1. Perdonsmawa sapkistu ukhajj ¿kamsañs munapjjestaspa?

 “PERDONSMAWA” sapkistu ukhajj ¿waljjay kusistanjja? Yamas chuym ustʼaykayätan ukatejj ukham sischistu ukhajj jukʼampiw kusistanjja. Ukampis perdonsmawa sasajj kamsañs muni uk yatiñajj janiw faciläkaspati. Inas ukampejj suma amigöskaktanwa sañ munchi, jan ukajj inas kunatï paski ukat janiw parlañ munjjti, ukampis janiw nayrjam amigöjjtanti sañ munarakchi.

 2. Biblian qhanañchaski ukarjamajj ¿kunjamsa Jehová Diosajj perdonistu? (Nota liytʼarakïta).

² Janiw khiti jaqes Jehová Diosjam perdonkaspati. Salmo qellqerejj akham sänwa: “Jumajj cheqpachapuniw jaqenakan juchanakapjja perdontajja, ukhamat jaqenakajj jumar respetapjjañapataki” sasa (Sal. 130:4). a Cheqas janiw khitis Jehová Diosjamajj perdonkistaspati, jupajj ‘cheqpachapuniw perdonistu’. Jupakiw kunjamas cheqpach perdonañajj uk yaticharakistaspa. Hebreo Arut Qellqatanakanjja, yaqhep versiculonakan Jehová Diosan perdonasiñapat parlañatakejj mä aruw apnaqasi, ukampis janiw uka pachpa arojj jaqenakan perdonasiñapat parlañatakejj apnaqaskiti.

 3. ¿Kunatsa Jehová Diosan jiwasar perdonatapampi jaqenakan perdonasipjjatapampejj jan igualäki? (Isaías 55:6, 7).

³ Jehová Diosajj maynir perdonki ukhajja, jan mayampitakiw juchap chhaqtayi, wasitatwa jupampejj sum apasjjarakispa.  Kunjamsa Jehová Diosajj kutin kutin perdonistu uk uñjasajj wal yuspärtanjja (Isaías 55:6, 7 liytʼäta).

 4. Kunas cheqpach perdonañajja uk amuyañasatakejj ¿kunjamsa Jehová Diosajj yanaptʼistu?

⁴ Niyakejjay Jehová Diosan jiwasar perdonatapampi pantjasir jaqenakan perdonasitapamp jan igualäkchejja, kunas cheqpach perdonañajj uk janiw jiwasajj sumpach amuyksnati. Ukampis Jehová Diosaw uk amuyañasatakejj mä qhawqha uñachtʼäwinakamp yanaptʼistu. Aka yatichäwin ukanakat mä qhawqha yatjjataskañäni. Ukhamatwa kunsa Jehová Diosajj juchas chhaqtayañatakisa, wasitat jupamp sum apasjjañasatakis luri uk amuyañäni. Ukanakat yatjjatkasajja, kunjamsa Jehová Diosajj perdonistu ukwa amuyañäni, ukarakiw wali munasir Jehová Diosan jiwasar perdonatap wali valoranit uñjañatak yanaptʼistani.

JEHOVÁ DIOSAJJ JUCHANAKAS APASJJEWA

 5. ¿Jehová Diosajj perdonkistu ukajj kunjamasa?

⁵ Biblianjja jilapartejj juchanakasajj mä jathi qʼepïkaspas ukhamwa parli. Davidajj juchanakapat akham sänwa: “Pantjasitanakajajj pʼeqej patjjan montonjjatatawa, mä jathi qʼepir uñtasitawa, qʼepiñas nayatakejj sinti jathiwa” sasa (Sal. 38:4). Ukampis Salmo 25:18; 32:5 textonakanjja, juchanakapat arrepentisirinakarojj Jehová Diosajj ‘perdoniwa’ sasaw qhanañchi. Uka versiculonakanjja, hebreo arut ‘perdonaña’ sasin jaqokipaski uka arojj “aptaña” jan ukajj “apaña” sañ muni. Ukhamajj kunapachatï Jehová Diosajj juchanakas perdonistu ukhajja, mä jathi qʼepsa aptasin apaqkistaspa, ukat apasjjarakispa ukhamawa.

 6. ¿Kawkirus Jehová Diosajj juchanakas apasjje?

⁶ Salmo 103:12 textonjja, kawkirus Jehová Diosajj juchanakas apasjje uk amuyañasatakejj yaqha uñachtʼäwit parlistu, ukan akham siwa: “Kunjamtï inti jalsojj inti jalantat wali jayankkejja, ukhamwa Diosajj jiwasan juchanakasjja wali jayar usku” sasa. Inti jalsojj inti jalantat wali jayankapuniwa. Inti jalsut inti jalantkamajj qhawqchʼa jayasa uk janirakiw amuyksnati. Ukhamajj Jehová Diosajj perdonjjestu ukhajja, juchanakas wali jayarupuniw apasjje. ¡Uk yatiñajj walpun chuymachtʼistu!

