1, 2. Шаул Дәмәшгдә нә етмәк нијјәтиндә иди?

 ҮЗЛӘРИНДӘН гәзәб јаған јолчулар Дәмәшгә јахынлашыр. Орада онлар гәддар бир планы һәјата кечирмәк истәјирләр. Онлар Исанын ҹамаатын нифрәтинә туш ҝәлмиш шаҝирдләрини евләриндән чыхараҹаг, әл-голларыны бағлајыб алчалдаҹаг вә Синедрион тәрәфиндән ҹәзаландырылмалары үчүн Јерусәлимә апараҹаглар.

² Бу дәстәјә әли гана булашмыш Шаул адлы бир нәфәр башчылыг едир a. Бу јахынларда о, дини фанатикләрин Исанын садиг шаҝирди Стефаны дашлајыб өлдүрдүкләрини мәмнунлугла мүшаһидә етмишди (Һәв. 7:57—8:1). Исанын Јерусәлимдә јашајан давамчыларыны тәгиб етмәклә кифајәтләнмәјиб Шаул тәгиб аловуну башга јерләрә дә јајмаға һазырлашыр. О, «Јол» кими танынан бу тәһлүкәли тәригәтин көкүнү кәсмәк истәјир. (Һәв. 9:1, 2; « Шаулун Дәмәшглә бағлы алдығы сәлаһијјәт» адлы чәрчивәјә бах.)

3, 4. а) Шаулун башына нә ҝәлди? б) Бу фәсилдә һансы суаллары мүзакирә едәҹәјик?

³ Гәфләтән ҝур ишыг Шаулун әтрафыны ишыгландырды. Онун јанындакылар ишығы ҝөрәндә һејрәтдән донуб галдылар. Шаулун ҝөзләри тутулду вә о, јерә јыхылды. Ҝөјдән бир сәс ҝәлди: «Шаул, Шаул, мәни нијә тәгиб едирсән?» Дурухуб галан Шаул сорушду: «Аға, сән кимсән?» Јәгин алдығы ҹаваб Шаулун үрәјинә хәнҹәр кими батды: «Мән сәнин тәгиб етдијин Исајам» (Һәв. 9:3—5; 22:9).

⁴ Исанын Шаула дедији илк сөзләрдән нә мәлум олур? Шаулун мәсиһилији гәбул етдији әрәфәдә баш верән һадисәләри арашдырмағын бизә һансы фајдасы дәјә биләр? Шаулун мәсиһи олмасындан сонра јаранан әмин-аманлыг дөврүндә јығынҹағын неҹә давранмасындан өзүмүзә һансы дәрси ҝөтүрә биләрик?

5, 6. Исанын Шаула дедији сөзләрдән нә өјрәнирик?

⁵ Дәмәшгә ҝедән јолда Шаулу дајандыранда Иса она: «Мәним шаҝирдләрими нијә тәгиб едирсән?» — демәди. Әксинә, јухарыда гејд едилдији  кими, «Мәни нијә тәгиб едирсән?» — дејә сорушду (Һәв. 9:4). Бәли, Иса давамчыларынын јашадығы чәтинликләрә өз чәтинлији кими бахыр (Мәт. 25:34—40, 45).

⁶ Әҝәр Мәсиһә иман етдијин үчүн тәгиб олунурсанса, әмин ол ки, һәм Јеһова, һәм дә Иса сәнин нәләр чәкдијиндән хәбәрдардыр (Мәт. 10:22, 28—31). Јеһова һал-һазырда сынағы арадан галдырмаја биләр. Унутма, Иса Стефанын өлүмүндә Шаулун иштирак етдијини, һәмчинин онун Јерусәлимдәки садиг шаҝирдләри евләриндән сүрүјүб чыхардығыны ҝөрүрдү (Һәв. 8:3). Лакин һәмин вахт о мүдахилә етмәди. Буна бахмајараг, Јеһова Мәсиһ васитәсилә Стефана вә диҝәр шаҝирдләрә садиг галмалары үчүн ҝүҹ верди.

