1. Janïr Bibliat yatjjatkayätan ukhajja, ¿kunjamänsa jakäwisajja?

 JEHOVÁ DIOSAN Testigonakapampi janïr Bibliat yatjjatkayäta ukhajja, ¿kunjamänsa jakäwimajja? Waljanejj janiw uka tiempot amtañsa munapkiti. Kunatï walïki jan walïkaraki uka toqetjja, akapachankir jaqenakajj janiw cheqaparjam amuyapkiti, inas jiwasajj jupanakjam amuychiyätan, sarnaqarakchiyätan. Jiwasatï ukhaman uñjaschiyätan ukhajja, jan kuna suytʼañani, “Diosar jan uñtʼasa” ukhamaw jakapjjayätanjja (Efes. 2:12). Ukampis Bibliat yatjjatañaw nayra jakäwis cambiañatakejj yanaptʼawayistu.

2. ¿Bibliat yatjjatkasajj kunanaksa yateqawayta?

² Bibliat yatjjatkasajja, alajjpachankir Awkisajj qhawqsa jumar munastam ukwa yatjjatawaytajja. Ukatjja Jehová Diosar kusisiyañatakisa, jupar servipki uka familiap taypir mantañatakisa, jakäwimana ukhamarak amuyuman cambionak lurañ wakisitapwa amuyarakpachätajja. Diosan leyinakapar respetañsa yateqarakpachätawa (Efes. 5:3-5).

3. 1) Colosenses 3:9, 10 textorjamajja, ¿Jehová Diosajj kun lurañassa muni? 2) ¿Kunatakis aka yatichäwejj yanaptʼistani?

³ Niyakejjay Jehová Diosajj Luririsächejja, alajjpachankir Awkisarakïchejja familiapankirinakajj kunjamsa sarnaqapjjañapa uk amtañatakejj derechoniwa. Bautisasiñ munapki ukanakarojj akham sarakiwa: “Nayrajj kunjam jaqëpjjayätas ukanaksa jan wali luräwinakapsa isïkaspas ukham apsusipjjam” sasa * (Colosenses 3:9, 10 liytʼäta). ¿Jumajj bautisasiñti amtaskta? Aka yatichäwejja, aka kimsa jisktʼanakar qhanañchañatakiw yanaptʼätam: ¿‘nayrajj kunjam jaqëpjjayätansa’ ukajj kamsañsa muni?  ¿Kunatsa Jehová Diosajj uk isïkaspas ukham apsusiñas munpacha? ¿Kunjamsa uk lursna? Jiwasatï bautisatäjjstanjja, ‘nayrajj kunjam jaqëpjjayätansa’ ukanakajj wasitat jakäwisan jan uñstañapatakiw aka yatichäwejj yanaptʼistani.

4. ¿‘Nayrajj kunjam jaqënsa’ ukanakamp apnaqayasir jaqejj kunanaksa luri?

⁴ ‘Nayrajj kunjam jaqënsa’ ukamp apnaqayasir jaqejja, jañchin munañaparjamaw kuns amti, luraraki. Jankʼak colerasiri, jupa pachpatak llakisiri, jan yuspärasiri, jachʼa jachʼa tukuri ukhamäspawa. Inas pornografía, qʼañu juchanak luririnaka, jan ukajj nuwasirinakajj utjki uka peliculanak uñchʼukiñajj gustchi. Inas jupajj suma jaqëskchi, jan wal luratapatsa jan wal parlatapatsa llakisirakchi, ukampis jan wali amuyunakapa jan wali luräwinakap cambiañatakejj janiw chʼamachaskiti (Gál. 5:19-21; 2 Tim. 3:2-5).

5. ¿Nayrajj kunjam jaqëyätansa uk taqpachpun apanuksnati? (Hechos 3:19).

