1—6. Јеһованын Шаһидләринин мүхтәлиф вәзијјәтләрдә тәблиғ етдикләрини ҝөстәрән нүмунә чәк.

 ГАНАДА јашајан Рибека адлы Јеһованын ҝәнҹ Шаһиди охудуғу мәктәбә өз тәблиғ саһәси кими бахырды. О, һәмишә мәктәбә Мүгәддәс Китаба әсасланмыш нәшрләр апарыр вә тәнәффүс вахты фүрсәтдән истифадә едәрәк синиф јолдашларына тәблиғ едирди. Рибека бир нечә синиф јолдашы илә Мүгәддәс Китаб дәрсинә башлады.

² Африканын шәргиндә јерләшән Мадагаскар адасында ики өнҹүл мүнтәзәм олараг уҹгар кәндә чатмаг үчүн гызмар истидә 25 километр мәсафәни гәт едирди. Онлар орада марагланан адамларла Мүгәддәс Китаб дәрси кечирдиләр.

³ Парагвај вә Парана чајлары бојунҹа јашајан инсанлара баш чәкмәк үчүн парагвајлы Јеһованын Шаһидләри диҝәр өлкәләрдән олан 15 көнүллү илә бирҝә гајыг дүзәлтмишдиләр. Чәкиси 45 тон олан бу гајыгда 12 нәфәр раһат јашаја биләр. Гајығын сајәсиндә Падшаһлығын чалышган тәблиғчиләри хош хәбәри уҹгар әразиләрә јајдылар. Башга ҹүр буну етмәк мүмкүн олмазды.

⁴ Узаг шималда, Алјаскада јашајан Јеһованын Шаһидләри јај мөвсүмүндә јаранан надир имкандан истифадә едиб туристләрә тәблиғ едирди. Һавалар истиләшәндә мүхтәлиф милләтләрдән олан сәрнишинлә долу сәјаһәт ҝәмиләри ора ҝәлирди. Јерли Јеһованын Шаһидләри лиманда мүхтәлиф дилләрдә Мүгәддәс Китаба әсасланмыш нәшрләр сәрҝиләјәрәк гонаглары гаршылајырды. Һәмин бөлҝәдәки уҹгар кәндләрә ҝетмәк үчүн тәјјарәнин ролу мисилсиздир, белә ки, онун сајәсиндә хош хәбәр алеут, атабаск, симшиан вә тлинкит кими иҹмалара чатдырылыр.

⁵ АБШ-ын Техас штатында јашајан Ларинин хүсуси бир саһәси вар иди. Бу, онун јашадығы гоҹалар евидир. Гәза нәтиҹәсиндә әлил арабасына мәһкум олмасына бахмајараг, Лари әлләрини јанына салыб отурмурду. О, Падшаһлыг хәбәрини, еләҹә дә Мүгәддәс Китаба әсасланан үмидини башгалары илә бөлүшүрдү. Бу үмидә Падшаһлығын рәһбәрлик едәҹәји вахтда јенидән ајаға галхаҹағы дахилдир (Әшј. 35:5, 6).

⁶ Шимали Мјанмада кечирилән бир топлантыда иштирак етмәк үчүн бир груп Јеһованын Шаһиди Мандалајдан ҝәми илә үч ҝүн јол ҝетмишди. Хош хәбәри тәблиғ етмәк арзусу илә онлар өзләри илә Мүгәддәс Китаба әсасланан  әдәбијјат ҝөтүрмүш вә сәрнишинләрә тәклиф етмишдиләр. Һәр дәфә ҝәми һансыса шәһәрә вә ја кәндә чатанда бу чалышган тәблиғчиләр ҝәмидән енир вә ҹәлд һәмин әразидә јашајан инсанлара әдәбијјат верирдиләр. Бу арада ҝәмијә јени сәрнишинләр минир вә ҝери гајыдан тәблиғчиләр онлара тәблиғ едирдиләр.

7. Аллаһын Падшаһлығы һаггында тәблиғ едәркән Јеһованын Шаһидләри һансы үсуллардан истифадә едирләр вә онларын мәгсәди нәдир?

