Jesusajj Tatitun Cenap uttʼaykäna ukhajja, 70 discipulonakajj janiw ukankapkänti, ukhamïpan Jesusarus jaytanukupkaspäna jan ukajj janis jupamp sumat uñjatäpkaspäna ukham janiw amuyañasäkiti. Uka horasanjja, Jesusajj apostolonakapamp chikäñwa munäna.

12 apostolonakasa 70 discipulonakas Jesusampejj sumat uñjatäpjjänwa. Jesusajj taqe discipulonakapat 12 chachanakaruw nayraqat ajllïna, apostolonaka sasaw jupanakar sarakïna (Luc. 6:12-16). Jesusajj ‘Tunka Payani apostolonakar jawsthapkäna’ ukhajj Galileankaskänwa, “ukatjja Diosan Reinopat yatiyapjjañapataki, usutanakar qollapjjañapatakiw khitäna” (Luc. 9:1-6). Ukat aynach toqenjja, mä arun Judeanjja, “yaqha paqallq tunkaniruw Tatitojj ajllirakïna. Panin panin jupa nayraqat khitäna” (Luc. 9:51; 10:1). Ukhamajj predikirïkäna uka lugaranakan discipulonakajj utjänwa.

Jesusan discipulopar tukupkäna uka judionakajja, sapa maraw Pascua amtasipkakïna, familianakapamp chikaw uk amtapjjpachäna (Éx. 12:6-11, 17-20). Jiwañapajj jakʼachasisinkäna ukhajja, apostolonakapampiw Jesusajj Jerusalenar saräna. Ukampis janiw jupajj Judea, Galilea, Perea markanakankir taqe discipulonakaparojj jupamp chik Pascua amtapjjañapatak siskänti. Amuyatajja, uka horasajj apostolonakapamp chikäñakwa munäna, ukatwa jupanakar akham säna: “Janïr tʼaqeskasinjja, walpun nayajj jumanakampi aka Pascua cena manqtʼasiñ munaskayäta” sasa (Luc. 22:15).

¿Kunatsa jupanakampïñak munpachäna? Mä suma razonaw utjäna. ‘Diosan Corderopjama, aka mundon juchap qʼomachiripjam’ jiwañapatak uruw jakʼachasisinkäna (Juan 1:29). Jesusajj Jerusalenan jiwañapänwa, nayratpachaw uka markan sacrificionakajj Diosar loqtasirïna. Pascuan loqtaskäna uka corderojja, kunjamsa Jehová Diosajj Egipto markat jupanakar salväna ukwa israelitanakar amtayäna. Ukampis Jesusan sacrificiot loqtasitapajj jukʼamp valoranïnwa. ¡Juchampit jiwañampitwa taqe jaqenakar salvañapäna! (1 Cor. 5:7, 8). 12 apostolonakajj Jesusan sacrificiot loqtasitapatwa cristiano congregacionan uttʼayasiñapatakejj yanaptʼapjjäna (Efes. 2:20-22). Sagrado Jerusalén markajj ‘12 cimiento qalanakaniwa, uka cimiento qalanakajj Corderon 12 apostolonakapan 12 sutinakapaniwa’ (Apoc. 21:10-14). Ukhamasti Diosat jan jitheqtir apostolonakajj Diosan amtapan phoqasiñapatakejj wali wakiskirïpjjewa. Ukatwa Jesusajj qhep qhepa Pascua amtkäna ukhasa Tatitun Cenap uttʼaykäna ukhas jupanakampïñ munpachäna.

70 discipulonakasa mayni discipulonakas janiw ukhajj Jesusamp chikäpkänti. Ukampis Diosat jan jitheqtir taqe discipulonakaw Tatitun Cenapat beneficiasipjjaspa. Kuna laykutejj taqe khitinakatï tiempompejj ajllit cristianöpkaspäna ukanakajja, reinotak pacto taypinkapjjaspänwa, uka arumajj uka toqetwa Jesusajj apostolonakapar parläna (Luc. 22:29, 30).