1, 2. ¿Kunjamsa apóstol Pablot yateqasiñajj jichhürunakan ancianonakar yanaptʼaspa?

 APÓSTOL PABLOJJ jilat kullakanakarojj wal munasïna, jupanak laykojj jan inaktʼasaw trabajïna (Hech. 20:31). Ukatwa jupar wal munasipjjpachäna. Mä kutejja, Éfeso markankir ancianonakajj jupan jan kuttʼanjjañap yatipjjäna ukhajja, “taqpachaniw wal jachapjjäna” (Hech. 20:37). Jichhürunakanjja apóstol Pablot yateqasisajj ukhamarakiw ancianonakajj jilat kullakanakar wal munasipjje, jupanakar yanaptʼañatakejj walja sacrificionak lurapjjaraki (Filip. 2:16, 17). Ukampis awisajj taqe luräwinakapamp phoqañajj ancianonakatakejj chʼamakiwa. ¿Kunas jupanakar yanaptʼaspa?

² Ancianonakajj walja lurañanakanïpjjewa, jupanakajj Pablotwa yateqasipjjaspa (1 Cor. 11:1). Jupajj janiw angelanakjam chʼamanïkänti, jan ukasti pantjasir jaqekïnwa, ukatwa awisajj kunatï walïki uk lurañatakejj wal chʼamachasiñapäna (Rom. 7:18-20). Walja jan walinakansa uñjaskchïnjja, janiw qarjtkänti, kusisitakïskänwa. Ancianonakatï jupat yateqasipjjanejja, jan walinakan uñjaskasas kusisitaw Jehová Diosar servisipkakini. Kunjamsa uk lurapjjaspa uk jichhajj uñjañäni.

3. ¿Kunanakatsa aka yatichäwin yatjjataskañäni?

³ Aka yatichäwinjja, kunanakas ancianonakatakejj chʼamakïspa ukwa pusi toqet yatjjataskañäni: 1) predicañataki ukat yaqha lurañanakampi phoqañatak tiempo apstʼasiña, 2) munasir awatirïña, 3) pachpa pantjasitanakapar saykataña, 4) mayninakan pantjasitanakapar saykataña. Kunjamsa apóstol Pablojj ukanakar saykatäna, kunjamsa ancianonakajj jupat yateqasipjjaspa ukanakatwa yatjjataskañäni.

4. ¿Kunatsa ancianonakatakejj predicañatak tiempo apstʼasiñajj chʼamakïspa?

⁴ ¿Kunatsa chʼamakïspa? Predicacionan wali yateqaskayäpkchisa, ancianonakajj walja lurañanakanïpjjewa. Ukanakat mä qhawqha uñjañäni. Awisajja semanan utjki uka tantachäwi sarayapjjañapawa, jan ukajj Congregacionan Bibliat Yatjjatañataki siski uksa sarayapjjañaparakiwa. Yaqha asignacionanakampisa, discursonakampisa phoqapjjañaparakiwa. Siervo ministerialanakar wakichtʼañatakisa jilat kullakanakar chʼamañchtʼañatakis tiempo apstʼasipjjarakiwa (1 Ped. 5:2). Yaqhep ancianonakajja, construccionana, Tantachasiñ Utanaka ukat Diosar adorañatak yaqha ukham utanak askichañanwa yanaptʼapjje. Ukampis taqe ukanakat sipansa, suma yatiyäwinak yatiyañaw ancianonakatakejj wali wakiskirejja, ukajj jilat kullakanakatakis wali wakiskirirakiwa (Mat. 28:19, 20).

5. ¿Kunatsa Pablojj predicañ toqet wali yateqaskayajja?

