Һәвари Булус Коринф јығынҹағына јаздығы биринҹи мәктубунда мәсиһиләр арасындакы чәкишмәләрә тохунмушду (1 Коринфлиләрә 6:1—8). О, тәәссүфлә гејд едирди ки, Коринфдә јашајан бәзи мәсиһиләр «ҹүрәт едиб мәһкәмәјә, имансызларын јанына» ҝедирдиләр (1-ҹи ајә). Булус тутарлы дәлилләр ҝәтирәрәк ҝөстәрди ки, мәсиһиләр мүбаһисәләрини мәһкәмәдә јох, јығынҹаг дахилиндә һәлл етмәлидирләр. Ҝәл әввәлҹә бу мәсләһәтин верилмә сәбәбләриндән бир нечәсини арашдыраҹаг, сонра исә бу мәсләһәтин әһатә етмәдији бир нечә вәзијјәти нәзәрдән кечирәҹәјик.

Әҝәр иш зәмининдә ики мәсиһи арасында анлашылмазлыг јараныбса, онлар мүбаһисәни билдикләри кими јох, Јеһованын ҝөстәрдији јолларла һәлл етмәлидирләр (Мәсәлләр 14:12). Иса Мәсиһ ҝөстәрмишди ки, анлашылмазлығын бөјүјүб мүбаһисәјә чеврилмәмәси үчүн ону исти-исти һәлл етмәк лазымдыр (Мәтта 5:23—26). Тәәссүф ки, бәзи мәсиһиләр мәсәләни шиширдиб мүбаһисәјә чевирир, һәтта мәһкәмәјә мүраҹиәт едирләр. Булус јазыр: «Әслиндә, бир-биринизлә чәкишмәјиниз артыг сизин мәғлубијјәтиниз демәкдир». Нә үчүн? Илк нөвбәдә бу, јығынҹағын вә Аллаһын адына ләкә ҝәтирә биләр. Буна ҝөрә дә биз һәвари Булусун «чәкишмәкдәнсә, нијә дә һагсызлыға гатлашмајасыныз?» сөзләринә ҹидди јанашырыг (7-ҹи ајә).

Булус һәмчинин бир чох мүбаһисәләри һәлл етмәк үчүн Аллаһын јығынҹаға вердији мүкәммәл әнамы хатырладыр. Мәсиһи ағсаггаллар Мүгәддәс Јазылардан алдыглары билик сајәсиндә һикмәт газанырлар. Булус дејир ки, онлар һәјата аид мәсәләләр барәсиндә гардашлар арасында һакимлик етмәјә гадирдирләр (3—5 ајәләр). Иса бөһтан вә фырылдагчылыг кими ҹидди ҝүнаһлар зәмининдә јаранан мүбаһисәләри һәлл етмәк үчүн ашағыдакы үч аддымы төвсијә етмишди: 1) тәрәфләр чалышыб мәсәләни өз араларында һәлл етмәлидирләр; 2) биринҹи аддым боша чыхарса, бир вә ја ики шаһидин иштиракы илә бу мәсәләни јолуна гојмаға чалышмалыдырлар; 3) икинҹи ҹәһд дә алынмаса, јығынҹаға,  јәни јығынҹағы тәмсил едән ағсаггаллара мүраҹиәт етмәлидирләр (Мәтта 18:15—17).

Әлбәттә, ағсаггалларын һамысы һүгуг вә ја бизнес саһәси үзрә мүтәхәссис дејил, ағсаггал вәзифәсини иҹра етмәк үчүн бу, һеч тәләб дә олунмур. Ишҝүзар мүбаһисәни һәлл едәркән онлар гардашларын гаршысына шәрт гојмурлар. Әксинә, онлар чалышырлар ки, һәр ики тәрәф Мүгәддәс Јазылардакы принсипләрә әмәл едиб, сүлһ јолу илә разылыға ҝәлсин. Даһа мүрәккәб мәсәләләрин һәлли үчүн онлар рајон нәзарәтчиләринә вә ја Јеһованын Шаһидләринин филиалына мүраҹиәт едә биләрләр. Инди исә ҝәл һәвари Булусун мәсләһәтинин әһатә етмәдији һаллара диггәт јетирәк.

Бәзи һалларда мәһкәмә иши формал характер дашыја биләр, јахуд иши тәмәннасыз вә сүлһ јолу илә һәлл етмәк үчүн һүгуги тәләб ола биләр. Мисал үчүн, бошанмаг вә ја ушаг үзәриндә гәјјумлуг һүгугу алмаг, алимент өдәнишини тәјин етмәк, сығорта компенсасијасы алмаг, мүфлисләшмиш һәр һансы бир мүәссисәнин кредиторлары сырасында олмаг вә вәсијјәтнамәни тәсдигләмәк кими мәсәләләри һәлл етмәк үчүн мәһкәмә јеҝанә систем ола биләр. Бәзи һалларда мәсиһи өз һүгугларыны мүдафиә етмәк үчүн гаршылыглы мәһкәмә иши галдырмаға мәҹбур олур *.

Әҝәр мәсиһи мәһкәмә ишини гәсди-гәрәзликдән ирәли ҝәләрәк галдырмырса, онда о, Булусун мәсләһәтинин руһуна зидд һәрәкәт етмир *. Бунунла белә, мәсиһинин башлыҹа мәгсәди Јеһованын адыны мүгәддәс тутмаг, јығынҹагда сүлһү вә бирлији горумагдыр. Мәсиһин давамчыларынын сәҹијјәви әламәти мәһәббәтдир, мәһәббәт исә «өз хејрини ҝүдмүр» (1 Коринфлиләрә 13:4, 5; Јәһја 13:34, 35).