1, 2. 1) ¿Kunapachas maynir perdonañajj chʼamakïspa? 2) ¿Kunjamsa Denise kullakajj perdonirïtap uñachtʼayäna?

 ¿JUMATAKEJJ mayninakar perdonañajj chʼamakiti? Perdonañajj chʼamakïspawa, jukʼampis maynejj arsutapampisa luratapampis chuym ustʼaykistu ukhaw chʼamäspa. Ukampis ¿kunsa jan chuyma ustʼatäjjañatakisa, mayninakar perdonañatakis lursna? Denise a kullakan experienciapat amuytʼañäni. Jupan perdonatapajj musparkañapuniwa. 2017 maranjja, Denise kullakampi familiapampejj ukhak inauguraskäna uka central mundial de los Testigos de Jehová ukaruw visitir sarapjjäna. Utar kuttʼasipkäna ukhajja, yaqha autow jupanakar chocantäna. Denise kullakajj desmayatat sartjjäna ukhajja, wawanakapan qʼala usuchjatätapa, Brian esposopas jiwatätapwa yatiyapjjäna. Kunanakatï paskäna uk amthapisajja, Denise kullakajj akham siwa: “Uka ratojj qʼala chuyma pʼakintatäyätwa, janirakiw kamachtʼirjamäkayätsa” sasa. Uka pasatatjja, uka auto apirejj jan umatätapa, sumakïskatapwa kullakajj yatïna, ukatwa jupajj tranquilok jikjjatasiñatakisa uka chachatak jan coleratäñatakis Jehová Diosar orasïna.

² Jupanakar chocantkäna uka auto apirirojj arrestapjjänwa, kullakan esposopar jan amanut jiwayatapatwa juicior apapjjarakïna, juezatejj juchaniw saspäna ukhajja, carcelaruw llawintapjjaspäna. Ukampis tribunalankirinakajja, Denise kullakarojj kuntï jumajj arskäta ukarjamaw uka jaqerojj carcelar llawintasiniti janicha ukajj amtasini sasaw sapjjäna. Kullakajj akham siwa: “Heridajajj chʼuktʼatäkäna uk jararasajj walja jayumpis warjjatapkitaspa ukham amuyasiyäta, kuna laykutejj  chuym wal usuykitäna ukanakatwa parlañajäna” sasa. Accidentejj paskäna uka mä qhawqha semananakatjja, Denise kullakajj tribunalaruw saräna, familiapar jan waltʼaykäna uka jaqe nayraqatanwa parlañapäna. Ukankkasajj uka jaqet khuyaptʼayasiñapatakiw Denise kullakajj juezar mayïna. b Kullakajj parlañ tukuyäna ukhajja, juezajj jachaqtʼasisaw akham säna: “Aka 25 maranakan juezat trabajisajja, janipuniw kunapachas uka arunak aka salan istʼirïkti. Janirakiw jan waltʼayatäki ukan familiapajj juchañchat jaqe favorajj ukham ruwtʼasirïkiti. Janipuniw ukham munasiñamp arstʼasirsa, ni perdonirs uñjirïkti” sasa.

 3. ¿Kunas Denise kullakarojj perdonañatak yanaptʼäna?

³ Jehová Diosajj kunja perdonasirisa uk amuytʼañaw Denise kullakarojj perdonañatak yanaptʼäna (Miq. 7:18). Jehová Diosan jiwasar perdonatapat yuspärañäni ukhajja, mayninakar perdonañatakejj dispuestokïñäniwa.

 4. ¿Kun lurañassa Jehová Diosajj muni? (Efesios 4:32).

⁴ Kunjamtï Jehová Diosajj taqe chuym perdonkistojja, ukhamarak mayninakar perdonsna ukwa jupajj muni (Efesios 4:32 liytʼäta). Chuym ustʼayapkistu ukanakar perdonañatak dispuestokïsna ukwa jupajj munaraki (Sal. 86:5; Luc. 17:4). Mayninakar perdonañatakejj kunas yanaptʼistaspa ukwa aka yatichäwin kimsa toqet yatjjataskañäni.

CHUYMA USTʼATÄTAM JAN UKHAMAK JAYTAMTI

 5. ¿Chuym ustʼayapkistu ukajj kunamp sasisa? (Proverbios 12:18).