⁷ Бу баҹы-гардашларын нүмунәсиндән ҝөрүндүјү кими, Јеһованын чалышган хидмәтчиләри дүнјанын һәр јериндә «Аллаһын Падшаһлығы һаггында әтрафлы шәһадәт» верирләр (Һәв. 28:23). Онлар ев-ев ҝедир, күчәдә инсанлара јахынлашыр, мәктуб јазыр вә ја онларла телефон васитәсилә данышырлар. Јеһованын Шаһидләри истәр автобусда ҝедәркән, истәр паркда ҝәзәркән, истәрсә дә иш јериндә фасилә вахты Аллаһын Падшаһлығы һаггында шәһадәт етмәк үчүн һәр фүрсәтдән истифадә едирләр. Тәблиғ үсуллары мүхтәлиф олса да, мәгсәд бир олараг галыр: хош хәбәри инсанларын олдуғу истәнилән јердә тәблиғ етмәк (Мәт. 10:11).

8, 9. а) Падшаһлыг ишинин ҝениш вүсәт алмасы нәјә ҝөрә әсл мөҹүзәдир? б) Ортаја һансы мараглы суал чыхыр вә бу суала ҹаваб вермәк үчүн нә етмәлијик?

⁸ Бәс сән, әзиз охуҹу, һал-һазырда 235-дән чох өлкә вә әразидә фәал сурәтдә тәблиғ едән Падшаһлығын чохсајлы тәблиғчиләри сырасындасанмы? Әҝәр беләдирсә, онда Падшаһлығын тәблиғи кими мөһтәшәм ишин ирәлиләмәсиндә сәнин дә пајын вар! Гыса мүддәт әрзиндә бу ишлә бағлы бүтүн дүнјада бу гәдәр наилијјәтин әлдә едилмәси әсл мөҹүзәдир! Ҹидди манеәләрә вә чәтинликләрә, һәтта дөвләт тәрәфиндән гојулан гадағалара вә ҝүҹлү тәгибләрә бахмајараг, Јеһованын Шаһидләри бүтүн милләтләрдән олан инсанлара әтрафлы шәһадәт верир.

⁹ Бу јердә мараглы суал мејдана чыхыр: Ҝөрәсән, нәјә ҝөрә һеч бир манеә, һәтта амансыз тәгибләр белә, Падшаһлыг ишинин ирәлиләмәсинин гаршысыны ала билмәјиб? Бу суала ҹаваб вермәк үчүн б. е. I әсринә гајытмаг лазымдыр. Ахы мүасир Јеһованын Шаһидләри олан бизләр һәмин вахт тәмәли гојулан иши давам етдиририк.

10. Иса өзүнү нәјә һәср етмишди вә бу ишлә бағлы она нә мәлум иди?

¹⁰ Мәсиһи јығынҹағынын Баниси Иса Мәсиһ өзүнү Аллаһын Падшаһлығы һаггындакы хош хәбәрин тәблиғи ишинә һәср етмишди. Бу онун һәјат амалы иди. О, бир дәфә демишди: «Мән Аллаһын Падшаһлығы һаггында мүждәни башга шәһәрләрә дә чатдырмалыјам, ахы Аллаһ мәни бу иш үчүн ҝөндәриб» (Лука 4:43). Иса билирди ки, башладығы иши өзү тамамлаја билмәјәҹәк. Өлүмүндән бир гәдәр әввәл о, Падшаһлыг хәбәринин «бүтүн халгларын арасында» тәблиғ олунаҹағыны сөјләмишди (Марк 13:10). Бәс бу иш неҹә вә ким тәрәфиндән һәјата кечириләҹәкди?

11. Иса шаҝирдләринә һансы ваҹиб тапшырығы верди вә бу иши јеринә јетирмәк үчүн онлар һансы көмәји алаҹагдылар?