⁵ Niyakejjay pantjasir jaqëstanjja, janiw khitis pʼeqepatsa chuymapatsa taqpach jan wali amuyunaksa jan wali munañanaks apanukkaspati. Awisajja kun luratasatsa kun arsutasatsa arrepentisiñäniwa (Jer. 17:9; Sant. 3:2). Ukampis nayrajj kunjam jaqëyätansa ukanak isïkaspas ukham apsustan ukhajja, jañchin munañanakapasa luräwinakapas janiw apnaqjjestuti, janirakiw jañchin munañaparjam sarnaqerit uñtʼatäjjtanti (Is. 55:7; Hechos 3:19 liytʼäta).

6. ¿Kunatsa Jehová Diosajj jan wali amuyunaksa jan wali luräwinaks apanukupjjam sasin sistu?

⁶ Jehová Diosajj wal munasistu, sum jakasiñaswa munaraki, ukatwa jan wali amuyunaksa jan wali luräwinaks apanukupjjam sasin sistu (Is. 48:17, 18). Jehová Diosajj ak yatiwa: jiwasatï jan wali munañanakamp apayasiñäni ukhajja, jiwas pachpaw jan waltʼayastanjja, mayninakarus jan waltʼayaraktanwa. Ukanak uñjasajja, Diosajj wal chuym ustʼayasi.

7. Romanos 12:1, 2 textorjamajja, ¿kuna amtarus puriñasa?

⁷ Nayrajj kunjam jaqëyätansa ukanak apanukuñatak chʼamachasitasatjja, inas yaqhep familiaranakasasa jan ukajj amigonakasas jiwasat burlasipjjchini (1 Ped. 4:3, 4). Kunjam jakañtï munktan ukham jakañatakejj derechonïtanwa,  janiw khitis kuns siskistaspati sasin inas sapjjchini. Ukampis Jehová Diosan leyinakaparjam jan sarnaqañ munapki ukanakajja, janiw cheqpachapun libre jakasipkiti, jan ukasti Supayan apnaqata akapachankir jaqenakat yateqasisaw sarnaqapjje (Romanos 12:1, 2 liytʼäta). Taqeniw mä amtar puriñasa: ¿nayrajj kunjam jaqëyätansa ukhamäskakiñäniti?, ukajj juchan kawsapata Supayan apnaqat aka mundon kawsapatwa utji, ¿jan ukajj aka tiempon suma jaqëñatakejj Jehová Diosampich cambiañatakejj yanaptʼayasiñäni? (Is. 64:8).

8. Jan wali amuyunaka jan wali luräwinak apanukuñatakejj ¿kunanakas yanaptʼistaspa?

⁸ Jan wali amuyunaka jan wali luräwinak apanukuñatakejj tiempow munasi, chʼamachasiñasarakiwa, uk Jehová Diosajj yatiwa (Sal. 103:13, 14). Ukampis Diosajja, Arup toqe, espíritu santop toqe, markap toqew cambiañasatakejj yatiñanïñsa, chʼamsa, yanapsa churistu. Inas jumajj kunjamsa Jehová Diosajj yanaptʼawaytam ukanak uñjawayjjsta. Nayrajj kunjam jaqëyätansa ukanak apanukuskakiñatakisa, bautisasiñatak Biblian mayitanakap phoqañatakis kunanaksa lurañasa ukanak jichhajj yatjjatañäni.

9. ¿Kunatakis Diosan Arupajj yanaptʼiristam?

⁹ Kunjamäsktasa uk uñakiptʼasiñatakejj Bibliaw yanaptʼiristam. Diosan Arupajj espejor uñtatawa, ukhamajj kunanaksa lupʼiskta, kunanaksa parlaskta, luraskarakta ukanak uñakiptʼasiñamatakiw yanaptʼiristam (Sant. 1:22-25). Bibliat yatichirimampi experienciani yaqha jilat kullakanakampiw yanaptʼapjjeristam. Jupanakajj Bibliampiw kunanaksa sum luraskta, kunanakansa chʼamachasiñama ukanak amuytʼasiñamatak yanaptʼapjjätam. Jan wali luräwinak apanukuñamatakejj Biblian yatichäwinakap thaqañwa yatichapjjarakïtam. Diosajj jumar yanaptʼañatakejj jankʼakiwa. Niyakejjay jupajj chuymam yatchejja, jupakiw sum yanaptʼiristam (Prov. 14:10; 15:11). Ukhamajj orasipunim, Bibliats sapüru yatjjatarakim.

