Иса пејғәмбәр инсанлара тәк бир дини, һагг динини өјрәдирди. О, бу дини әбәди һәјата апаран јола бәнзәтмишди вә демишди ки, «бу јолу аз адам тапыр» (Мәтта 7:14). Јалныз һагг кәламы олан Мүгәддәс Китаба әсасланан ибадәт Аллаһа мәгбулдур. Бүтүн дүнјада Аллаһа сидги-үрәкдән ибадәт едәнләр тәк бир диндә, һәгиги диндә бирләширләр. Јәһја 4:23, 24; 14:6 ајәләрини охујун.

Иса пејғәмбәр габагҹадан демишди ки, заһирән мөмин ҝөрүнән јаланчылар пејда олаҹаг вә онун гојдуғу јолу корлајаҹаг. Онлары неҹә танымаг олар? Әмәлләриндән. Дилдә Исанын гојдуғу јолла ҝетдијини дејән, амма әмәлләри бу иддианын там әкси олан динләри таныјырсыныз? Һагг јолу илә ҝедәнләрин хүсусијјәтләри вә әмәлләри бу јола ујғун олмалыдыр. Мәтта 7:13—23 ајәләрини охујун.

Бу адамлары нөвбәти әламәтләрдән танымаг олар:

• Мүгәддәс Китабы рәһбәр тутурлар. Аллаһын јолу илә ҝедәнләр Онун Кәламына ујғун јашајырлар. Демәли, һәгиги диндә инсанын иҹад етдији тәлимләр олмамалыдыр (Мәтта 15:7—9). Һәгиги ибадәтчиләрин сөзү илә әмәли бирдир. Јәһја 17:17; 2 Тимутијә 3:16, 17 ајәләрини охујун.

•   Јеһова Аллаһын адыны уҹа тутурлар. Аллаһын јолу илә ҝедәнләр Аллаһын адына бөјүк еһтирам бәсләјирләр. Муса, Давуд кими пејғәмбәрләр Аллаһын адыны билир, Ону бу адла чағырырдылар. Иса Мәсиһ дә Аллаһын адыны уҹа тутур, ону инсанлара билдирирди. Үстәлик, Аллаһын адынын мүгәддәс тутулмасы үчүн дуа етмәји өјрәдирди (Мәтта 6:9). Бәс бу ҝүн кимләр Јеһова Аллаһын адыны инсанлара ачыглајыр? Јәһја 17:26; Ромалылара 10:13, 14 ајәләрини охујун.

• Аллаһын Падшаһлығыны мүждәләјирләр. Аллаһ-Таала Иса Мәсиһи јер үзүнә хош мүждә илә ҝөндәрмишди. Һәмин мүждә сәмави Падшаһлыг һаггында иди. Бу Падшаһлыг бәшәријјәтин јеҝанә үмид јеридир. Иса пејғәмбәр мүждәни сон нәфәсинәдәк бәјан етди (Лука 4:43; 8:1; 23:42, 43). О, давамчыларына да тапшырды ки, бу мүждәни дүнјаја јајсынлар. Аллаһын јолу илә ҝедәнләр бу тапшырығы иҹра едирләр. Мәтта 24:14 ајәсини охујун.

• Дүнја ишләринә гарышмырлар. Аллаһын јолу илә ҝедәнләр сијасәтә вә иҹтимаи мүнагишәләрә баш гошмурлар (Јәһја 17:16; 18:36). Һәмчинин онлар зәманәмизин чиркин әмәлләриндән кәнарда дурур вә сахта дәјәрләрин далынҹа дүшмүрләр. Јагуб 4:4 ајәсини охујун.

• Араларында гардашлыг мәһәббәти вар. Аллаһын јолу илә ҝедәнләр миллијәтиндән асылы олмајараг, һәр бир инсана һөрмәт едирләр. Бу, Мүгәддәс Китабын тәләбидир. Әксәр динләр мүһарибәләри дәстәкләдији һалда, Аллаһын тәрәфиндә оланлар һеч бир мүнагишәјә гарышмырлар (Микә 4:1—3). Әксинә, вар ҝүҹләрини үлви мәгсәдләрә сәрф едирләр. Јәһја 13:34, 35; 1 Јәһја 4:20 ајәләрини охујун.

Тәлимләрини Мүгәддәс Китабдан ҝөтүрүр? Аллаһын адыны уҹа тутур? Аллаһын Падшаһлығыны бәшәријјәтин јеҝанә үмид јери кими мүждәләјир? Әсил гардашлыг мәһәббәти илә сәҹијјәләнир вә мүнагишәләрдән кәнарда дурур? Сиз нә дејәрдиниз? 1 Јәһја 3:10—12 ајәләрини охујун.