 7. ¿Jehová Diosajj juchanakasampejj kamachisa uk kunjamsa Bibliajj qhanañchi? (Miqueas 7:18, 19).

⁷ Jehová Diosajj juchanakas wali jayar apasjje ukhajj ¿jupa jakʼarus apasjjaspa ukhamati? Janiw ukhamäkiti. Ezequías reyejj akham sänwa: “Taqe juchanakajsa qhepäjjamaruw jaqttajja” sasa. Notapan akham sarakiwa: “Taqe juchanakajsa juma nayraqatatwa chhaqtaytajja” sasa (Is. 38:9, 17; nota). Ukhamajj arrepentistan ukhajja, Jehová Diosajj juchanakas katusajj jan mayamp uñjañatakis wali jayar jaqtkaspa ukhamawa. Ukhamarus uka textojj akham sasaw traducisirakispa: “Janis kunapachas jucha lurkirista ukhamwa lurtajja” sasa. Niya uka pachparakwa Miqueas 7:18, 19 (liytʼäta) textojj qhanañchi. Uka textojja, kunjamsa Jehová Diosajj taqe juchanakas lamar qotar jaqonti uka toqetwa parli. Bibliajj qellqaskäna uka tiemponakanjja, mä kunas lamar qotar jaqontasïna ukhajj janiw kunjamats katusjjaspänti.

 8. ¿Kunanaksa akhakamajj yateqawaytanjja?

⁸ Bibliankir uñachtʼäwinakarjamajja, jan juchañchasjjañasatakejj kunjamsa Jehová Diosajj juchanakas qʼal chhaqtayi ukwa yateqtanjja. Davidjamarakiw akham sistanjja: “Khitinakatï jan wali luratanakapat perdonatäpki ukanakajj kusisipjjpan, juchanakapat perdonatäpki ukanakas ukhamaraki. Kawkïri jaqen juchaptï Jehová Diosajj janipun amtasjjani uka jaqejj kusispan” sasa (Rom. 4:6-8). ¡Cheqas ukaw cheqpach perdonañajja!

 JEHOVÁ DIOSAJJ JUCHANAKAS QʼAL CHHAQTAYI

 9. ¿Kuna uñachtʼäwimpis Jehová Diosajj kunjamsa juchanakas perdonistu uk amuytʼayistu?

⁹ Kunjamsa Jehová Diosajj arrepentisirinakan juchanakap qʼal chhaqtayi uk amuytʼañatakejja, Bibliankir yaqha uñachtʼäwinakat yatjjatarakiñäni, jupajj juchampit jiwañampit jaqenakar kutsuyasaw uk luräna. Bibliarjamajja, Jehová Diosajj maynin juchanakap jareqewa, qʼomacharakiwa, ukhamatwa Diosajj juchachasirir qʼomachi (Sal. 51:7; Is. 4:4; Jer. 33:8). Qʼomachatäjjani ukhajj kunjamäjjanisa uk Jehová Dios pachpaw akham qhanañchi: “Juchanakamajj llijkir wila colorjamäkchisa, khunur uñtasit janqʼor tukuyatäniwa. Juchanakamajj wila color isjamäkchisa, janqʼo tʼarwar uñtasit tukuyatäniwa” sasa (Is. 1:18). Mä telajj wila colorampi jan ukajj llijkir wila colorampi qʼañuchatäki ukhajja, uk apsuñajj wali chʼamawa. Uka uñachtʼäwit parlasinjja, kunjamsa Jehová Diosajj juchanakas jan mayampitak qʼal chhaqtayaspa uka toqetwa qhanañchistu.

10. ¿Kunjamsa Jehová Diosajj juchanakas perdonistu uk kuna yaqha uñachtʼäwimpis amuytʼayarakistu?

¹⁰ Kunjamtï pasïr yatichäwin yatjjataniwayktanjja, juchanakasajj manunakar uñtasitawa (Mat. 6:12; Luc. 11:4). Ukhamajj sapa kuti Dios contra juch lurtan ukhajja, sapa kutis jukʼamp manunïksna ukhamawa. Ukampis Jehová Diosajj perdonjjestu ukhajja, jupas uka walja manunakas phoqkaspa ukhamawa, mä arunjja manunakas chhaqtaykaspasa, janis jiwasan pagañasajj wakisjjaspa ukhamawa. Perdonkistu uka juchanakasat janirakiw wasitat pagañas munkiti. ¡Jehová Diosan ukham perdonasirïtapat walpun kusistanjja!