10. ¿Kunsa Elie sat chachan experienciapat yateqtanjja?

¹⁰ Jehová Diosan leyinakapat sipans jukʼamp sumajj janiw utjkiti, jan ukat payachasimti. Kuntï Jehová Diosajj siskistu ukajj jiwasan askisatakiwa. Jupan leyinakaparjam sarnaqerinakajja, jukʼamp valoranitwa uñjasipjje, mä amtampiw jakasipjje, kusisitäpjjarakiwa (Sal. 19:7-11). Ukampis Diosan leyinakaparjam jan sarnaqerinakajja, jañchin munañanakapamp apayasisajj jan walinakanwa uñjasipjje. Diosan leyinakaparjam jan sarnaqasajj kuna jan walinsa maynejj uñjasispa uka toqet Elie sat chachajj kamsisa uk uñjapjjañäni. Jupan awk taykapajj Diosar munasipkchïnsa, waynitükäna ukhajj jan wali amigonakampiw chikachasjjäna. Droganakampiw qolljasïna, qʼañu juchanakanwa sarnaqjjäna, lunthatasjjarakïnwa. Jukʼamp jukʼamp qhoru jaqëjjänwa, wali nuwasirëjjarakïnwa. Jupajj akham siwa: “Kunanaktï mä cristianojj jan lurañapäki ukanakwa lurjjayäta” sasa. Ukampis kunanaktï wawäkäna ukhajj awk taykapajj yatichapkäna ukanak janiw armaskänti, ukatwa Bibliat wasitat yateqañ qalltjjäna. Jan wali luräwinakap jaytjjañatak chʼamachasisajj 2000 maranwa bautisasjjäna. ¿Jehová Diosan leyinakaparjam sarnaqañajj kunjamsa yanaptʼawayi? Jupajj akham saskakiwa: “Jichhajj janiw llakitäjjtti concienciajas qʼomakëjjewa” sasa. * Kunjamtï Elie chachan experienciapajj uñachtʼaykejja, Jehová Diosan leyinakaparjam jan sarnaqerinakajj jupanak pachpaw jan waltʼayasipjje, ukampis Diosajja cambiapjjañapatak yanaptʼañatakejj jankʼakiwa.

11. ¿Kunanaksa Jehová Diosajj uñisi?

 ¹¹ Kuntï Jehová Diosajj uñiski uk uñisiñ yateqam (Sal. 97:10). Jehová Diosajj ‘jachʼa jachʼa tukuñsa, kʼarisiñsa, jan juchan jaqer jiwayañsa’ uñisiwa sasaw Bibliajj qhanañchi (Prov. 6:16, 17). Ukatjja “wila wartir jaqetsa engañjir jaqetsa ajjtasiwa” (Sal. 5:6). Jehová Diosajj ukham amuyunakatsa luräwinakats walpun ajjtasi, ukatwa Noé chachan tiempopan jakapkäna taqe uka jan wali jaqenakar qʼal tukjäna, kuna laykutejj kunayman jan wali luräwinakampiw oraq phoqantapjjäna (Gén. 6:13). ¿Kunsa Jehová Diosajj uñisiraki? Khititï divorciasiñataki jan juchan esposaparu jan ukajj esposopar engañjki uk uñisiwa, ukwa Malaquías profeta toqejj säna. Ukham luririnakajj juparus adorapkchejja, Diosajj janiw katoqaskiti, ukham lurapjjatapat jupanakar cuenta mayirakini (Mal. 2:13-16; Heb. 13:4).

12. ¿Kunatï jan walïki uk uñisiñajj kamsañsa muni?

