1 DE JULIO DE 2021
BOLIVIA
Machaq Mundon Jakirinakataki Bibliaw aymar arut presentasiwayi
27 de junio de 2021 maranjja, Machaq Mundon Jakirinakataki Bibliaw aymar arut presentasiwayi, taqenis celulararu jan ukajj tabletaruw uka Biblia apaqapjjäna. Uka urutaki grabat discursonakjja Bolivia markankir taqpach congregacionanakampi gruponakampiw istʼapjjäna. Nelvo Cavalieri jilataw Biblia presentawayi, jupajj Comité de Sucursal de Bolivia ukanwa serviski.
¿Khitinakarus aka Bibliajj yanaptʼani?
Aymar aru parlir jaqenakajja 1,6 millonatsa jukʼampïpjjewa. Jupanakat jilapartejja Titicaca qota toqenakanwa jakasipjje, uka qotajja cordillera de los Andes uksa toqenkiwa
Bolivia markanjja 36 indígena arunakaw utji, Bolivia markan jilaparte parlaski uka indígena arunakatjja aymar arojj payïriwa
Diosan arunakap yatiyirinakajja mä 2.000 ukhanïpjjewa, jupanakajj 60 jila congregacionanakanwa servisipki. Aymar congregacionanakajj Argentina, Bolivia, Brasil, Chile, Perú uka markanakanwa utji
Aka Biblia traduciñ tukuyañatakejja, 6 traductoranakaw trabajiwayapjje, 4 maranwa tuktʼayapjjaraki
Traductoranakat maynïrejj akham sänwa: “Aka Bibliajja aymar parlir jaqenakatakejj Jehová Diosan mä jachʼa regalopuniwa. Kunjamtï aymaranakajj parlasipki ukham lurtʼatawa, aka Biblia liytʼasinjja aymaranakajj wali sumwa entiendipjjani. Jehová Diosan arunakapajj jaqenakan chuymaparuw purtʼani” sasa.
Comité de Sucursal de Bolivia ukankir Mauricio Handal jilatajj akham sasaw qhanañcharakïna: “2017 maran Griego Arut Qellqatanakajj aymar arut presentaskäna ukhat jichhakamajja, walja jilat kullakanakaw uka Bibliat yuspärapjjäna, uka Bibliajj jaqenakan chuymaparuw purtʼawayi sasaw yuspärapjjäna. Jichhajj Bibliajj phoqatpachaw utj-jjestu, wali qhana, kunjamtï jaqenakajj parlasipki ukham traducitarakiwa. Biblia liytʼirinakajja kuntï Bibliajj yatichki uk wali sumwa amuytʼapjjani, jukʼampis Biblia churkistu uka Jehová Diosar jakʼachasipjjañapatakiw aka Bibliajj jaqenakar yanaptʼani, uka toqet janiw pächasipkti” sasa.
Aka Bibliajja, aymar aru parlir jilat kullakanakarojj Salmo qellqerjam chuymatpach akham sas arstʼasipjjañapatakiw yanaptʼani: “Juman salvatäñwa nayajj wal munta, kuna laykutejj juman arumajj mä suytʼäwi churitu” (Salmo 119:81).