⁵ ¿Kunanaksa apóstol Pablojj luräna? Filipenses 1:10 textojja, kunatsa Pablojj suma prediktʼirïna ukwa amuytʼayistu. Ukan akham sasaw ewjjtʼistu: ‘Kunanakatejj jukʼamp importantëki ukanak amuyapjjam’ sasa. Jupas ewjjtʼaparjamaw sarnaqarakïna. Pablojj mä luräwi katoqäna, ukajj jakäwipan wali importantënwa. “Jaqenak nayraqatansa utat utatsa” taqe chuymaw predicäna (Hech. 20:20). Janiw yaqhep horasak predickänti ni semanan mä urukis predickänti, jan ukasti taqe horasaw predikirïna. Mä kutejja, Atenas markan masinakapar suykasaw suma yatiyäwinak wali importante jaqenakar predicäna, yaqhepanakajj istʼapjjänwa (Hech. 17:16, 17, 34). Alquilat utapan ‘cadenanakampi chinuntatäkäna’ ukhasa, khitinakarutï predicañ puedkäna taqe ukanakaruw predicäna (Filip. 1:13, 14; Hech. 28:16-24).

6. ¿Kunjamsa Pablojj yaqha jilatanakar yanaptʼäna?

⁶ Pablojj janiw tiempop ina chʼusar aptʼirïkänti. Yaqhanakarus jupamp predicañatakiw invittʼirïna. Misionerot nayrïr kuti viajkäna ukhajja, Juan Marcos chacharuw invittʼäna, misionerot payïr kuti viajkäna ukhasti Timoteo waynaruw invittʼarakïna (Hech. 12:25; 16:1-4). Uka chachanakarojj congregacionanak organiztʼapjjañapataki, suma awatirïpjjañapataki, suma yatichirïpjjañapatakiw yanaptʼäna (1 Cor. 4:17).

7. Efesios 6:14, 15 textorjamajja, ¿kunjamsa ancianonakajj Pablon ewjjtʼaparjam lurapjjaspa?

⁷ ¿Kunanaksa ancianonakajj yateqapjjaspa? Pablot yateqasisajja, ancianonakajj janiw utat utatak predicapjjañapäkiti, jan ukasti taqe horasanwa predicapjjañapa (Efesios 6:14, 15 liytʼäta). Alasir sarkasa jan ukajj trabajonkasipki ukhaw predicapjjaspa. Jan ukajj Tantachasiñ Uta lurañantï yanaptʼasipkchejja, uka  jakʼankir vecinonakampiru, aljañatak apanipki jupanakampiruw suma yatiyäwinak yatiyapjjaspa. Apóstol Pabljamarakiw predicacionan mayninakar wakichtʼañatakejj tiempo apstʼasipjjaspa, sañäni, siervo ministerialanakaruw wakichtʼapjjaspa.

8. ¿Awisajj kunsa mä ancianojj lurañapa?

⁸ Ancianonakajj janiw congregacionan lurañanakapampi, jan ukajj circuiton utjki uka lurañanakamp sinti ocupatäpjjañapäkiti. Ukhamäspa ukhajja, janiw predicañatakejj tiemponëjjapjjaspati. Taqe lurañanakapampi phoqañatak tiemponïñatakejja, awisajj yaqhep luräwinak jan katoqasipjjañapaw wakisini. Uka toqet orasjjasajja, inas jupanakajj mä asignación katoqasisajj kunanakatï jukʼamp importantëki ukanak apanukusipkatap amuyasipjjchispa. Sañäni, sapa semana Familiampi Bibliat Yatjjataña, predicaña, jan ukajj wawanakapar predicañ yatichañ apanukusipkatapwa amuyasipjjaspa. Yaqhepatakejj mä asignacionar janiw sañajj chʼamakiwa, ukampis ancianonakajj taqe lurañanakap wali amuyumpi phoqañ munapjjatap Jehová Diosajj amuyiwa.

9. Ancianonakajj wali ocupatäpkchisa, ¿kuna jan walinakansa uñjasipjje?

⁹ ¿Kunatsa chʼamakïspa? Niyakejjay qhepa urunakan jakstanjja, Jehová Diosan servirinakapajj kunayman jan walinakanwa uñjastanjja. Ukatwa taqenis chʼamañchtʼatäñsa, yanaptʼatäñsa, chuymachtʼatäñsa muntanjja. Awisasti yaqhepanakajj jan wali thakir jan saranukuñatakiw yanaptʼatäñ munapjje (1 Tes. 5:14). Cheqas ancianonakajj kuna jan walinakantï uñjasktan ukanak janiw chhaqtayañ puedipkaniti. Ukampis jilat kullakanakar chʼamañchtʼañataki, sum uñjañataki chʼamachasipjjaspa ukwa Jehová Diosajj muni. Niyakejjay ancianonakajj wali ocupatäpjjchejja, ¿kunjamsa jilat kullakanakar yanaptʼañatak tiempo apstʼasipjjaspa?

