Papit mamitajajj chuymatpach catolicöpjjänwa. Ukampis Diosan Jehová sutip Biblian uñjapjjäna ukhajja, jankʼakiw Jehová Diosan Testigopäjjapjjäna. Niyakejjay tatajajj carpintería yatchïnjja, janiw Jesusar uñtasitanak maderat lurjjänti, jan ukasti uta manqh mä Salonaruw tukuyjjäna. Filipinas markan capitalapankir Manila sat lugarankir San Juan del Monte markanjja, ukaw nayrïr Salonänjja.

1952 maranwa nasta, jankʼakiw tataj mamajajj Jehová Diosat yatichapjjetäna, kunjamtï pusi jilanakajampi kimsa kullakanakajamp lurapkäna ukhama. Tatajajj Biblian mä capitulop sapür liytʼañatakiw jiltaskatajarjam chʼamañchtʼitäna. Mä qhawqha qellqatanakasat nayampiw yatjjatarakïna. Awisajj tataj mamajajj circuitonakaru, betelitanakaruw utar invitapjjeri. Jupanakajj chʼamañchtʼkiri kusisiykir experiencianakwa cuenttʼapjjerïtu. Ukaw Jehová Diosar serviñ jakäwinakajan nayrar uchañatak chʼamañchtʼapjjetäna.

Papit mamitajan Diosar wal confiyapjjatapajj nayatak wali yateqaskañänwa. 1971 maran mamitajan mä usump jiwatapatjja, papitujampejj precursorat serviñwa qalltapjjayäta. Ukampis 1973 maran 20 maranïkayäta ukhajja, papitujaw jiwjjarakïna. Jan jupanakampëjjasajj wali sapaki, jan kuns kamachtʼirjama ukhamaw jikjjatasiyäta. Ukampis ‘kuntï suytʼasktan ukajj phoqasipuniniwa’ sasin Bibliajj siski ukaw jan sint llakisiñatakisa, Diosat jan jitheqtañatakis mä anclar uñtasit yanaptʼitäna (Heb. 6:19). Papitujan jiwatapat mä jukʼa qhepatjja, Palawan provinciankir Coron islan serviñatakiw precursor especialat uttʼayapjjetäna.

21 maraniw Coron islar puriyäta. Niyakejjay mä jachʼa markan jilschiyätjja, uka islan luzasa, utanakan umasa, autonakasa, motonakas janiw añch utjkänti, ukajj nayatak wali musparkañänwa. Jilat kullakanakajj mä jukʼanikïpkchïnsa, janiw  precursor masijajj utjkänti, awisajj sapakiw predikirïta. Nayrïr phajjsejj chʼamakïnwa, kuna laykutejj familiajatsa amigonakajats wal llakisiyäta. Sapa arumaw alajjpach uñtasajj jachtʼasis warawaranak uñchʼukirïta. Asignacionaj jaytasajj utaruw kuttʼañ munjjayäta.

Ukham sapak uñjasisajj Jehová Diosaruw qhan arstʼasis orasirïta. Bibliana qellqatanakasan liytʼkayäta uka chʼamañchtʼkir arunakatwa amtasirïta. Salmo 19:14 textot wal lupʼirïta, ukat akwa amuyirïta: nayatï jupar kusisiyki ukanakat lupʼëjja, Jehová Diosajj ‘nayan Qarqajäniwa, nayan Salvirijäniwa’, ukatakejj luratanakapata kunja suma chuymanisa ukanakat lupʼiñajänwa. “Usted nunca está solo” a sat yatichäwiw wal yanaptʼitäna, ukajj La Atalaya revistankänwa. Walja kutiw uk liytʼayäta. Uk liytʼkasajj Jehová Diosamp nayampikis parltʼasipkirista ukhamänwa, ukajj nayatak wali valoranïnwa, kuna laykutejj ukhanakaw orasirïta, yatjjatirïta, lupʼirakirïta.

Coron islar puritajat janiw jay paskänti, ukhaw ancianot uttʼayapjjetäna. Niyakejjay ukan nayak ancianöchiyätjja, nayakiw Diosan Arunakap Yatiyañatak Escuelsa, predikir mistuñatak tantachäwsa, Librot Yateqañataki Taman Tantachäwsa, Yatiyañataki revistat yatjjatañatak tantachäws sarayirïta. Sapa semanarakiw taqenitak discurso arstʼañajäna. Ukanakaw jan sapak jikjjatasiñatak yanaptʼitäna.