 ¹¹ Өлүмүндән вә дирилмәсиндән сонра Иса шаҝирдләринә ҝөрүндү вә онлара мүһүм тапшырыг верди: «Буна ҝөрә дә ҝедин вә бүтүн халгларын ичиндә шаҝирд һазырлајын, онлары Ата, Оғул вә мүгәддәс руһ ады илә вәфтиз един, сизә әмр етдијим һәр шејә риајәт етмәји онлара өјрәдин. Мән бу дөврүн јекунуна кими һәмишә сизинләјәм» (Мәт. 28:19, 20). «Сизинләјәм» сөзү ҝөстәрирди ки, Иса Мәсиһ тәблиғ етмәк вә шаҝирд һазырламаг ишиндә давамчыларына дајаг олаҹаг. Шаҝирдләрин белә көмәјә еһтијаҹы олаҹагды, чүнки Иса демишди ки, «бүтүн халглар [онлара] нифрәт едәҹәк» (Мәт. 24:9). Онлар һәмчинин башга бир көмәк дә алаҹагдылар. Иса ҝөјә галхмаздан әввәл онлара демишди ки, «јерин уҹгарларынадәк» онун шаһиди олмалары үчүн онлара мүгәддәс руһ вериләҹәк (Һәв. 1:8).

12. Һансы мүһүм суаллар јараныр вә онлара ҹаваб тапмаг нә үчүн ваҹибдир?

¹² Бу јердә бир нечә ваҹиб суал јараныр: Исанын һәвариләри вә биринҹи әсрдәки диҝәр шаҝирдләр бу тапшырыға ҹидди јанашырдылармы? Мәсиһи киши вә гадынлардан ибарәт нисбәтән кичик олан бу груп амансыз тәгибләр гаршысында белә, Аллаһын Падшаһлығы һаггында әтрафлы шәһадәт вермәјә давам едирдими? Һәгигәтәнми шаҝирд һазырламаг ишиндә онлар сәмави көмәк алырдылар вә Јеһованын мүгәддәс руһу онлара дајаг олурду? Бу вә диҝәр суаллара Мүгәддәс Китаба дахил олан «Һәвариләрин ишләри» бөлмәси ҹаваб верир. Бу суаллара ҹаваб тапмағымыз олдугҹа ваҹибдир. Нәјә ҝөрә? Иса вәд етмишди ки, онун тапшырдығы иш «бу дөврүн јекунуна» кими давам едәҹәк. Демәли, бу тапшырыг ахыр ҝүнләрдә јашајан бизләр дә дахил олмагла, бүтүн һәгиги мәсиһиләрә аиддир. Бу сәбәбдән, өзүнә тарихи мәлуматлары дахил едән «Һәвариләрин ишләри» китабы бизим үчүн бөјүк әһәмијјәт кәсб едир.

13, 14. а) «Һәвариләрин ишләри» китабыны ким јазыб вә јазар китаба дахил етдији мәлуматлары һарадан топлајыб? б) «Һәвариләрин ишләри» китабында нә һагда данышылыр?

¹³ «Һәвариләрин ишләри» китабыны ким јазыб? Китабын һеч бир јериндә ону јазанын ады чәкилмир, лакин ҝириш сөзләриндән ајдын ҝөрүнүр ки, «Һәвариләрин ишләри» китабыны јазан елә «Луканын јаздығы мүждә»ни гәләмә алан шәхсдир (Лука 1:1—4; Һәв. 1:1, 2). Беләликлә, лап башланғыҹдан «севимли һәким» вә диггәтҹил тарихчи Лука «Һәвариләрин ишләри» китабынын јазычысы һесаб олунуб (Кол. 4:14). Китаб б. е. 33-ҹү илиндә Исанын ҝөјә галхмасындан ерамызын тәхминән 61-ҹи илинә, һәвари Булусун Ромада мәһбуслуғунун сонуна гәдәр олан 28 или әһатә едир. Китаб бојунҹа Луканын ҝаһ «онлар», ҝаһ да «биз» демәсиндән белә гәнаәтә ҝәлмәк олар ки, о тәсвир етдији һадисәләрин әксәријјәтинин ҹанлы шаһиди олмушду (Һәв. 16:8—10; 20:5; 27:1). Диггәтли тәдгигатчы Лука, шүбһәсиз ки, бу мәлуматлары билаваситә китабда адлары чәкилән Булусдан, Барнәбадан, Филипдән вә башгаларындан алмышды.