10. 1 Tesalonicenses 2:7 textorjamajja, ¿kunjamsa Pablojj jilat kullakanakar uñjäna?

¹⁰ ¿Kunanaksa apóstol Pablojj luräna? Apóstol Pablojj jilat kullakanakar kunjamats felicittʼapunirïnwa, chʼamañchtʼarakirïnwa. Ancianonakajj Pablot yateqasisarakiw jilat kullakanakar munasiñamp uñjapjje (1 Tesalonicenses 2:7 liytʼäta). Pablojja nayasa Jehová Diosas wal munasipjjsma sasaw jilat kullakanakar sirïna (2 Cor. 2:4; Efes. 2:4, 5). Amigonakaparjamaw uñjirïna, jupanakampïñatakis tiempo apstʼasirakirïnwa. Llakinakapatsa pantjasitanakapatsa, wali qhanwa jupanakar parläna, ukhamatwa jupanakar confiyatap uñachtʼayäna (2 Cor. 7:5; 1 Tim. 1:15). Problemanakapat sint llakisiñat sipansa, jilat kullakanakaruw yanaptʼäna.

11. ¿Kunatsa Pablojj cristiano jilat kullakanakar ewjjtʼirïna?

¹¹ Awisasti apóstol Pablojj cristiano jilat kullakanakar ewjjtʼañapaw wakisïna. Ukampis janiw colerap samarasiñatakejj ewjjtʼkänti, jan ukasti jupanakat llakisitapata, problemanakar  jan purtʼasipjjañapatak yanaptʼañ munatapatwa ewjjtʼäna. Ewjjtʼanakapajj fácil amuykayäñapatakiw chʼamachasirïna, ukarjam sarnaqapjjañapwa munarakirïna. Sañäni, Corinto markankir cristianonakar carta qellqkäna ukhajja, wali qhanwa ewjjtʼäna. Ukampis qhepatjja, kunjamsa cartap katoqasipjjäna uk yatiñatakejj Titoruw khitäna. ¡Ewjjtʼanakap katoqasipjjatap yatisajj walpun kusisïna! (2 Cor. 7:6, 7).

12. ¿Jilat kullakanakar chʼamañchtʼañatakejj kunsa ancianonakajj lurapjjañapa?

¹² ¿Kunanaksa ancianonakajj yateqapjjaspa? Pablot yateqasisaw ancianonakajj jilat kullakanakatak tiempo apstʼasipjjañapa. Ukatakejj janïräkipanwa tantachäwinakar puripjjaspa, ukhamat jilat kullakanakamp parltʼasin jupanakar chʼamañchtʼañataki. Awisajj mä jilataru jan ukajj mä kullakar chʼamañchtʼañatakisa, qhawqsa munastan uk uñachtʼayañatakis mä qhawqha minutonakakiw wakisispa (Rom. 1:12; Efes. 5:16). Pablot yateqasir ancianonakajja, Bibliampiw jilat kullakanakar chʼamañchtʼapjje. Qhawqsa Jehová Diosajj jupanakar munasi uksa sapjjaraki. Jupanakamp sapa kuti parltʼañatak chʼamachasisa, felicittʼañatak chʼamachasisaw jupanakar munasipjjatap uñachtʼayapjje. Mä ancianotï maynir ewjjtʼañapächi ukhajja, Bibliarjamapuniw ewjjtʼañapa. Niyakejjay mä jilatasa jan ukajj mä kullakas ewjjtʼaparjam luraspa uk munchejja, qhansa ewjjtʼkchinejja, munasiñampiw ewjjtʼañaparaki (Gál. 6:1).

13. ¿Pantjasitanakapajj kunjamsa mä ancianor uñjasiyaspa?

