1. Әллинҹи ҝүн бајрамындакы аб-һаваны тәсвир ет.

 ЈЕРУСӘЛИМИН күчәләриндә ҹанланма вар a. Мәбәдин гурбанҝаһындан түстү галхдыгҹа лавилиләр антифон шәклиндә, јәни нөвбә илә Һаллел (113—118 мәзмурлар) охујур. Күчәләр бајрама ҝәлән гонагларла долудур. Онлар Елам, Месопотамија, Каппадокија, Понт, Мисир вә Рома кими узаг јерләрдән ҝәлмишләр b. Ҝөрәсән бу гәдәр ҹамаат нәјә ҝөрә ҝәлиб? Әллинҹи ҝүн бајрамыны, башга сөзлә, нүбар ҝүнүнү гејд етмәјә (Сај. 28:26). Бајрам арпа јығымынын сона чатдығыны, буғда јығымынын исә башландығыны билдирир. Бу, севинҹли бир ҝүндүр.

2. Ерамызын 33-ҹү илиндә һансы һејрәтамиз һадисә баш верир?

² Ерамызын 33-ҹү илинин мүлајим јаз сәһәри, тәхминән саат доггуз радәләриндә әсрләр бојунҹа инсанлары һејрәтә ҝәтирәҹәк бир һадисә баш верир. Гәфләтән ҝөјдән «шиддәтли күләјин сәсинә охшар бир сәс» ҝәлир (Һәв. 2:2). Сәс Исанын тәхминән 120 шаҝирдинин топлашдығы јерә долур. Сонра гәрибә бир шеј баш верир. Аловун дилләринә бәнзәр бир шеј ҝөрүнүр вә бир-бир шаҝирдләрин үзәринә гонур c. Бундан сонра шаҝирдләр мүгәддәс руһла долур вә мүхтәлиф дилләрдә данышмаға башлајырлар! Онлар шәһәрә чыханда Јерусәлимин күчәләриндәки гонаглар һејрәтә ҝәлирләр: шаҝирдләр онларла сәрбәст данышырлар! Инанылмаздыр, һәр кәс шаҝирдләрин онларын доғма дилләриндә данышдығыны ешидир (Һәв. 2:1—6).

3. а) Нәјә ҝөрә ерамызын 33-ҹү илиндә кечирилән Әллинҹи ҝүн бајрамыны һәгиги ибадәтин тарихиндә дөнүш нөгтәси адландырмаг олар? б) Бутрусун нитги илә Падшаһлығын ачарларындан истифадә едилмәси арасында һансы әлагә вар?

³ Бу валеһедиҹи мәлуматда һәгиги ибадәтин тарихиндә баш верән мүһүм бир һадисә — руһани Исраилин, мәсһ олунмуш мәсиһи јығынҹағынын тәсис олунмасы тәсвир олунур (Гал. 6:16). Амма бу, һәлә һарасыдыр? Һәмин ҝүн Бутрус издиһама мүраҹиәт едәркән Падшаһлығын үч ачарындан биринҹисини истифадә етди. Бу ачарлардан һәр бири мүхтәлиф груп инсанлар  үчүн хүсуси немәтләр алмаг имканы ачаҹагды (Мәт. 16:18, 19). Биринҹи ачар јәһудиләрә вә прозелитләрә хош хәбәри гәбул етмәјә вә Аллаһын мүгәддәс руһу илә мәсһ олунмаға имкан ачды d. Бунун сајәсиндә онлар руһани Исраилин үзвү олаҹаг вә онларын Аллаһын Падшаһлығында падшаһ вә каһин кими идарә етмәк үмиди олаҹагды (Вәһј 5:9, 10). Вахт кечдикҹә сәмәријјәлиләр вә башга халглардан олан адамлар да бу хејир-дуаны алаҹагдылар. Мүасир мәсиһиләр ерамызын 33-ҹү илинин Әллинҹи ҝүн бајрамында баш верән мүһүм һадисәләрдән нә өјрәнә биләрләр?

4. Мүасир мәсиһи јығынҹағы илә ерамызын 33-ҹү илиндә тәсис олунан јығынҹаг арасында һансы әлагә вар?