Coron islan predicañajj wali sumänwa, tiempompejj yaqhep estudionakajajj bautisasjjapjjänwa. Ukampis yaqhep jan waltʼäwinakajj utjarakïnwa. Territorior puriñatakejja, awisajj chika urpachaw kayuk sarañajäna, kawkjans arumajj iktʼä uk janiw yatirïkti. Congregacionajampejj walja jiskʼa islanakan predicapjjañajänwa. Lamar qotan oladanakasa, thayasa, jallus wals sartirïkchïnjja, lanchat viajiñajänwa. ¡Janirakiw nadañs yatkayätti! Ukhamäkchïnsa Jehová Diosajj jarkʼaqapunitänwa, yanaptʼarakitänwa. Ukampis jukʼamp jan waltʼäwinakajj utjañapäkäna uka asignacionatakiw wakichaskitäna, qhepatak uk amuyasiyäta.

1978 maranjja, Australiat alay toqenkir Papúa Nueva Guinea markaruw khitapjjetäna. Uka markajj walja qollunakaniwa, niya España marka ukchʼarakiwa. Mä kimsa millón jaqenakas ukan utjkchïnjja, 800 jila arunakaw ukan parlasïna. Ukampis niya taqeniw Nueva Guinea markankir pidgin aru parlapjjäna, ukajj tok pisin satarakiwa.

Nayraqatajj Port Moresby capitalaruw inglés aru parlir mä congregacionar khitapjjetäna. Ukampis janiw jayajj ukankkayätti, tok pisin aru parlir yaqha congregacionaruw sarjjayäta, uka aru yateqañatakiw clasenak qalltayäta. Kuntï clasen yateqkayäta uk jankʼakiw predicacionan parlirïta, ukaw uka aru jankʼak yateqañatak yanaptʼitäna. Mä jukʼa tiempot tok pisin arut discursonak arstʼjjayätwa. Papúa Nueva Guinea markar puritajat janïraw mä maras paskänti, ukhaw circuitot uttʼayapjjetäna, walja jachʼa provincianakankir tok pisin aru parlir congregacionanakar visitañajänwa. ¡Janiw uk suykayätti!

Niyakejjay congregacionanakajj jaya jayankapjjchïnjja, walja asamblea de circuitonakwa organizañajäna, sapa kutiw viajirakiyäta. Qalltan  janiw uka marksa, costumbrenakapsa sum uñtʼkayätti, janirakiw arups yatkayätti, ukatwa sapäkirists ukham amuyasiyäta. Qollu qollütapat janiw mä congregacionat yaqha congregacionarojj fácil sarañjamäkänti. Ukatwa niya sapa semanajj avionat viajirïta. Awisajj nayakiw mä thantha avionetat viajirïta. Kunjamtï lanchat viajisajj wal llakisirïktjja, ukhamarakiw avionetat viajisajj wal llakisirïta.

Mä qhawqhanikiw telefononïpjjäna. Ukatwa congregacionanakarojj cartanak apayirïta. Walja kutiw janïr cartanakajan purkipan purjjerïta, ukatwa jilat kullakanakar katuñatakejj jaqenakamp yanaptʼayasirïta. Jupanakamp jikisirïta ukhajja, wali munasiñampiw katoqtʼapjjerïtu, ukaw kunatsa wal chʼamachasiskayäta uk amtayitäna. Jehová Diosan yanaptʼap walja toqenakatwa uñjayäta, ukaw jupa jankʼankaskataj amuyayitäna.

Bougainville markankir tantachäwir nayrïr kut sarkayäta ukhajja, mä chacha warmiw wali kusisit jakʼachasipjjetäna. Akham sasaw jisktʼapjjetäna: “¿Nanakat amtasisktati?” sasa. ¡Cheqas jupanakat sum amtasiskayäta! Port Moresby markar purkayäta ukhaw jupanakar predicayäta, mä qhawqha tiempojj Bibliatwa jupanakar yatichayäta. Ukampis ukankir mä jilataw jupanakar Bibliat yatichaskakïna. Jichhajj ¡bautisatäjjapjjänwa! Papúa Nueva Guinea markan kimsa mara servisajj ukham walja bendicionanakwa katoqawayta.