 ¹⁴ «Һәвариләрин ишләри» китабында нәдән бәһс олунур? Бир гәдәр әввәл јаздығы «Мүждә»дә Лука Иса Мәсиһин дедикләрини вә етдикләрини гәләмә алмышды. «Һәвариләрин ишләри» китабында исә о, Исанын шаҝирдләринин данышдыгларындан вә етдикләриндән сөһбәт ачыр. «Һәвариләрин ишләри» китабында кәнардан «савадсыз, садә адам»лар кими ҝөрүнән, лакин мөһтәшәм иши һәјата кечирән инсанлардан бәһс едилир (Һәв. 4:13). Бир сөзлә десәк, Аллаһдан илһам алмыш бу китабда мәсиһи јығынҹағынын неҹә тәшкил олундуғу вә неҹә инкишаф етдији һагда данышылыр. Китабда биринҹи әсрдәки мәсиһиләрин неҹә тәблиғ етдијиндән, јәни онларын тәблиғ үсуллары вә бу ишә мүнасибәтләриндән сөһбәт ачылыр (Һәв. 4:31; 5:42). Орада хош хәбәрин јајылмасында мүгәддәс руһун һансы ролу ојнадығы тәсвир олунур (Һәв. 8:29, 39, 40; 13:1—3; 16:6; 18:24, 25). Һәмчинин орада Мүгәддәс Китабын әсас мөвзусундан, Мәсиһин рәһбәрлик етдији Аллаһын Падшаһлығы васитәсилә Аллаһын адынын мүгәддәс тутулмасындан бәһс едилир вә ҝүҹлү мүгавимәтләрә бахмајараг, Падшаһлыг хәбәринин ҝениш јајылдығы ҝөстәрилир (Һәв. 8:12; 19:8; 28:30, 31).

15. «Һәвариләрин ишләри» китабыны арашдырмағын бизә һансы фајдасы олаҹаг?

¹⁵ «Һәвариләрин ишләри» китабыны арашдырмаг, һәгигәтән дә, инсаны һејран едир вә иманыны мөһкәмләндирир! Мәсиһин биринҹи әсрдәки давамчыларынын ҹәсарәт вә чалышганлыг нүмунәләри үзәриндә дүшүнмәк үрәјимизи риггәтә ҝәтирәҹәк, бизи онларын иманыны тәглид етмәјә тәшвиг едәҹәк. Бунунла да «ҝедин... шаҝирд һазырлајын» тапшырығыны даһа мүвәффәгијјәтлә јеринә јетирәҹәјик. Әлиндәки нәшр «Һәвариләрин ишләри» китабыны диггәтлә өјрәнмәјинә көмәк етмәк үчүн нәзәрдә тутулуб.

16. Бу нәшр һансы үч мәгсәдә хидмәт едир?

¹⁶ Бу нәшрин әсас мәгсәди нәдир? Китаб үч мәгсәдә: 1) Јеһованын Өз мүгәддәс руһу васитәсилә Падшаһлығын тәблиғи вә шаҝирд һазырламаг ишини дәстәкләдијинә әминлијимизи мөһкәмләндирмәк, 2) Мәсиһин биринҹи әсрдә јашајан давамчыларынын нүмунәсини арашдырмагла бизи хидмәтдә даһа сәјли олмаға тәшвиг етмәк вә 3) Јеһованын тәшкилатына, һәмчинин тәблиғ ишиндә вә јығынҹаглара нәзарәт етмәкдә рәһбәрлији үзәринә ҝөтүрән кәсләрә һөрмәтимизи артырмаг мәгсәдинә хидмәт едир.

17, 18. Бу нәшр неҹә тәртиб едилиб вә һансы хүсусијјәтләри Мүгәддәс Китабын фәрди мүталиәсиндә фајдалы олаҹаг?