⁵ Maynin kun arsutapatsa jan ukajj kun luratapatsa, wali chuyma ustʼataw jikjjatassna, jukʼampis mä munat amigöspa jan ukajj mä familiaräspa ukhaw ukham jikjjatassna (Sal. 55:12-14). Awisajja chuym ustʼayapkistu ukajj mä cuchillomp jununtatäñamp sasispawa (Proverbios 12:18 liytʼäta). Janis chuyma ustʼatäksna ukham tukuñajja, mä cuchillomp jununtatäsajj pachparukis uka cuchillo jaytksna ukhamäspawa. Ukampis ukham tukuñajj janiw sum jikjjatasiñatak yanaptʼkistaniti.

 6. ¿Kunsa maynin chuyma ustʼayatäsajj qalltan lursna?

⁶ Maynejj chuym ustʼaykistu ukhajja, qalltan inas colerassna. Bibliarjamajj maynejj colerasispawa, ukampis coleramp jan atipayasiñatakiw ewjjtʼistu (Sal. 4:4; Efes. 4:26). Kuna laykutejj chuymasan kunjamas jikjjatastan ukarjamaw kuns lursna. Jilapartejj coleratäñajj jan walinakaruw apistaspa (Sant. 1:20). Amtapunim: mä kunat coleratäñajj utjaspawa, ukampis coleratäskakiñajj jiwasatäjjewa.

 7. ¿Kunjamanakats maynejj jan waltʼayistaspa?

⁷ Maynejj chuym ustʼaykistu ukajj ¿kunjamanakats jan waltʼayistaspa? Ann kullakajj akham siwa: “Wawäkayäta ukhajja, tatajajj mamajaruw apanuküna, niñerajampiw casarasirakïna. Apanukutaw uñjasiyäta. Wawanakanëjjapjjäna ukhajja, janis yäqjjapjjetaspa ukhamwa amuyasiyäta, janis khitis munaskitaspa ukham amuyasaw jilsurakiyäta” sasa. Georgette kullakajja, esposopajj yaqha warmimp sarjjäna ukhajj kunjamas jikjjatasïna uk akham siwa: “Chuymajajj walpun usutäna. Wawatpachaw jupampejj amigöpjjayäta. ¡Precursoräpjjarakiyätwa!” sasa. Naomi kullakajj akham sarakiwa: “Esposojamp jan waltʼayatäñ janipuniw kunapachas piensirïkti. Ukampis pornografía uñchʼukitap nayar imtʼaskatap arsusïna ukhajja, engañjkitaspasa traicionkitaspas ukhamwa amuyasiyäta” sasa.

 8. 1) ¿Kunatsa mayninakar perdonañasa? 2) ¿Kunjamsa mayninakar perdonañajj yanaptʼistu? (“ Maynin sinti jan waltʼayatajj ¿kunsa lursna?” sat recuadro liytʼäta).

 ⁸ Kunsa mayninakajj sapjjestani jan ukajj lurapjjestani uk janiw controlksnati, ukampis kun satasa jan ukajj luratas kamachañänisa uk controlsnawa. Jiwasatakejj Jehová Diosar munasitasat perdonañaw jukʼamp walïspa, uk lurañaswa jupajj munaraki. Ukhamarus jiwasatï coleratakïskañäni jan perdonkarakiñäni ukhajja, jan amuytʼasisaw kuns lursna, cuerposarus jan waltʼaysnawa (Prov. 14:17, 29, 30). Christine kullakat amuytʼañäni, jupajj akham siwa: “Chuyma ustʼatäkta ukhajja, janiw lartʼasirjamäkti, janiw sum manqʼasjjti, ni sums iktʼasjjaraktti. Jan sum jikjjatasitaj laykojj janiw esposojampisa mayninakampis sum apasiñ puedjjaraktti” sasa.

 9. ¿Kunjamsa jan chuyma ustʼatäñajj yanaptʼistu?

⁹ Chuym ustʼaykistu ukajj janis perdón maykchistanejja, jan sinti jan waltʼayatäñatakejj ¿kunsa lursna? Párrafo 7 ukan parlaniwayktan uka Georgette kullakajj akham siwa: “Mä qhawqha tiempotjja, janiw chuyma ustʼatäjjayätti, esposojäkäna ukatakis janiw coleratäjjayätti, tranquilokëjjarakiyätwa” sasa. Chuyma ustʼatäñ apanukusajj mayninakampejj sum apasiraktanjja, ukham lurasajj jiwas pachpaw mä regalo churastanjja: janiw ukamp aynachtʼktanti, kusisitaw jakasiraktanjja (Prov. 11:17). Inas chuyma ustʼatätam amuyassta, janirak perdonirjamäkstati, ¿kunsa lurasma?