11. ¿Bibliajj juchanakas qʼomachañat parlasajj kamsañs muni? (Hechos 3:19).

¹¹ Jehová Diosajj juchanakasa jan ukajj manunakas janiw aleq ukhamak chhaqtaykiti, jan ukasti qʼal chhaqtayi (Hechos 3:19 liytʼäta). Uk amuyañatakejj ak amuytʼañäni, papelan qellqtʼatäki uka manum jan pagjjañamatakejj mä jachʼa equisampiw (X) maynejj numeronakjjar raytʼi. Cheqas uka manumajj raytʼatäkchisa, numeronakajj uñstaskakiwa. Ukampis Bibliarjamajj janiw manus aleq raytʼañat parlkiti, jan ukasti borrskaspas ukham chhaqtayañatwa parli. Uk sum amuytʼañatakejja, Bibliajj qellqaskäna uka tiemponakan tintajj kunanakat luratänsa uk amuytʼañäni, ukajj kʼillimampi jan ukajj carbonampi, gomampi ukat umampiw lurasirïna. Ukhamajj facilakiw ukajj mä chʼaran esponjamp borrsusispäna. Qellqtʼatäkäna uka manojj borrsusïna ukhajja, qʼalaw chhaqtjjäna, janirakiw uñjasjjänti. Janis kunapachas maynejj manunïkaspäna ukhamäjjarakïnwa. Cheqas Jehová Diosajj perdonjjestu ukhajj juchanakas qʼal chhaqtayjje, ¡walpun ukat yuspärtanjja! (Sal. 51:9).

12. Chʼiyar qenayat parlir uñachtʼäwit ¿kunsa yateqsna?

¹² Kunjamsa Jehová Diosajj juchanakas perdoni uk qhanañchañatakejja, Isaías 44:22 textojj yaqha uñachtʼäwimpiw qhanañcharaki, ukan akham siwa: “Jan wali luratanakamjja mä qenayas tapjjatkaspa ukhamwa chhaqtayäjja, juchanakamjja mä chʼiyar qenayas tapjjatkaspa ukhamwa chhaqtayäjja” sasa. Jehová Diosajj perdonjjestu ukhajja, juchanakas mä chʼiyar qenayampis tapjjatkaspa ukhamawa, ukhamat jan khitis uñj-jjañapataki.

13. Jehová Diosajj juchanakam perdonatapat ¿kunjamas chuymaman jikjjatasta?

¹³ ¿Yatjjatawayktan uka uñachtʼäwinakajj kunsa yatichistu? Jehová Diosajj perdonjjestu ukhajja, janiw wiñayatakis juchanakasamp qʼañuchatäksna ukham amuyañasäkiti. Niyakejjay juchanakasajj Jesucriston wilapamp pagasiwayjjchejja, janiw jiwasan pagañasajj wakisjjeti. Juchasajj qʼala chhaqtayatäjjewa, janis  kunapachas jucha lurkasäna ukhamäjjarakiwa. Juchanakasat arrepentistan ukhajja, Jehová Diosajj cheqpachapuniw perdonistu.

JEHOVÁ DIOSAJJ WASITATWA AMIGOPARJAM UÑJ-JJESTU

14. ¿Kunatsa Jehová Diosan jiwasar perdonjjatapat jan payachasiñasäki? (Fotompi dibujompi uñjjattʼarakïta).

¹⁴ Jehová Diosajj perdonjjestu ukhajja, wasitatwa jupan amigopäjjsna, janiw ukat payachasiñasäkiti. Uk yatiñajja, juchanakasat jan jukʼamp juchañchasiñatakiw yanaptʼistu. Jehová Diosajj jucha luratasat coleratakïskaspasa, jan ukajj castigañpuns munkistaspa ukham janiw sañ munkiti. ¡Diosajj janipuniw uk lurkaspati! ¿Kunatsa uka toqet jan payachasktanjja? Kuna laykutejj jupa pachpaw Jeremías profetarojj akham säna: “Pantjasitanakap perdonäwa, janirakiw juchanakapats jukʼamp amtasjjäti” sasa (Jer. 31:34). Apóstol Pablojj uka pachpa arunak aytasajj akham sarakïnwa: “Janirakiw juchanakapatjja jukʼamp amtasjjäti” sasa (Heb. 8:12). ¿Uka arunakajj kamsañs muni?

15. ¿Jehová Diosajj janiw juchanakamat amtasjjäti siski ukajj kamsañs muni?

