Mä munat amigosajj llaki usunïki ukhajja, awisajj janiw kuns kamachtʼañ puedktanti. Ukampis usupar saykatañatak yanaptʼasaw qhawqsa munastan uk uñachtʼaysna.

“Sapa maynis istʼañatakejj jankʼakïñapawa” (SANTIAGO 1:19).

Amigomarojj walja toqenakatwa yanaptʼasma, mayjja, kuntï parlañ munki ukar istʼasaw yanaptʼasma. Jupajj ukakwa munaspa. Ukhamajja cheqapun jupat llakisitam amuyañapatak chʼamachasim. Ukatakejja kunatsa ukham jikjjatasi uk amuyañatakiw chʼamachasiñama, janiw jupat jan wal amuyañamäkiti, janirakiw jiskʼachañamäkisa. Jupajj jan munkasaw kuns siristam, ukampis qhepatakwa arrepentisispa, uk amtapunim (Job 6:2, 3).

‘Llakitanakar chuymachtʼapjjam’ (1 TESALONICENSES 5:14).

Amigomajj inas wali llakitäskchi, jan ukajj janis kunatak sirvkaspa ukham jan amuyasiñatak chʼamachasiskchi. Ukatwa jupat llakisitam yatiyañama. Ukhamatwa jan kun sañ puedkasas chuymachtʼäta, chʼamañchtʼarakïta.

“Cheqpach amigojja taqe tiempon munasiriwa” (PROVERBIOS 17:17).

Jumaw yanaptʼañatakejj chʼamachasiñama. Amtamarjamak yanaptʼañat sipansa, kunansa yanaptʼirisma sasaw jisktʼañama. Jupatï kunansa yanaptʼasma uk jan siskätam ukhajja, jumaw  kunsa lurapjjasma uk sasma, inas pasiyiriw sarsna sischisma. Jan ukajj mercadotwa altʼanirapisma, utwa qʼomacharapisma, yaqha ukhamanakanwa yanaptʼasma (Gálatas 6:2).

‘Paciencianïpjjam’ (1 TESALONICENSES 5:14).

Awisajja inas amigomajj parlañatak jan ganasanïkchiniti. Ukhamäni ukhajja, jumatï parltʼañ munäta ukhajj saskakitätawa sasaw sasma. Usutätap laykojja, inas arunakapampi luratanakapampi chuym ustʼaychïtam, jan ukajj kuntï lurañ amtawayapkta uk phoqañ jan munjjchiniti, jan ukajj inas colerasjjchini. Jupar yanaptʼkasajja, paciencianïñamawa, amuyañamarakiwa (Proverbios 18:24).

“Taqe horasan suma amigäñatakiw chʼamachasta. Amigajan taqe problemanakap janis askichañ puedkstjja, parlañ muni ukhajj istʼapuntwa. Awisajj sumak jikjjatasiñatakejj ukakwa muni” (Fabiana, a jupan amigapajj llaki usuniwa, depresión clínica, trastornos alimentarios sat usunakanirakiwa).

“Mä amigajajj kusisitapuniw sarnaqasi, jupajj wali munasiñampiw uñjitu. Mä urojja utaparuw invittʼitu, mä suma manqʼwa phaytʼarapirakitu. Ukham wali munasirïtap laykojja, kunjamas jikjjatasta ukwa cuentʼta. Ukatjja wali chʼamañchtʼataw jikjjatasta” (Ha-eun, jupajj llaki usuniwa).

“Paciencianïñajj wali importantewa. Esposajan mä kun luratapas colerayitu ukhajja, janiw jupan juchapäkiti, llaki usunïtapatwa ukham luri sasaw amuyta. Ukaw jan colerasiñataki, munasiñamp uñjañatak yanaptʼitu” (Jacob, esposapajj llaki usuniwa).

“Esposajajj taqe kunansa yanaptʼapunituwa, chuymachtʼarakituwa. Llakimp aynachtʼatäkta ukhajja, kuntï jan lurañ munkta uk lurañatakejj janiw obligkituti. Ukhamätapatjja, kunatï gustkäna uk janiw lurjjeti. Wali khuyaptʼayasiriwa, naya laykojj walja sacrificionakwa luri. Ukatwa jupar wal munasta” (Enrico, jupajj llaki usuniwa).