7. Тәгибләрин гаршысында сынмамаг үчүн нә етмәк лазымдыр?

⁷ Нөвбәти аддымлары атсан, сән дә тәгибләр гаршысында әјилмәјәҹәксән: 1) нә олурса-олсун, садиг галмаға гәти гәрарлы ол; 2) Јеһовадан көмәк истә (Филип. 4:6, 7); 3) Гисасы Јеһованын өһдәсинә бурах (Ром. 12:17—21); 4) Әмин ол ки, Јеһова сынағы арадан галдырмағы лазым биләнәҹән сәнә кифајәт гәдәр ҝүҹ верәҹәк (Филип. 4:12, 13).

8, 9. Һәнәнја алдығы тапшырығын нәдән ибарәт олдуғуну биләндә һансы һиссләри кечирмишди?

⁸ Шаулун: «Аға, сән кимсән?» суалына ҹаваб вердикдән сонра Иса она деди: «Дур, шәһәрә ҝет, нә етмәк лазым олдуғу орада сәнә дејиләҹәк» (Һәв. 9:6). Ҝөзләри тутулан Шаулу Дәмәшгә апардылар, орада о, үч ҝүн оруҹ тутуб дуа етди. Бу арада Иса Дәмәшгдә јашајан «бүтүн јәһудиләрин рәғбәтини газанмыш» Һәнәнја адлы шаҝирдә Шаул һаггында данышды (Һәв. 22:12).

⁹ Јәгин Һәнәнјанын һиссләри бир-биринә гарышмышды. Јығынҹағын Башы олан дирилмиш Иса Мәсиһ онунла шәхсән данышыб мәһз она хүсуси тапшырыг верди. Һәнәнјаја бөјүк шәрәф ҝөстәрилмишди. Амма тапшырыг  шәрәфли олдуғу гәдәр дә чәтин иди! Иса Һәнәнјаја Шаулла данышмағы тапшыранда о деди: «Аға, мән чохларындан ешитмишәм ки, о, сәнин Јерусәлимдәки мүгәддәс хидмәтчиләринә зүлмләр едиб. Бурада да сәнин адыны чағыран һәр кәси һәбс етмәк үчүн бөјүк каһинләрдән ихтијар алыб» (Һәв. 9:13, 14).

10. Һәнәнја илә рәфтарындан Иса һаггында нә өјрәнирик?

¹⁰ Иса һиссләрини дилинә ҝәтирдијинә ҝөрә Һәнәнјаны мәзәммәт етмәди. Амма нә етмәли олдуғуну она ајдын шәкилдә билдирди. Үстәлик, бу чәтин тапшырығы нә үчүн иҹра етмәли олдуғуну сөјләјәрәк онун ләјагәтинә һөрмәтлә јанашды. Иса Шаул һаггында Һәнәнјаја деди: «Бу адам адымы  халглара, о ҹүмләдән һөкмдарлара вә Исраил оғулларына билдирмәк үчүн сечдијим аләтдир. Адым уғрунда нәләр чәкәҹәјини она ҝөстәрәҹәјәм» (Һәв. 9:15, 16). Һәнәнја дәрһал Исанын сөзүнү јеринә јетирди. Тәгибчи Шаулу тапыб она деди: «Шаул, гардаш, бура ҝәләркән јолда сәнә ҝөрүнән Ағамыз Иса мәни сәнин јанына ҝөндәрди ки, ҝөзләрин ачылсын вә сән мүгәддәс руһла доласан» (Һәв. 9:17).

11, 12. Шаулун мәсиһилији гәбул етмәси илә бағлы һадисәләрдән нә өјрәнирик?