CHUYMA USTʼATÄTAM APANUKJJAM

10. ¿Kunatsa jan chuyma ustʼatäjjañatakejj tiempojj munasi? (Dibujonak uñjjattʼarakïta).

¹⁰ ¿Kunas jan chuyma ustʼatäjjañatakejj yanaptʼiristam? Maya, tiempow pasañapa. Mä accidenten wal usuchjasiri mä jaqet parltʼañäni. Jupajj qollayaskchisa, waliptañapatakejj tiempow munasi. Chuyma ustʼatäñampejj ukhamarakïspawa, jan chuyma ustʼatäjjañatakisa, taqe chuym perdonañatakis tiempow munasi (Ecl. 3:3; 1 Ped. 1:22).

11. ¿Kunjamsa oracionajj perdonañatak yanaptʼistaspa?

¹¹ Paya, perdonañatakejj Jehová Diosaruw orasiñama. c Párrafo 7 ukan parlaniwayktan uka Ann kullakajja, kunjamsa oracionajj jupar yanaptʼäna uk akham siwa: “Kunanaktï familjamajj  jan sum lurapkayäta ukanakat perdonatäñatakiw Jehová Diosar mayisiyäta. Ukat tatajampiru esposapampirojj “perdonapjjsmawa” sasaw mä cartan qellqayäta” sasa. Ann kullakatakejj janiw faciläkänti, ukampis akham saskakiwa: “Kunjamtï Jehová Diosajj perdonasirïki ukham perdonasajja, tatajampi esposapampejj Diosar uñtʼapjjaspa ukwa suyarakta” sasa.

12. ¿Kunatsa chuymasar confiyañat sipans Jehová Diosar confiyañasa? (Proverbios 3:5, 6).

¹² Kimsa, chuymamar confiyañat sipans Jehová Diosaruw confiyañama (Proverbios 3:5, 6 liytʼäta). Jehová Diosajj kunas jiwasatakejj walïspa uk sum yati (Is. 55:8, 9). Jupajj janipuniw kunatï jan waltʼaykistaspa uk lurañ maykistaniti. Ukhamajj perdonañ maykistu ukajj jiwasan askisatakiwa, janiw ukat payachasiñasäkiti (Sal. 40:4; Is. 48:17, 18). Ukampis jiwasatï kunjamas chuymasan jikjjatastan ukaruk confiyjjsna ukhajja, janiw kunapachas perdonksnati (Prov. 14:12; Jer. 17:9). Párrafo 7 ukan parlaniwayktan uka Naomi kullakajj akham siwa: “Qalltanjja pornografía uñchʼukitapat esposojar jan perdonañatakejj razonanïkiristsa ukham amuyasiyäta. Wasitatwa chuym ustʼayitani, qhawqsa tʼaqesiyitu ukanaks jupajj armasjjaniwa sasaw amuyarakiyäta. Ukham amuyañatakejj Jehová Diosakiw kunjamas jikjjatasta uk yati sasaw sarakiyäta. Ukampis tiempompejj ak amuyasiyäta: kunjamsa jikjjatasta uk Jehová Diosajj sumsa amuykchitojja, uka luratajajj walïkaspas ukham janiw uñjkiti. Kunjamas jikjjatasta uk jupajj sum yati, maynejj chuyma pʼakintatäki ukhajj janiw ratuk ukajj chhaqtkiti uks jupajj yatirakiwa, ukampis jupajj perdonasirïñajwa muni” sasa. d

KUSISIT CHUYMANÏÑATAK CHʼAMACHASIM

13. Romanos 12:18-21 textorjamajj ¿kunsa lurañasa?

¹³ Inas maynejj sinti jan wal lurawaychistu, ukampis perdonañatakejj janiw kunatï pasawayki ukat jan parlañakejj wakiskaniti. Ak lurañaw wakisirakini: jilatasächi jan ukajj kullakasächi ukhajja, jupamp sumankthapiñatakiw chʼamachasiñasa (Mat. 5:23, 24). Colerasiñat sipansa khuyaptʼayasirïñwa ajlltanjja, chuyma  ustʼatäñat sipansti perdonañwa ajlliraktanjja (Romanos 12:18-21 liytʼäta; 1 Ped. 3:9). ¿Kunas ukatakejj yanaptʼistani?

14. ¿Kun lurañatakis chʼamachasiñasa, ukat kunatsa?