1978 maranwa Coron islat sarjjta, ukampis janïr ukat sarkasajj wali chʼamachasiri wali trabajtʼir mä kullakaruw uñtʼayäta, jupajj Adel satänwa. Sapakiw Samuel ukat Shirley wawanakapar uywaskäna, mamaparus cuidarakïnwa, precursor regularat servirakïna. Mayo de 1981 maranjja, Filipinas markaruw Adel kullakamp casarasiñatak kuttʼayäta. Panpachaniw precursor regularat serviñ qalltapjjayäta, familiarus cuidapjjarakiyäta.

Familianïkchiyätsa, 1983 maran wasitatwa precursor especialat uttʼayapjjetäna. Palawan provinciankir Linapacan sat islaruw asignapjjetäna. Uka lugarajj jayankänwa, janirakiw Testigonakas utjkänti, ukhampachas ukaruw sarjjapjjayäta. Niya mä mara ukankjjapjjayäta ukhajja, esposajan mamapaw jiwjjäna. Jan añcha llakisiñatakejj predicañaw yanaptʼapjjetäna. Niyakejjay tantachäwir sarañ munir walja estudionakajj utjapjjchitänjja, uka islan mä Salonaw munasjjäna. Ukatwa mä jiskʼa Salón lurapjjayäta. Puripjjatajat kimsa marakis pasaskchïnjja, Jesusan jiwatap amtirejj ¡110 jaqenakaw jutapjjäna! Jupanakat waljanejj sarjjapjjayäta uka qhepatwa bautisasipjjäna.

1986 maranjja, Culion islaruw asignapjjetäna ukat esposajajj precursora especialäjjarakïnwa. Uka islan lepra usuninakan mä coloniaw utjäna. Niyakejjay cuerponakapajj lepra usump qʼala tukjatäpjjchïnjja, qalltan uka usuninakar predicañ wal ajjsarayasipjjayäta. Ukampis “uka coloniankirinakajj tratamiento katoqapjjewa, janiw uka usump contagiapkiristamti” sasaw uka markankir publicadoranakajj sapjjetäna. Jupanakat yaqhepajj mä kullakan utapanwa tantachasipjjäna. Jankʼakiw yatinoqtapjjayäta, Diosamp jaqenakamp rechazatäpkaspas ukham amuyasirinakar  mä suytʼäwit parlasajj wal kusisipjjayäta. Jutïrin kʼumara jakasiñ utjatap yatisajj kusisitäpjjänwa, uk uñjañajj wali sumänwa (Luc. 5:12, 13).

¿Kunjamsa wawanakajajj Culion islan yatinoqtapjjäna? Coron islankir pä tawaq kullakanakaruw jutapjjañapatak invitapjjayäta, ukhamat wawanakajj suma amigonïpjjañapataki. Samuel, Shirley ukat uka pä kullakanakasa, mayninakar kunatï cheqäki uk yatichasajj wali kusisitäpjjänwa. Jupanakajj walja wawanakaruw yatichapjjäna, esposajampejj awk taykanakaparuw yatichapjjarakirïta. Mä tiempojj 11 familianakaruw yatichapjjayäta. Mä qhawqha tiempot waljaniw Diosar jukʼamp jakʼachasipjjäna, ukhamatwa mä congregación uttʼayapjjayäta.

Qalltan nayakiw ukan ancianöyäta. Ukhamajj Culion islankir kimsaqallqo publicadoranakatakisa, uka jakʼankir Marily markan llätunka publicadoranakatakis tantachäwinak sarayañatakiw sucursalajj mayitäna. Marily markar puriñatakejja, kimsa horaw lamar qotnam viajipjjañajäna. Tantachäwi tukuyarusti, Halsey sat markan Bibliat yatichañatakejj familpachaw walja horanak qollunaknam sarapjjerïta.

Tiempompejj walja jaqenakaw Marily ukat Halsey markanakan Testigöjjapjjäna, ukatwa uka markanakan Salonanak lurapjjayäta. Kunjamtï Linapacan sat markan paskänjja, ukhamarakiw jilat kullakanakasa Diosat yatiñ munapkäna uka jaqenakas niya taqpach materialanak uchapjjäna, jupanakarakiw niya taqpach ut lurapjjäna. Marily markankir Salonajj mä 200 jaqenakatakïnwa, asambleanak apañatakejj jachʼaptayasirakispänwa.