¹³ ¿Kunatsa chʼamakïspa? Niyakejjay taqenis pantjasirïstanjja, ancianonakajj pantjasirïpjjarakiwa (Rom. 3:23). Awisajj ancianonakajj pantjasitanakap wali amuyumpi uñjañatakiw chʼamachasipjjañapa. Yaqhepanakajja inas pantjasitanakap uñjasajj aynachtʼjjapjjchi. Yaqhepanakajja pantjasitanakapajj janis kunäkaspa ukham inas uñjapjjchispa, janis cambiapjjañapajj wakiskaspa ukham inas amuyapjjarakchispa.

14. Filipenses 4:13 textorjamajja, ¿kunjamsa llampʼu chuymanïñajj pantjasitanakapar saykatañatakejj apóstol Pablor yanaptʼäna?

¹⁴ ¿Kunanaksa apóstol Pablojj luräna? Pablojj humilde chuymanïnwa, ukatwa ‘janiw naya sapakejj pantjasitanakajarojj atipjkiristi’ sasin säna. Diosan chʼamapampikiw ukanak atipjaspäna, jupajj uk sum yatïna. Nayra tiemponjja, jan waltʼayañatakiw cristianonakar arknaqäna. Ukampis tiempompejj jan wal luraskatap amuyasisajj cambiañatakejj jankʼakïnwa (1 Tim. 1:12-16). Jehová Diosan yanaptʼapampejja, wali munasiri, sinttʼasiri,  humilde chuymani awatirëjjänwa. Jan wali luratanakapat amuyasisajj chuyma ustʼatas jikjjataskchïnjja, Jehová Diosajj perdonjjetuwa sasaw confiyäna, janirakiw pantjasitanakapat jukʼamp piensjjänti (Rom. 7:21-25). Janiw perfectökaspänti uk jupajj sum yatïna, ukatwa suma cristianöñatak chʼamachasïna, predicacionamp phoqañatakis humilde chuymampiw Jehová Diosamp yanaptʼayasïna (1 Cor. 9:27; Filipenses 4:13 liytʼäta).

15. ¿Kunjamsa mä ancianojj pantjasitanakap uñjañapa?

¹⁵ ¿Kunanaksa ancianonakajj yateqapjjaspa? Ancianonakajj janiw perfectöpjjatap laykojj ancianot uttʼayatäpkiti, ukampis Jehová Diosajj pantjasitanakapat amuyasipjjañapwa muni, suma cristianöñatak chʼamachasipjjañapwa munaraki (Efes. 4:23, 24). Kunjamäsipkis uk Biblian yanaptʼapampi amuykiptʼasisajj cambiapjjañaparakiwa. Ukhamtï lurapjjanejja, Jehová Diosajj kusisit jakasipjjañapataki, luräwinakap sum phoqapjjañapatakiw yanaptʼani (Sant. 1:25).

16. Ancianonakatï jilat kullakanakan pantjasitanakapak uñchʼukjjapjjaspa ukhajja, ¿kunas jupanakar pasaspa?

¹⁶ ¿Kunatsa chʼamakïspa? Walja tiempo jilat kullakanakamp chikachasisajja, jupanakan pantjasitanakapakwa ancianonakajj uñchʼukjjapjjaspa. Janitï ukat amuyasipkaspajja, colerjjapjjakispawa, jan munasiri, mayninakar kʼumiri ukhamäjjapjjaspawa. Supayajj ukpunwa muni sasaw Pablojj cristianonakar säna (2 Cor. 2:10, 11).

17. ¿Kunjamsa apóstol Pablojj jilat kullakanakar uñjirïna?

¹⁷ ¿Kunanaksa apóstol Pablojj luräna? Pablojj jilat kullakanakan suma luratanakap uñjañatakipuniw chʼamachasirïna. Jupanakan pantjasitanakap sum yatiskäna, ukasti awisas jupar jan waltʼayarakirïnwa. Ukhamäkchisa maynejj pantjaski ukajj janiw jan wali jaqëkaspas ukham sañ munkiti, uk Pablojj sum yatïna. Jilat kullakanakarojj munasiñampiw uñjirïna, kunja suma chuymanïpjjesa ukwa uñjarakirïna. Kunatï walïki uk lurañatak maynir chʼamachasiskir uñjasajja, suma chuymampiw luraski, mä jukʼa yanaptʼañakiw wakisi sasaw amuyirïna.

