Politiconakar uñisiñasa jupanakar jan walinak lurañas aka oraqpachanwa wal uñjasi.

•   México markanjja, 2023 al 2024 maran utjkäna uka eleccionan 39 candidatonakaruw jiwarayasiwayi, janiw kunapachas ukajj uñjasiwaykiti, kunayman jan walinakaw uka eleccionan uñjasiwayaraki.

•   Europa toqenjja, ukhamarakiw jaqenakajj politiconakar kunayman jan walinak lurawayapjje, sañäni, 15 de mayo de 2024 maranjja primer ministro de Eslovaquia ukaruw niyapun jiwayapjjäna.

•   Estados Unidos markanjja, 13 de julio de 2024 marajj niyapuniw Donald Trump sat expresidenterojj jiwayapjjäna, jaqenakajj uk istʼasajj wal sustjasipjjäna.

 ¿Kunatsa uka jan walinakajj utji? ¿Ukanakajj tukusjjpachäniti? ¿Bibliajj uka toqet kamsisa?

 Bibliarjamajja, jichhürunakan ‘qhepa urunakanwa’ jakasktanjja, uka tiempon jakir jaqenakajj jan kuna acuerdorus mantañ munirinaka, qhorunaka ukhamäpjjañapänwa.

•   “Qhepa urunakanjja chʼama tukuña jan wali tiemponakaw utjani. Jaqenakajj akhamäpjjaniwa: jupanak pachpa munasirinaka, [...] jan yuspärasirinaka, jaqe masipar jaytanukurinaka, [...] jan kuna acuerdorus mantañ munirinaka, [...] qhorunaka, [...] traicioneronaka, jan amuytʼañ munirinaka, jachʼañchasirinaka” (2 Timoteo 3:1-4).

 Gobiernonak contra saytʼasiñasa política toqet jan waltʼäwinakas qhepa urunakan aka oraqpachanwa utjani sasaw Bibliajj sarakïna (Lucas 21:9, nota). Ukampis uñisisiñanakasa política toqet jan waltʼayasiñanakas janiw wiñayatakïkaniti.

 Diosajja, jaqenakan apnaqata gobiernonak lantejj alajjpachankir mä gobierno uttʼayani sasaw Bibliajj yatichi.

•   “Alajjpachankir Diosajj yaqha reino uttʼayarakini [...]. Uka reinow taqe uka reinonakarojj tʼunjani, chhaqtayani, uka reinokiw wiñayatak utjarakini” (Daniel 2:44).

 Diosan Reinopajj aka oraqpachan cheqpach sumankañampi mayachtʼat jakasiñamp utjayani.

•   Uka Reinon Jesucristo sat gobernanteparojja, “Sumankañan Principepa” sasaw uñtʼasiraki. Jupaw wiñayataki sumankañ utjayani (Isaías 9:6, 7).

•   Jichhürunakansa, Diosan Reinopar apoyirinakajj jupanakpura sum apasiñatakiw yateqasipki. Bibliajj jupanakat akham siwa: “Espadanakap aradon rejanakaparuw tukuyapjjani, lanzanakapjja jusinakaruw tukuyapjjarakini. Markanakajja janiw yaqha markanak contrajj espada aytjjapjjaniti, janirakiw jukʼampejj guerran nuwasiñatak yateqjjapjjaniti” sasa (Isaías 2:3, 4).

 Jukʼamp yatiñatakejja, “¿Kunanaksa Diosan Reinopajj lurani?” sat yatichäwi liytʼam, ¿Kunas Diosan Reinopajja? sat video uñtarakim.