1993 maranjja, esposajampejj Filipinas markanwa circuitot serviñ qalltapjjayäta, ukhajj wawanakajajj jilïrëjjapjjänwa. 2000 maranjja, Escuela de Entrenamiento Ministerial ukaruw invitapjjetäna, ukhamat uka escuelanakan instructoräñajataki. Janis uk lurañ puedkirista ukhamaw amuyasiyäta, ukampis esposajajj chʼamañchtʼapunitänwa, “uk phoqañatakejj Jehová Diosaw chʼam churätam” sasaw amtayarakitäna (Filip. 4:13). Ukan cheqätap esposajajj yatïnwa, kuna  laykutejj usutpachas asignacionapamp phoqaskakïnwa.

2006 maran instructorat serviskayäta ukhajja, esposajarojj párkinson usunïtapwa yatiyapjjäna. ¡Walpun sustjasipjjayäta! Cuidasiñapatakejj “asignación jaytjjañäni” sasaw jupar sayäta, ukampis jupajj akham sitänwa: “Mirä amp suma, nayar yanaptʼañapatakejj mä doctor thaqtarapita. Jehová Diosaw asignacionasamp phoqañatakejj yanaptʼaskistani” sasa. Sojjta maranakajj jan quejasisaw jupajj Jehová Diosar serviskakïna. Jan sarnaqerjamäjjäna ukhajja, silla de ruedatwa predicäna. Jan parlañ puedjjäna ukhajja, mä aruki jan ukajj pä aruk arsusaw tantachäwinakan comentirïna. Aguantañan wali yateqaskañätapat walja mensajenakwa katoqerïna, ukhamaruw 2013 maran jiwjjäna. 30 jila maranakaw jan jaytjasiri, munasir esposajamp chikäyäta, ukampis jupamp jan chikäjjasajj wasitatwa wali llakita sapakjamak amuyasjjayäta.

Asignacionajampejj phoqaskakiyätwa, ukham lurañajwa esposajajj munarakispäna. Wali ocupatäyätwa, ukaw jan sapak amuyasiñatak yanaptʼitäna. 2014 marat 2017 marakamajja, predicañajj jarkʼatäkäna uka tagalo aru parlir congregacionanakar visitañatakiw invitapjjetäna. Uka qhepatjja, Taiwán, Estados Unidos ukat Canadá markanakan uka aru parlir congregacionanakaruw visitarakiyäta. 2019 maranjja, India ukat Tailandia markanakan inglés arut apaskäna uka Escuela para Evangelizadores del Reino escuelan instructorat serviyäta. Uka asignacionanakamp phoqkasajj wali kusisitäyätwa. Jehová Diosar serviñar chuym uchasajj jukʼamp kusisitätwa.

Servir sarkta uka lugaranakanjja, jilat kullakanakarojj munasipuntwa, ukatwa jupanakar jaytañajj chʼamajja. Ukampis uka horasanakan Jehová Diosar confiyañwa yateqawayta. Kutin kutiniw jupan yanaptʼap uñjawayta, ukaw cambionak taqe chuym katoqasiñatak yanaptʼawayitu. Jichhajj precursor especialatwa Filipinas markan serviskta. Machaq congregacionajan wali kusisitätwa, jupanakaw familiajajja, munasiñampiw uñjapjjarakitu. Samuelusa Shirley wawajas mamapat yateqasisaw Diosar servisipkaraki, ukajj wal kusisiyitu (3 Juan 4).

Kunayman yantʼanakanwa jakäwijan uñjasiwayta, kunjamsa esposajajj mä jan wali usump tʼaqesisajj jiwjjäna ukwa uñjawayta. Walja cambionakaruw yatinoqtawayta. Ukampis Jehová Diosajj “janiw sapa mayni jiwasanakat jayankkiti” (Hech. 17:27). Servirinakapajj wali jaya lugaranakans jakapkchejja, jupanakar yanaptʼañatakisa chʼamañchtʼañatakis ‘Jehová Diosan amparapajj janiw wali jiskʼäkiti’ (Is. 59:1). Jehová Diosajj Qarqajawa, janipuniw jakäwijan jaytawaykituti, walpun ukat jupar yuspärta. Janipuniw sapäkayätti.