¹¹ Шаулун мәсиһилији гәбул етмәси илә әлагәдар баш верән һадисәләр бир нечә факты үзә чыхарыр. Мәсәлән, Иса сөз вердији кими, тәблиғ ишинә фәал сурәтдә рәһбәрлик едир (Мәт. 28:20). Дүздүр, о, бу ҝүн һеч бир инсанла билаваситә данышмыр. Амма евиндәки гуллугчулары үзәринә гојдуғу садиг вә ағыллы нөкәрин васитәсилә тәблиғ ишинә рәһбәрлик едир (Мәт. 24:45—47). Рәһбәрлик Шурасынын ҝөстәриши илә тәблиғчиләр вә өнҹүлләр Мәсиһ һагда даһа чох өјрәнмәк истәјән инсанлары тапмаг үчүн ҝөндәрилирләр. Өтән фәсилдә гејд олундуғу кими, бу инсанларын чоху Аллаһдан рәһбәрлик истәмиш, сонра исә Јеһованын Шаһидләри онлара баш чәкмишләр (Һәв. 9:11).

¹² Һәнәнја итаәткарлыг ҝөстәрәрәк тапшырығы јеринә јетирди вә немәтләр алды. Бәс сән, һәтта горхсан белә, әтрафлы шәһадәт вермәк әмринә табе олурсан? Бәзиләри ев-ев тәблиғ етмәјә вә танымадыглары адамларла сөһбәт етмәјә чәкинирләр. Башгалары үчүн исә иш јериндә, күчәдә, јахуд телефон вә ја мәктуб васитәсилә тәблиғ етмәк чәтиндир. Һәнәнја үрәјиндәки горхуну дәф етди, бунун да сајәсиндә Шаулун мүгәддәс руһу алмасына көмәк етмәк кими шәрәфли иши јеринә јетирди b. Һәнәнја Исаја етибар етдији вә Шаула гардаш ҝөзү илә бахдығы үчүн тапшырығынын өһдәсиндән мүвәффәгијјәтлә ҝәлди. Һәнәнја кими биз дә Исанын тәблиғ ишинә рәһбәрлик етдијини јадда сахласаг, инсанлара гаршы шәфгәтли олсаг вә һәтта ән амансыз адамлара да ҝәләҹәк баҹы-гардашларымыз кими бахсаг, үрәјимиздәки горху һиссинә галиб ҝәлә биләрик (Мәт. 9:36).

13, 14. Әҝәр Мүгәддәс Китабы өјрәнир, амма һәлә вәфтиз олмамысанса, Шаулун нүмунәсиндән нә өјрәнә биләрсән?

¹³ Шаул дәрһал өјрәндикләринә ујғун давранды. Шәфа тапан кими вәфтиз олду вә Дәмәшгдәки шаҝирдләрлә сых үнсијјәт етмәјә башлады. Амма бу һәлә һарасыдыр? О, «вахт итирмәдән синагогларда Иса һаггында шәһадәт верәрәк онун Аллаһын Оғлу олдуғуну тәблиғ етмәјә башлады» (Һәв. 9:20).

 ¹⁴ Әҝәр сән Мүгәддәс Китабы өјрәнир, амма һәлә вәфтиз олмамысанса, Шаул кими өјрәндикләринә ујғун олараг, гәти аддымлар атаҹагсанмы? Дүздүр, Шаул Мәсиһин мөҹүзәсини өз үзәриндә һисс етмишди вә шүбһәсиз, бу, ону һәрәкәтә тәшвиг етмишди. Анҹаг башгалары да Исанын етдији мөҹүзәләрин шаһиди олмушдулар. Мәсәлән, бәзи фәрисиләр Исанын әли гурумуш адама шәфа вермәсини ҝөрмүшдү, еләҹә дә бир чох јәһудиләр онун Илазәри өлүләрдән дирилтмәсини ешитмишди. Бунунла белә, онларын чоху буна етинасыз јанашырды, һәтта бәзиләри Исаја дүшмән кәсилмишди (Марк 3:1—6; Јәһ. 12:9, 10). Амма онлардан фәргли олараг, Шаул дәјишди. Нә үчүн о, хош хәбәрә һај верди? Чүнки Шаул инсандан чох Аллаһдан горхурду вә Мәсиһин она ҝөстәрдији мәрһәмәти јүксәк гијмәтләндирирди (Филип. 3:8). Ејни әһвал-руһијјәдә олсан, тәблиғ етмәјә вә вәфтиз олмаға сәнә дә һеч нә мане олмајаҹаг.