¹² Jehová Diosajj “kunatï jan walïki ukjja uñisipjjam” sasaw sistu (Rom. 12:9). Uñisiña siski uka arojja, mä kun uñjasin ajjtasktan ukwa amuytʼayistu. Uñisiña arojja chuymatpach mä kun uñisiña, ajjtasiña sañwa munarakispa. Akham amuytʼañäni: ¿tʼamantat manqʼa churapjjestaspa ukhajj kamachsnasa? Uk uñjasakiw puraks usuyasjjsna. Kunanakatï Diosatakejj jan walïki ukanak ukhamwa uñisiñasaraki.

13. ¿Kunanaksa lupʼisktan uka toqet kunatsa wal amuyasiñasa?

¹³ Kunanaktï lupʼiskta ukanakat amuyasim. Cheqas kunanaktï lupʼktan ukarakwa lurtanjja, ukatwa Jesusajj kuna amuyunakatï jachʼa juchar purtʼasiykistaspa ukanak apanukupjjam sasin yatichäna (Mat. 5:21, 22, 28, 29). Niyakejjay alajjpachankir Awkisar kusisiyañ munstanjja, jan wali amuyunak jankʼakiw apanukuñasa.

14. ¿Kunas parlatasan qhan amuyasi, kunanaksa jisktʼasiñasaraki?

¹⁴ Kunanaksa parlaskta uka toqet amuyasim. Jesusajj akham sänwa: “Lakat mistki ukajj chuymatwa juti” sasa (Mat. 15:18). Chuyma manqhasan kunjamätansa ukajja, parlatasanwa qhan amuyasi. Akham jisktʼasim: “¿Jan walinakan uñjasisajj kunatï cheqäki ukti parltjja? Nayatï casaratästjja, ¿mayninakamp parlkasajj formaläñatak chʼamachastti? ¿Qʼañu juchanakat jan parlañatakejj chʼamachastti? ¿Maynejj colertʼaykitu ukhajj pacienciampit jaystjja?” sasa. Uka jisktʼanakat lupʼiñatak tiempo apstʼasim. Parlatamajj mä isin botonanakapampi sasispawa, jumatï desbotonasïta ukhajja, isi apsusiñajj facilakïniwa. Jumatï mayninakar  jiskʼachañanaka, kʼarisiñanaka, qʼañu juchanakat parlañanak apanuküta ukhajja, ukhamarakiw nayrajj kunjam jaqëyätasa uk apanukuñajj jan chʼamäkaniti.

15. ¿Nayrajj kunjam jaqëyätansa uk lawar chʼakkatañatakejj kunsa lurañasa?

¹⁵ Kuntï lurañ amtkta uk jan payachasis luram. Cambionak lurañajj kunatsa wali wakiskiri uk amuytʼasiñasatakejja, apóstol Pablojj wali musparkañ uñachtʼäwitwa parläna. Nayrajj kunjam jaqëyätansa uk lawar chʼakkatapjjam sasaw säna (Rom. 6:6). Jesusajj Jehová Diosaruw kusisiyañ munäna, ukatwa lawar chʼakkatayasiñatakejj dispuestokïna. Jiwasampejj ukhamarakiwa, Diosarutï kusisiyañ munstan ukhajja, jupajj uñiski uka jan wali amuyunaka, jan wali luräwinak apanukuñatakejj dispuestokïñasawa. Ukham lurañäni ukhajj qʼoma conciencianïñäniwa, wiñayatak jakasiñsa taqe chuymaw suytʼarakiñäni (Juan 17:3; 1 Ped. 3:21). Ak amtapjjapuniñäni, Jehová Diosajj janiw jiwasar kusisiyañatakejj leyinakap cambykaniti. Jan ukasti, jiwasaw leyinakaparjam sarnaqañatakejj cambiañasa (Is. 1:16-18; 55:9).

16. ¿Kunatsa jan walinak apanukuñatakejj chʼamachasiskakiñama?