⁴ Мәсиһи јығынҹағынын илк үзвләри јухары отагда бир јерә топлашан вә мүгәддәс руһла мәсһ олунан тәхминән 120 шаҝирд олду (Һәв. 2:1). Һәмин ҝүнүн сонуна јахын минләрлә инсан вәфтиз олараг бу јығынҹаға гошулду. Бу исә бизим ҝүнләрдә дә бөјүмәјә давам едән тәшкилатын инкишафынын садәҹә башланғыҹы иди! Бәли, бу дөврүн сону ҝәлмәздән әввәл «Падшаһлыг һаггындакы бу мүждә халгларын һамысына шәһадәт олсун дејә бүтүн јер үзүндә» Аллаһдан горхан киши вә гадынлардан ибарәт иҹма, мүасир мәсиһи јығынҹағы тәблиғ едир (Мәт. 24:14).

5. Мәсиһи јығынҹағы илә үнсијјәтин һәм биринҹи әсрдә, һәм дә мүасир дөврдә һансы фајданы ҝәтирдијини изаһ ет.

⁵ Бундан савајы, мәсиһи јығынҹағы өз үзвләри, әввәлҹә мәсһ олунмушлар, сонралар исә «башга [гојунлар]» үчүн руһани ҝүҹ мәнбәји олмалы иди (Јәһ. 10:16). Булус јығынҹағын үзвләринин бир-биринә дәстәк олмасыны чох гијмәтләндирдијини  ҝөстәрәрәк Ромадакы мәсиһиләрә јазмышды: «Сизинлә ҝөрүшмәји үрәкдән арзулајырам вә мәтин олмағыныз үчүн сизә руһани әнам бәхш етмәк истәјирәм. Даһа доғрусу, истәјирәм ки, һамымыз: мән дә, сиз дә бир-биримизин иманы васитәсилә бир-биримизи руһландыраг» (Ром. 1:11, 12).

6, 7. Мүасир мәсиһи јығынҹағы Исанын бүтүн халглара тәблиғ етмәк тапшырығыны неҹә јеринә јетирир?

⁶ Биринҹи әсрдә олдуғу кими, мүасир дөврдә дә мәсиһи јығынҹағы ејни мәгсәдләрә хидмәт едир. Иса шаҝирдләринә чәтин, ејни заманда чох мараглы бир тапшырыг вермишди. О демишди: «Ҝедин вә бүтүн халгларын ичиндә шаҝирд һазырлајын, онлары Ата, Оғул вә мүгәддәс руһ ады илә вәфтиз един, сизә әмр етдијим һәр шејә риајәт етмәји онлара өјрәдин» (Мәт. 28:19, 20).

⁷ Һәмин иш бу ҝүн Јеһованын Шаһидләринин мәсиһи јығынҹағы тәрәфиндән һәјата кечирилир. Дүздүр, мүхтәлиф дилләрдә данышан инсанлара тәблиғ етмәк елә дә асан дејил. Буна ҝөрә дә Јеһованын Шаһидләри тәрәфиндән 1000-дән чох дилдә Мүгәддәс Китаба әсасланан әдәбијјатлар нәшр олунур. Әҝәр мүнтәзәм олараг мәсиһи ҝөрүшләриндә, Падшаһлығын тәблиғи вә шаҝирд һазырламаг ишиндә иштирак едирсәнсә, онда севинмәјә там әсасын вар. Белә ки, сән Јеһованын адына әсаслы сурәтдә шаһидлик вермәк шәрәфинә лајиг ҝөрүлмүш вә јерин әһалиси илә мүгајисәдә сајы аз олан инсанларын сырасындасан!

8. Јығынҹаг ҝөрүшләриндән һансы фајданы әлдә едирик?

