¿Jutïrin kunjamsa jakasiñäni uk kunjamats yatsna?
Walja jaqenakajja jakäwipajj jan uñjkañ chʼamanakampi apnaqatäkaspas ukhamwa amuyapjje. Ukatwa kunaymaninak lurapjje, ukanak lurañas sum jakasiñatakejj yanaptʼkaspa ukhamwa amuyapjjaraki.
¿KUNSA WALJANEJJ CREYIPJJE?
ASTROLOGÍA. Waljanejja, nasipkäna ukürojj warawaranakajj kunjamänsa ukas kunatï jutïrin paskani uk yatiñatakejj yanaptʼkaspa ukhamwa amuyapjje. Ukatwa jan walinakar jan purtʼasiñatakisa nayrar mistuñatakisa horoscoponak liyipjje.
COCAT UÑAYASIÑA. Yaqhepajj kunas jutïrin pasani jan ukajj kunatsa mä jan walin uñjasi uk yatiñatakejja, cocat uñjjatayasiriw sarapjje. Ukarjamarakiw kun lurañsa, jan lurañsa amtapjje. *
JIWATANAKAR YANAPTʼA MAYIÑA. Yaqhepanakajja jiwatanakar yanaptʼa mayiñasa, jan ukajj walja diosanakar adorañas jan walinakat jarkʼaqkaspa, jan ukajj bendición katoqañatakis yanaptʼkaspa ukham amuyapjje. Vietnam markan jakasiri Van * sat mä warmejj akham siwa: “Jiwatanakar jachʼañchasajja nayan vidajasa wawanakajan vidapasa sumaruw saraspa, jutïrinsa sumaw jakasipjjerista sasaw amuyapjjayäta” sasa.
YAQHA CUERPON NASIÑA. Waljanejja jiwjjasin wasitatwa nastan, ukajj kutin kutiniw pasi sasaw sapjje. Amuyunakaparjamajja, kuntï nayra vidapan lurawayapki ukarjamaw walinsa jan walinsa uñjasipjje sasaw sapjje.
Ukajj aleq säwikiwa sasinsa waljanejj chuymanakapan sapkchejja, horoscoponak liyisipkakiwa, tabla ouija®, cartas del tarot, ukhamarak amparanaksa uñayasisipkakiwa, yaqha ukhamanaksa lurasipkakiwa. Ukanakat inas kawkïris jutïrit yatiñatak yanaptʼchistaspa sasaw amuyapjje.
¿UKAJJ JAQENAKAR YANAPTʼITI?
¿Ukanakar creyir jaqenakajj sumat jakasipjjpacha, jutïrin sumat jakasipjjarakpachäni?
Kunas Vietnam markan jakasiri Hào chacharojj pasäna uk uñjapjjañäni. Jupajja, astrologiaru, feng shui ukaru, jiwatanakar jachʼañchañaruw creyïna, ukanakampiw irpayasirakïna. Ukampis ¿cheqapunit yanaptʼäna? Uka chachajj akham siwa: “Negociojajj aynachtʼänwa, manunakanwa uñjasiyäta, familiajanjja problemanakaw utjäna, wali llakitäyätwa” sasa.
Taiwán markankiri Qiuming sat chachajja, akanakaruw creyïna: astrologiaru, jiwjjasin yaqha cuerpon nasiñaru, destinoru, feng shui ukaru, jiwatanakar yanaptʼa mayiñaru. Ukampis ukanakat sum yatjjatasajj akham sänwa: “Uka creencianakasa, costumbrenakasa may maywa parlapjje, janiw amuyañjamäkiti. Astrologiajj sapa kutiw pantjasi, jiwjjasin yaqha cuerpon jakañ toqetsti, ni kamsaña. Nayra jakäwin kunjamsa jakayäta uk jan amtasksta ukhajja, ¿kunjamarak cambiasmasti?” sasa.
“Uka creencianakasa, costumbrenakasa may maywa parlapjje, janiw amuyañjamäkiti” (QIUMING, TAIWÁN)
Hào chachasa, Qiuming chachasa, yaqhanakasa, akwa amuyawayapjje, destinosa, warawaranakasa, jiwatanakasa, jiwatat yaqha cuerpon nasiñasa kunas jutïrin pasani uk janiw sapkaspati. Ukhamajja ¿kunas jutïrin pasani uk janit yatksna?
Jutïrin sum jakasiñatakejja, wali yatjjatatäñasa, walja qollqenïñas wakiskaspa ukhamwa waljanejj amuyapjje. Ukampis uk luririnakajja, ¿kunjamsa jikjjatasipjje?
^ Párrafo 5 China markansa Asia toqenkir yaqha markanakansa niya ukar uñtasitwa lurapjjaraki, ukajj feng shui satawa.
^ Párrafo 6 Aka revistanjja, yaqhep sutinakajj cambiasiwayiwa.
^ Párrafo 16 Uka arunakajj Bibliankiwa, Gálatas 6:7 textona. Wali uñtʼat mä säwejj akham siwa: “Jan walinak luräta ukhajja, jan walinwa uñjasirakïta” sasa.
Akanakajj inas gustarakiristam
YATIYAÑATAKI
Astrologonakasa yatirinakasa ¿jutïr urunakat yatipjjaspati?
¿Kuntï jutïr urunakat yatiyapki ukanakarojj confiyasmati?
YATIYAÑATAKI
¿Kunsa Bibliajj jakañatsa jiwañatsa yatichi?
Jiwjjtan uka qhepatjja, ¿kunas jiwasampi pasjje? ¿Jan jiwir almanïtanti? ¿Jiwatanakajj kawkinkasipkisa?