¹⁶ Jan walinak apanukuñatakejj chʼamachasiskakim. Bautisasjjäta uka qhepatsa, jan wali amuyunak apanukuñatak chʼamachasiñamajj wakisiskakiniwa. Maurício jilatat parltʼañäni, juparojj waynitutpachaw chachanakamp sarnaqañajj (homosexual) gustäna. Tiempompejj Jehová Diosan Testigonakaparuw uñtʼäna ukat Bibliat yateqañwa qalltarakïna. Cambiasajj 2002 maranwa bautisasïna. Diosar walja maranakas sirvjjchejja, jupajj akham siwa: “Jan wali amuyunak apanukuñatakejj awisajj wal chʼamachasiñajawa” sasa. Ukhamäkchisa janiw aynachtʼkiti, jupajj akham saskakiwa: “Nayatï uka jan wali amuyunak pʼeqejar jutipan jan ukanak lurkä ukhajja, Jehová Diosajj nayat kusisiniwa, uk yatiñaw chuymachtʼitu” sasa. *

17. ¿Nabiha sat warmin experienciapat kunas chʼamañchtʼtam?

¹⁷ Jehová Diosar yanaptʼa mayim, espíritu santomp yanaptʼayasim, jan chʼamamarojj confiyasimti (Gál. 5:22; Filip. 4:6). Nayrajj kunjam jaqëyätasa uk apanukuñatakisa, jan mayamp ukar kuttʼañatakis wal chʼamachasiñamawa. Nabiha sat warmimpejj kunas pasäna ukat  parltʼañäni. Sojjta maranikïskäna ukhaw awkipajj jupar jaytanuküna, jupajj akham siwa: “Tatajan nayar apanukutapatjja walpun llakisiyäta” sasa. Jilsjjasajja mä kunats ratuk colertʼasiri ukhamäjjänwa. Droganak apnaqañaruw mitisjjäna, ukatwa walja maranak carcelar llawintapjjäna. Ukatjja carcelar visitapkäna uka Testigonakaw Bibliat yatichapjjäna, ukaw cambiañatakejj yanaptʼäna, jupajj akham sarakiwa: “Yaqhep vicionak facilak jaytanukuyäta. [...] Ukampis cigarro fumañ janiw jaytañ puedkayätti” sasa. Cigarro fumañ jaytañatakejj mara jila chʼamachasisajj jaytjjänwa. Kunas jaytañatakejj yanaptʼäna uka toqet jupajj akham siwa: “Jehová Diosar sapa kuti orasiñaw yanaptʼawayitu” sasa. Jupajj akham saskakiwa: “Nayatï Jehová Diosar kusisiyañatak cambiawaystjja, taqeniw cambiapjjarakispa” sasa. *

18. 1 Corintios 6:9-11 textorjamajja, ¿kunsa Diosan servirinakapat waljanejj lurawayapjje?

¹⁸ Nayrïr patak maranakanjja, Jehová Diosajj Cristomp chik apnaqapjjañapatak ajllkäna uka yaqhep chachanakas warminakasa, nayrajj jan walinakwa lurapjjäna. Yaqhepajj adulterio jucha luririnaka, chachapura jan ukajj warmipura ikintasirinaka, lunthatanaka ukhamäpjjänwa. Ukampis espíritu santon yanaptʼapampejj cambiapjjänwa (1 Corintios 6:9-11 liytʼäta). Jichhürunakanjja, ukhamarakiw Bibliajj cambiapjjañapatak waljanir yanaptʼawayi. * Wali yatintatäpkäna uka jan wali luräwinakwa apanukuwayapjje. Niyakejjay jupanakajj cambiapjjchejja, jumas jan walinak apanukurakismawa, ukhamat bautisasiñatak Biblian mayitanakap phoqañataki.

19. ¿Kunanakatsa akjjar jutki uka yatichäwin yatjjataskañäni?

¹⁹ Khitinakatï bautisasiñ munapki ukanakajja, janiw nayrajj kunjam jaqëpkäntï uk apanukuñatakik chʼamachasipjjañapäkiti, jan ukasti machaq jaqëñamp isthapisiñatak chʼamachasipjjañaparakiwa. Akjjar jutkani uka yatichäwinjja, kunjamsa machaq jaqëñamp isthapissna, kunjamsa mayninakajj yanaptʼapjjarakistaspa ukanakatwa yatjjataskañäni.