¹⁴ Chuym ustʼaykistu ukarojja, kunjamtï Jehová Diosajj uñjki ukham uñjañatakiw chʼamachasiñasa. Maynejj kunja suma chuymanisa ukakwa Diosajj uñji (2 Crón. 16:9; Sal. 130:3). Ak amuytʼañäni: jiwasatï maynin suma chuymanïtap thaqañäni ukhajja, suma chuymanïtapwa jikjjatañäni, ukampis jiwasatï maynin jan walïki uk thaqañäni ukhajja, jan walïki ukwa jikjjatarakiñäni. Mayninakan suma chuymanïpjjatap thaqañäni ukhajja, perdonañajj jukʼamp facilakïniwa. Jarrod sat mä jilatajj akham siwa: “Kuna jan waltï mä jilatajj lurki ukjja, kunja suma chuymanisa ukampiw igualtʼayta. Ukham lurañaw jupar jankʼak perdonañatak yanaptʼitu” sasa.

15. ¿Kunatsa chuym ustʼaykistu ukarojj “perdonjjsmawa” sañasa?

¹⁵ Akwa lurarakisma: chuym ustʼaykistu ukarojj “perdonjjsmawa” sañamawa. ¿Kunatsa uk lurañamajj wali wakiskirejja? Naomi kullakajj  akham siwa: “Esposojajj ‘¿perdonjjestati?’ sasaw jisktʼitäna. ‘Perdonjjsmawa’ sañs munkchiyätjja, janiw uk arsurjamäkayätti. Ukhamatwa cheqpachapun jupar jan perdonataj amuyasiyäta. Ukampis tiempompejja, ‘perdonjjsmawa’ sasaw esposojar sayäta. Uka mä aru satajajj esposojarusa nayarus wal yanaptʼapjjetäna. Esposojajj sumak jikjjatasjjasajj jachaqtʼasïnwa, nayasti tranquilokëjjarakiyätwa. Ukhat aksaruw juparojj jukʼat jukʼat confiyjjayäta, jichhajj wasitatwa suma amigöjjapjjta” sasa.

16. ¿Kunsa perdonasirïñat yateqawayta?

¹⁶ Jehová Diosajj perdonasirïñaswa muni (Col. 3:13). Ukhamäkchisa awisajj perdonañajj chʼamakïspawa. Ukampis kunjamtï yatjjataniwayktanjja, akanak lurañaw yanaptʼistaspa: 1) chuyma ustʼatätas janiw ukhamak jaytañasäkiti, 2) chuyma ustʼatätas apanukjjañasawa, 3) kusisit chuymanïñatakiw chʼamachasiñasa (“ ¿Kunanak lurañas perdonañatak yanaptʼiristam?” sat recuadro liytʼäta).

¿KUNJAMSA PERDONASIRÏÑAJJ YANAPTʼIRISTAM?

17. ¿Perdonañajj kunjamsa yanaptʼistu?

¹⁷ Perdonasirïñatakejj walja razonanakaw utjistu. Ukanakat jichhajj mä qhawq uñjañäni. Maya, wali khuyapayasiri Jehová Dios Awkisatwa yateqastanjja, juparuw kusisiyaraktanjja (Luc. 6:36). Paya, wali khuyapayasiñampi jiwasar perdonatapatjja, Jehová Diosarojj wal yuspärtanjja (Mat. 6:12). Kimsa, cuerposan kʼumaräñapatakiw yanaptʼistani, jukʼamp suma amigonakaw utjarakistani.

18, 19. ¿Perdonasirïtasat kuna askinakas utjaspa?

¹⁸ Perdonasajj inas jan suykayätan uka walja askinak jikjjatchiñäni. Qalltan parlaniwayktan uka Denise kullakarojj kunas pasäna uk amuytʼañäni. Kullakajj janiw qalltan ak yatkänti, autopar chocantas accidentasiykäna uka chachajj juicio qhepat jiwayasiñwa amtäna. Ukampis Denise kullakan perdonasirïtap uñjasajj wal musparäna, ukatwa uka chachajj Testigonakamp Bibliat yatjjatañ qalltäna.

¹⁹ Perdonañajj wali chʼamäkaspas ukham inas amuystan. Ukampis perdonañajj walja bendicionanakwa utjayaspa (Mat. 5:7). Ukhamajj Jehová Diosat yateqasiñatak chʼamachasipjjañäni, cheqpachapun mayninakar perdonapjjarakiñäni.