc. 6:35). Ukhamajj mayninakatï jan yuspärapkätam ukhajja, janiw llakisiñamäkiti. Amtapunim, mayninakar yanaptʼatamatsa, ‘kusisit chuymamp churatamats’ Jehová Diosajj bendisipunïtamwa (2 Cor. 9:7; Prov. 19:17).

17. Jehová Diosat yateqasisajj ¿kunats mayninakar mä kuns churtanjja? (Lucas 14:12-14).

 ¹⁷ Jehová Diosat yateqasiñasatakejja, kuntï Lucas 14:12-14 (liytʼäta) texton siski ukarjamaw luraraksna. Khitinakatï kuttʼayapkistaspa ukanakar mä kun wajjtʼañasa jan ukajj mä kun churañas walikïskiwa. Ukampis jiwasatï kuttʼayjjetaniwa sasin maynir mä kun churatas amuyasstan ukhajj ¿kunsa lursna? Kuntï Jesusajj siskäna ukarjamaw lursna. Khitinakatejj jiwasar jan kuttʼayirjamäpkaspa ukanakaruw mä kuns wajjtʼsna. Ukhamatwa Jehová Diosat yateqasitas uñachtʼayasajj kusisitäñäni. Ukarakiw jan yuspärapkistani ukhajj kusisitäskakiñatak yanaptʼistani.

18. ¿Kunas mayninakat jan wal jan amuyañatak yanaptʼistaspa?

¹⁸ Jan mayninakat jan wal amuyamti (1 Cor. 13:7). Mä kun luratasat maynejj jan yuspärkistani ukhajj akham sasaw jisktʼassna: “¿Jan yuspärasiripuniti, jan ukajj yuspärasiñakch armasi?” sasa. Inas kunjamtï munkayätan ukham jan yuspärasiñatakejj yaqha razonanakajj utjchi. Chuymapan wal yuspäraskistaspa, ukampis janiw uk kunjamats uñachtʼayañ puedkaspati. Inas yanaptʼatäsajj phenqʼasirakchi, jilapartejj jupaw yaqhanakar yanaptʼpachäna, ukatwa ukham phenqʼasispa. Ukampis jiwasatï jilat kullakanakar cheqpachapun munasstan ukhajja, janiw jupanakat jan wal amuykañäniti, kusisitaw churaskakiñäni (Efes. 4:2).

19, 20. ¿Kunjamsa paciencianïñajj maynir mä kuns churtan ukhajj yanaptʼistaspa? (Fotonak uñjjattʼarakïta).

¹⁹ Paciencianïñamawa. Wajjtʼasirïñ toqet akham sasaw Salomón reyejj qellqäna: “Tʼantʼamjja umanakar jaqontam, walja urunak qhepatjja mayampiw jikjjatäta” sasa (Ecl. 11:1). Uka arunakarjamajja, mä kun wajjtʼatasat maynejj “walja urunak” qhepatwa yuspäraskistaspa. Ukaw mä kullakampejj pasäna.

²⁰ Walja maranak nayrajj mä superintendente de circuito jilatan esposapajja, ukhak bautisasir mä kullakarojj suma lurtʼat mä tarjeta apayäna, ukan Diosat jan jitheqtañapatakiw  chʼamañchtʼarakïna. Mä kimsaqallqo maranak qhepatjja, tarjeta katoqer kullakajj akham sasaw uka kullakar qellqäna: “Jumar qellqaniñajj wakisipunïnwa, inas jan yatkstati, ukampis kuntï qellqankayäta ukajj walpun aka maranakan yanaptʼawayitu” sasa. Ukat akham sarakïnwa: “Tarjetamajj wali munasiñamp lurtʼatänwa, qellqtʼankta uka textojj chuymarupuniw purtʼitäna, janipuniw ukat armaskti” sasa. a Kuna jan walinakans kullakajj uñjasïna uk qhanañchtʼasajja, kullakajj akham saskakïnwa: “Awisajj janiw chʼamachasiñsa ni Testigöñs munjjayätti. Ukampis qellqankista uka texto liytʼañajj walpun yanaptʼawayitu. Uka kimsaqallqo maranakanjja, janiw kunas ukham yanaptʼawaykituti” sasa. Circuito jilatan esposapajj uka carta katoqasajj ¡walpun kusispachäna! Jiwasarojj ukhamarakiw mä kun churatasat “walja urunak” qhepat yuspärapjjestaspa.

21. ¿Kunatsa Jehová Diosat yateqasiñatak chʼamachasiskakiñama?

²¹ Kunjamtï yatjjataniwayktanjja, katoqañat sipans churktan ukhaw jukʼamp kusisitätanjja, Jehová Diosaw ukham lurtʼasiwayistu. Jilat kullakanakasar yanaptʼktan ukhajj sumakiw jikjjatastanjja. Yuspärapkistu ukhajj kusisiraktanwa. Ukampis churatasat yuspärapjjchistanis janisa, kunatï walïki uk lurasajj kusisiraktanwa. Waljsa jan ukajj jukʼaksa churkchïñänejja, kuntï 2 Crónicas 25:9 textojj siski uk amtapuniñäni, ukan akham siwa: “Jehová Diosajj ukat sipans jukʼamp churiristam” sasa. Cheqas janiw khitis Jehová Diosat sipans jukʼamp churkaspati. Kunjamsa Jehová Diosajj churatasat kuttʼayistu uk uñjasajj wal kusisiraktanjja. Ukhamajj alajjpachankir Awkisat yateqasisajj mayninakar churasipkakiñäni.