15, 16. Шаул синагогларда нә едирди вә Дәмәшгдәки јәһудиләр онун чатдырдығы хәбәрә неҹә һај вердиләр?

¹⁵ Тәсәввүр едә биләрсән, Шаул синагогларда Иса һаггында тәблиғ етмәјә башлајанда ҹамаат арасында неҹә чашгынлыг, тәәҹҹүб вә һиддәт баш галдырды? Онлар бир-биринә дејирдиләр: «Мәҝәр бу адам Јерусәлимдә Исанын адыны чағыранлара ҝөз вериб, ишыг вермәјән адам дејил?» (Һәв. 9:21). Шаул нәјә ҝөрә фикрини дәјишдијини изаһ едәркән «Исанын Мәсиһ олдуғуну мәнтигли сурәтдә сүбут» едирди (Һәв. 9:22). Амма мәнтиг һәр шеји һәлл етмир. Адәт-әнәнә буховунда олан һәр зеһни, гүрурла зәнҹирләнән һәр үрәји тәк мәнтиглә азад етмәк мүмкүн дејил. Лакин Булус үмидини үзмүрдү.

¹⁶ Үч ил кечдикдән сонра Дәмәшгдәки јәһудиләр һәлә дә Шаула гаршы чыхырдылар. Ахырда ону өлдүрмәк гәрарына ҝәлдиләр (Һәв. 9:23; 2 Кор. 11:32, 33; Гал. 1:13—18). Онларын суи-гәсд һазырладыгларынын үстү ачыланда Шаул еһтијатла давраныб шәһәрдән чыхды. Ону зәнбилдә шәһәр диварындакы пәнҹәрәдән ашағы салладылар. Лука јазыр ки, һәмин ҝеҹә Шаула гачмаға көмәк едән адамлар «Шаулун шаҝирдләри» иди (Һәв. 9:25). Бу сөзләрдән белә нәтиҹәјә ҝәлмәк олар ки, Шаулу Дәмәшгдә динләјәнләрдән һеч олмаса бәзиләри хош хәбәрә һај вермиш вә Мәсиһин давамчысы олмушду.

17. а) Инсанлар Мүгәддәс Китаб һәгигәтләринә неҹә һај верирләр? б) Биз бундан сонра да нә етмәлијик вә нә үчүн?

¹⁷ Илк дәфә аиләнә, достларына вә башгаларына өјрәндијин јахшы шејләр һаггында данышанда јәгин үмид едирдин ки, Мүгәддәс Китабдакы мәнтиг данылмаз олдуғу үчүн һәр кәс ону гәбул едәҹәк. Ола билсин, бәзиләри белә дә давранмышды, чохлары исә әксинә, ону рәдд етмишди. Бәлкә дә аиләнин бәзи үзвләри сәнинлә дүшмән кими рәфтар етмәјә башламышлар (Мәт. 10:32—38). Лакин Мүгәддәс Китабдан дәлилләр ҝәтирәрәк нәзакәтлә сөһбәт етмәјә чалышсан вә өзүнү һәмишә әсл мәсиһи кими апарсан, һәтта сәнә гаршы чыханларын белә фикри дәјишә биләр (Һәв. 17:2; 1 Бут. 2:12; 3:1, 2, 7).

18, 19. а) Барнәба нә заман Шаула замин дурду вә бунун сајәсиндә нә мүмкүн олду? б) Барнәба вә Шаулдан неҹә нүмунә ҝөтүрә биләрик?