18. ¿Kunjamtï Pablojj Evodia ukat Síntique kullakanakar yanaptʼkäna ukat kunsa yateqsna? (Filipenses 4:1-3).

¹⁸ Pablojj kunjamsa Filipos congregacionankir pä kullakanakarojj yanaptʼäna uk jichhajj uñjañäni (Filipenses 4:1-3 liytʼäta). Amuyatajja, Evodia ukat Síntique kullakanakajj jan waltʼayasisajj yaqh yaqhaw sarnaqjjapjjäna. Ukampis Pablojj janiw jupanakar toqenoqkänti, ni jiskʼachkarakïnsa jan ukasti suma luräwinakapa, Diosat jan jitheqtas wali sum servipjjatapwa uñjäna. Qhawqsa Jehová Diosajj jupanakar munasïna uk jupajj yatïnwa. Niyakejjay jupanakarojj suma chuymamp uñjchïnjja, sumankthapipjjañapatakiw chʼamañchtʼäna. Jilat kullakanakar suma chuymamp uñjañaw kusisitakïskañatakisa, congregacionan amigonakanïskakiñatakis yanaptʼäna.

19. 1) ¿Jilat kullakanakar suma chuymamp uñjañatakejj kunsa ancianonakajj lurapjjañapa? 2) ¿Foton uñjaski uka Tantachasiñ Uta qʼomachaskir ancianot kunsa yateqta?

 ¹⁹ ¿Kunanaksa ancianonakajj yateqapjjaspa? Anciano jilatanaka, jilat kullakanakajj kunja suma chuymanïpjjesa uk uñjapjjam. Jupanakajj pantjasirïpkchisa, suma luratanakapajj utjapuniwa (Filip. 2:3). Awisajj maynir cheqañchapjjañamaw wakisini, yaqhepajja arunakapampi jan ukajj luratanakapampiw mayninakar chuym ustʼayapjjaspa. Ukhaman uñjasisajja, Pablot yateqasisaw suma luratanakap uñjañatak chʼamachasipjjañama. Uka jilatasa jan ukajj uka kullakasa, Jehová Diosarojj wal munasi, aguantasaw serviskaraki, cambiarakispawa, uk uñjapjjañamawa. Jilat kullakanakar suma chuymamp uñjapki uka ancianonakajja, congregacionan munasiñ utjañapatakiw yanaptʼapjje.

20. ¿Apóstol Pablot yateqaskakiñatakejj kunsa ancianonakajj lurapjjaspa?

²⁰ Apóstol Pablot yateqaskakiñajj ancianonakarojj wal yanaptʼaspa. Ukatakejj Índice de las publicaciones Watch Tower ukanwa “Pablo” siski uk thaqtapjjaspa, ukatjja “ejemplo para los ancianos” siski ukwa thaqtapjjarakispa. Uka yatichäwinakat mä qhawqha yatjjatasajja, akham sasaw jisktʼasipjjaspa: “¿Kunjamsa Pablot yateqasiñajj luräwinakajampi kusisit phoqaskakiñatakejj yanaptʼitu?” sasa.

21. ¿Kunatsa ancianonakajj jan payachasipjjañapäki?

²¹ Anciano jilatanaka, Jehová Diosajj janiw perfectöpjjañam suykiti, jan ukasti jupat jan jitheqtasa servipjjasma ukwa muni, uk janipun armasipjjamti (1 Cor. 4:2). Diosajj Pablon taqe luratanakapsa jupat jan jitheqtatapsa wali valoranitwa uñjäna. Ukhamajj janipun akat payachasipjjamti, Jehová Diosajj luratanakam wali valoranitwa uñjaraki, kunjamtï Hebreos 6:10 textojj siskejja, “jupajj janiw luratanakamatsa ni sutipar munasipjjatamatsa armaskiti, ukanakjja santo jilatanakar jichhakam servisaw uñachtʼayapjjtajja”.