¹⁵ Biblian amtaña siski uka arojja, janiw kunatï nayrajj paskäna uk amtasiñatakejj apnaqaskapuniti. Awisanakajja, mä kun lurañataki jan ukajj mä kun lurañ amtañatakiw apnaqasispa. Jesusan ladopan warkkatatäkäna uka jan walinak lurir jaqejj kuntï siskäna uk amuytʼañäni, Jesusarojj akham sänwa: “Jesús, Reinomar mantjjäta ukhajj nayat amttʼasitätawa” sasa (Luc. 23:42, 43). Ukham sasinjja, janiw aleqakis jupat amtasiñapäkaspa ukham sañ munkänti. Jesusasti kunsa jupa laykojj lurani ukwa sarakïna, juparojj jiwatat jaktayañwa arsüna. Ukhamajj Jehová Diosajj juchanakamat janiw jukʼamp amtasjjäti siskistu ukhajj perdonjjestuwa, janirakiw juchanakasat castigañatakejj kunsa lurkaniti ni kunapachas jucha luratasat amtasjjaniti.

16. ¿Jehová Diosajj perdonkistu ukajj kunamp sasisa?

¹⁶ Jehová Diosajj perdonjjestu ukhajj kunjamas jikjjatastan ukjja, Bibliajj yaqha uñachtʼäwimpiw qhanañcharakistu. Niyakejjay taqenis  pantjasir jaqëstanjja, ‘juchan esclavopäksnas’ ukhamätanwa. Ukampis Jehová Diosamp perdonatäsajja, ‘juchanakasat salvat esclavöksnas’ ukhamätanwa (Rom. 6:17, 18; Apoc. 1:5). Cheqas Jehová Diosajj perdonjjestu ukhajj antutat mä esclavjamaw wal kusistanjja.

17. ¿Jehová Diosajj perdonkistu ukajj mä usutsa qollasksna ukhamawa sasajj kunatsa sissna? (Isaías 53:5).

¹⁷ (Isaías 53:5 liytʼäta). Yatjjatkañäni uka qhepa uñachtʼäwinjja, Bibliarjamajj juchararäsajj jan qollkañ mä usunïksnas ukhamätanwa. Juchar purtʼasktan ukhajja, Jehová Diosamp sum apasktan ukajj janiw nayrjamäjjeti, ukampis jupajj Yoqapan sacrificiot loqtasitapampiw qollistu, ukhamatwa Diosajj wasitat jupamp sum apasjjañasatak yanaptʼistu (1 Ped. 2:24). Wali usuntatäsin qollasjje ukhajja, maynejj wali kusisitawa. Jehová Diosajj perdonjjestu, jupamp sum apasiñasatak qolltʼjjestu ukhajja, ukhamarakiw wal kusistanjja.

¿KUNJAMSA JEHOVÁ DIOSAN JIWASAR PERDONATAPAJJ YANAPTʼISTU?

18. ¿Bibliarjamajj Jehová Diosan jiwasar perdonatapat parlki uka uñachtʼäwinakajj kunsa yatichistu? (“¿Kunjamsa Jehová Diosajj perdonistu?” sat recuadro liytʼarakïta).

¹⁸ Yatjjataniwayktan uka uñachtʼäwinakajj ¿kunsa Jehová Diosan perdonasirïtapat yatichistu? Akwa yatichistu, Jehová Diosajj perdonkistu ukhajja, juchanakasajj wiñayatakiw qʼal chhaqtjje. Ukhamatwa alajjpachankir Awkisampejj sum apasiraktanjja. Ak amtapuniñäni, Jehová Diosajj perdonkistu ukajj jiwasatak mä regalowa. Jupajj jiwasar wal munasitapata, khuyapayasitapatwa uka regalo churistu, janiw uk katoqañatakejj derechonïksnas ukham amuyañasäkiti (Rom. 3:24).

19. 1) ¿Kunatsa Jehová Diosar wal yuspärañasa? (Romanos 4:8). 2) ¿Kunsa jutïr yatichäwin yatjjataskañäni?

¹⁹ (Romanos 4:8 liytʼäta). Cheqas kunjamtï Salmo 130:4 texton siskejja, Jehová Diosajj ‘cheqpachapuniw jaqenakan juchanakap perdoniʼ. ¡Uk yatisajj walpun yuspärtanjja! Ukampis jiwasatï Jehová Diosamp perdonayasiñ munstan ukhajja, Jesusan ewjjtʼap amtañasawa, jupajj akham sänwa: “Jumanakatï mayninakan juchanakap jan perdonapkätajja, janirakiw alajjpachankir Awkimajj juchanakam perdonapkätamti” sasa (Mat. 6:14, 15). Ukhamajj Jehová Diosat yateqasisaw mayninakar perdonañasa. Kunjamsa uk lursna ukwa jutïr yatichäwin yatjjataskañäni.