Jaqenakajj utj-jjäna ukhatpachaw taqe kun Luriri Diosajj angelanakap toqe, profetanakap toqe jaqenakar parläna. Kuntï sañ munkäna uksa promesanakapsa qellqayarakïnwa. Diosajja jutïrin kusisitaw jakasipjjäta sasaw arsuwayarakïna, ukampis inas akham jisktʼassta: “¿Diosan promesanakapajj kawkinsa jikjjatasi?” sasa.

Diosan arunakapajja, Sagrado Qellqatanakanwa jikjjatasi (2 Timoteo 3:16). ¿Diosajj kuntï sañ munkäna uk kunjamsa profetanakapar qellqayäna? Diosajj amuyunakapjja, uka chachanakan amuyunakaparuw qellqapjjañapatak uchäna (2 Pedro 1:21). Akham amuytʼañäni: empresani mä chachajj kuntï sañ munki ukjja, secretarioparuw qellqayi, ukhamajj uka qellqatajj secretarion amuyupawa sasajj janiw sisksnati, jan ukasti empresani chachankiwa sasaw sissna. Diosampejj niya ukhamarakiwa, kuntï sañ munkäna uk chachanakarus qellqaykchïnjja, Sagrado Qellqatanakajj Jupankiwa.

Diosajj kuntï sañ munkistu ukajj wali wakiskiriwa, uk taqe jaqenakan liyipjjañapa amuyapjjañapwa muni. Jichha tiemponjja, Jupan ‘wiñay suma yatiyäwinakapajj taqe markankirinakataki, tribunkirinakataki, kunayman parlani jaqenakataki, kunayman kasta jaqenakatakiw’ utji (Apocalipsis 14:6). Diosan yanaptʼapampejja, Arupajj phoqatpachasa jan ukajj chikatakisa 3.000 jila arunakanwa utji, janiw kuna libros ukham walja arunakan utjkiti.