 ¹⁸ Шаул Јерусәлимә ҝәләндә мәлум сәбәбләрә ҝөрә шаҝирдләр онун мәсиһилији гәбул етдијинә инанмадылар. Амма Барнәба замин дуранда һәвариләр ону гәбул етдиләр, о да бир мүддәт онларла галды (Һәв. 9:26—28). Шаул еһтијатлы иди, амма хош хәбәрдән утанмырды (Ром. 1:16). О, бир заманлар Иса Мәсиһин шаҝирдләрини амансызҹасына тәгиб етдији Јерусәлимдә ҹәсарәтлә тәблиғ едирди. Јерусәлимдәки јәһудиләр тәрәфдарларынын дүшмән мөвгејә кечдијини баша дүшәндә дәһшәтә ҝәлдиләр вә ону өлдүрмәк үчүн фүрсәт ахтармаға башладылар. Мүгәддәс Китабда дејилир: «Гардашлар бундан хәбәр тутанда ону [Шаулу] Гејсәријјәјә ҝәтириб орадан Тарса јола салдылар» (Һәв. 9:30). Шаул Исанын јығынҹаг васитәсилә вердији ҝөстәриши јеринә јетирди. Бу һәм Шаулун, һәм дә јығынҹағын хејринә олду.

¹⁹ Диггәт јетир ки, Шаула көмәк етмәк үчүн Барнәба өзү тәшәббүс ҝөстәрди. Сөзсүз ки, бу хејирхаһ аддым Јеһованын ики чалышган хидмәтчиси арасында мөһкәм достлуғун тәмәлини гојду. Сән дә Барнәба кими јығынҹағын јени үзвләринә ҹанла-башла көмәк едир, онларла тәблиғә чыхыр вә руһани ҹәһәтдән инкишаф етмәләринә јардым ҝөстәрирсәнми? Әҝәр беләдирсә, онда бол-бол немәтләр алаҹагсан. Бәс әҝәр тәзәҹә тәблиғчи олмусанса, Шаулдан нүмунә ҝөтүрәрәк тәклиф олунан көмәји гәбул едирсәнми? Тәҹрүбәли тәблиғчиләрлә әмәкдашлыг етмәклә сән тәблиғ етмәк баҹарығыны јахшылашдыраҹаг, севинҹ әлдә едәҹәк вә өмүрлүк достлар тапаҹагсан.

20, 21. Аллаһын хидмәтчиләри кечмишдә әмин-аманлыг дөврүндән максимум неҹә истифадә едирдиләр вә мүасир дөврдә неҹә истифадә едирләр?

²⁰ Шаулун мәсиһилији гәбул етмәсиндән вә сағ-саламат Јерусәлимдән јола салынмасындан сонра «бүтүн Јәһудијјә, Ҹәлилә вә Сәмәријјәдәки јығынҹаг үчүн әмин-аманлыг дөврү башланды» (Һәв. 9:31). Шаҝирдләр јаранан бу әлверишли вахтдан неҹә истифадә етдиләр? (2 Тим. 4:2). Мүгәддәс Китабда дејилир ки, онлар мөһкәмләнирди. Һәвариләр вә диҝәр мәсул гардашлар шаҝирдләрин иманыны мөһкәмләндирир вә «Јеһова Аллаһын горхусу вә мүгәддәс руһун тәсәллиси илә» јашајан јығынҹаға рәһбәрлик едирдиләр. Мәсәлән, Бутрус фүрсәтдән истифадә едиб Шарон дүзүндә јерләшән Лидда шәһәриндәки шаҝирдләри руһландырырды. Онун сәји нәтиҹәсиндә һәмин әразидә јашајан бир чохлары «Ағаја иман ҝәтирди» (Һәв. 9:32—35). Шаҝирдләрин фикри башга шејләрә јајынмырды, әксинә, онлар бир-бириләринин гајғысына галыр вә хош хәбәри тәблиғ едирдиләр. Бунун сајәсиндә јығынҹаг бөјүјүрдү.