⁸ Бу чәтин зәманәдә проблемләрә севинҹлә таб ҝәтирмәк үчүн Јеһова Аллаһ бизә үмумдүнја гардашлыг бәхш едиб. Булус ибрани мәсиһиләрә јазмышды: «Ҝәлин бир-биримизә гаршы диггәтли олуб бир-биримизи мәһәббәтә вә јахшы ишләрә тәшвиг едәк, бәзиләринин вәрдиш етдији кими, јығынҹагларымыздан галмајаг, бир-биримизи руһландыраг вә о ҝүнүн јахынлашдығыны ҝөрдүкҹә бунлары даһа чох едәк» (Ибр. 10:24, 25). Мәсиһи јығынҹағы Јеһованын бәхшишидир. Онун васитәсилә биз башгаларыны руһландырыр, ејни заманда өзүмүз дә руһланырыг. Ҝәл руһани баҹы-гардашларымыза һәмишә  јахын олаг. Һеч вахт јығынҹаг ҝөрүшләрини тәрк етмәјәк!

9, 10. Мүхтәлиф дилләрдә данышан инсанлара тәблиғ етмәк үчүн бәзи мәсиһиләр нә етмишләр?

⁹ Јәгин ерамызын 33-ҹү илинин Әллинҹи ҝүн бајрамында јәһудиләрлә прозелитләр һејрәт ичиндә идиләр. Еһтимал ки, онларын әксәријјәти үмуми дилдә, ја јунан, ја да ибрани дилиндә үнсијјәт едирди. Инди исә «шаҝирдләр онларын доғма дилләриндә данышырды» (Һәв. 2:6). Сөзсүз ки, хош хәбәри доғма дилләриндә ешитмәк онларын үрәјинә тәсир етмишди. Әлбәттә, бу ҝүн мәсиһиләрә мөҹүзәви шәкилдә башга дилләрдә данышмаг габилијјәти верилмир. Амма онларын арасындан бир чохлары Падшаһлыг хәбәрини бүтүн халглардан олан инсанлара чатдырмаг үчүн әлләриндән ҝәләни едирләр. Неҹә? Бәзиләри јахынлыгдакы әҹнәбидилли јығынҹагда хидмәт етмәк вә һәтта хариҹи өлкәјә көчмәк мәгсәди илә јени дил өјрәнир. Чох вахт онларын ҝөстәрдији ҹәһдләр һәмсөһбәтләриндә дәрин тәәссүрат ојадыр.

¹⁰ Кристина једди башга Јеһованын Шаһиди илә бирҝә гуҹарат дилини өјрәнирди. О, гуҹарат дилиндә данышан иш јолдашы илә гаршылашанда ону доғма дилиндә саламлады. Бу, ҝәнҹ гадына хош тәсир бағышлады вә о, Кристинанын нәјә ҝөрә гуҹарат дили кими чәтин бир дили өјрәндији илә марагланды. Фүрсәтдән истифадә едәрәк Кристина она јахшы шаһидлик верди. Ҝәнҹ гадын она деди: «Јәгин сизин чатдырмаг истәдијиниз хәбәр чох ваҹибдир».

11. Әҹнәби дилләрдә данышан инсанлара Падшаһлыг һагда мүждәни тәблиғ етмәк үчүн нә едә биләрик?

¹¹ Дүздүр, һамыда јени дил өјрәнмәк алынмыр. Бунунла белә, биз Падшаһлыг һаггында хәбәри әҹнәбидилли инсанлара чатдыра биләрик. Бу неҹә мүмкүндүр? Үсуллардан бири одур ки, «JW Language^®» тәтбиги васитәсилә әразиниздә чохлу инсанын данышдығы дилләрдә  саламлашмаг үчүн сөзләр өјрәнә биләрсиниз. Һәмчинин һәмин дилдә данышан инсанларын һәгигәтә марағыны артырмаг үчүн бир нечә ифадә дә өјрәнә биләрсиниз. Онлары jw.org сајтына јөнәлдин вә әҝәр варса, онларын дилиндә олан видео вә нәшрләрлә таныш един. Хидмәтдә бу кими вәсаитләрдән истифадә етмәклә биз дә биринҹи әсрдәки баҹы-гардашлар кими ејни севинҹи јашаја биләрик: «дүнјанын һәр өлкәсиндән ҝәлмиш» инсанлар хош хәбәри «доғма дилләриндә» ешидәндә мәәттәл галмышдылар.