¹⁷ Бу нәшр неҹә тәртиб едилиб? Әҝәр диггәт јетирдинсә, китаб һәр бири «Һәвариләрин ишләри» китабынын мүәјјән һиссәсини әһатә едән сәккиз бөлмәјә ајрылыб. Мәгсәд «Һәвариләрин ишләри» китабыны ајәбәајә арашдырмаг јох, орада јазылан һадисәләрдән дәрс ҝөтүрмәкдә вә өјрәндикләримизи шәхсән неҹә тәтбиг едә биләҹәјимизи анламагда бизә көмәк етмәкдир. Һәр фәслин әввәлиндә һәмин фәслин әсас мөвзусу вурғуланыр вә «Һәвариләрин ишләри» китабынын һансы һиссәсинин арашдырылаҹағы ҝөстәрилир.

 ¹⁸ Бу нәшрин Мүгәддәс Китабын фәрди мүталиәси заманы фајдалы олаҹаг диҝәр хүсусијјәтләри дә вар. «Һәвариләрин ишләри» китабындакы һәјәҹанландырыҹы һадисәләри тәсвир едән ҝөзәл шәкилләр сәнә охудугларыны хәјалында ҹанландырмаға көмәк едәҹәк. Бир чох фәсилләрдә чәрчивәләр јерләшир ки, онларда да фајдалы әлавә мәлумат верилир. Бәзи чәрчивәләрдә иманлары өрнәк ҝөтүрүләси Мүгәддәс Китаб персонажлары һаггында гыса мәлумат јазылыб. Диҝәрләри исә «Һәвариләрин ишләри» китабында хатырланан јерләр, һадисәләр, јахуд башга персонажлар һаггындакы тәфсилатлары өзүнә дахил едир.

19. Вахташыры өзүмүзә һансы суаллары вермәлијик?

¹⁹ Бу нәшр өзүнү јохламагда сәнә көмәк едәҹәк. Падшаһлығын тәблиғчиси кими нечә мүддәт хидмәт етмәјиндән асылы олмајараг, вахташыры ајаг сахлајыб һәјатда нәјә үстүнлүк вердијини вә мәсиһи хидмәтинә мүнасибәтини јохламаг јахшы оларды (2 Кор. 13:5). Өзүндән соруш: «Хидмәтин тәхирәсалынмаз иш олдуғуну дәрк едирәмми? (1 Кор. 7:29—31). Хош хәбәри әминликлә вә сәјлә тәблиғ едирәмми? (1 Салон. 1:5, 6). Тәблиғ вә шаҝирд һазырламаг ишиндә әлимдән ҝәлдији гәдәр иштирак едирәмми?» (Кол. 3:23).

20, 21. Нәјә ҝөрә тапшырығымыз бу гәдәр ваҹибдир вә нә етмәјә гәтијјәтли олмалыјыг?

²⁰ Ҝәл һеч вахт унутмајаг ки, бизә ваҹиб иш — тәблиғ вә шаҝирд һазырламаг иши һәвалә олунуб. Һәр өтән ҝүн бу ишин ваҹиблијини даһа да артырыр. Бу системин сону сүрәтлә јахынлашыр. Һәлә һеч вахт бу гәдәр инсанын һәјаты тәһлүкә алтында олмајыб. Биз билмирик, әбәди һәјата апаран јолда јеримәјә мејли олан нә гәдәр инсан хош хәбәрә һај верәҹәк (Һәв. 13:48). Буна бахмајараг, нә гәдәр ки ҝеҹ дејил, биз белә инсанлара көмәк етмәлијик (1 Тим. 4:16).

²¹ Беләликлә, Падшаһлығын биринҹи әсрдә јашајан чалышган тәблиғчиләринин нүмунәсини изләмәк сон дәрәҹә ваҹибдир. Арзу едирик ки, бу нәшр сәни даһа сәјлә вә ҹәсарәтлә тәблиғ етмәјә тәшвиг етсин, һәмчинин бундан сонра да «Аллаһын Падшаһлығы һаггында әтрафлы шәһадәт» вермәк гәтијјәтини мөһкәмләндирсин (Һәв. 28:23).