²¹ Ијирминҹи әсрин сонларына јахын бир чох өлкәләрдә Јеһованын Шаһидләри үчүн «әмин-аманлыг дөврү» башланды. Аллаһын халгыны сыхышдыран  сијаси гурулушлар бир ҝөз гырпымында дағылды вә гадағалар гисмән вә ја тамамилә арадан галдырылды. Он минләрлә Јеһованын Шаһиди фүрсәтдән истифадә едиб ачыг сурәтдә тәблиғ етмәјә башлады вә бу, чох ҝөзәл нәтиҹәләр ҝәтирди.

22. Малик олдуғун азадлыгдан максимум дәрәҹәдә неҹә истифадә едә биләрсән?

²² Сән дә малик олдуғун азадлыгдан там шәкилдә истифадә едирсәнми? Әҝәр јашадығын өлкәдә дин азаддырса, о заман Шејтан сәни Падшаһлығын марагларыны бир кәнара гојуб вар-дөвләт далынҹа гачмаға тәһрик етмәк истәјәҹәк (Мәт. 13:22). Гојма диггәтин башга шејләрә јајынсын. Малик олдуғун нисбәтән әмин-аманлыг дөврүндән сәмәрәли истифадә ет. Буна шаһидлик етмәк вә јығынҹағы мөһкәмләндирмәк үчүн бир фүрсәт кими бах. Унутма, вәзијјәт ҝөзләнилмәдән дәјишә биләр.

23, 24. а) Табитәнин һадисәсиндән нә өјрәнирик? б) Нәјә гәти гәрарлы олмалыјыг?

²³ Ҝәл Табитә, јахуд Дорка адлы бир шаҝирдлә баш верәнләрә нәзәр салаг. О, Лидданын јахынлығында јерләшән Јаффа шәһәриндә јашајырды. Бу садиг баҹы вахтындан вә әмлакындан дүзҝүн истифадә едирди, о, «чох хејирхаһ иди вә касыблара һәмишә әл тутурду». Бир дәфә о, гәфилдән хәстәләнди вә өлдү c. Јаффадакы шаҝирдләр, хүсуси илә дә Табитәнин јахшылыг етдији дул гадынлар онун өлүмүнү бөјүк кәдәрлә гаршыладылар. Бутрус онун ҹәсәдинин дәфн үчүн һазырландығы евә ҝәләндә, Иса Мәсиһин һәвариләри арасында о вахтадәк ҝөрүнмәмиш бир мөҹүзә ҝөстәрди. О дуа едиб Табитәни дирилтди! Бутрус дул гадынлары вә диҝәр шаҝирдләри отаға чағырыб дирилмиш Табитәни ҝөстәрәндә онларын неҹә севиндијини тәсәввүр едә биләрсәнми? Јәгин бүтүн баш верәнләр гаршыдакы сынаглара таб ҝәтирмәк үчүн онлары чох мөһкәмләндирди. Тәбии ки, мөҹүзә һагда «хәбәр бүтүн Јаффаја јајылды вә хејли адам Ағаја иман ҝәтирди» (Һәв. 9:36—42).

²⁴ Табитәнин башына ҝәлән бу һадисәдән ики ваҹиб шеји өјрәнирик. 1) Инсан бу ҝүн вар, сабаһ јохдур. Буна ҝөрә дә әлимиздә имкан вар икән Аллаһын јанында јахшы ад газанмаг неҹә дә ваҹибдир! (Ваиз 7:1). 2) Дирилмә үмиди хәјал дејил. Табитәнин етдији чохлу хејирхаһ ишләр Јеһованын нәзәриндән гачмырды, буна ҝөрә дә Јеһова ону мүкафатландырды. О бизим дә әмәјимизи унутмајаҹаг вә әҝәр Армаҝеддондан  әввәл ҝөзләримизи һәјата јумсаг, бизи дирилдәҹәк (Ибр. 6:10). Беләликлә, «әлверишли» вә ја «чәтин вахтда» јашамағымыздан асылы олмајараг, ҝәл мәтанәтлә Мәсиһ һаггында әсаслы сурәтдә шаһидлик едәк (2 Тим. 4:2).