12. а) Ерамызын 33-ҹү илинин Әллинҹи ҝүн бајрамында баш вермиш мөҹүзә һагда Јуил пејғәмбәр габагҹадан нә демишди? б) Нә үчүн Јуилин пејғәмбәрлијинин биринҹи әсрдә јеринә јетмәси ҝөзләнилмәз дејилди?

¹² Бутрус чохмилләтли издиһама мүраҹиәт етмәк үчүн ајаға галхды (Һәв. 2:14). Ону динләјәнләрин һамысына изаһ етди ки, шаҝирдләрә башга дилләрдә данышмаг габилијјәтини Аллаһ вермиш вә беләҹә, Јуил пејғәмбәр васитәсилә дедији «һәр ҹүр инсанын үзәринә руһуму төкәҹәјәм» пејғәмбәрлијини јеринә јетирмишди (Јуил 2:28). Ҝөјә галхмаздан әввәл Иса шаҝирдләринә вәд етмишди: «Мән Атамдан хаһиш едәҹәјәм вә О, сизә башга бир көмәкчи верәҹәк». Сонра исә Иса һәмин көмәкчинин «руһ» олдуғуну демишди (Јәһ. 14:16, 17).

13, 14. Бутрус динләјиҹиләринин үрәјинә неҹә јол тапмаға чалышырды вә биз ондан неҹә нүмунә ҝөтүрә биләрик?

¹³ Бутрус јекунда гәтијјәтлә ҹамаата деди: «Гој бүтүн Исраил еви буну јахшы билсин ки, дирәкдә едам етдијиниз Исаны Аллаһ һәм Аға, һәм дә Мәсиһ етмишдир» (Һәв. 2:36). Дүздүр, Иса ишҝәнҹә дирәјиндә едам едиләндә Бутрусу динләјәнләрин әксәријјәти орада дејилди. Бунунла белә, онлар бир халг кими баш верән һадисәјә ҝөрә мәсулијјәт дашыјырдылар. Лакин диггәт јетир ки, Бутрус јәһудиләрә һөрмәтлә мүраҹиәт едир вә онларын үрәјинә јол тапмаға чалышырды. Бутрусун мәгсәди  динләјиҹиләрини мүһакимә етмәк јох, онлары төвбәјә тәшвиг етмәк иди. Бәс ҹамаат Бутрусун сөзләрини тәһгир кимими гәбул етди? Әсла. Әксинә, онларын «үрәјини, санки хәнҹәр јарды». Онлар сорушдулар: «Биз нә едәк?» Һөрмәтҹил мүнасибәти сајәсиндә Бутрус чохларынын үрәјинә јол тапды, бу да онлары төвбә етмәјә сөвг етди (Һәв. 2:37).

¹⁴ Бутрусун инсанларын үрәјинә неҹә јол тапмасы бизим үчүн бир нүмунәдир. Шаһидлик едәркән ев саһибинин Мүгәддәс Китаба зидд ҝедән һәр фикрини тәкзиб етмәк лазым дејил. Әксинә, сөһбәти һәр ики тәрәфин разылаша биләҹәји мәгамлар үзәриндә гурмалыјыг. Һәмсөһбәтимизлә үмуми мөвзу тапандан сонра сөһбәти нәзакәтлә Аллаһын Кәламы әсасында давам етдирә биләрик. Мүгәддәс Китаб һәгигәтләрини бу ҹүр тәгдим едәндә чох вахт сәмими инсанлар хош хәбәрә јахшы һај верирләр.

15. а) Бутрус ҹамаата нә деди вә онлар бу сөзләрә неҹә һај вердиләр? б) Әллинҹи ҝүн бајрамында хош хәбәри ешидән минләрлә инсан нәјә ҝөрә елә һәмин ҝүн вәфтиз олмаға һазыр иди?

¹⁵ Ерамызын 33-ҹү илинин Әллинҹи ҝүн бајрамында Бутрус сәмими јәһудиләрә вә прозелитләрә деди: «Төвбә един вә... гој һәр кәс... вәфтиз олунсун» (Һәв. 2:38). Нәтиҹәдә, тәхминән 3000 адам, еһтимал ки, Јерусәлимин јахынлығындакы һөвзәләрдә вәфтиз олунду e. Бәлкә онлар һиссләрә гапылараг бу аддымы атмышдылар? Бу һадисә Мүгәддәс Китабы өјрәнәнләрә вә мәсиһиләрин өвладларына һазыр олмадан, тез-тәләсик вәфтиз олмаға әсас верирми? Гәтијјән. Унутма ки, б. е. 33-ҹү илинин Әллинҹи ҝүн бајрамында вәфтиз олунан јәһудиләр вә прозелитләр Аллаһын Кәламыны јахшы билирдиләр вә Јеһоваја һәср олунмуш халгын үзвү идиләр. Үстәлик, онлар Аллаһа сәјлә хидмәт етдикләрини  артыг нүмајиш етдирмишдиләр. Мәсәлән, бәзиләри узаг мәсафәни гәт едәрәк һәр ил кечирилән бу бајрама ҝәлмишдиләр. Аллаһын нијјәтинин јеринә јетмәсиндә Иса Мәсиһин ојнадығы ролла бағлы ваҹиб һәгигәтләри гәбул етдикдән сонра онлар хидмәтләрини давам етдирмәјә һазыр идиләр, садәҹә олараг, инди буну Мәсиһин вәфтиз олунмуш давамчылары гисминдә едәҹәкдиләр.

16. Биринҹи әсрдәки мәсиһиләр фәдакарлыг руһуну неҹә тәзаһүр етдирдиләр?

¹⁶ Јеһованын һәмин инсанлара немәтләр вердији ачыг-ајдын ҝөрүнүрдү. Мүгәддәс Китабда дејилир: «Имана ҝәләнләрин һамысы бир јердә олурду вә һәр шејләри үмуми иди. Онлар әмлакларыны сатыб пулу араларында һәр кәсин еһтијаҹына ҝөрә бөлүшдүрүрдүләр» f (Һәв. 2:44, 45). Сөзсүз ки, бүтүн һәгиги мәсиһиләр биринҹи әсрдәки диндашларынын ҝөстәрдији мәһәббәт вә фәдакарлыг нүмунәсини тәглид етмәјә чалышырлар.

17. Вәфтиз олунмаг үчүн һансы аддымлары атмаг лазымдыр?

¹⁷ Өзүнү Јеһоваја һәср едиб вәфтиз олунмаг истәјән инсан әввәлҹә Мүгәддәс Китаба әсасланан бир нечә аддымы атмалыдыр. Она илк нөвбәдә Аллаһын Кәламындан билик әлдә етмәк лазымдыр (Јәһ. 17:3). Сонра о, өјрәндикләринә иман ҝәтирмәли вә әввәлки ҝүнаһларына ҝөрә пешман олдуғуну ҝөстәрмәк үчүн төвбә етмәлидир (Һәв. 3:19). Даһа сонра исә јанлыш јолдан дөнмәли вә Аллаһын ирадәсинә ујғун олан јахшы ишләр ҝөрмәјә башламалыдыр (Ром. 12:2; Ефес. 4:23, 24). Бу аддымлардан сонра о, дуада өзүнү Аллаһа һәср едә вә вәфтиз олуна биләр (Мәт. 16:24; 1 Бут. 3:21).

18. Мәсиһин вәфтиз олунмуш давамчыларынын гаршысында һансы имкан ачылыр?

¹⁸ Сән Иса Мәсиһин һәср вә вәфтиз олунмуш шаҝирдисәнми? Әҝәр беләдирсә, онда бу шәрәфә лајиг ҝөрүлдүјүн үчүн Аллаһа миннәтдар ол. Јеһова әсаслы сурәтдә шаһидлик вермәк ишиндә вә ирадәсинин јеринә јетирилмәсиндә мүгәддәс руһла долан биринҹи әсрдәки шаҝирдләр кими, сәндән дә истифадә едә биләр!